Yumi Mekem Ol Sakrefaes Long Jehova Long Olgeta Hat Blong Yumi

“Long wanem wok we yufala i mekem, be yufala i mas mekem long gladhat blong yufala [“long olgeta hat blong yufala,” NW], olsem we yufala i stap wok blong Masta blong yumi.”—KOL. 3:23.

1-3. (a) ?From we Jisas i givim laef blong hem olsem wan sakrefaes, i min se Jehova i no moa askem long ol Kristin blong oli mekem sakrefaes? Yu eksplenem. (b) ?Yumi wantem save ansa blong wanem kwestin?

LONG taem blong ol fas Kristin, Jehova i givhan long ol man blong hem blong oli kasem save se sakrefaes blong Jisas i finisim Loa blong Moses. (Kol. 2:13, 14) Jehova i no moa askem long ol Kristin blong oli kilim anamol blong mekem ol sakrefaes, mo blong givim ol narafala presen we ol man Jiu oli stap givim i go long God, blong plante handred yia. Loa i finisim wok blong hem olsem ‘man we i lukaot long pikinini blong mekem hem i folemgud ol rul blong masta blong hem.’ Loa ya i lidim ol man oli go long Kraes.—Gal. 3:24.

² Hemia i no min se ol Kristin oli no moa mekem ol sakrefaes. Aposol Pita i talem se ol Kristin oli mas ‘mekem ol sakrefaes long God blong fren gud wetem hem. Mo hem i glad blong tekem sakrefaes olsem, from we oli joen long Jisas Kraes blong mekem.’ (1 Pita 2:5) Mo aposol Pol i tokbaot wan Kristin we i givim laef blong hem i go long God. Hem i talem klia se olgeta haf blong laef blong Kristin ya, i olsem “wan sakrefaes.”—Rom 12:1.

³ Yumi mekem ol sakrefaes long Jehova, taem yumi givim sam samting i go long hem mo taem yumi lego sam samting blong mekem moa long wok blong hem. ?Ol samting we yumi lanem long ol sakrefaes blong ol man Isrel, i givhan olsem wanem blong yumi mekem ol sakrefaes we Jehova i glad long olgeta?

OL SAKREFAES WE YUMI MEKEM EVRI DEI

4. ?Long ol samting we yumi mekem evri dei, yumi mas tingbaot wanem?

⁴ Maet i had blong kasem save olsem wanem yumi mekem ol sakrefaes long Jehova long ol samting we yumi mekem evri dei. Yumi mekem ol wok long haos, long skul, wok blong kasem mane, yumi go long stoa blong pem ol samting, mo plante narafala wok bakegen. Maet yumi ting se ol wok ya oli no mekem yumi kam klosap moa long  Jehova. Be sipos yu givim laef blong yu i go long Jehova no yu gat tingting blong mekem olsem, yu mas tingbaot se ol samting we yu mekem evri dei oli save mekem se yu fren gud wetem Jehova. Yumi mas gat fasin blong Kristin man 24 aoa evri dei. Mo yumi folem ol tok blong God long olgeta samting we yumi mekem long laef blong yumi. Hemia nao from wanem Pol i talem se: “Long wanem wok we yufala i mekem, be yufala i mas mekem long gladhat blong yufala [“long olgeta hat blong yufala,” NW], olsem we yufala i stap wok blong Masta blong yumi, yufala i no stap wok blong ol man nomo.”—Ridim Kolosi 3:18-24.

5, 6. ?Wanem i save givhan long yumi blong lukaot gud se ol fasin mo ol klos blong yumi oli stret?

⁵ Ol samting we yumi mekem evri dei, oli no ol wok we God i talem se yumi mas mekem blong wosipim hem. Be nating, Pol i talem se long olgeta wok we yumi mekem, yumi mas mekem ‘long olgeta hat blong yumi, olsem we yumi stap wok blong God.’ Hemia i mekem yumi tingbaot fasin we yumi mas mekem oltaem. ?Yumi lanem wanem? ?Oltaem yu yu gat fasin blong Kristin man? ?Oltaem yu putum ol klos we i stret blong ol Kristin? ?No samtaem yu yu sem blong talem se yu yu wan Witnes blong Jehova, from we fasin blong yu i no stret no from we yu putum klos we i no stret? !Yumi no mas mekem olsem! Yumi no wantem mekem wan samting we i spolem nem blong God.—Aes. 43:10; 2 Kor. 6:3, 4, 9.

⁶ Bambae yumi tokbaot tingting mo fasin blong yumi taem yumi mekem ol defren wok ‘long olgeta hat blong yumi, olsem we yumi stap wok blong God.’ Yumi mas tingbaot se taem ol man Isrel oli mekem sakrefaes long Jehova, oltaem oli mas givim ol nambawan anamol mo ol nambawan kakae blong olgeta long hem.—Eks. 23:19.

