Yumi Traehad Blong Mekem Se Evriwan Long Kongregesen Oli Gat Gudfala Tingting

“Jisas Kraes, Masta blong yumi bambae i stap givhan long yufala long tingting blong yufala, long gladhat blong hem.”—FIL. 4:23, NTB.

?YUMI SAVE MEKEM WANEM BLONG EVRIWAN LONG KONGREGESEN OLI GAT GUDFALA TINGTING . . .

․․․․․

taem yumi joen wanples wetem ol brata sista?

․․․․․

taem yumi wok strong long wok blong prij?

․․․․․

taem yumi talemaot ol bigfala sin long ol elda?

1. ?From wanem Pol mo Jisas tufala i talem gudfala toktok long kongregesen blong Filipae mo Tuatira?

OL KRISTIN long Filipae bifo, oli pua. Be oli glad blong givim samting we oli gat long ol Kristin brata sista blong olgeta, mo oli soemaot we oli lavem olgeta tumas. (Fil. 1:3-5, 9; 4:15, 16) Hemia nao from wanem Pol i talem long olgeta se: “Jisas Kraes, Masta blong yumi bambae i stap givhan long yufala long tingting blong yufala, long gladhat blong hem.” (Fil. 4:23, NTB) Ol Kristin long Tuatira oli gat tingting mo fasin olsem ol Kristin long kongregesen blong Filipae. Jisas i talem long olgeta se: “Mi mi save finis fasin blong yufala long Tuatira. Mi save we yufala i lavlavem yufala, mo yufala i bilif long mi. Mi save we yufala i stap givhan gud long ol man, mo mi save we tingting blong yufala i longfala, i no save foldaon. Mo mi save tu we wok blong yufala naoia i moa gud long wok ya we yufala i mekem fastaem.”—Rev. 2:19.

2. ?Tingting blong yumi i mekem wanem long ol narafala long kongregesen?

² Ol kongregesen blong ol Witnes blong Jehova, oli soemaot ol defdefren fasin mo tingting. Long sam kongregesen, ol Kristin brata sista oli soemaot kaen fasin mo oli soemaot we oli lavem narafala. Long sam narafala kongregesen, ol Kristin brata sista oli wok strong long wok blong prij mo plante oli mekem wok blong paenia. Taem yumi wanwan i wok had blong gat gudfala tingting, yumi givhan blong mekem se evriwan long kongregesen i joen gud mo i gohed gud. (1 Kor. 1:10) Be taem samfala oli gat nogud tingting, hemia i save mekem ol narafala long kongregesen oli no moa traehad long wok blong God, oli no moa wok strong long wok blong prij, mo maet oli no stretem man we i mekem bigfala sin. (1 Kor. 5:1; Rev. 3:15, 16) ?Kongregesen blong yu i soemaot wanem tingting? ?Yu save mekem wanem blong evriwan long kongregesen oli gat wan gudfala tingting?

YUMI GIVGIVHAN LONG YUMI BLONG GAT GUDFALA TINGTING

3, 4. ?Yumi save mekem wanem blong ‘presem God long fes blong olgeta man blong hem’?

³ Deved i singsing long Jehova i se: “Bambae mi talem tangkiu  long yu long fes blong olgeta man blong yu, bambae mi presem yu long fes blong olgeta evriwan.” (Sam 35:18) Deved i presem Jehova taem hem i stap wetem ol narafala man blong Jehova. Long ol miting we kongregesen i mekem evri wik, yumi gat janis blong givim ol ansa we oli soemaot se tingting blong yumi i strong mo yumi bilif strong. Yumi save givim ol ansa olsem long Wajtaoa Stadi. Yumi evriwan i mas tingbaot ol kwestin ya: ?Mi mi stap traehad blong givim ansa oltaem long ol miting? ?No mi ansa sam samtaem nomo? ?Mi mi stap rere gud ol miting, blong mi save givim ol gudfala ansa? Sipos yu yu wan papa, ?yu yu stap givhan long ol pikinini blong yu blong oli rerem ol ansa? ?Mo yu tijim olgeta blong oli givim ol ansa long prapa toktok blong olgeta?

