Yu Mas Wok Blong Jehova Long Olgeta Hat Blong Yu
Yu Mas Wok Blong Jehova Long Olgeta Hat Blong Yu
“Pikinini blong mi, Hae God i God blong yumi, . . . yu mas obei long hem, mo yu mas wok blong hem long olgeta tingting blong yu [“long olgeta hat blong yu,” NW].”—1 KRON. 28:9.
YU TRAEM FAENEM ANSA BLONG OL KWESTIN YA:
․․․․․
?Baebol i yusum tok ya hat blong tokbaot wanem?
․․․․․
?Yumi save mekem wanem blong jekem hat blong yumi?
․․․․․
?Yumi mekem wok blong Jehova long olgeta hat blong yumi olsem wanem?
1, 2. (a) ?Wanem haf blong bodi we Baebol i yusum plante taem blong tokbaot wan narafala samting? (b) ?From wanem yumi mas kasem save se hat i pija blong wanem?
SAMTAEM Baebol i tokbaot ol haf blong bodi olsem pija blong wan narafala samting. Job i talem se: “Ol blaen man, mi mi ae blong olgeta, mo ol man we oli no save wokbaot, mi mi leg blong olgeta.” Jisas i talem se: “Sipos raet han blong yu i mekem yu yu foldaon, i gud yu katemaot, yu sakem.”—Job 29:15; Mat. 5:30.
2 Wan haf blong bodi we Baebol i tokbaot moa i bitim ol narafala haf, hemia hat blong man. * Long prea blong gudfala woman ya Hana, hem i talem se: “!Hae God! !Yu yu mekem tingting blong mi [“hat blong mi,” NW] i glad we i glad!” (1 Saml. 2:1) Ol man we oli raetem Baebol, oli tokbaot hat klosap wan taosen taem. Yumi mas kasem save se hat i pija blong wanem, from we Baebol i talem se yumi mas lukaot gud long hat blong yumi.—Ridim Ol Proveb 4:23.
?HAT I PIJA BLONG WANEM?
3. ?Yumi save faenemaot mining blong “hat” long Baebol olsem wanem? Plis yu talem wan pijatok.
3 Nating se Baebol i no talem se hat i pija blong wanem samting stret, yumi save faenemaot wanem we hem i stap tokbaot. ?Yumi faenemaot olsem wanem? Yu traem tingbaot wan tri we i gat plante lif. Sipos yu stap klosap long tri ya bambae yu luk wanwan lif nomo. Be sipos yu stanap longwe lelebet, bambae yu luk ful tri se i olsem wanem. Long sem fasin, yumi mas lukluk long plante vas long Baebol we i yusum tok ya “hat,” nao bambae yumi save mining blong hem. ?Ale, tok ya “hat” i minim wanem?
4. (a) ?Long Baebol, tok ya “hat” i minim wanem? (b) ?Tok blong Jisas long Matiu 22:37 i minim wanem?
4 Ol man we oli raetem Baebol, oli yusum tok ya “hat” blong tokbaot olgeta samting long saed blong yumi we oli haed. Hemia ol samting we yumi wantem, ol tingting blong yumi, ol samting we yumi laekem mo no laekem, ol fasin blong yumi, ol samting we yumi gat gudhan blong mekem, risen from wanem yumi mekem ol samting, mo ol samting we yumi plan blong mekem. (Ridim Dutronome 15:7; Ol Proveb 16:9; Ol Wok 2:26.) Be samtaem tok ya “hat” i no minim olgeta samting ya. Yu traem tingbaot tok blong Jisas se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Mat. 22:37) Long vas ya, tok ya “hat” i blong tokbaot man se i harem olsem wanem, i wantem wanem, mo ol filing blong hem. Jisas i tokbaot hat, laef, mo tingting. Hem i talem ol samting ya wanwan from we hem i wantem se ol samting we yumi mekem long laef blong yumi, mo fasin we yumi yusum tingting blong yumi i mas soemaot se yumi lavem God. (Jon 17:3; Efes. 6:6) Be taem Baebol i talem “hat” nomo, hem i minim olgeta samting long saed blong yumi we oli haed.