TINGTING MO FASIN BLONG YUMI

7. ?Taem yumi givim laef blong yumi i go long God, yumi promes blong mekem wanem?

⁷ Desisen we yu mekem blong givim laef blong yu i go long Jehova i wan gudfala desisen. Yu promes se bambae yu yusum olgeta laef blong yu blong mekem wok blong hem. Hemia i min se bambae yu putum God fasples long laef blong yu, long olgeta samting we yu mekem. (Ridim Hibrus 10:7.) Ating yu luk finis se taem yu traehad blong faenemaot tingting blong Jehova long wan samting, nao yu mekem wanem we hem i wantem, yu kasem gudfala frut. (Aes. 48:17, 18) Yumi tabu mo yumi glad from we yumi traehad blong folem fasin blong Jehova, we hem nao i stap tijim yumi.—Lev. 11:44; 1 Tim. 1:11.

8. ?From wanem yumi mas tingbaot se ol sakrefaes we ol man Isrel oli mekem long Jehova oli tabu?

⁸ Tingting blong Jehova se ol sakrefaes we ol man Isrel oli mekem oli tabu. (Lev. 6:25; 7:1) Hibru tok we oli tanem i kam “tabu” i minim wan samting we i defren, i blong God nomo. Sipos yumi wantem se Jehova i glad long ol sakrefaes blong yumi, yumi mas stap longwe long ol samting long wol ya we oli no klin. Yumi no mas laekem eni samting we Jehova i no laekem. (Ridim 1 Jon 2:15-17.) Hemia i min se yumi mas stap longwe long eni  man no long eni samting we i save mekem se yumi doti long fes blong God. (Aes. 2:4; Rev. 18:4) Mo tu, i min se yumi no save gohed blong lukluk mo tingting long ol rabis fasin mo ol samting we oli no klin.—Kol. 3:5, 6.

9. ?From wanem fasin we yumi mekem long narafala i impoten?

⁹ Pol i talem long ol Kristin long taem blong hem se: “Oltaem yufala i mas mekem ol gudfala fasin, mo yufala i mas givgivhan long yufala, from we ol fasin ya tu i olsem we yufala i stap kilim anamol blong mekem sakrefaes i go long God, we hem i glad tumas long olgeta.” (Hib. 13:16) Yes, sipos oltaem yumi mekem gudfala fasin mo yumi givhan long ol narafala, bambae Jehova i luk se fasin blong yumi i olsem wan sakrefaes we hem i glad tumas long hem. Lav we i pusum yumi blong tingbaot narafala, i soemaot se yumi ol tru Kristin.—Jon 13:34, 35; Kol. 1:10.

OL SAKREFAES WE YUMI MEKEM BLONG WOSIPIM GOD

10, 11. ?Jehova i gat wanem tingting long wok blong prij we yumi mekem mo long wosip we yumi mekem long hem? ?Mo samting ya i pulum yumi blong mekem wanem?

¹⁰ Wan rod blong mekem i gud long narafala hemia taem yumi ‘talemaot we yumi putum tingting blong yumi i stap strong long God.’ ?Yu yu tekem evri janis blong talemaot gud nius long narafala? Pol i talem se “yumi mas leftemap nem blong God. Fasin ya i olsem we oltaem yumi stap mekem sakrefaes blong givim long hem. Evritaem, taem yumi talemaot nem blong Jisas long fes blong ol man, i olsem we yumi givim presen i go long God.” (Hib. 10:23; 13:15; Hos. 14:2) I gud yumi tingbaot hamas taem yumi yusum blong talemaot gud nius, mo wanem we yumi save mekem blong kam gud moa long fasin blong yumi blong prij. Plante haf long Miting Blong Kingdom Wok i givhan long yumi blong tingbaot ol samting ya. Be bigfala samting we yumi mas tingbaot hemia se taem yumi joen long wok blong prij mo taem yumi tekem janis blong prij long narafala, yumi stap mekem ‘wan sakrefaes we i leftemap nem blong God.’ Wok ya i haf blong wosip we yumi mekem long God. From samting ya, yumi mas meksua se sakrefaes we yumi mekem, hem i nambawan. Laef blong yumi i defdefren, be sipos yumi tinghae long wok blong Jehova bambae yumi joen plante long wok blong prij.

