Yu Trastem Jehova Hem i Stap Holem Taem

“Yu yu stap holem olgeta taem, mo yu stap putum ol defren taem blong yia. Yu yu putumap ol king, mo yu save tekemaot olgeta bakegen.”—DAN. 2:21.

?BAMBAE YU YU ANSA OLSEM WANEM?

Ol samting we God i wokem mo ol profet tok we oli kamtru, ?oli soemaot olsem wanem se God i stap holem taem?

?Yumi mas mekem wanem taem yumi save se Jehova i God we i stap holem taem?

?From wanem ol samting we ol man oli mekem i no jenisim taem we Jehova i putum?

1, 2. ?From wanem Jehova i save gud se taem i wanem?

BIFO olgeta, taem Jehova God i no mekem ol man yet, hem i mekem ol samting we oli blong makem taem. Long namba fo dei, hem i talem se: “I mas gat ol laet i stap long skae blong makem dei mo naet. Ol samting ya bambae oli blong makem ol dei, mo ol yia, mo ol taem blong lafet.” (Jen. 1:14, 19, 26) Ol samting ya oli kamtru olsem we God i wantem.

² Kam kasem tede, ol saentis oli no save se ol dei, ol wik, mo ol manis oli pas olsem wanem. Wan buk i talem se: “I no gat man i save talem se taem i wanem.” Be Jehova i save gud. Hem nao i “mekem skae wetem olgeta samting we i stap long hem” mo “hem i wokem wol ya.” Jehova i save wanem bambae i hapen long fiuja. Baebol i talem se ‘bifo olgeta, hem i talemaot fastaem ol samting we biaen oli hapen. Bifo finis, hem i talemaot ol samting we biaen oli kamtru.’ (Aes. 45:18; 46:10) Bambae yumi tokbaot tu samting we oli givhan long yumi blong bilif strong long Jehova mo long Baebol. Faswan hemia ol samting we Jehova i mekem, mo namba tu hemia ol profet tok we oli kamtru finis. Tufala samting ya i soemaot se Jehova nao i God we i stap holem taem. Hem i mekem tingting blong hem i kamtru long stret taem we hem i makemaot.

OL SAMTING WE GOD I MEKEM

3. ?Wanem sam samting we oli holem taem long fasin we i stret gud?

³ Plante samting we Jehova i mekem oli folem taem long fasin we i stret gud. Ol samting olsem ol sta long skae oli stap muv oltaem long fasin we i stret. Hemia i givhan long yumi blong faenemaot stret ples we bambae oli stap long hem, nao yumi save ol defren taem blong yia. Mo taem ol man oli wokbaot, oli save yusum ol sta long skae blong faenem rod blong olgeta. Tru, God  ya we i mekem ol sta, “paoa blong hem i strong we i strong.” I stret nomo we yumi presem hem.—Ridim Aesea 40:26.

4. ?Ol samting we oli folem taem, oli soemaot waes blong Jehova olsem wanem?

⁴ Ol samting we oli laef, olsem ol tri mo ol anamol oli folem taem. Plante pijin oli save wetaem oli mas lego wan ples mo go long wan narafala ples. (Jer. 8:7) Ol man tu oli folem taem. Bodi blong yumi i save wetaem i delaet mo wetaem i tudak. Yu traem tingbaot sipos wan man i tekem plen i go long narafala ples we i longwe long ples blong hem. Long ples blong hem ol man oli slip, be long narafala ples ya ol man oli wekap. Afta we sam dei i pas, bodi blong hem i lan long jenis ya. Yes, ol samting we Jehova i mekem oli soemaot se hem i stap holem ‘taem mo i stap putum ol defren taem blong yia.’ Paoa blong hem i bigwan mo hem i waes we i waes. (Ridim Ol Sam 104:24.) Waes mo paoa blong Jehova i no gat en blong hem. Taswe, yumi save bilif strong se hem i save mekem tingting blong hem i kamtru.

OL PROFET TOK OLI KAMTRU LONG STRET TAEM

5. (1) ?Olsem wanem blong save wanem bambae i hapen long ol man? (2) ?From wanem Jehova i save talemaot wanem bambae i hapen mo wetaem samting ya bambae i kamtru?

