Yu Traehad Blong Mekem Mared Blong Yu i Stap Strong
Yu Traehad Blong Mekem Mared Blong Yu i Stap Strong
“Long olgeta we oli mared finis, tok blong mi i no blong mi nomo, i blong Masta blong yumi tu.”—1 KOR. 7:10.
?YU YU SAVE EKSPLENEM?
?God i joenem man mo woman long mared olsem wanem?
?Ol elda oli save mekem wanem blong givhan long olgeta we oli gat trabol long mared?
?Yumi mas gat wanem tingting long mared?
1. ?Ol Kristin oli mas tingbaot mared olsem wanem? ?From wanem?
TAEM ol Kristin oli mared oli mekem wan promes long fes blong God. Hemia wan promes we oli mas tinghevi long hem. (Pri. 5:4-6) Jehova i stanemap mared. Hem nao i “joenem” man mo woman long mared. (Mak 10:9) Samtaem loa blong kantri mo loa blong Baebol i no sem mak. Nating se i olsem, ol man blong Jehova oli mas tingbaot tingting blong Jehova long mared. Maet tufala we i mared, tufala i no wosipim Jehova yet. Be taem tufala i save Jehova tufala i mas gat tingting blong Jehova long mared.
2. ?Wanem ol kwestin we bambae yumi ansa long olgeta long stadi ya?
2 Man mo woman we i mared, tufala i save harem gud. ?Be yumi save mekem wanem sipos yumi no glad long mared blong yumi? ?Yumi save mekem mared blong yumi i kam gud bakegen? ?Wanem i save givhan long ol man mo woman we oli kasem trabol long mared blong olgeta?
?BAMBAE MI GLAD NO BAMBAE MI HAREM NOGUD?
3, 4. ?Wanem i save hapen sipos yu no jusum gud man no woman blong yu?
3 Taem mared blong wan Kristin man mo woman i stap strong, tufala i glad mo tufala i ona long Jehova. Be sipos mared blong tufala i brok, tufala i save harem nogud tumas. Sipos ol Kristin we oli no mared yet oli folem ol tok blong Baebol, taem oli mared bambae oli harem gud. Be sipos wan Kristin i no jusum gud man no woman blong hem, hem i save harem nogud tumas. Sam yangfala oli stap fren finis, be oli no rere blong mared. Sam narafala oli lukluk long Intenet blong faenem man no woman we oli laekem. Ale oli mared hareap mo i no longtaem biaen, oli harem nogud long mared blong olgeta. Sam narafala oli mekem bigfala sin taem oli stap fren blong mared. Biaen oli mared be oli no tinghae long man no woman blong olgeta.
4 Sam Kristin oli no mared long “man blong Masta,” nao biaen oli harem nogud from i no ful famle we i wosipim Jehova. (1 Kor. 7:39) Sipos hemia nao samting we i hapen long yu, yu mas prea long Jehova blong i fogivim yu mo i givhan long yu. Bambae Jehova i no karemaot ol trabol we yu kasem from mastik we yu mekem. Be sipos yu sore mo yu talemaot long Jehova se yu mekem i no stret, hem i save givhan long yu blong stanap strong. (Sam 130:1-4) Yu mas traehad blong mekem God i glad, mo bambae glad blong hem i ‘mekem yu yu stap strong.’—Neh. 8:10.
TAEM I GAT TRABOL LONG MARED
5. ?Taem i gat trabol long mared blong wan Kristin, i nogud we hem i gat wanem tingting?
5 Samfala we oli no glad long mared blong olgeta oli stap tingting se: ‘?Mi mi save mekem mared blong mi i kam gud bakegen no nogat? !Ating bambae mi glad moa sipos mi mared long wan narafala man!’ Maet oli stap drim se bambae oli lego man no woman blong olgeta, mo oli tingting se: ‘!Mi mi wantem stap mi wan! ?From wanem mi no divos? Nating se i no stret, mi mi save seraot long man blong mi, nao mi harem gud bakegen.’ I nogud ol Kristin oli tingting olsem mo oli drim se laef blong olgeta i defren. I moa gud oli traehad blong glad long laef blong olgeta mo oli folem ol tok blong God.