?FROM WANEM YUMI MAS LUKAOT GUD LONG HAT BLONG YUMI?
5. ?From wanem yumi traehad blong mekem wok blong Jehova long olgeta hat blong yumi?
5 King Deved i talem long Solomon se: “Pikinini blong mi, Hae God i God blong yumi, mo oltaem mi mi stap obei long hem. Mi mi talem strong long yu, se yu tu yu mas obei long hem, mo yu mas wok blong hem long olgeta tingting [“hat,” NW] blong yu, we tingting blong yu i glad. Hem i save olgeta tingting [“hat,” NW] blong yumi, mo olgeta samting we yumi wantem.” (1 Kron. 28:9) Jehova i stap lukluk hat blong olgeta man. Yes, hem i lukluk hat blong yumi tu. (Prov. 17:3; 21:2) Sipos Jehova i laekem wanem we hem i luk long hat blong yumi, bambae yumi save fren wetem hem mo yumi kasem nambawan laef long fiuja. Taswe, yumi wantem folem advaes blong Deved blong mekem bes blong yumi long wok blong Jehova. Yumi mas wok blong Jehova “long olgeta hat blong yumi.”
6. ?Yumi mas luksave wanem taem yumi stap mekem wok blong Jehova?
6 Yumi ol man blong Jehova, yumi wok strong long wok blong Jehova. Hemia i soemaot se yumi wantem mekem wok blong Jehova long olgeta hat blong yumi. Be yumi mas luksave se sin we i stap long yumi mo rabis wol ya blong Setan, i save mekem tingting blong yumi i slak, nao yumi no moa mekem wok blong Jehova long olgeta hat blong yumi. (Jer. 17:9; Efes. 2:2) Taswe, oltaem yumi mas jekem hat blong yumi, blong lukaot gud se tingting blong yumi i no kam slak. ?Yumi jekem hat blong yumi olsem wanem?
7. ?Wanem i soemaot samting we i stap long hat blong yumi?
7 I no gat man i save luk insaed long wan tri blong save sipos tri ya i gud no i nogud. Long sem fasin, i no gat man i save luk ol tingting mo ol fasin blong yumi we i stap haed. Taem Jisas i toktok antap long bigfala hil, hem i talem se ol samting we yumi mekem oli soemaot wanem i stap long hat blong yumi. I sem mak olsem we frut blong wan tri i soemaot se tri ya i gud no i nogud. (Mat. 7:17-20) Bambae yumi tokbaot wan long ol samting we yumi mekem, we i soemaot wanem i stap long hat blong yumi.
YU JEKEM HAT BLONG YU
8. Folem Matiu 6:33, ?yumi soemaot samting we i stap long hat blong yumi olsem wanem?
8 Long bigfala toktok blong Jisas antap long Hil, hem i talem samting we ol man oli mas mekem blong soemaot se oli wantem mekem wok blong Jehova long olgeta hat blong olgeta. Jisas i talem se: “Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Mat. 6:33) Samting we yumi putum fasples long laef blong yumi i soemaot wanem we yumi wantem long hat blong yumi, wanem we yumi stap tingting long hem, mo wanem we yumi stap plan blong mekem. Taswe wan rod blong jekem se yumi stap wok blong God long olgeta hat blong yumi, hemia blong tingting gud long wanem we i stap fasples long laef blong yumi.
9. ?Jisas i singaot sam man blong oli mekem wanem? ?Samting we oli mekem i soemaot wanem?