¹¹ Oltaem yumi yusum taem blong yumi blong wosipim Jehova, nating se yumi stap long haos no yumi stap long kongregesen. Hemia wan samting we Jehova i talem se yumi mas mekem. I tru se tede yumi no nid blong obei long loa blong Sabat mo yumi no nid blong go long Jerusalem blong mekem ol lafet. Be ol loa ya oli save tijim yumi. Evri dei yumi gat plante samting blong mekem, be God i wantem se yumi makemaot taem  blong stadi long Baebol, prea, mo go long ol miting. Mo man we i hed blong famle i mas tingbaot blong mekem famle wosip wetem famle blong hem. (1 Tes. 5:17; Hib. 10:24, 25) I gud yumi tingbaot kwestin ya se, ?Mi mi save kam gud moa long fasin blong mi blong wosipim God?

12. (a) ?Insens we ol man Isrel oli bonem i go long Jehova, i olsem wanem samting we yumi mekem tede? (b) ?Yumi save mekem wanem blong ol prea blong yumi oli olsem insens?

¹² King Deved i singsing long Jehova se: “Plis yu letem prea blong mi i kam long yu olsem smok blong insens we man i bonem i kam long yu.” (Sam 141:2) I gud blong tingbaot se yumi stap prea hamas taem, mo yumi stap tokbaot wanem long ol prea blong yumi. Buk blong Revelesen i talem se “ol prea blong ol man blong God” oli olsem insens. Hem i talem se ol prea we Jehova i glad blong harem, oli olsem insens we Jehova i harem smel blong hem se i gud tumas. (Rev. 5:8) Long Isrel bifo, ol pris oli bonem insens long olta blong Jehova, be oli mas lukaot gud blong wokem insens ya stret olsem we Jehova i talem. Ale, bambae Jehova i glad long insens ya. (Eks. 30:34-37; Lev. 10:1, 2) Long sem fasin, yumi mas prea olsem we Jehova i talem long yumi. Ale bambae yumi save se Jehova i glad long ol prea blong yumi.

YUMI GIVIM PRESEN I GO MO YUMI KASEM PRESEN

13, 14. (a) ?Epafrodaetas mo kongregesen blong Filipae, oli mekem wanem blong givhan long Pol? ?Mo wanem tingting blong Pol long samting we oli mekem? (b) ?Yumi save mekem wanem blong folem fasin blong Epafrodaetas mo ol Kristin long Filipae?

¹³ Presen mane we yumi givim blong givhan long wok blong Kingdom long fulwol, i olsem wan sakrefaes we yumi mekem long Jehova, nating se yumi givim plante no smol. (Mak 12:41-44) Long taem blong ol fas Kristin, kongregesen blong Filipae i sanem Epafrodaetas i go long Rom blong meksua se Pol i gat ol samting we hem i nidim. Kongregesen i sanem sam mane wetem Epafrodaetas blong givim long Pol. Hemia i no fas taem we ol Kristin long Filipae oli givhan long Pol long gladhat blong olgeta. Oli sanem presen ya i go long Pol from we oli no wantem se hem i wari long mane, be oli wantem se hem i save spenem moa taem long wok blong prij. ?Wanem tingting blong Pol long presen ya? Hem i talem se i olsem we oli givim wan presen i “go long God, we i gat gudfala smel blong hem, mo we God i glad blong kasem.” (Ridim Filipae 4:15-19.) Pol i glad tumas long kaen fasin blong ol Kristin long Filipae, mo Jehova tu i glad long olgeta.

¹⁴ Tede tu, Jehova i glad tumas taem yumi givim presen mane blong givhan long wok blong Kingdom long fulwol. Mo hem i promes se sipos yumi gohed blong lukaot Kingdom fastaem, bambae hem i givim ol samting we yumi nidim evri dei, blong yumi laef mo blong bilif blong yumi i stap strong.—Mat. 6:33; Luk 6:38.

YUMI SOEMAOT WE YUMI TINGHAE LONG OL SAMTING WE GOD I GIVIM

15. ?Wanem sam samting we yu yu wantem talem tangkiu long Jehova from?

¹⁵ Yumi save talem tangkiu long Jehova from plante samting we hem i givim long yumi. Evri dei yumi mas talem tangkiu long hem from presen ya laef. Hem i givim olgeta samting we yumi nidim. Hem i givim kakae, klos, haos, mo win we yumi pulum. Mo hem i givim stret save blong ol trutok blong Baebol long yumi. Nao yumi bilif long hem mo yumi putum tingting blong yumi i stap long ol nambawan promes blong hem. Hem i God ya we i mekem yumi, mo hem i mekem plante samting blong yumi. Taswe, yumi mas wosipim hem mo yumi mas mekem ol sakrefaes blong leftemap nem blong hem.—Ridim Revelesen 4:11.

16. ?Yumi mas mekem wanem blong soemaot se yumi tinghae long sakrefaes blong Kraes?

