Wan Kampani Blong Pris Mo King i Mekem i Gud Long Olgeta Man

“God i jusumaot yufala blong yufala i laen blong hem. Yufala i pris blong King [“wan kampani blong pris mo king,” NW]. Yufala i man blong wan kantri nomo, we yufala i tabu man blong God, mo yufala i man blong hem nomo.”—1 PITA 2:9.

1. ?From wanem plante man oli singaot “Kakae blong Masta” se Memoriol? ?Mo from wanem yumi mekem Memoriol?

LONG naet blong Nisan 14, long yia 33, Jisas Kraes mo ol 12 aposol blong hem oli mekem lafet blong Pasova blong ol man Jiu. Hemia las taem we oli mekem lafet ya. Biaen Jisas i talem long Judas Iskariot, man ya we bambae i salem hem, blong i aot long olgeta. Ale, Jisas i stanemap wan defren lafet blong ol man blong hem oli mekem. Biaen, Baebol i singaot lafet ya se “Kakae blong Masta.” (1 Kor. 11:20) Tu taem Jisas i talem se: “Oltaem yufala i mas mekem samting ya blong tingbaot mi bakegen.” Taswe, plante man oli singaot lafet ya se Memoriol. Hemia wan taem blong tingbaot ol samting we Kraes i mekem, speseli ded blong hem. (1 Kor. 11:24, 25) Ol Witnes blong Jehova long olgeta ples long wol oli obei long tok blong Jisas, nao oli mekem Memoriol evri yia. Long yia 2012, Nisan 14 long kalenda blong Baebol, i stat taem san i godaon long Tasde, Eprel 5.

2. ?Jisas i talem wanem long saed blong bred mo waen?

² Wan disaepol blong Jisas we nem blong hem Luk, i talemaot klia wanem we Jisas i mekem long naet ya. Hem i se: “[Jisas] i tekem bred, i talem tangkiu long God from. Nao hem i brekem, i givim long ol man blong hem, mo i talem se, ‘Hemia bodi blong mi, we bambae mi givim from yufala. Oltaem yufala i mas mekem samting ya blong tingbaot mi bakegen.’ Mo long sem fasin, taem olgeta oli kakae finis, hem i tekem kap, nao i talem se, ‘Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.’” (Luk 22:19, 20) ?Ol aposol oli kasem save wanem taem oli harem ol tok ya?

3. ?Ol aposol oli kasem save wanem taem Jisas i tokbaot bred mo waen?

³ Ol aposol oli gat save long ol sakrefaes we ol pris oli mekem long God, long haos prea long Jerusalem. Oli givim ol anamol i go long Jehova blong mekem sakrefaes long hem from we oli wantem se Jehova i glad long olgeta. Mo plante long ol sakrefaes ya i blong askem God blong i fogivim ol man from sin blong olgeta. (Lev. 1:4; 22:17-29) Taswe taem Jisas i talem long ol aposol  se bambae hem i givim bodi blong hem from olgeta, oli kasem save se bambae hem i givim laef blong hem we i stret gud olgeta olsem wan sakrefaes. Sakrefaes blong hem i gud moa i winim ol anamol we ol man Isrel oli givim blong mekem sakrefaes long God.

4. Taem Jisas i talem se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap,” ?Jisas i minim wanem?

⁴ Taem Jisas i talem se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap,” ?Jisas i minim wanem? Ol aposol oli save profet tok we Jeremaea i talemaot se bambae i gat wan niufala promes no kontrak. (Ridim Jeremaea 31:31-33.) Ol tok blong Jisas oli soemaot se hem i stanemap niufala kontrak ya. Niufala kontrak ya bambae i tekem ples blong kontrak we Jehova i mekem wetem ol man Isrel, taem hem i yusum Moses blong givim Loa long olgeta. ?Olsem wanem? ?Tufala kontrak ya oli joen?

5. ?Kontrak blong loa i givim wanem janis long ol man Isrel?

⁵ Yes, bigfala tingting we i stap long tufala kontrak ya oli joen. Taem Jehova i mekem kontrak blong Loa wetem ol man Isrel, hem i talem se: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol. Nating we olgeta man long wol ya oli blong mi, be yufala bambae i tabu, yufala i man blong mi nomo, mo bambae yufala i pris blong mi [“bambae yufala i kam wan kingdom blong pris,” NW], yufala i stap mekem wok blong mi.” (Eks. 19:5, 6) ?Ol man Isrel oli kasem save wanem taem Jehova i talem ol tok ya long olgeta?