6. ?Ol tok long Matiu 19:9 i soemaot wanem?
6 Maet i no stret blong wan Kristin we i divos i mared bakegen. I dipen sipos hem i divos from risen we Baebol i talem no nogat. Jisas i talem se: “Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.” (Mat. 19:9) Vas ya i yusum wan tok long lanwis Grik we i min se man i slip wetem narafala woman, mo i save minim tu ol narafala doti fasin. Wan Kristin we i stap tingbaot blong divos, hem i mas prea long God fastaem, blong i mekem wan gudfala desisen.
7. ?Bambae ol man oli tingting wanem sipos mared blong wan Kristin i brok?
7 Sipos mared blong wan Kristin i brok, hemia i soemaot se hem i no fren gud wetem God. Aposol Pol i askem kwestin ya se: ‘?Sipos man i no save lukaot gud long famle blong hem, be bambae hem i save lukaot gud long kongregesen blong God, olsem wanem?’ (1 Tim. 3:5) Taem tufala we i mared tufala i talem se tufala i Kristin be mared blong tufala i brok, hemia i save mekem ol man oli ting se tufala i no folem fasin blong Kristin man.—Rom 2:21-24.
8. ?Sipos wan Kristin i mekem desisen blong seraot no divos, hemia i soemaot wanem?
8 Sipos Kristin man mo woman tufala i tingting blong seraot no divos from risen we i no stap long Baebol, hemia i min se tufala i no moa fren gud wetem Jehova. Maet tufala no wan long tufala, i no folem ol tok blong Baebol. Sipos tufala i trastem Jehova long olgeta hat blong tufala, tufala i save mekem mared blong tufala i kam gud bakegen.—Ridim Ol Proveb 3:5, 6.
9. ?Sam Kristin we oli no lego man no woman blong olgeta, oli kasem wanem blesing?
9 Plante man we oli gat trabol long mared, oli ting se mared blong olgeta bambae i brok. Be biaen mared blong olgeta i kam gud. Ol Kristin we oli no hareap blong lego man no woman blong olgeta, oli harem gud. Aposol Pita i tokbaot gudfala samting we i save hapen taem wan Kristin woman i no lego man blong hem. Hem i talem se: “Yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.” (1 Pita 3:1, 2) Gudfala fasin blong wan Kristin i save pulum man no woman blong hem, blong i kam long trutok. Ol Kristin we oli traehad blong mekem mared blong olgeta i kam gud bakegen mo oli no seraot, oli ona long God mo ful famle i harem gud.
10, 11. ?From wanem samfala oli gat trabol long mared blong olgeta? ?Bambae Jehova i givhan long olgeta olsem wanem?
10 Bighaf blong ol Kristin oli jusum man no woman we i baptaes finis, from we oli wantem mekem Jehova i glad. Be samtaem samting we oli no tingbaot i hapen. Maet tingting blong man no woman blong olgeta i foldaon mo hem i harem nogud. Maet man no woman blong olgeta i no moa prij. Wan samting olsem i hapen long Linda. * Hem i wok strong long wok blong prij mo hem i wan gudfala mama. Hem i harem nogud tumas taem man blong hem i mekem sam samting we i no stret. Man blong hem i no tanem tingting blong hem, mo kongregesen i putumaot hem. Taem wan samting olsem i hapen long wan Kristin, hem i save harem se mared blong hem bambae i nogud nomo. ?Hem i save mekem wanem?
11 Maet hem i stap tingting se: ‘?Mi mas traehad blong mekem mared blong mi i kam gud nomata wanem samting i hapen?’ Hem nomo i mas mekem desisen ya. Be Baebol i soemaot se i gud we hem i no lego. Samfala oli stanap strong from we oli wantem se tingting blong olgeta i klin long fored blong God. God i tinghae long olgeta. (Ridim 1 Pita 2:19, 20.) Jehova i yusum Baebol mo tabu spirit, blong givhan long ol Kristin we oli traehad blong mekem mared blong olgeta i stap strong.
OLI RERE BLONG GIVHAN LONG YU
12. ?Bambae ol elda oli gat wanem tingting long yumi sipos yumi askem help long olgeta?
