Spirit Blong God i Lidim Ol Fas Kristin Mo i Lidim Yumi Tede

“Sem Spirit ya nomo i stap mekem ol wok ya.”—1 KOR. 12:11.

1. ?Bambae yumi ansa long wanem kwestin long stadi ya?

LONG dei blong Pentekos long yia 33, i gat sam nambawan samting i hapen. !Hemia taem we spirit blong God i kam fulap long ol man blong hem! (Wok 2:1-4) God i stat yusum spirit blong hem long wan defren rod, blong i lidim ol man blong hem. Long las stadi, yumi luk olsem wanem spirit blong God i givhan long ol man bifo blong oli mekem wok blong God, nating se samtaem ol wok ya oli no isi. ?Rod we God i yusum spirit blong hem blong lidim ol man bifo, i defren olsem wanem long rod we hem i yusum afta we Kristin kongregesen i stat? ?Tabu spirit blong God i givhan olsem wanem long ol Kristin tede? Long stadi ya, bambae yumi ansa long ol kwestin ya.

 “Mi Mi Gel Blong Wok Nomo Blong Hae God”

2. ?Wanem save we Meri i gat long spirit blong God?

² Meri i wan long olgeta ya we tabu spirit i kam fulap long olgeta long rum ya long Jerusalem. (Wok 1:13, 14) Be Meri i save longtaem finis se Jehova i save yusum spirit blong hem blong mekem ol naranarafala samting. Bitim 30 yia finis, Jehova i yusum tabu spirit blong hem blong sanem Pikinini blong hem i kam long wol. Jehova i tekem laef blong Pikinini blong hem long heven, i putum i go long bel blong Meri. Nao Meri i gat bel nating we hem i no stap wetem man yet.—Mat. 1:20.

3, 4. ?Wanem tingting we Meri i gat long samting we God i wantem hem blong mekem? ?Yumi save folem fasin blong Meri olsem wanem?

³ ?From wanem Jehova i jusum Meri? Afta we enjel i talem long Meri se bambae hem i bonem Pikinini blong God, Meri i talem se: “Mi mi gel blong wok nomo blong Hae God. Mi wantem blong i kamtru long mi olsem we yu yu talem.” (Luk 1:38) Toktok blong Meri i soemaot fasin blong hem. Hem i rere blong mekem samting we Jehova i wantem hem blong mekem. Hem i no askem long enjel se bambae ol man oli gat wanem tingting long hem, taem bambae oli luk se hem i gat bel be i no mared. Hem i no fraet se Josef bambae i no moa wantem mared long hem. Toktok blong Meri i soemaot se hem i trastem Jehova fulwan.

⁴ ?Olsem wanem? ?Samtaem yu yu harem se ol wok we God i givim long yu, oli bigwan tumas blong yu mekem? I gud yumi tingbaot ol kwestin ya: ?Mi mi trastem Jehova fulwan, se bambae hem i mekem samting we hem i wantem i kamtru? ?Mi mi glad blong mekem wok we Jehova i wantem mi blong mekem? Yu yu save gat strong tingting se God i givim spirit blong hem long olgeta we oli trastem hem fulwan, mo long olgeta we oli obei long hem olsem man we i rulum olgeta.—Wok 5:32.

Tabu Spirit i Givhan Long Pita

5. ?Bifo long dei blong Pentekos long yia 33, tabu spirit i givhan long Pita blong mekem wanem?

⁵ Olsem Meri, aposol Pita tu i luk paoa blong tabu spirit longtaem finis, bifo long dei blong Pentekos long yia 33. Jisas i givim paoa long hem mo long ol narafala aposol blong oli ronemaot ol devel long ol man. (Mak 3:14-16) Nating se Baebol i no tokbaot samting ya plante, i luk olsem se Pita i ronemaot devel long man. Long Lugun blong Galili, Jisas i talem long Pita blong i wokbaot antap long wota i kam long hem. Tabu spirit i givhan long Pita blong i mekem samting ya. (Ridim Matiu 14:25-29.) I klia se Pita i save mekem sam bigbigfala wok from we hem i trastem tabu spirit blong i givhan long hem. Smoltaem biaen, tabu spirit i givhan long Pita mo ol narafala disaepol blong mekem plante narafala samting bakegen.

6. ?Long dei blong Pentekos long yia 33, mo afta long taem ya, spirit blong God i givhan long Pita blong i mekem wanem?