¹⁶ Las stadi i talem se sakrefaes blong Kraes i wan nambawan presen we God i givim long ol man. Presen ya i soemaot se God i lavem tumas ol man. (1 Jon 4:10) ?Yumi mekem wanem blong soemaot se yumi tinghae long presen ya? Pol i talem se: “Kraes i lavem mifala tumas, nao fasin ya blong hem i stap  holemtaet mifala. Mifala i luksave se hem wan nomo we hem i ded blong sevem olgeta man, . . . blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem, we hem i ded, mo i laef bakegen, blong i sevem olgeta.” (2 Kor. 5:14, 15) Pol i stap talem se sipos yumi tinghae long wanem we God i mekem, bambae yumi yusum laef blong yumi blong ona long God mo long Pikinini blong hem. Taem yumi obei, mo taem yumi prij mo yumi pulum ol man oli kam disaepol, hemia i soemaot se yumi lavem God mo Kraes. Mo i soemaot tu se yumi tinghae long samting we tufala i mekem.—1 Tim. 2:3, 4; 1 Jon 5:3.

17, 18. ?Samfala oli mekem wanem blong leftemap nem blong Jehova? Yu traem talem stori blong wan we i mekem olsem.

¹⁷ ?Olsem wanem? ?Yu ting se yu save mekem moa long wok blong God blong leftemap nem blong hem? Plante we oli tingbaot ol gudfala samting we Jehova i mekem blong olgeta, oli jenisim sam samting long laef blong olgeta. Nao oli spenem moa taem long wok blong prij mo long ol narafala wok long ogenaesesen blong Jehova. Samfala oli mekem haftaem paenia wan manis evri yia, no maet bitim wan manis. Mo sam narafala oli naf blong mekem wok blong fultaem paenia. Samfala oli givhan blong wokem ol haos wosip. Hemia ol nambawan wok we yumi save mekem blong soemaot se yumi tinghae long ol samting we God i mekem. God bambae i glad long yumi, sipos stret tingting i pusum yumi blong mekem wok blong hem. Yumi mekem wok blong hem from we yumi wantem soemaot long hem se yumi tinghae long ol samting we hem i mekem.

¹⁸ Plante Kristin oli wantem soemaot se oli tinghae long ol samting we Jehova i givim. Wan long olgeta, nem blong hem Morena. Morena i gruap long wan famle we i Katolik. Be hem i gat plante kwestin. Hem i wantem save God mo hem i wantem save se yumi laef blong wanem. Hem i lukaot ansa blong ol kwestin ya long Katolik jos mo long waes blong ol man Esia. Taem hem i stat blong stadi Baebol wetem ol Witnes blong Jehova, ol ansa blong ol kwestin blong hem oli jes kam klia. Morena i glad tumas long tijing we hem i kasem long Baebol. Ale, Morena i wantem soemaot long Jehova se hem i tinghae long ol samting we Jehova i givim long hem. Hem i yusum olgeta paoa blong hem long wok blong Jehova. Afta we hem i baptaes, hem i mekem wok blong haftaem paenia evri manis, mo taem hem i luk se i stret, hem i statem wok blong fultaem paenia. Naoia 30 yia i pas finis, mo Morena i gohed yet blong mekem wok blong Jehova fultaem.

19. ?Wanem sam moa samting we yu save mekem, blong mekem sakrefaes long Jehova?

¹⁹ Plante gudfala man blong Jehova oli no save mekem wok blong paenia from we sam samting long laef blong olgeta i blokem olgeta. Be yumi evriwan i save mekem ol sakrefaes we God i glad long olgeta, sipos yumi traehad blong mekem wanem we yumi save mekem long wok blong Jehova. Yumi mas lukaot gud se ol fasin blong yumi oli folem ol rul blong Baebol. Mo long olgeta samting we yumi mekem, yumi mas tingbaot oltaem se yumi stap wok long nem blong Jehova. Yumi mas bilif long Jehova. Yumi trastem hem se bambae hem i mekem ol promes blong hem oli kamtru. Yumi mas mekem ol gudfala wok. Yumi givhan blong mekem gud nius i go moa. Yumi soemaot se yumi tinghae long olgeta samting we Jehova i mekem blong yumi. Yes, yumi mas gohed blong mekem ol sakrefaes long Jehova long olgeta hat blong yumi.

YU TRAEM LUK SIPOS YU SAVE ANSA LONG OL KWESTIN YA:

․․․․․

?Yumi mekem wanem blong ona long Jehova, long ol samting we yumi mekem evri dei?

․․․․․

?Wanem ol sakrefaes we yumi mekem blong wosipim God?

․․․․․

?Wanem ol samting we yumi save givim long Jehova?

[Kwestin]

[Tok blong makem poen long pej 27]

?Gudfala fasin blong Jehova i mekem se yu yu wantem mekem wanem?

[Tok blong pija long pej 25]

?Yu yu tekem evri janis blong prij long narafala?