9 Wan samting i hapen smoltaem afta we Jisas i talem long ol man blong hem blong oli ‘lukaot blong obei fastaem long God.’ Bambae yumi luk se samting we man i putum i stap fasples long laef blong hem, i soemaot wanem i stap long hat blong hem. Luk i talem se tingting blong Jisas i “strong blong go long Jerusalem,” nating se hem i save se ol man bambae oli mekem i nogud long hem. Taem Jisas wetem ol disaepol blong hem “oli stap wokbaot long rod,” hem i mitim sam man mo hem i singaot olgeta blong oli biaen long hem oli man blong hem. Ol man ya oli glad blong biaen long hem, be i gat sam samting we oli wantem mekem fastaem. Wan man i talem se: “Masta, plis yu letem mi mi go berem papa blong mi fastaem.” Wan narafala man i talem se: “Masta, bambae mi mi biaen long yu, mi man blong yu. Be plis yu letem mi mi gobak long ples blong mi fastaem, blong talem tata long ol famle blong mi.” (Luk 9:51, 57-61) Yes, tingting blong Jisas i strong blong mekem samting we God i wantem. Be tingting blong ol man ya we Jisas i singaot olgeta i no strong nating. Oli tingbaot fastaem ol samting we olgeta oli wantem. Hemia i soemaot se oli no mekem wok blong Jehova long olgeta hat blong olgeta.
10. (a) ?Yumi mekem wanem taem Jisas i singaot yumi blong biaen long hem? (b) ?Jisas i talem wanem pijatok?
10 Yumi no mekem olsem ol man ya. Yumi glad blong biaen long Jisas mo kam man blong hem. Evri dei yumi mekem wok blong Jehova. Hemia i soemaot se yumi tingbaot Jehova long hat blong yumi. Be nating se yumi strong long wok blong Jehova, yumi mas lukaot se wan samting i no spolem hat blong yumi. ?Wanem i save spolem hat blong yumi? Jisas i talem wan pijatok blong soemaot ansa. Hem i talem se: “Man we i stap holem stik blong brebrekem graon long garen mo i stap luklukbak long ol samting biaen long hem, hem i no stret long kingdom blong God.” (Luk 9:62, NW) ?Yumi lanem wanem long pijatok ya?
?YU YU “HOLEMSTRONG OL GUDFALA FASIN”?
11. Long pijatok blong Jisas, ?wanem i hapen long man we i stap brebrekem graon?
11 I gud yumi tingting moa long pijatok ya blong luk se hem i tijim yumi long wanem samting. Wan man blong wokem garen i stap wok strong blong brebrekem graon. Be taem hem i stap brebrekem graon, hem i stap tingting long haos blong hem. Hem i stap tingbaot se long haos i gat ol famle mo ol fren blong hem, i gat kakae, miusik, hem i save laf gud, mo hem i save sidaon long sado. Hem i stap tingting strong long ol samting ya. Afta we hem i stap brebrekem graon longtaem lelebet, hem i wantem tumas ol samting ya. Ale, hem i luklukbak long “ol samting biaen.” Nating se i gat plante wok yet blong mekem long garen, tingting blong man ya i no stap gud long wok blong hem, mo hem i no moa wok gud. Ale masta blong hem i no glad long hem from we hem i no wok strong longtaem.
12. ?Olsem man ya long pijatok blong Jisas, wanem samting i save hapen long wan Kristin?
12 Tede, wan samting olsem i save hapen long wan Kristin. Maet i luk olsem se hem stap wok strong, i gohed gud, be wan samting i stap spolem hat blong hem. Yu traem tingbaot wan brata we i strong blong go long ol miting mo blong joen long wok blong prij. Hem i stap mekem ol samting ya, be hem i stap tingting long sam samting blong wol we hem i laekem. Long hat blong hem, hem i wantem tumas ol samting ya. Afta sam yia i pas we hem i stap mekem wok blong God, tingting blong wantem ol samting long wol i kam strong tumas long hem. Nao hem i luklukbak long “ol samting biaen.” Nating se i gat plante wok yet blong mekem long wok blong prij, tingting blong hem i no moa stap long wok ya, mo hem i no moa mekem gud wok ya olsem fastaem. (Fil. 2:16) Jehova i “masta blong garen.” Hem i harem nogud tumas we wan man blong wok blong hem i no wok strong longtaem.—Luk 10:2.
13. ?Yumi mekem wok blong Jehova long olgeta hat blong yumi olsem wanem?