12 Sipos yu gat trabol long mared blong yu, yu save askem help long ol Kristin we oli save gud ol tok blong Baebol. Ol elda oli glad blong yusum ol vas blong Baebol blong givhan long yu. (Wok 20:28; Jem. 5:14, 15) Bambae ol elda oli no tingting nogud long yu. Bambae oli lavem yu mo oli gat respek long yu moa i bitim bifo, from we oli luk we yu wantem tumas blong mekem God i glad.
13. ?Fas Korin 7:10-16 i givhan long yumi olsem wanem?
13 Ol elda oli save yusum ol tok blong Pol blong givhan long ol Kristin we man no woman blong olgeta i no stap long trutok. Pol i talem se: “Long olgeta we oli mared finis, tok blong mi i no blong mi nomo, i blong Masta blong yumi tu. Mi mi talem se woman i no mas lego man blong hem. Sipos woman i lego man blong hem, bambae i mas stap olsem nomo, i no mared bakegen. No sipos no, bambae i mas kambak blong joen gud bakegen long man blong hem. Mo man i no mas mekem divos long woman blong hem. . . . ?Sipos yu yu woman olsem, olsem wanem yu ting se yu no save sevem man blong yu? ?No sipos yu yu man olsem, olsem wanem yu ting se yu no save sevem woman blong yu?” (1 Kor. 7:10-16) Yu tingbaot sipos man no woman blong yu i wosipim Jehova. !Hemia wan nambawan blesing!
14, 15. ?Wanem i mekem se samfala oli lego man blong olgeta? ?From wanem woman we i wantem lego man blong hem i mas prea mo tingting gud?
14 ?Wanem i save mekem se Kristin woman i “lego” man blong hem? Samtaem woman i seraot long man blong hem from we man ya i no wantem givim ol samting we hem mo ol pikinini i nidim. Samtaem man i kilim nogud woman blong hem mo i blokem hem long wok blong God.
15 I stap long ol Kristin wanwan blong mekem desisen se bambae oli stap wetem man blong olgeta no bambae oli lego hem. Oli mas prea mo tingting gud from wanem oli wantem lego man blong olgeta. ?I tru se man blong Kristin ya i stap blokem hem long wok blong Jehova? Maet Kristin ya tu i no stap stadi Baebol, i no go long olgeta miting, mo i joen wanwan taem nomo long wok blong prij.
16. ?From wanem ol Kristin oli no mas hareap blong divos?
16 Yumi no mas hareap blong divos. Yumi tinghae long fasin fren blong yumi wetem God. Mo yumi tinghae long mared se i wan presen we hem i givim. Yumi ol man blong Jehova. Taswe, yumi no wantem se desisen blong yumi i mekem ol man oli tingting nogud long Jehova. Yumi wantem leftemap tabu nem blong hem oltaem. From samting ya, yumi no mekem rabis plan blong lego man no woman blong yumi, blong mared long narafala.—Jer. 17:9; Mal. 2:13-16.
17. ?Wetaem i stret blong talem se “God i singaot yumi, blong yumi stap long kwaet laef”?
17 Ol Kristin we oli mared long man no woman we i no Witnes, oli mas traehad blong mekem mared blong olgeta i stap strong. Sipos oli traehad be man no woman blong olgeta i lego olgeta, oli no mas harem se i fol blong olgeta. Pol i talem se: “Sipos man we i no bilif i wantem lego woman blong hem we i Kristin, no woman we i no bilif i wantem lego man blong hem we i Kristin, i gud nomo, hem i save mekem. Nao man no woman we i Kristin, hem i no moa gat samting i fasem hem long woman no man we i lego hem. God i singaot yumi, blong yumi stap long kwaet laef.”—1 Kor. 7:15. *
