Bilif Mo Gudfala Fasin ?Olsem Wanem Blong Gat Tufala Fasin Ya?

?JISAS i mekem wanem blong givhan long ol man? Hem i no traem stanemap wan niu gavman. Be hem i givhan long ol man blong jenisim fasin mo tingting blong olgeta. Yu tingbaot samting we Jisas i talem taem hem i tijim ol man antap long hil. Bifo we hem i talem se ol man blong hem oli mas olsem sol mo laet, hem i talem se ol man we “oli stap lukaot God,” oli save harem gud. Mo hem i talem se “olgeta we tingting blong olgeta i stap daon oli save harem gud.” Olgeta we tingting blong olgeta i klin gud, mo olgeta we oli man blong pis, oli save harem gud. (Matiu 5:1-11) Jisas i givhan long ol man blong hem blong kasem save se oli mas jenisim tingting blong olgeta. Oli mas folem ol tok blong God we i soemaot wanem i gud mo wanem i nogud. Mo oli mas mekem wok blong God long fulhat blong olgeta.

Wan narafala samting we Jisas i mekem, hemia se hem i sore long man we i harem nogud, nao i givhan long hem. Be Jisas i no traem finisim olgeta trabol blong man. (Matiu 20:30-34) Hem i mekem ol man we oli sik oli kam gud bakegen, be hem i no finisim sik. (Luk 6:17-19) Hem i givhan long ol man we narafala i mekem i nogud long olgeta. Be ol man oli stap mekem i nogud yet long narafala. Hem i givim kakae long ol man we oli hanggri. Be hem i no finisim trabol ya we man i sot long kakae.—Mak 6:41-44.

Yumi Givhan Long Ol Man

?From wanem Jisas i givhan long ol man blong oli jenisim fasin mo tingting blong olgeta? ?From wanem Jisas i givhan long ol man we oli harem nogud? ?From wanem hem i no stanemap wan niu gavman mo hem i no finisim ol trabol? Jisas i save se God i mekem wan plan finis. Bambae God i yusum Kingdom blong hem blong spolem gavman blong ol man, mo bambae hem i finisim ol trabol we i mekem ol man oli harem nogud. (Luk 4:43; 8:1) Taswe taem ol man blong Jisas oli wantem se Jisas i stap blong mekem sam moa sikman i gud, Jisas i talem se: “I gud yumi go long ol narafala vilej raonabaot long ples ya blong mi prij long olgeta, from we mi mi kam long ples ya blong mekem wok ya.” (Mak 1:32-38) Jisas i mekem plante man we oli sik oli harem gud bakegen. Be long tingting blong hem, i moa impoten blong prij mo blong tijim ol man.

Ol Witnes blong Jehova oli traehad blong folem fasin blong Jisas long wok blong prij. Oli sore long ol man we oli harem nogud mo oli givhan long olgeta. Be oli no traem finisim ol trabol long wol. Oli bilif se gavman blong God bambae i finisim olgeta samting we i mekem man i harem nogud. (Matiu 6:10) Olsem Jisas, ol Witnes oli no traem stanemap wan niu gavman. Be oli traehad blong givhan long ol man blong oli jenisim fasin mo tingting blong olgeta. Hemia wan gudfala rod blong givhan long ol man, from we fasin blong ol man nao i mekem bigfala trabol long wol, i bitim politik.

Yumi Mas Gat Gudfala Fasin

I tru se ol Witnes blong Jehova oli no joen long politik, be oli save se oli mas gat gudfala fasin long ol man raonabaot mo long gavman. From samting ya, oli obei mo oli gat respek long gavman. Oli prij long ol man mo oli seremaot ol buk we oli tijim ol man blong  obei long loa blong gavman. Be taem gavman i talem se oli mas mekem samting we i agensem loa blong God, oli no obei. Oli “obei long God,” i bitim we oli obei long man.—Ol Wok 5:29; Rom 13:1-7.

Ol Witnes blong Jehova oli go long haos blong ol man blong tijim olgeta long Baebol. Oli no kasem mane from wok ya. Plante milian man oli jenisim fasin mo tingting blong olgeta from ol samting we oli lanem. Evri yia, ol Witnes oli givhan long plante handred taosen man blong oli no moa smok, oli no moa drong, oli no moa tekem drag, oli no moa plei laki, mo oli no moa mekem ol rabis fasin blong man wetem woman. Oli lanem ol gudfala fasin from we oli folem ol tok blong Baebol long laef blong olgeta.

Ol tok blong Baebol i givhan long evriwan long famle blong respektem moa ol narafala. Mo hem i givhan long ol man mo ol woman blong toktok gud tugeta, i givhan long ol papa mama blong toktok gud long ol pikinini, mo blong ol pikinini oli toktok gud long olgeta bakegen. Ol gudfala fasin ya oli mekem famle i joen gud. Mo sipos ol famle long wan vilej oli joen gud, bambae olgeta man oli save joen gud moa.

Naoia we yu ridim finis ol haf ya, ?wanem tingting blong yu? ?Baebol i soemaot se i stret blong skul mo politik tufala i joen? Ansa i klia nomo se i no stret blong tufala i joen. ?Be olsem wanem? ?Ol tru Kristin oli mas gat gudfala fasin long ol man raonabaot mo long gavman? Yes, oli mas gat gudfala fasin. ?Oli soemaot gudfala fasin olsem wanem? Oli folem ol tok blong Jisas blong kam olsem sol mo laet long ol man long wol.

Ol man we oli traehad blong folem ol tok ya blong Jisas we yumi tokbaot finis, bambae oli harem gud. Mo bambae oli givhan long famle blong olgeta mo long ol man raonabaot blong oli harem gud. Ol Witnes oli glad blong givim moa save long yu, long saed blong Baebol stadi we oli stap mekem wetem ol man long ples blong yu. *

[Futnot]

[Tok blong makem poen long pej 7]

Jisas i givhan long ol man blong oli jenisim fasin mo tingting blong olgeta, be hem i no stanemap wan niu gavman

[Tok blong makem poen long pej 8]

Ol Witnes blong Jehova oli save se oli mas gat gudfala fasin long ol man raonabaot mo long gavman