13 Tijing we yumi kasem i klia nomo. Yumi mas wok strong moa, blong soemaot se yumi mekem wok blong Jehova long olgeta hat blong yumi. I no naf we yumi joen oltaem long ol miting blong kongregesen mo long wok blong prij. (2 Kron. 25:1, 2, 27) Sipos long hat blong yumi, yumi stap laekem “ol samting biaen,” hemia ol samting blong wol ya, yumi stap spolem fasin fren blong yumi wetem Jehova. (Luk 17:32) Taswe, blong yumi save mekem wok blong Jehova long olgeta hat blong yumi, yumi mas “agens long ol rabis fasin,” mo yumi mas “holemstrong ol gudfala fasin.” (Rom 12:9; Luk 9:62, NW) Yes, nating we i luk olsem se sam samting long wol blong Setan oli save givhan long yumi mo oli save mekem yumi harem gud, yumi mas lukaot se oli no blokem yumi blong mekem wok blong Jehova long olgeta hat blong yumi.—2 Kor. 11:14; ridim Filipae 3:13, 14.
!YUMI MAS LUKAOT GUD OLTAEM!
14, 15. (a) ?Setan i traem pulum yumi blong kam slak long wok blong Jehova olsem wanem? (b) Yu talem wan pijatok we i soemaot se yumi mas lukaot gud long rod we Setan i yusum blong trikim yumi.
14 Yumi givim laef blong yumi long Jehova from we yumi lavem hem. Blong plante yia finis, plante long yumi oli pruvum se oli mekem wok blong Jehova long olgeta hat blong olgeta. Be Setan i gohed blong traem pulum yumi. Hem i wantem spolem hat blong yumi. (Efes. 6:12) Setan i save se bambae yumi no lego Jehova wantaem nomo, we yumi no moa wosipim hem. Taswe, Setan i yusum ol samting blong ‘laef long wol ya,’ blong traem mekem tingting blong yumi i kam slak, nao yumi no moa strong blong mekem wok blong God. (Ridim Mak 4:18, 19.) ?From wanem rod ya i wok gud?
15 I gud yumi tingbaot wan pijatok we i save givhan long yumi blong ansa long kwestin ya. Yu traem tingbaot se yu gat wan bag raes long haos. Taem yu go long garen, pikinini blong yu i pusum han blong hem long bag mo i karem smol raes blong fidim faol. Ating yu no luk se raes i godaon. Ale nekis dei, hem i kam kasem raes bakegen. ?Olsem wanem? ?Yu luksave? Nogat. Yu no luksave from we raes i stap godaon sloslo nomo. Long sem fasin, tingting mo fasin blong wol blong Setan i save mekem we sloslo, tingting blong yumi i no moa strong blong mekem wok blong God. Sipos wan Kristin i no lukaot gud, bambae hem i no luksave se tingting blong hem i no strong olsem fastaem.—Mat. 24:42; 1 Pita 5:8.
YUMI MAS PREA
16. ?Yumi mas mekem wanem blong no foldaon long ol trik blong Setan?
16 Yumi mas gohed blong mekem wok blong Jehova long olgeta hat blong yumi. ?Yumi mas mekem wanem blong no foldaon long ol trik blong Setan? (2 Kor. 2:11) Yumi mas prea. Pol i talem long ol Kristin se ‘oli mas stanap strong taem Setan i wokem ol giaman trik blong hem.’ Biaen hem i talem long olgeta se: “Yufala i mas prea, yufala i mas askem long God blong i givhan long yufala. Oltaem nomo yufala i mas prea.”—Efes. 6:11, 18; 1 Pita 4:7.
17. ?Yumi lanem wanem long ol prea blong Jisas?
17 Sipos yumi wantem blokem Setan, yumi mas folem fasin blong Jisas blong prea. Prea we Jisas i mekem i soemaot strong tingting we hem i gat blong mekem wok blong Jehova long olgeta hat blong hem. Man ya Luk i tokbaot prea we Jisas i mekem long naet bifo we hem i ded. Hem i talem se: “From we tingting blong hem i trabol tumas, hem i stap prea i strong moa.” (Luk 22:44) Jisas i talem ol tok we oli kamaot long hat blong hem mo hem i prea strong. I no fastaem we hem i prea olsem. Be hemia wan taem long laef blong hem we bigfala trabol bambae i kasem hem, i bitim ol narafala taem. Taswe hem i prea “strong moa.” Mo Jehova i ansa long prea blong hem. Yumi lanem se samtaem yumi save prea strong moa i bitim ol narafala taem, i dipen long samting we i traem yumi mo long trik blong Setan se i haed olsem wanem. Moa we trabol i bigwan, moa we yumi mas prea strong long Jehova blong i blokem yumi.