⁶ Long dei blong Pentekos long yia 33, tabu spirit i mekem se Pita mo plante narafala disaepol oli save toktok long lanwis blong ol man we oli kam long Jerusalem. Ale, Pita i stanap mo i toktok long fored blong plante man. (Wok 2:14-36) Samtaem Pita i fraet. Mo samtaem hem i mekem samting we i no tingting gud fastaem. Be afta we hem i kasem tabu spirit, hem i no fraet blong prij long ol man, nating se oli kilim hem mo oli talem long hem blong i no moa prij. (Wok 4:18-20, 31) God i yusum spirit blong hem blong mekem Pita i save sam samting we i haed. (Wok 5:8, 9) Mo spirit blong God i givim paoa long Pita blong i mekem man we i ded i laef bakegen.—Wok 9:40.

7. ?Wanem ol tijing blong Jisas we Pita i jes kasem save long olgeta afta we tabu spirit i makemaot hem?

⁷ Bifo long dei blong Pentekos, Pita i kasem save plante samting we Jisas i tijim. (Mat. 16:16, 17; Jon 6:68) Be i gat sam samting we hem i kasem save afta nomo. Fastaem, hem i no kasem save se tri dei afta we Kraes i ded, bambae Kraes i laef bakegen wetem bodi blong spirit man. Mo hem i no kasem save se Kingdom blong Kraes bambae i stap long heven. (Jon 20:6-10; Wok 1:6) Pita i no kasem save se taem sam man oli ded bambae oli save laef bakegen wetem bodi blong spirit man, mo oli rul long Kingdom long heven. Be taem tabu spirit i makemaot Pita long dei blong Pentekos mo God i jusumaot hem blong i  kasem laef long heven, long taem ya nao hem i jes kasem save ol tijing ya blong Jisas.

8. ?Ol Kristin we tabu spirit i makemaot olgeta mo ol narafala sipsip, oli kasem save wanem?

⁸ Afta we ol disaepol blong Jisas oli kasem tabu spirit, oli kasem save klia sam tijing we fastaem oli no kasem save long olgeta. Tabu spirit i pulum ol man we oli raetem Grik haf blong Baebol, blong oli eksplenem ol nambawan trutok. Ol trutok ya oli soemaot fasin we God i folem blong mekem stamba tingting blong hem i kamtru. (Efes. 3:8-11, 18) Tede, ol Kristin we tabu spirit i makemaot olgeta mo ol narafala sipsip, oli save stadi long ol trutok ya mo kasem save long olgeta. (Jon 10:16) ?Yu yu tinghae long save blong Baebol we spirit blong God i givhan long yu blong kasem save long hem?

“Tabu Spirit i Kam Fulap” Long Pol

9. ?Tabu spirit i givhan long Pol blong mekem wanem?

⁹ Samwe 1 yia afta long dei blong Pentekos long yia 33, tabu spirit i makemaot Sol, we biaen ol man oli save hem se Pol. Spirit blong God i mekem se Pol i save mekem sam samting we oli stap givhan yet long yumi tede. Tabu spirit i pulum hem blong raetem 14 buk blong Baebol. Tabu spirit i givhan long Pol long sem fasin we i givhan long Pita. Pol i kasem save long promes ya se samfala bambae oli kasem laef long heven, we bambae oli no save ded bakegen samtaem. Mo Pol i tokbaot promes ya long ol tok we hem i raetem long Baebol. Tabu spirit i givhan long Pol blong i ronemaot devel long man, i mekem ol sikman oli gud bakegen, mo i mekem samfala we oli ded oli laef bakegen. Be Pol i kasem paoa long tabu spirit blong mekem wan narafala wok we i moa impoten. Ol man blong God tede, oli kasem paoa blong mekem sem wok ya, nating se God i no mekem wan merikel blong givim paoa long olgeta.

10. ?Tabu spirit i givhan olsem wanem long Pol blong i toktok?

¹⁰ From we “Tabu Spirit i kam fulap” long Pol, hem i no fraet blong tok agens long wan kleva. Hed gavman blong Saepras i lesin long ful storian blong Banabas mo Pol. Hem i laekem ol tok we Pol i talem mo hem i bilif long God. Baebol i talem se “hem i sapraes tumas” long tijing blong Jehova. (Wok 13:8-12) Pol i save se spirit blong God nomo i save mekem hem i naf blong talemaot trutok we i no fraet nating. (Mat. 10:20) Biaen, Pol i askem long ol brata sista long kongregesen blong Efesas blong oli prea from hem, ‘blong God i givim tok long hem.’—Efes. 6:18-20.