PROMES YA SE BAMBAE I GAT WAN KAMPANI BLONG PRIS MO KING

6. ?God i mekem kontrak blong Loa, blong i save mekem wanem promes i kamtru?

⁶ Ol man Isrel oli save wanem ya wan “promes” no wan kontrak. Hemia from we bifo, Jehova i mekem ol kontrak wetem Noa mo Ebraham. (Jen. 6:18; 9:8-17; 15:18; 17:1-9) Wan haf long kontrak we Jehova i mekem wetem Ebraham, hemia promes ya se: “Sid blong yu bambae i mekem se olgeta neson long wol oli save kasem blesing sipos oli traehad.” (Jen. 22:18, NW) Jehova i mekem kontrak blong Loa, blong i save mekem promes ya i kamtru. From kontrak ya, bambae ol man Isrel oli ‘nambawan man blong God, i winim ol narafala man long wol.’ ?From wanem God i jusumaot ol man Isrel blong oli nambawan man blong hem? Hemia blong oli kam “wan kingdom blong pris” blong Jehova.

7. ?Taem Baebol i tokbaot “wan kingdom blong pris” hem i minim wanem?

⁷ Ol man Isrel oli gat ol king mo ol pris. Be long olgeta ya, i gat wan nomo we hem i mekem tugeta wok ya, we Jehova i glad long hem. Hemia Melkisedek. (Jen. 14:18) Long kontrak blong Loa, Jehova i givim janis long ol man Isrel blong oli gat “wan kingdom blong pris.” Jehova bambae i jusumaot olgeta we oli stap long kingdom ya, long neson blong ol man Isrel. Biaen Baebol i tokbaot olgeta ya we Jehova i jusumaot, se oli “wan kampani blong pris mo king.” Yes, bambae oli mekem tugeta wok ya, oli king mo oli pris.—1 Pita 2:9, NW.

8. ?Wanem wok blong ol pris we God i jusumaot olgeta?

⁸ I klia se wok blong king i blong rulum ol man. ?Be wanem wok blong pris? Hibrus 5:1 i talem se: “Oltaem God i stap jusumaot wan long ol man, nao i putumap hem i kam hae pris, blong hem i mekem ol wok long fes blong hem long bihaf blong ol narafala man. Ol hae pris ya oli stap givim presen i go long God, mo oli stap kilim anamol blong mekem rod blong tekemaot ol sin blong ol man.” Ol pris we Jehova i jusumaot, oli kam long fes blong God long bihaf blong ol narafala man. Oli mekem ol sakrefaes long Jehova blong askem Jehova blong i fogivim ol man from ol sin blong olgeta. Mo ol pris oli wok long nem blong Jehova blong tijim ol man long ol loa blong hem. (Lev. 10:8-11; Mal. 2:7) Olsem nao, ol pris oli givhan long ol man we oli mekem sin blong oli fren gud wetem God bakegen.

9. (a) ?Ol man Isrel oli mas mekem wanem blong oli kam “wan kingdom blong pris”? (b) ?From wanem Jehova i jusumaot samfala long neson blong Isrel blong oli mekem wok blong pris? (c) ?From wanem ol man Isrel oli no save kam “wan kingdom blong pris” taem oli stap aninit long kontrak blong Loa?

⁹ Kontrak blong Loa i givim janis long ol man Isrel blong oli kam king mo pris, we i mekem i gud long “ol narafala man long wol.” Be ol man Isrel  oli mas mekem wan samting blong oli save kasem nambawan janis ya. God i talem se: ‘Oli mas obei long hem, mo oli mas holemgud promes ya we hem i mekem wetem ol bubu blong olgeta bifo.’ ?Olsem wanem? ?Oli save “obei” long God? Yes, be samtaem bambae oli mestem from we oli sinman. (Rom 3:19, 20) Hemia nao from wanem Jehova i jusumaot samfala long neson blong Isrel blong oli mekem wok blong pris. Ol pris ya oli no mekem wok blong king. Wok blong olgeta i blong kilim ol anamol blong mekem sakrefaes long Jehova from ol sin blong ol man. (Lev. 4:1–6:7) Ol pris oli mas mekem ol sakrefaes ya blong tekemaot sin blong olgeta tu. (Hib. 5:1-3; 8:3) Nating se Jehova i glad long ol sakrefaes ya, be ol sakrefaes ya oli no save tekemaot sin fulwan. Ol pris we oli wok aninit long kontrak blong Loa, oli no save mekem ol man Isrel oli fren gud wetem God fulwan, nating se ol man Isrel ya oli wantem tumas blong mekem God i glad. Aposol Pol i talem se: “Blad blong bul mo blad blong man nani i no save tekemaot sin blong man samtaem.” (Hib. 10:1-4) From we ol man Isrel oli no obei long olgeta tok blong Loa, God i givim panis long olgeta. (Gal. 3:10) Nao oli no save kam wan kampani blong pris mo king blong ol narafala man long wol.