18. (a) ?Yu mas tingbaot wanem kwestin long saed blong ol prea we yu mekem? ?From wanem? (b) ?Wanem sam samting we yumi save mekem blong lukaot gud long hat blong yumi? ?Ol samting ya oli mekem wanem long hat blong yumi? (Plis lukluk bokis long pej 22.)
18 ?Ol prea olsem oli givhan long yumi olsem wanem? Pol i talem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala [“bambae i lukaotgud long hat mo tingting blong yufala, NW].” (Fil. 4:6, 7) Sipos yumi wantem mekem wok blong Jehova long olgeta hat blong yumi, yumi mas prea strong long Jehova mo yumi mas prea oltaem. (Luk 6:12) Taswe i gud yu tingbaot kwestin ya se: ‘?Mi mi stap prea strong long Jehova? ?Mi mi prea oltaem long Jehova?’ (Mat. 7:7; Rom 12:12) Ansa blong yu i soemaot sipos tingting blong yu i strong blong mekem wok blong God no nogat.
19. ?Bambae yu mekem wanem blong yu gohed blong mekem wok blong Jehova long olgeta hat blong yu?
19 Olsem yumi tokbaot, ol samting we yumi putum fasples long laef blong yumi oli soemaot wanem i stap long hat blong yumi. Yumi mas meksua se ol samting we yumi lego mo ol samting we Setan i yusum blong trikim yumi, oli no mekem tingting blong yumi i slak. (Ridim Luk 21:19, 34-36.) Taswe, olsem Deved, yumi mas gohed blong prea long Jehova mo askem se: “Plis yu mekem we mi mi gat wan tingting nomo i stap long hat blong mi.”—Sam 86:11, NW.
[Futnot]
^ par. 2 Ol olfala hanraet blong Baebol, oli yusum tok ya “hat” we plante taem, Baebol long Bislama i tanem i kam “tingting.” Taswe i gud yumi tingbaot se taem yumi ridim tok ya “tingting” long ol vas long stadi ya, tok we oli yusum long ol olfala hanraet i minim “hat.”
[Kwestin]
[Tok blong pija long pej 22]
TRI SAMTING WE YUMI MAS MEKEM BLONG LUKAOT GUD LONG HAT BLONG YUMI
I gat sam samting we yumi mas mekem blong givhan long hat blong yumi blong i wok gud. Long sem fasin, i gat sam samting we yumi mas mekem blong lukaot gud long hat blong yumi we Baebol i tokbaot. Plis yu tingting gud long tri samting we oli impoten blong mekem:
1 Kakae: Yumi mas kakae gud blong givhan long hat blong yumi blong i wok gud. Long sem fasin, yumi mas meksua se yumi kakae gud long saed blong spirit. Oltaem yumi wanwan i mas stadi, yumi mas tingting dip, mo yumi mas go long ol miting.—Sam 1:1, 2; Prov. 15:28; Hib. 10:24, 25.
2 Eksasaes: Samtaem hat blong yumi i mas pam strong blong mekem se i wok gud. Long sem fasin, yumi mas wok strong long wok blong prij, mo yumi traehad blong mekem moa long wok blong God. Hemia i mekem se hat blong yumi we Baebol i tokbaot, i stap gud.—Luk 13:24; Fil. 3:12.
3 Ples we yumi stap long hem: Ol man we yumi wok wetem olgeta mo ol man we oli stap raonabaot long yumi, oli no obei long God. Samtaem fasin blong olgeta i save mekem yumi harem nogud, nao yumi harem olsem se hat blong yumi i hevi. Be yumi save harem gud bakegen taem yumi joen oltaem wetem ol Kristin brata mo sista. Olgeta oli tingbaot yumi mo oli wantem mekem wok blong God long olgeta hat blong olgeta.—Sam 119:63; Prov. 13:20.
