Kwestin Blong Olgeta We Oli Ridim Magasin Ya . . .

?Hu i Sanem “Sta” Ya?

▪ ?Yu yu luk finis muvi we i soemaot tri king no waes man we trifala i kam luk Jisas taem hem i jes bon, i slip long bokis we ol man oli fidim anamol long hem? Long stori ya, oli talem se God i yusum wan sta blong lidim trifala i go long Betlehem, long ples we Jisas i stap long hem. Long sam ples, plante pikinini oli lanem baehat nem blong trifala king ya. Hemia Melchior, Caspar, mo Baltazar. ?Be olsem wanem? ?Stori ya i stret folem ol tok blong Baebol? Nogat. Plante samting long stori ya oli no stret.

Fas samting we i gud blong tingbaot hemia se, ?hu ol man ya? Long lanwis Grik, Baebol i no talem se oli king no oli waes man. Be hem i talem se oli man blong lukluk sta. Oli folem kastom blong ol hiten man blong lukluk ol sta blong talemaot fiuja. Baebol i no talemaot nem blong olgeta mo i no talem se oli hamas.

Seken samting se, ?ol man ya oli kam luk Jisas wetaem? Oli no kam taem hem i bebi mo i slip long bokis blong fidim anamol. ?Yumi save samting ya olsem wanem? Matiu i raetem long Gospel blong hem se: “Oli go insaed long haos ya, oli luk pikinini ya wetem mama blong hem Meri.” (Matiu 2:11) Vas ya i no tokbaot Jisas olsem wan smol bebi, be i tokbaot Jisas se hem i “pikinini” finis. Meri mo Josef tufala i no moa slip long ples blong ol anamol. Tufala i stap long wan “haos.”

Namba tri samting se, ?hu i sanem “sta” we i lidim ol man ya? Plante lida blong ol jos oli talem se God nao i sanem “sta” ya. ?Hemia i tru? Yu tingbaot se “sta” ya i no lidim ol man ya oli go stret long Betlehem. Fastaem hem i lidim olgeta i go long Jerusalem, long King Herod. Oli talemaot long Herod se Jisas i bon mo Jisas i “king blong ol laen blong Isrel.” Herod i jalus mo i wantem kilim Jisas i ded. (Matiu 2:2) Herod i traem trikim ol man ya. Hem i talem se taem oli faenemaot weples pikinini ya i stap long hem, bambae oli talem long hem blong hem tu i go leftemap nem blong pikinini ya. Ale “sta” ya i lidim ol man ya oli go long Josef mo Meri. Tru, ol man ya blong lukluk sta oli folem wan plan we i save spolem pikinini ya. God nao i mekem se olgeta oli jenisim plan blong olgeta. Herod i kros we i kros from we ol man ya oli no sanem tok i go long hem blong talem se Jisas i stap weples. Herod i talem long ol man blong hem blong oli go long Betlehem mo long ol ples raonabaot, blong kilim i ded olgeta pikinini we oli no kasem 2 yia yet.—Matiu 2:16.

Biaen Jehova i tokbaot Jisas se: “Hemia pikinini blong mi, we mi lavem hem tumas. Mi mi glad tumas long hem.” (Matiu 3:17) ?Yu ting se sipos Jehova i lavem Pikinini blong hem, bambae hem i jusum ol hiten man we oli lukluk ol sta blong oli talemaot ol tok blong hem? Olgeta oli joen long giaman wosip, we i agensem Loa blong Jehova. (Dutronome 18:10) ?Yu ting se bambae Jehova i yusum wan sta blong lidim olgeta i go long Herod, blong oli talemaot wan mesej we i mekem Herod i jalus? Herod i wan rabis king we i stap kilim ol man i ded. ?Yu ting se bambae Jehova i yusum sem sta ya bakegen blong soemaot weples pikinini blong hem i stap long hem? Pikinini blong hem i smol tumas, i no naf blong ronwe.

Yu traem tingbaot wan gudfala komanda blong ami. Hem i sanem nambawan soldia blong hem i go mekem faet long kantri blong enemi. ?Yu ting se komanda bambae i talemaot long enemi se soldia blong hem i stap weples? !Nogat! Long sem fasin, Jehova i sanem Pikinini blong hem i kam long rabis wol ya. ?Yu ting se taem Pikinini blong hem i smol yet, bambae hem i talemaot long rabis King Herod se Pikinini blong hem i stap weples? !Nogat!

?Ale hu i sanem “sta” ya? ?Hu i wantem kilim Jisas i ded? ?Hu i no wantem se Jisas i kam bigman mo i mekem wok blong God long wol? ?Hu i lidim man i go krangke, i giaman long man, i raf, mo i kilim man i ded? Jisas hem wan i talem se Setan nao i “man blong giaman, we i stamba blong ol giaman toktok.” Stat bifo olgeta, Setan i “man blong kilim man.”—Jon 8:44.