?God Nao i Stap Panisim Yumi?

Long manis Maj, 2011, graon i seksek bigwan long Japan. Paoa blong hem i kasem 9.0. Biaen, bigfala wef i kilim Japan. Wan bigman blong gavman long Japan i talem se: “Nating se mi sore long ol man we disasta i kasem olgeta, be mi ting se hemia tembatsu (panis we i kam long God).”

Long manis Jenuware, 2010, bitim 220,000 man oli ded taem graon i seksek long Haiti. Wan prija long televisin i talem se disasta ya i kasem olgeta from we oli “mekem wan kontrak wetem Setan” mo oli mas “tanem tingting blong olgeta blong oli kambak long God.”

Long taon ya Manila long Filipin, 79 man i ded taem wan bigfala hip blong ol man oli puspusum olgeta oli foldaon mo oli wokbaot antap long olgeta. Wan pris blong Katolik jos i talem se: “God i wantem wekemap tingting blong yumi from we tingting blong yumi i no jajem yumi mo i no stikim yumi.” Wan niuspepa i talem se “long evri 100 man, 21 oli bilif se God i stap soemaot we hem i kros, nao i mekem hil i foldaon, hariken, mo ol narafala disasta” oli kasem kantri ya.

LONGTAEM finis i kam ol man oli bilif se God i stap mekem ol disasta blong panisim ol man nogud. Long yia 1755, graon i seksek bigwan long Lisbon, long Potugal. I gat bigfala faea. Mo wan bigfala wef i kilim taon ya. Samwe long 60,000 man oli ded. Wan waes man blong wol we plante man oli save hem, nem blong hem Voltaire, i askem se: “?Olsem wanem? ?Ol man Lisbon oli moa nogud i bitim ol man Paris we oli harem gud long plante nogud fasin?” Plante milian man oli wantem save sipos i tru we God i stap mekem ol disasta blong panisim ol man. Long plante kantri, ol man oli talem se ol disasta oli ol wok blong God.

Taswe yumi mas tingbaot ol kwestin ya se: ?I tru se long taem bifo God i mekem ol disasta blong panisim ol man? ?Ol disasta we oli kam plante tede, oli panis we i kam long God?

Plante man oli kwik blong talem se ol disasta oli fol blong God. Oli tokbaot ol stori long Baebol we God i yusum ol samting we hem i mekem blong jajem ol man. (Jenesis 7:17-22; 18:20; 19:24, 25; Namba 16:31-35) Be taem yumi lukluk gud long ol stori ya long Baebol, i gat tri samting we i defren long ol disasta we yumi stap luk tede. Fas samting se, oltaem God i givim woning, bifo we hem i jajem ol man. Namba tu samting se, taem God i jajem ol man hem i no spolem olgeta man. Hem i spolem nomo olgeta we oli rabis mo olgeta we oli no wantem lesin long woning blong hem. Be ol disasta oli spolem ol gudfala man wetem ol nogud man evriwan. Namba tri samting se, God i mekem rod blong ol gudfala man oli sef.—Jenesis 7:1, 23; 19:15-17; Namba 16:23-27.

I no gat wan samting i soemaot se ol disasta we oli spolem laef blong plante milian man tede, oli kam long God. ?Bambae ol disasta oli finis samtaem? ?Yu save mekem wanem blong yu stap sef? Bambae yu faenemaot ansa blong ol kwestin ya long ol haf we oli kam biaen.