⁵ Ol samting we Jehova i mekem, oli tijim yumi long ‘ol fasin blong hem we yumi no save luk stret long ae blong yumi.’ Be oli no save ansa long ol impoten kwestin, olsem kwestin ya se, ?Bambae wanem i hapen long ol man? (Rom 1:20) I gat wan rod nomo blong save ansa blong kwestin olsem. Yumi mas stadi long ol tok Baebol. I gat plante profet tok we oli kamtru long stret taem we Jehova i putum. Jehova i save talemaot wanem bambae i kamtru from we hem i save wanem bambae i hapen. Mo hem i save mekem ol samting oli kamtru olsem we hem i wantem mo long taem we hem i wantem.

6. ?Wanem i soemaot se Jehova i wantem we yumi kasem save long ol profet tok long Baebol?

⁶ Jehova i wantem se yumi kasem save long ol profet tok long Baebol, blong oli givhan long yumi. I tru se Jehova i no makem taem olsem yumi. Be hem i yusum ol tok we yumi kasem save long hem blong talemaot wetaem wan samting bambae i kamtru. (Ridim Ol Sam 90:4.) Buk blong Revelesen i tokbaot “fo enjel” we oli rere, oli stap wet “long yia ya mo manis ya mo dei ya stret.” Hemia ol tok we yumi kasem save long olgeta. (Rev. 9:14, 15) Taem yumi kasem save se ol profet tok oli kamtru long stret taem we God i talem, yumi bilif strong moa se God i stap holem ‘taem mo i stap putum ol defren taem blong yia.’ Mo bilif blong yumi long Baebol i kam strong moa. I gud yumi tokbaot sam profet tok we oli kamtru finis.

7. ?Tok blong Jeremaea i soemaot olsem wanem se oltaem Jehova i mekem tingting blong hem i kamtru?

⁷ Fastaem yumi tingbaot samting we i hapen long ol yia 600 B.K.T. * “Long namba fo yia we King Jehoeakim, we papa blong hem King Josaea i king blong Juda, Hae God i toktok long Profet Jeremaea from ol man Juda.” (Jer. 25:1) Jehova i talem se ol man Babilon bambae oli spolem Jerusalem, mo bambae oli tekem ol man Jiu oli aot long kantri blong Juda i go long Babilon. Bambae ol man Jiu “oli kam man blong wok blong king ya, gogo kasem seventi yia.” Hemia nao samting we i hapen long yia 607 B.K.T. ?Jehova i talem se bambae wanem i hapen long en blong ol 70 yia? Hem i talem long ol man blong hem se: “Bambae yufala i stap long Babilonia gogo kasem seventi yia, mo biaen, bambae mi kam tekemaot yufala, mi tekem yufala i kambak long stret ples blong yufala bakegen, olsem we mi promes finis long yufala.” (Jer. 25:11, 12; 29:10) Profet tok  ya i kamtru long stret taem we Jehova i talem. Ol man Media mo Pesia oli mekem ol man Jiu oli fri long Babilon. Mo long yia 537 B.K.T., ol man Jiu oli gobak long kantri blong olgeta.

8, 9. ?Ol profet tok we Daniel i tokbaot, oli soemaot olsem wanem se Jehova i God we i stap holem “taem”?

⁸ Samwe tu yia bifo we ol man Jiu oli aot long Babilon, Daniel i tokbaot olgeta bakegen long wan narafala profet tok. Long profet tok ya, God i talem se bambae Mesaea i kamtru 483 yia afta we toktok i goaot blong wokem Jerusalem bakegen. King blong Media mo Pesia i talem toktok ya long yia 455 B.K.T. Fo handred eiti tri yia biaen, long yia 29 K.T., Jisas i baptaes mo tabu spirit i kamdaon long hem. Mo hem i kam Mesaea. *—Neh. 2:1, 5-8; Dan. 9:24, 25; Luk 3:1, 2, 21, 22.

⁹ I gud yumi tingbaot wanem we Baebol i talemaot long saed blong Kingdom blong God, we Mesaea bambae i rul long hem. Ol profet tok oli soemaot se Kingdom ya bambae i stanap long heven long yia 1914. Baebol i talemaot wan “saen” we i soemaot se Jisas i stap rul. Bambae i gat plante trabol long wol from we Jisas i sakemaot Setan long heven. (Mat. 24:3-14; Rev. 12:9, 12) Mo Baebol i talemaot stret taem we ‘rul blong ol man we oli no laen blong Isrel, bambae i finis.’ Hemia long yia 1914, taem Kingdom i stat blong rul.—Luk 21:24; Dan. 4:10-17. *

10. ?Wanem bambae i kamtru long stret taem we God i putum?

