Yumi Lanem Samting Long Tok Blong God

?Baebol i Talemaot Fiuja?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?Ol profet tok long Baebol oli klia?

Hae God we i gat olgeta paoa, hem nomo i save gud ol samting we bambae oli kamtru long fiuja. (Amos 3:7) Longtaem finis God i talemaot se bambae wan man i kamtru we hem i Mesaea no Kraes. Bambae Mesaea i kamaot long laen blong gudfala man ya Ebraham. Taem Mesaea i rulum ol man, bambae ol man we oli obei long hem oli kasem blesing blong laef we i stret gud, we oli no moa sik. (Jenesis 22:18; Aesea 53:4, 5) Man ya we God i Promes blong sanem, bambae i bon long taon ya Betlehem.—Ridim Maeka 5:2.

Ol samting we i hapen long laef blong Jisas oli soemaot se hem nao i Mesaea. Baebol i talemaot se wan yang gel we i no stap wetem man yet bambae i bonem Mesaea, mo bambae ol man oli no laekem hem. Bambae Mesaea i givim laef blong hem blong tekemaot sin blong plante man, mo bambae oli berem hem wetem ol rijman. Ol profet tok ya oli kamtru bitim 700 yia afta we Baebol i talemaot olgeta. (Aesea 7:14; 53:3, 9, 12) Mo Baebol i talemaot se bambae Mesaea i go long taon ya Jerusalem long wan dongki. Mo bambae wan fren blong hem i salem hem long ol enemi blong hem blong 30 sekel silva. Olgeta samting we ol profet tok ya oli talem, oli kamtru bitim 500 yia biaen.—Ridim Sekaraea 9:9; 11:12.

2. ?God i talemaot stret taem we ol profet tok bambae oli kamtru?

Bitim 500 yia bifo, Baebol i talemaot stret yia we Mesaea bambae i kamtru. Baebol i tokbaot ol wik blong yia, we hemia i min se wan “wik” i longfala olsem seven yia. Bambae i gat 7 wik mo 62 wik, hemia 69 wik evriwan. Sikisti naen wik blong ol yia, hemia 483 yia. ?Yumi stat blong kaontem ol yia ya wetaem? Baebol i talem se yumi kaontem ol yia ya stat long taem we wan man blong God, nem blong hem Nehemaea, i kasem Jerusalem mo i stat blong wokem taon ya bakegen. Histri blong ol man Pesia i soemaot se nehemaea i stat blong mekem samting ya long yia 455 B.K.T. (Nehemaea 2:1-5) Fo handred eiti tri yia biaen, long yia 29 K.T., * Jisas i baptaes mo i kam Mesaea. Hemia stret taem we profet tok ya i talemaot.—Ridim Daniel 9:25.

 3. ?Sam profet tok blong Baebol oli stap kamtru naoia?

Jisas i talemaot se bambae i gat sam samting i hapen long taem blong yumi, we bambae i mekem bigfala jenis long wol. Long profet tok blong hem, hem i tokbaot gud nius blong Kingdom blong God. Bambae Kingdom ya i mekem se ol man we oli lavem God long olgeta ples long wol, oli harem gud. Bambae Kingdom ya i finisim olgeta rabis fasin blong ol man long wol ya.—Ridim Matiu 24:14, 21, 22.

Ol profet tok blong Baebol oli talemaot klia wanem bambae i hapen long en blong wol ya. Nating se ol man oli ting se save blong olgeta i stap kam antap, be Baebol i soemaot se bambae oli spolem wol. Ol trabol olsem ol bigfala faet, kakae i sot, graon i seksek, mo ol strong sik, bambae oli kam plante moa. (Luk 21:11; Revelesen 11:18) Bambae ol man oli no moa mekem ol gudfala fasin. Long taem ya we i gat plante trabol, bambae ol man blong Jisas oli stap talemaot gud nius blong Kingdom blong God long olgeta kantri.—Ridim Matiu 24:3, 7, 8; 2 Timoti 3:1-5.

4. ?Fiuja blong ol man bambae i olsem wanem?

Hae God we i gat olgeta paoa, i plan blong mekem plante gudfala samting i kamtru long laef blong ol man we oli stap tru long hem. Jisas Kraes we i Mesaea, wetem ol man we hem i jusumaot blong go long heven, bambae oli rulum wol. Olgeta ya oli joen long Kingdom no long gavman ya, we bambae i rul blong wan taosen yia. Bambae ol dedman oli laef bakegen mo bambae oli gat janis blong kasem laef we i no save finis. Mo Kingdom ya bambae i mekem olgeta sikman oli gud bakegen. Bambae i no moa gat man i sik mo bambae i no moa gat man i ded.—Ridim Revelesen 5:10; 20:6, 12; 21:4, 5.

[Futnot]

Sipos yu wantem save moa, plis lukluk pej 23-25 mo pej 197-201 long buk ya ?Wanem Samting We Baebol i Rili Tijim?