10. ?Wanem bigfala tingting we i stap long kontrak blong Loa?

¹⁰ Hemia i no min se neva bambae ol man Isrel oli save kam haf blong “wan kingdom blong pris,” olsem we Jehova i promes long olgeta. Sipos oli traehad blong obei long Jehova long olgeta hat blong olgeta, bambae oli save kasem janis ya, be i no long taem we oli stap aninit long Loa. ?From wanem? (Ridim Galesia 3:19-25.) Blong kasem ansa blong kwestin ya, yumi mas save bigfala tingting we i stap long kontrak blong Loa. Loa i givhan long ol man Isrel we oli obei long God, blong oli no mekem giaman wosip. Mo Loa i givhan long olgeta blong kasem save se oli sinman, mo oli nidim wan sakrefaes we i gud moa i winim ol sakrefaes we hae pris blong olgeta i save mekem. Loa ya i lidim olgeta i go long Kraes no Mesaea. Tufala tok ya Kraes mo Mesaea i minim “Man we God i Jusumaot.” Be taem Mesaea i kamtru, bambae hem i stanemap wan niufala kontrak. Hemia kontrak ya we Jeremaea i tokbaot. Olgeta we oli bilif long Kraes bambae oli joen long niufala kontrak ya mo bambae oli kam “wan kingdom blong pris.” Bambae yumi luk olsem wanem samting ya i kamtru.

OL MEMBA BLONG NIUFALA KONTRAK OLI KAM WAN KAMPANI BLONG PRIS MO KING

11. ?Jisas i kam fandesen blong wan kampani blong pris mo king olsem wanem?

¹¹ Long yia 29, Jisas blong Nasaret i kam Mesaea. Hem i gat 30 yia taem hem i baptaes. Hem i baptaes blong soemaot se hem i rere blong mekem spesel wok we Jehova i wantem hem blong mekem. Long taem ya, Jehova i talem se: “Hemia pikinini blong mi, we mi lavem hem tumas.” Jehova i jusumaot hem mo i makemaot hem wetem tabu spirit, i no wetem oel. (Mat. 3:13-17; Wok 10:38) God i jusumaot Jisas blong hem i kam Hae Pris, mo biaen hem i kam King, nao i mekem i gud long olgeta man we oli bilif long hem. (Hib. 1:8, 9; 5:5, 6) Ale bambae Jisas i openem rod blong ol narafala oli joen long wan kampani blong pris mo king.

12. ?Sakrefaes blong Jisas i mekem wanem?

¹² ?Olsem Hae Pris, Jisas i save mekem wanem sakrefaes blong pemaot ol man we oli bilif long hem, blong oli fri long sin we Adam i pasem long olgeta? Samting we Jisas i talem taem hem i stanemap Memoriol blong ded blong hem, i givhan long yumi blong kasem save se sakrefaes ya hemia prapa laef blong hem we i stret gud olgeta. (Ridim Hibrus 9:11, 12.) Afta we God i makemaot Jisas blong i kam Hae Pris, plante samting oli traem Jisas. Hem i mekem tingting blong hem i stap daon, mo hem i lanem fasin ya blong obei long God, gogo hem i ded. (Hib. 4:15; 5:7-10) Taem God i mekem Jisas i laef bakegen, hem i go long heven mo i givim praes blong sakrefaes blong hem i go long Jehova. (Hib. 9:24) Stat long taem ya i kam kasem tede, Jisas i save toktok long Jehova from olgeta we oli bilif long sakrefaes blong hem. Hem i save halpem olgeta blong mekem wok blong God, we oli putum tingting blong olgeta i stap long nambawan promes ya blong laef we i no save finis. (Hib. 7:25) Mo tu, sakrefaes blong Jisas i mekem niufala kontrak ya i kamtru.—Hib. 8:6; 9:15.