¹⁰ I no longtaem, “bigfala trabol” we Jisas i tokbaot bambae i kamtru. Ale bambae Jisas i rul blong wan taosen yia. Yumi mas gat strong tingting se ol samting ya bambae oli kamtru long stret taem we God i putum. Taem Jisas i stap long wol, Jehova i putum finis ‘dei mo taem’ blong ol samting ya i hapen.—Mat. 24:21, 36; Rev. 20:6.

YUMI MAS YUSUM GUD TAEM BLONG YUMI

11. ?Sipos yu bilif se en i klosap, yu mas mekem wanem?

¹¹ Yumi save se Kraes i King mo yumi stap long “taem blong en.” Taswe ?yumi mas mekem wanem? (Dan. 12:4, NW) Plante man oli luk we ol trabol oli stap kam mowas, be oli no kasem save se Baebol i talem finis se bambae oli kamtru long ol las dei. Samfala oli ting se wol bambae i kam nogud olgeta. Sam narafala oli ting se ol man oli save mekem wol i kam gud, nao “olgeta samting i kwaet, i gud nomo.” (1 Tes. 5:3) ?Olsem wanem long yu? ?Yu bilif se en blong rabis wol ya i klosap? Sipos yes, yu mas yusum taem blong yu blong mekem wok blong Jehova mo blong givhan long ol narafala blong oli save hem. (2 Tim. 3:1) Yu mas yusum taem blong yu long fasin we i waes.—Ridim Efesas 5:15-17.

12. ?Ol tok blong Jisas i tijim yumi long wanem?

 ¹² I gat plante samting long wol we i save pulum tingting blong yumi i gowe long wok blong Jehova. Taswe i no isi blong yusum gud taem blong yumi. Jisas i talem se: “Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere.” God i talem long Noa se bambae wol i lus. Bambae ol man nogud oli draon long bigfala wota we i kavremap olgeta ples long wol. Noa i wan man “we i stap talemaot stret fasin.” Hem i wok strong blong talemaot ol tok blong God. (Mat. 24:37; 2 Pita 2:5) Be ol man “oli stap kakae, mo oli stap dring, mo oli stap mekem mared, . . . gogo wota i ron bigwan, i tekemaot olgeta.” Taswe Jisas i talem se: “Oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.” (Mat. 24:38, 39, 44) Yumi mas mekem olsem Noa, be i no olsem ol man long taem blong hem. ?Wanem bambae i givhan long yumi blong yumi rere?

13, 14. ?Yumi save wanem samting we i givhan long yumi blong gohed long wok blong Jehova?

¹³ Yumi no save wetaem Pikinini blong man bambae i kamtru, be yumi save se oltaem Jehova i mekem tingting blong hem i kamtru long stret taem. Nomata wanem samting i hapen long wol mo wanem samting ol man oli plan blong mekem, Jehova i no jenisim taem we hem i putum. Jehova i mekem ol samting oli hapen long taem we hem i wantem mo olsem we hem i wantem. (Ridim Daniel 2:21.) Ol Proveb 21:1 i tokbaot Jehova, i se: “Yu yu stap holem olgeta taem, mo yu stap putum ol defren taem blong yia. Yu yu putumap ol king, mo yu save tekemaot olgeta bakegen. Yu nao yu stap givim waes mo save long man.”

¹⁴ Jehova i save mekem ol samting oli hapen blong tingting blong hem i kamtru long stret taem. Plante samting we oli hapen long wol oli mekem ol profet tok blong Baebol i kamtru. Hemia i tru tumas taem yumi tingbaot ol profet tok long saed blong wok blong talemaot gud nius blong Kingdom, long olgeta ples long wol. Yu tingbaot bigfala jenis we i kamaot long kantri we wan man nomo i rul long hem. Plante man oli sek se kwiktaem nomo gavman i jenis. Ol jenis olsem i mekem se gud nius i kasem plante moa man, long plante kantri we fastaem wok blong prij i tabu. Taswe yumi mas yusum gud taem blong yumi blong mekem wok blong Jehova, God ya we i stap holem ‘taem, mo i putum ol defren taem blong yia.’