11. ?Spirit blong God i lidim Pol olsem wanem?

¹¹ Tabu spirit i givhan long Pol blong i toktok, be samtaem tabu spirit i blokem hem blong i no go prij long sam ples. Tabu spirit i lidim Pol taem hem i mekem wok blong misinari. (Wok 13:2; ridim Ol Wok 16:6-10.) Tede, Jehova i stap yusum spirit blong hem blong lidim yumi long wok blong prij. Olsem Pol, ol man we oli obei long Jehova oli traehad blong talemaot trutok we oli no fraet mo oli wok strong. Tede, God i no yusum spirit blong hem sem mak olsem we hem i mekem blong lidim Pol. Be yumi save se Jehova i yusum spirit blong hem blong “pulum” ol man we hat blong olgeta i stret, oli kam long trutok.—Jon 6:44.

“Ol Defdefren Kaen Fasin Blong Mekem Ol Wok”

12-14. ?Spirit blong God, i wok long olgeta man blong God long sem fasin? ?Wanem sam defdefren fasin we spirit blong God i wok long ol man blong God?

¹² Taem yumi luk olsem wanem Jehova i blesem kongregesen blong ol tabu Kristin long ol yia 1 kasem 99 K.T., * hemia i leftemap tingting  blong yumi bigwan. Tabu spirit i givim “paoa” long ol Kristin long taem ya blong oli mekem sam spesel wok. Long leta we Pol i raetem long kongregesen blong Korin, hem i tokbaot paoa ya we God i givim long olgeta. Hem i talem se: “Yumi gat ol defdefren kaen paoa, be i gat wan Spirit ya nomo blong God we i stap givimaot olgeta. I gat ol defdefren kaen wok we yumi stap mekem, be i gat wan Masta ya nomo blong yumi, we yumi stap wok blong hem. I gat ol defdefren kaen fasin blong mekem ol wok ya, be i gat wan God ya nomo we i stap wok insaed long olgeta man, blong oli gohed long ol wok ya.” (1 Kor. 12:4-6, 11) Pol i talem se tabu spirit i save wok long ol defdefren man blong God, blong oli naf blong mekem wok we God i wantem. Tabu spirit i lidim “smol kampani” mo “ol narafala sipsip.” (Luk 12:32; Jon 10:16) Be i no min se oltaem tabu spirit i wok long fasin we i sem mak long olgeta brata sista wanwan.

¹³ Yu traem tingbaot. Tabu spirit i putumap ol elda. (Wok 20:28) Be long olgeta Kristin we tabu spirit i makemaot olgeta, samfala nomo oli wok olsem elda long kongregesen. Hemia i min se spirit blong God i wok long ol memba blong kongregesen long ol defdefren kaen fasin.

¹⁴ Spirit ya we i mekem ol tabu Kristin oli save se God i adoptem olgeta, oli kam pikinini blong hem, i sem spirit ya we Jehova i yusum blong mekem Jisas i laef bakegen long heven. (Ridim Roman 8:11, 15.) Jehova i yusum sem spirit ya blong mekem heven mo wol. (Jen. 1:1-3) Mo Jehova i givim sem spirit ya long Bejalehel, blong mekem hem i gat gudhan blong mekem spesel wok long haos tapolen. Sem spirit ya i mekem Samson i strong we i strong, blong hem i save mekem ol samting we narafala man i no save mekem. Mo sem spirit ya i givhan long Pita blong i wokbaot antap long wota. Taswe yumi mas tingbaot se taem spirit blong God i lidim wan Kristin, i no sem mak olsem we tabu spirit i makemaot hem. Tabu spirit i gat plante spesel fasin blong wok. Wan long ol spesel fasin ya, hemia se tabu spirit i makemaot sam Kristin. God nao i jusumaot olgeta ya.

15. ?Bambae God i gohed olwe blong makemaot ol tabu Kristin? ?From wanem yu ansa olsem?

¹⁵ Longtaem finis i kam, tabu spirit blong God i stap wok long ol man blong God long ol defdefren kaen fasin. Taem God i no makemaot yet ol Kristin wetem tabu spirit, be hem i stap givim spirit long ol man blong hem blong plante taosen yia finis. Long dei blong Pentekos long yia 33, God i stat blong makemaot ol Kristin wetem tabu spirit blong hem, be bambae hem i no gohed olwe blong mekem olsem. Nating se i olsem, bambae God i gohed blong givim tabu spirit blong hem long ol man, blong oli save mekem samting we hem i wantem gogo i no save finis.