YU MAS TRASTEM JEHOVA
18. Nating se mared blong yu i no kam gud, ?from wanem yu save harem gud we yu bin traehad?
18 Taem yumi gat trabol long mared, yumi mas prea long Jehova blong i mekem tingting blong yumi i strong. Mo yumi mas trastem hem. (Ridim Ol Sam 72:14.) Yu tingbaot Linda we yumi tokbaot finis. Plante yia hem i traehad blong mekem mared blong hem i kam gud, be hem i no save. Ale, hem i divos. ?Olsem wanem? ?Hem i harem se hem i westem taem blong hem? Nogat. Hem i talem se: “From we mi traehad blong mekem mared blong mitufala i kam gud, fasin blong mi i pulum ol narafala blong gat gudfala tingting long Jehova. Mi mi harem gud long tingting blong mi. Mo samting we i mekem mi mi glad moa, hemia se gel blong mitufala i gohed gud long trutok. Hem i givim laef blong hem i go long Jehova mo i wok strong long wok blong Jehova.”
19. ?Wanem i save hapen sipos tufala we i mared, tufala i traehad blong mekem mared i kam gud?
19 Wan Kristin woman we nem blong hem Marilyn i glad from we hem i trastem God mo i traehad blong mekem mared blong hem i kam gud. Hem i talem se hem i wantem lego man blong hem from we man blong hem i no givim ol samting we hem i nidim, mo i blokem hem blong mekem wok blong Jehova. Fastaem man blong hem i wan elda, be hem i mekem sam desisen long saed blong wok blong hem we oli no waes. Hem i mestem ol miting, mo tufala i no moa storian gud. Marilyn i fraet bigwan taem ol teroris oli mekem plen i sperem bilding long taon we tufala i stap long hem. Ale hem i no wantem stap long ples we i gat plante man. Biaen hem i kasem save se i no fol blong man blong hem nomo. Fasin blong hem tu i mekem se i gat trabol. Tufala i storian bakegen, tufala i mekem famle stadi tugeta, mo tufala i go oltaem long ol miting. Ol elda oli kaen mo oli givhan long tufala. Mared blong tufala i kam gud bakegen, mo tufala i glad tumas olsem se tufala i jes mared. Biaen man blong hem i mekem wok bakegen long kongregesen. Marilyn i talem se hem i harem nogud tumas taem mared blong tufala i gat trabol, be biaen samting we hem i lanem i givhan bigwan long tufala.
20, 21. ?Wanem bigfala samting we yumi mas tingbaot?
20 Nating se yumi mared no yumi no mared, oltaem yumi mas gat strong tingting mo yumi mas trastem Jehova. Sipos i gat trabol long mared blong yu, yu mas mekem evri samting we yu save mekem blong winim trabol ya. Yu mas tingbaot se man mo woman we i mared, “tufala i no moa tu, tufala i olsem wan bodi nomo.” (Mat. 19:5) Nating se i gat trabol long mared blong yu, be sipos yu no lego man no woman blong yu, maet bambae yu glad tumas blong luk we hem i joen long tru wosip.
21 Nomata wanem samting i hapen long laef blong yumi, oltaem fasin blong yumi i mas pulum ol narafala blong oli gat gudfala tingting long Jehova. Sipos i gat bigfala trabol long mared blong yu mo yu wantem lego man no woman blong yu, yu mas tingting gud from wanem yu wantem mekem olsem. Yu mas prea strong long Jehova, yu mas tingting dip long ol tok blong Baebol, mo yu mas askem ol elda blong oli givhan long yu. Bigfala samting we yu mas tingbaot, hemia blong mekem Jehova i glad long olgeta samting we yu mekem, mo yu soemaot se yu tinghae long mared se i wan nambawan presen we God i givim.
[Ol futnot]
^ par. 10 Mifala i jenisim nem blong samfala.
^ par. 17 Plis lukluk buk ya ‘Stap Long Laef Ya We God i Lavem Yu,’ pej 220-222.
[Kwestin]
[Tok blong makem poen long pej 16]
Ol Kristin we oli no hareap blong lego man no woman blong olgeta, oli harem gud
[Tok blong makem poen long pej 18]
Oltaem yu mas trastem Jehova mo yu askem hem blong i mekem tingting blong yu i strong
[Tok blong pija long pej 15]
Jehova i blesem ol Kristin we oli traehad blong mekem mared blong olgeta i stap strong
[Tok blong pija long pej 17]
Ol narafala Kristin oli save givhan long yu blong harem gud mo blong fren gud wetem Jehova