13. ?Wanem bambae i hapen long olgeta we oli stap long niufala kontrak?

¹³ Tabu spirit i makemaot olgeta tu we oli stap  long niufala kontrak. (2 Kor. 1:21) Ol man Jiu we oli stap tru long God oli stap long niufala kontrak, mo biaen ol man blong ol narafala laen tu oli stap long niufala kontrak. (Efes. 3:5, 6) ?Wanem bambae i hapen long olgeta we oli stap long niufala kontrak? Bambae God i fogivim olgeta from ol sin blong olgeta. Jehova i promes se: “Mi bambae mi fogivim yufala, mi tekemaot ol sin blong yufala, mo bambae mi no moa save tingbaot olgeta bakegen.” (Jer. 31:34) Taem Jehova i fogivim olgeta finis, seken samting we bambae i hapen long olgeta, hemia se bambae oli kam “wan kingdom blong pris.” Pita i talem long ol Kristin we tabu spirit i makemaot olgeta se: “God i jusumaot yufala blong yufala i laen blong hem. Yufala i pris blong King [“wan kampani blong pris mo king,” NW]. Yufala i man blong wan kantri nomo, we yufala i tabu man blong God, mo yufala i man blong hem nomo. Hem i mekem olsem long yufala, blong yufala i save talemaot ol gudgudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.” (1 Pita 2:9) Ol tok ya we aposol Pita i talem, hemia ol tok we Jehova i talem taem hem i givim Loa long ol man Isrel. Long vas ya, Pita i talem bakegen ol tok ya mo hem i soemaot se ol tok ya oli stret long ol Kristin we oli stap long niufala kontrak.—Eks. 19:5, 6.

WAN KAMPANI BLONG PRIS MO KING I MEKEM I GUD LONG OLGETA MAN

14. ?Kampani blong pris mo king i mekem wok blong olgeta long weples?

¹⁴ ?Olgeta we oli stap long niufala kontrak oli mekem wok blong olgeta long weples? Oli mekem wok blong olgeta long wol. Oli mekemap wan grup blong ol pris. Oli wok long nem blong Jehova. Oli talemaot “ol gudgudfala wok” blong Jehova long ol man mo oli givim save blong Baebol we i olsem gudfala kakae. (Mat. 24:45; 1 Pita 2:4, 5) Taem olgeta ya oli ded mo oli laef bakegen, bambae oli save mekem wok blong pris mo king wetem Kraes long heven. (Luk 22:29; 1 Pita 1:3-5; Rev. 1:6) Aposol Jon i luk long wan vison we plante spirit man oli stap klosap long bigfala jea blong Jehova long heven. Oli stap sing long “wan niufala singsing” i go long Smol Sipsip. Oli se: “Blad blong yu i ron, yu yu pemaot ol man, oli blong God. Olgeta ya oli kamaot long olgeta kala, mo long olgeta kantri, mo long olgeta laen, mo long olgeta lanwis. Yu yu King, nao yu mekem olgeta oli kam man blong yu, we oli pris blong mekem wok blong God blong mifala, mo bambae oli king, oli rul long olgeta man long wol.” (Rev. 5:8-10) Long wan narafala vison, Jon i tokbaot ol king ya. Hem i se: “Olgeta ya bambae oli pris blong God mo blong Kraes, mo bambae oli joen wetem Kraes we hem i  King, nao oli rul wetem hem, gogo wan taosen yia i pas.” (Rev. 20:6) Ol king ya we oli joen wetem Kraes, oli mekemap wan kampani blong pris mo king we i mekem i gud long olgeta man long wol.

15, 16. ?Kampani blong pris mo king bambae i mekem i gud long olgeta man olsem wanem?