⁴ Yumi save soemaot se tingting blong yumi i stap strong long Jehova. Hemia i min se, long hat blong yumi, yumi wantem mekem fasin we i stret. Fasin blong yumi blong singsing long ol miting i save soemaot samting ya. Deved i talem se: “God. !Oltaem tingting blong mi i stap strong long yu! !Bambae mi sing, mi presem yu!” (Sam 57:7) Long ol miting, ol singsing oli givim nambawan janis long yumi blong ‘sing mo presem’ Jehova, we tingting blong yumi i stap strong long hem. Sipos yumi no save gud sam long ol singsing ya, yumi save lanem olgeta taem yumi mekem famle wosip. Yumi wantem mekem olsem Deved we i talem se: “Oltaem long laef blong mi, bambae mi stap singsing blong presem Hae God, gogo laef blong mi i finis.”—Sam 104:33.

5, 6. ?Yumi save mekem wanem blong tekem narafala i kam long haos blong yumi? ?Mo yumi givhan long narafala long gladhat blong yumi olsem wanem? ?Hemia i mekem wanem long ol narafala long kongregesen?

⁵ Wan narafala samting we yumi save mekem blong evriwan long kongregesen oli lavlavem olgeta, hemia se yumi tekem ol Kristin brata sista oli kam long haos blong yumi. Long las haf blong leta we Pol i sanem long ol Hibru Kristin, hem i talem se: “Oltaem, yufala i mas lavlavem yufala, olsem we yufala i wan brata nomo. Mo yufala i mas rere blong tekem ol strenja oli kam insaed long haos blong yufala.” (Hib. 13:1, 2) Wan nambawan rod blong soemaot fasin ya, hemia taem yumi singaot seket elda mo woman blong hem tufala i kam kakae long haos. Yumi save singaot olgeta tu we oli mekem wok blong Jehova fultaem. I gud se samtaem yumi singaot ol wido, ol famle we papa no mama nomo i lukaot long pikinini, mo sam narafala bakegen. Yumi save singaot olgeta blong kam kakae mo blong joen wetem yumi long famle wosip blong yumi.

⁶ Pol i talem long Timoti blong i givhan long ol narafala blong oli “mekem ol gudfala fasin, mo ol gudfala wok, mo oli mas kam rij long fasin ya. Oli mas gat gladhat blong givhan long ol man, mo blong seraot ol samting blong olgeta long ol narafala  man. Long fasin ya, i olsem we oli stap putumgud plante gudgudfala samting blong olgeta, we i olsem fandesen blong laef blong olgeta, we i save stap strong oltaem. Nao bambae oli save kasem laef ya we i prapa wan.” (1 Tim. 6:17-19) Pol i stap givhan long ol Kristin brata sista blong oli gat gladhat blong givhan long ol narafala. Nating se yumi trabol long mane, yumi save gat gladhat blong givhan long narafala. Yu traem tingbaot. Sipos yu yu gat wan trak, yu save tekem samfala i go long wok blong prij mo long ol miting. ?Sipos yu yu go long trak blong narafala, yu save mekem wanem blong soemaot se yu glad long kaen fasin blong hem? Yu save mekem se evriwan long kongregesen oli gat gudfala tingting, sipos yu givim smol mane blong givhan long narafala blong pem bensin mo blong lukaot long trak blong hem. Hemia bambae i givhan long hem bigwan from we praes blong bensin i stap go antap moa oltaem. Wan narafala rod blong soemaot long ol Kristin brata sista se yumi nidim olgeta mo yumi lavem olgeta, hemia blong spenem moa taem wetem olgeta. Yes, yumi mas mekem i gud long “olgeta ya we oli brata mo sista blong yumi from we olgeta tu oli bilif long Kraes.” Taem yumi rere blong yusum taem mo olting blong yumi blong givhan long olgeta, bambae yumi lavem olgeta moa, mo bambae yumi givhan long ol narafala long kongregesen blong oli gat gudfala tingting.—Gal. 6:10.

7. ?I givhan olsem wanem long kongregesen taem yumi no talemaot olbaot ol samting we ol Kristin brata sista oli talem long yumi?