YUMI SOEMAOT SE YUMI BILIF LONG JEHOVA

15. Taem i gat sam jenis, ?yumi mekem wanem blong soemaot se yumi bilif long Jehova?

¹⁵ Yumi mas bilif long Jehova, se oltaem hem i mekem tingting blong hem i kamtru long stret taem. Nao bambae yumi save gohed blong prij long ol man long ol las dei. Laef i stap jenis oltaem, taswe yumi mas jenisim fasin blong yumi blong prij. Samtaem ogenaesesen blong Jehova i mekem sam jenis, blong givhan long yumi blong talemaot gud nius long fasin we i gud moa. Sipos yumi folem ol jenis ya mo yumi wok aninit long Jisas we i ‘hed blong kongregesen,’ yumi soemaot se yumi bilif long God ya we i stap holem ‘taem, mo i putum ol defren taem blong yia.’—Efes. 5:23.

16. ?From wanem yumi save bilif se Jehova bambae i givhan long yumi long stret taem?

¹⁶ Jehova i wantem se yumi prea long hem enitaem, mo yumi bilif strong se bambae hem i “givhan long yumi, stret long taem” we yumi nidim. (Hib. 4:16) Hemia i soemaot se Jehova i lavem yumi wanwan mo hem i stap tingbaot yumi. (Mat. 6:8; 10:29-31) Yumi mas prea oltaem long Jehova blong i givhan long yumi mo yumi mas folem ol tok blong hem. Long rod ya, yumi soemaot se yumi bilif long Jehova. Mo taem yumi prea, yumi mas tingbaot ol Kristin brata mo sista blong yumi.

17, 18. (1) ?I no longtaem bambae Jehova i mekem wanem long ol enemi blong hem? (2) ?Yumi mas lukaot blong no gat wanem tingting?

 ¹⁷ Naoia i no taem blong gat bilif we i hafhaf. Be i taem blong gat bilif we i givim strong tingting long yumi blong mekem samting we God i wantem. (Rom 4:20) Setan mo olgeta we i stap long paoa blong hem, oli stap traehad blong blokem wok we Jisas i talem long yumi blong mekem. (Mat. 28:19, 20) Nating se Setan i agensem yumi, yumi save se Jehova i “God ya we i laef, i stap we i stap, mo we i save sevem olgeta man, be antap moa, hem i sevem yumi ya we yumi bilif long hem.” Hem i ‘save tekemaot yumi long ol samting we i stap traem yumi.’—1 Tim. 4:10; 2 Pita 2:9.

¹⁸ I no longtaem bambae Jehova i spolem rabis wol ya. Yumi no save wanem samting stret bambae i hapen mo yumi no save stret taem we samting ya bambae i kamtru. Be yumi save se Kraes bambae i spolem ol enemi blong God long stret taem. Ale olgeta man bambae oli save se i stret we Jehova nao i rulum heven mo wol. Taswe, i nogud yumi fogetem “taem” we yumi stap long hem naoia. Yumi mas lukaot blong no gat tingting ya se: “I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.”—1 Tes. 5:1; 2 Pita 3:3, 4.

“BAMBAE MI STAP WET LONG HEM”

19, 20. ?From wanem yumi mas wet long Jehova?

¹⁹ Taem Jehova i mekem ol man, hem i wantem se oli laef olwe. Nao oli save lanem moa long saed blong hem mo ol gudfala samting we hem i wokem. Prija 3:11 (NW) i tokbaot Jehova i se: “Olgeta samting, hem i wokem oli naes long stret taem blong olgeta. Laef we i no save finis, hem i putum long hat blong olgeta, blong bambae olgeta man oli no save faenemaot olgeta wok we tru God i mekem, long stat blong olgeta i go kasem en blong olgeta.”

²⁰ Yumi glad tumas se Jehova i no jenisim tingting blong hem long saed blong ol man. (Mal. 3:6) Baebol i talem se God “i no save jenis.” (Jem. 1:17) Nating se plante yia i pas, hemia i no jenisim tingting mo fasin blong Jehova. Hem i “King we rul blong hem i stap oltaem nomo, gogo i no save finis.” (1 Tim. 1:17) Taswe yumi mas “wet long hem.” (Maeka 7:7) Olsem Baebol i talem, yumi mas ‘putum tingting blong yumi i stap long Hae God, yumi mas strong. Tingting blong yumi i mas stap strong oltaem.’—Sam 31:24.

[Ol futnot]

[Kwestin]

[Tok blong pija long pej 21]

Daniel i bilif se ol profet tok blong God bambae oli kamtru

[Tok blong pija long pej 23]

?Yu yu yusum gud taem blong yu blong mekem samting we Jehova i wantem?