¹⁵ ?Bambae ol 144,000 man oli mekem i gud long ol man long wol olsem wanem? Revelesen japta 21 i tokbaot ol pris ya olsem wan taon long heven, hemia niufala Jerusalem. Mo hem i “woman ya blong Smol Sipsip blong God.” (Rev. 21:9) Vas 2 kasem vas 4 i talem se: “Nao mi luk bigfala taon ya we i tabu, we hemia niufala Jerusalem ya. Hem i kamaot long God, i aot long heven i kam, mo hem i flas gud, i olsem woman we bambae i mared, we oli flasemgud hem blong i go mitim man blong hem. Nao mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’” !Hemia ol nambawan blesing! Bambae i no moa gat man i krae, i harem nogud, i harem i soa long bodi blong hem, mo i krae from man we i ded. Olgeta man bambae oli stret gud olgeta mo bambae oli fren gud wetem God fulwan.

¹⁶ Revelesen 22:1, 2 i tokbaot sam moa blesing we ol man bambae oli kasem from kampani blong pris mo king. Vas ya i talem se: “Enjel ya i soemaot wan bigfala reva long mi. Reva ya i stap ron, mo hem i wota blong laef. Hem i stap saen olsem glas, mo i stap kamaot long bigfala jea ya we God wetem Smol Sipsip blong hem, tufala i stap sidaon long hem. Wota ya i ron, i pas long medel blong rod blong bigfala taon ya. Mo long tufala saed blong hem, i gat ol tri blong laef, we oli stap karem frut blong olgeta, twelef taem long wan yia, wan taem long wan manis. Mo lif blong ol tri ya oli blong tekemaot sik blong ol man blong ol kantri long wol.” Vison ya i soemaot se “ol man blong ol kantri long wol,” no ol famle blong ol defren ples long wol, bambae oli fri olgeta long sin we Adam i pasem long olgeta. Tru, ‘ol samting ya blong bifo, bambae oli lus olgeta.’

KAMPANI BLONG PRIS MO KING I FINISIM GUD WOK BLONG HEM

17. ?Long en blong 1000 yia, kampani blong pris mo king bambae i finisim wanem wok?

¹⁷ Long en blong 1000 yia, bambae olgeta man oli stret gud olgeta from wok we kampani blong pris mo king i mekem. Biaen, Jisas Kraes we i Hae Pris mo King, bambae i givimbak olgeta ya we oli stret gud i go long Jehova. (Ridim 1 Korin 15:22-26.) Yes, kampani blong pris mo king bambae i finisim gud wok blong hem.

18. ?Afta we kampani blong pris mo king i finisim wok blong olgeta, bambae Jehova i yusum olgeta olsem wanem?

¹⁸ ?Afta long taem ya, bambae Jehova i yusum olgeta we i stap long kampani blong pris mo king olsem wanem? Revelesen 22:5 i talem se: “Bambae olgeta oli rul gogo i no save finis.” ?Bambae oli rulum hu? Baebol i no talem ansa blong kwestin ya. Be Jehova bambae i gohed blong tinghae long olgeta. Bambae oli laef long heven gogo i no save finis. Mo bambae oli kasem bigfala save taem oli givhan long olgeta man blong oli kam stret gud olgeta. Taswe, bambae oli gohed blong mekem wok blong king, mo bambae Jehova i gohed blong yusum olgeta blong mekem ol plan blong hem oli kamtru gogo i no save finis.

19. ?Olgeta we oli joen long Memoriol bambae oli tingbaot wanem?

¹⁹ Bambae yumi tingbaot ol tijing ya blong Baebol taem yumi joen long Memoriol blong ded blong Jisas long Tasde, Eprel 5, 2012. Ol tabu Kristin we oli stap yet long wol bambae oli soemaot we oli stap long niufala kontrak. Bambae olgeta oli kakae bred we i no gat is long hem mo oli dring red waen. Samting ya bambae i mekem olgeta oli tingbaot ol nambawan blesing mo ol nambawan wok we oli kasem, blong mekem promes blong God blong laef olwe i kamtru. Yumi evriwan we yumi joen long Memoriol, yumi soemaot we yumi tinghae long kampani blong pris mo king, we Jehova God i jusumaot blong mekem i gud long olgeta man.

?YU YU SAVE EKSPLENEM?

․․․․․

?Fas taem we Jehova i mekem promes blong wan kampani blong pris mo king, hemia wetaem?

․․․․․

?Olgeta we oli stap long niufala kontrak, oli kam wan kampani blong pris mo king olsem wanem?

․․․․․

?Kampani blong pris mo king bambae i mekem i gud long olgeta man olsem wanem?

[Kwestin]

[Tok blong pija long pej 31]

Kampani blong pris mo king bambae i karem ol blesing we i no save finis long olgeta man