⁷ Yu save givhan long evriwan long kongregesen blong oli lavlavem olgeta, taem yu fren gud wetem ol narafala Kristin brata sista, mo yu no talemaot olbaot ol samting we olgeta oli talem long yu. (Ridim Ol Proveb 18:24.) Sipos wan fren i talem wan samting long yu long saed blong laef blong hem, bambae yu soemaot se yu yu wan tru fren sipos yu no go talemaot samting ya long ol narafala. Taem wan brata i talemaot tingting blong hem long yu no se hem i harem olsem wanem, hem i trastem yu se bambae yu no go talemaot samting ya long narafala. Ale bambae yutufala i fren gud moa. Yes, yumi mas wan fren we i no talemaot olbaot ol samting we narafala i talem long yumi. Nao bambae yumi givhan blong mekem se kongregesen i olsem wan famle we i gat lav.—Prov. 20:19.

YUMI MAS WOK STRONG LONG WOK BLONG PRIJ

8. ?Jisas i givim wanem advaes long ol Kristin long Laodisia, mo from wanem?

⁸ Jisas i toktok long kongregesen long Laodisia, hem i talem se: “Mi mi save finis fasin blong yufala long Laodisia. Long ol wok blong yufala, i olsem we yufala i no hot, mo yufala i no kol tu. Sipos yufala i hot gud no yufala i kol gud, hemia i moa gud, bambae mi mi save glad long yufala. Be from we yufala i hafhaf nomo, olsem we yufala i no hot gud, yufala i no kol gud, bambae mi sakemaot yufala, olsem we man i traot long kakae we i no stret.” (Rev. 3:15, 16) Ol Kristin long Laodisia oli no wok strong long wok blong prij. From samting ya, oli no fren gud wetem ol narafala long kongregesen. Lav i pulum Jisas blong givim advaes ya se: “Long olgeta man we mi lavem olgeta, mi mi stap tok strong long olgeta, mo mi stap givim panis long olgeta. From samting ya, yufala i mas traehad blong tanem tingting blong yufala from ol sin blong yufala [“mo yufala i mas wok strong,” NW].”—Rev. 3:19.

9. ?Glad we yumi soemaot long wok blong prij i mekem wanem long kongregesen?

 ⁹ Sipos yumi wantem se evriwan long kongregesen oli gat gudfala tingting, yumi mas wok strong long wok blong prij we yumi soemaot se yumi glad. Wan stamba wok blong kongregesen, hemia blong faenem ol gudfala man long teritori mo tijim olgeta long trutok. Taswe i gud yumi folem fasin blong Jisas, mo yumi wok strong long wok blong pulum ol man oli kam disaepol. (Mat. 28:19, 20; Luk 4:43) Moa we yumi soemaot se yumi glad long wok ya, moa we bambae yumi joen gud wetem ol Kristin brata sista mo wetem “God blong mekem wok blong hem.” (1 Kor. 3:9) Taem yumi joen long wok blong prij wetem ol narafala, yumi luk we oli talemaot bilif blong olgeta mo oli soemaot we oli lavem Jehova mo trutok. Ale, yumi harem se yumi lavem olgeta moa mo yumi tinghae long olgeta. Mo yumi evriwan long kongregesen yumi joen gud, from we yumi mekem wok blong Jehova “we solda blong wan i joen long solda blong narawan.”—Ridim Sefanaea 3:9. *

10. ?Taem yumi traehad blong kam gud moa long wok blong prij, hemia i mekem wanem long ol narafala long kongregesen?

¹⁰ Taem yumi traehad blong kam gud moa long wok blong prij, hemia i givhan long ol narafala. Sipos yumi soemaot se yumi wantem save ol man we yumi prij long olgeta mo yumi traehad blong kasem hat blong olgeta, bambae yumi glad moa long wok blong prij. (Mat. 9:36, 37) Sipos yumi glad long wok ya, bambae olgeta we oli joen wetem yumi oli glad long wok ya tu. Jisas i no sanem ol disaepol blong hem oli go prij olgeta wan nomo, hem i sanem olgeta oli go tutu. (Luk 10:1) Hemia i leftemap tingting blong olgeta mo i trenem olgeta. Mo tu, hemia i givhan long olgeta blong oli glad moa long wok ya. !Tru ya, yumi harem gud taem yumi joen wetem ol pablisa we oli glad mo oli wok strong long wok blong prij! Glad blong olgeta i leftemap tingting blong yumi mo i givhan long yumi blong gohed long wok ya.—Rom 1:12.