16. ?Tabu spirit blong Jehova i stap givhan long ol man blong God tede blong oli mekem wanem?

¹⁶ ?Tabu spirit i stap givhan long ol man blong Jehova tede blong oli mekem wanem? Revelesen 22:17 i talem se: “Tabu Spirit wetem Woman blong Smol Sipsip, tufala i talem se, ‘Yu kam.’ Mo olgeta evriwan we oli harem tok ya, oli mas talem olsem tu se, ‘Yu kam.’ Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.” Tabu spirit i stap givhan long ol Kristin tede blong oli singaot ‘olgeta we i wantem dring,’ blong oli kam tekem wota blong laef. Ol tabu Kristin oli stap lidim wok ya, mo ol narafala sipsip tu oli joen wetem olgeta long wok ya. Tabu spirit i stap lidim olgeta ya evriwan. Olgeta evriwan oli givim laef blong olgeta i go long Jehova mo oli baptaes ‘long nem blong Papa, Pikinini mo Tabu Spirit.’ (Mat. 28:19) Mo oli soemaot ol fasin we i frut blong spirit, long laef blong olgeta. (Gal. 5:22, 23) Spirit blong God i givhan long olgeta blong oli traehad blong gat wan laef we i klin mo i mekem God i glad.—2 Kor. 7:1; Rev. 7:9, 14.

Yu Mas Gohed Blong Askem Tabu Spirit Long God

17. ?Yu mas mekem wanem blong soemaot we spirit blong God i stap long yu?

¹⁷ Nating se bambae yu laef olwe long heven no long wol, Jehova i save givim “paoa ya we i bigwan tumas” long yu, blong yu stanap strong go kasem en. (2 Kor. 4:7) Maet ol man oli no kaen long yu mo oli jikim yu, from we yu mekem wok blong prij. Be sipos yu gohed nomo blong prij, yu soemaot we yu yu gat spirit blong God. Yu mas tingbaot  se ‘sipos ol man oli tok nogud long yu from we yu yu man blong Kraes, yu save harem gud. Hemia i min se Spirit ya blong heven, we i Spirit blong God, hem i kamdaon finis, i stap long yu.’—1 Pita 4:14.

18, 19. ?Bambae Jehova i yusum tabu spirit blong hem blong givhan long yu olsem wanem? ?Yu mas gohed blong mekem wanem?

¹⁸ God i glad nomo blong givim tabu spirit long olgeta we oli askem long hem. Spirit blong God i save givhan long yu blong gat gudhan blong mekem wok blong God, mo blong wantem traehad moa long wok ya. ‘God i stap wok long laef blong yu blong mekem yu yu glad blong obei long hem, mo blong givim paoa long yu blong yu save mekem ol samting we hem i wantem.’ Tabu spirit mo fasin blong yu blong traehad blong “holemtaet tok blong laef” (NW) bambae i givhan long yu blong ‘gohed blong wok had, we yu ona long God, mo yu fraet tu long hem. Yu mas mekem olsem, blong yu save finisim wok ya we hem i stap mekem blong sevem yu.’—Fil. 2:12, 13, 16.

¹⁹ Yu save trastem God fulwan se bambae hem i givhan long yu wetem spirit blong hem. Ale, yu mas wok strong blong mekem evri wok we Jehova i givim long yu, yu mas gat gudhan long hem, mo yu mas askem Jehova blong givhan long yu. (Jem. 1:5) Bambae hem i givhan long yu blong kasem save Tok blong hem, blong stanap strong taem trabol i kasem yu, mo blong talemaot gud nius. Jisas i promes se: “Yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.” (Luk 11:9, 13) Hemia i min se yu mas askem tabu spirit tu long God. Yu mas gohed blong askem long Jehova blong i givhan long yu, blong yu gat fasin olsem ol man blong hem bifo, we oli letem tabu spirit i lidim olgeta.

[Futnot]

?Yu Yu Save Eksplenem?

• ?Yumi save folem fasin blong Meri olsem wanem, nao bambae yumi kasem blesing?

• ?Spirit blong God i lidim Pol olsem wanem?

• ?Tede, spirit blong God i lidim ol man blong God olsem wanem?

[Kwestin]

[Tok blong pija long pej 26]

Spirit blong God i mekem se Pol i winim paoa blong ol rabis enjel

[Tok blong pija long pej 28]

Nating se wan Kristin bambae i laef long heven no long wol, tabu spirit i save givhan long hem