YUMI NO MAS TOK AGENSEM NARAFALA MO YUMI NO HAEDEM OL BIGFALA SIN

11. ?Long taem blong Moses, sam man Isrel oli mekem wanem? ?Mo oli agensem hu?

¹¹ Sam wik afta we Jehova i mekem ol man Isrel oli kam wan neson, olgeta oli tok agensem narafala mo oli komplen. Ale, oli agensem Jehova mo tufala ya we Jehova i yusum blong lidim olgeta. Hemia Moses mo Eron. (Eks. 16:1, 2) Long olgeta man Isrel we oli aot long Ijip, smol man nomo oli go insaed long Promes Lan. Moses tu hem i no go insaed long Promes Lan, from we nogud tingting blong ol man Isrel i mekem se hem tu i mekem fasin we i no stret. (Dut. 32:48-52) ?Tede, yumi save mekem wanem blong tingting blong yumi i no kam nogud?

12. ?Wanem i save givhan long yumi blong blokem fasin ya blong komplen?

¹² Yumi mas lukaot gud blong no komplen. Wan samting we yumi save mekem blong blokem fasin ya, hemia sipos yumi mekem tingting blong yumi i stap daon mo yumi ona long olgeta we oli lukaot long yumi. Wan narafala samting we i save givhan long yumi, hemia se yumi mas jusum gud ol fren blong yumi. Bambae yumi harem nogud sipos yumi jusum ol pleplei we oli no stret. Mo sipos yumi joen tumas wetem ol man we oli no obei long Jehova long ples blong wok mo long skul, bambae hemia i spolem gudfala tingting blong yumi. Yumi waes blong no joen tumas wetem olgeta we oli stap komplen, mo oli wantem folem prapa tingting blong olgeta.—Prov. 13:20.

13. ?Fasin ya blong tok agensem narafala i save spolem kongregesen olsem wanem?

¹³ Taem ol Kristin long kongregesen oli komplen oltaem, sloslo bambae fasin ya i save spolem pis we i stap long kongregesen mo fasin blong kongregesen blong joen gud. Taem wan Kristin i tok agensem ol Kristin brata mo sista blong hem, bambae hem i mekem narafala i harem nogud. Mo maet bambae hem i toktok gogo, hem i mekem sin. Hem i giaman long baksaed blong narafala mo i spolem nem blong narafala. (Lev. 19:16; 1 Kor. 5:11) Long taem blong ol fas Kristin, samfala we oli stap komplen, “oli no gat respek long ol masta, mo oli tok nogud long olgeta we i gat haenem.” (Jud 8, 16) God  i no glad nating long olgeta ya we oli tok agensem ol Kristin brata we oli holem wok long kongregesen.

14, 15. (a) ?Sipos wan Kristin i gohed blong mekem bigfala sin, wanem i save hapen long kongregesen? (b) ?Yumi mas mekem wanem sipos yumi save se wan Kristin i stap haedem wan bigfala sin?

¹⁴ ?Olsem wanem sipos yu save se wan Kristin i stap haedem wan bigfala sin? Maet hem i stap dring bitim mak, no hem i lukluk ol rabis pija, no hem i stap mekem rabis fasin blong man wetem woman. ?Bambae yu mekem wanem? (Efes. 5:11, 12) Sipos yu no mekem wan samting, Jehova i save karemaot tabu spirit blong hem long kongregesen. Hemia i save spolem pis we i stap long ful kongregesen. (Gal. 5:19-23) Pol i talem long ol Kristin long Korin se oli mas “sakemaot ol olfala is.” Long sem fasin, tede yumi mas lukaot gud se i no gat man long kongregesen we i stap mekem bigfala sin. Olsem nao, yumi protektem gudfala tingting blong evriwan long kongregesen. ?Yu save mekem wanem blong i gat pis long kongregesen?

¹⁵ Olsem yumi tokbaot finis, yumi no mas talemaot olbaot ol samting we narafala i talem long yumi, speseli taem narafala i talemaot se hem i harem olsem wanem, mo wanem tingting blong hem. !I no stret nating mo i no kaen blong talemaot samting we narafala i no wantem ol man blong save! Be sipos wan Kristin i mekem wan bigfala sin, ol elda long kongregesen oli mas save. Jehova i givim wok long ol elda blong stretem man we i mekem sin. (Ridim Levitikas 5:1.) Taswe, sipos yumi save se wan Kristin brata no sista i mekem wan bigfala sin, yumi mas talem long hem se hem i mas go toktok wetem ol elda, mo i askem olgeta blong givhan long hem. (Jem. 5:13-15) Be sipos hem i no go toktok wetem ol elda, nao i tekem longtaem tumas, yu mas go talemaot sin blong hem long ol elda.

16. ?Taem yumi talemaot long ol elda, bigfala sin we narafala i mekem, hemia i protektem kongregesen olsem wanem?

¹⁶ Ol man oli mas harem se Kristin kongregesen i wan ples we i sef. Mo yumi mas traehad blong protektem kongregesen. Taswe, taem wan Kristin i mekem bigfala sin, yumi mas talemaot long ol elda. Bambae ol elda oli givhan long Kristin we i mekem sin blong i kasem save se samting we hem i mekem i nogud. Sipos Kristin ya i tanem tingting blong hem, mo i lesin long ol advaes we ol elda oli givim blong stretem hem, bambae hem i no spolem gudfala tingting blong kongregesen. ?Be olsem wanem sipos hem i no tanem tingting blong hem mo i no lesin long advaes blong ol elda? Kongregesen i mas putumaot hem. Olsem nao, hem i no save pulum ol narafala long kongregesen blong oli gat nogud tingting mo nogud fasin. Mo long rod ya, ol elda oli protektem gudfala tingting blong kongregesen. (Ridim 1 Korin 5:5. *) Yes, yumi evriwan i gat wok blong talemaot long ol elda, bigfala sin we narafala i mekem. Yumi mas folem advaes blong ol elda. Mo yumi mas protektem olgeta Kristin brata mo sista long kongregesen.

YU MAS TRAEHAD BLONG MEKEM SE “EVRIWAN I JOEN GUD”

17, 18. ?Wanem bambae i givhan long yumi blong mekem se evriwan long kongregesen oli joen gud?

¹⁷ Long taem bifo, ol disaepol blong Jisas “oli stap lesin long ol tok ya we ol aposol oli stap tijim olgeta long hem.” Olsem nao, oli mekem se evriwan long kongregesen oli joen gud. (Wok 2:42) Oli tinghae long ol advaes we ol elda long kongregesen oli givim. Hemia advaes we i kamaot long Baebol. Tede tu, ol elda oli save givhan long evriwan long kongregesen blong oli joen gud mo ol elda oli leftemap tingting blong evriwan. Hemia from we oli folem advaes blong slef we i stret mo waes. (1 Kor. 1:10) Taem yumi obei long ol tok blong Baebol we ogenaesesen blong Jehova i talemaot, mo yumi folem advaes blong ol elda, yumi soemaot se ‘yumi evriwan i stap traehad blong holem pis, blong yumi save joen gud oltaem.’—Efes. 4:3.

¹⁸ Ale, yumi mas wok had blong mekem se evriwan long kongregesen oli gat gudfala tingting mo oli holemtaet gudfala tingting ya. Sipos yumi mekem olsem, yumi save se ‘Jisas Kraes, Masta blong yumi bambae i stap givhan long yumi long tingting blong yumi, long gladhat blong hem.’—Fil. 4:23, NTB.

[Ol futnot]

[Kwestin]

[Tok blong pija long pej 24]

?Yu yu rerem ol gudfala ansa blong givhan long evriwan long kongregesen blong oli gat gudfala tingting?

[Tok blong pija long pej 25]

Yu save givhan long evriwan long kongregesen blong oli gat gudfala tingting, taem yu lanem gud ol singsing