Yumi Lanem Samting Long Tok Blong God

?Wanem Bambae i Hapen Long Ol Skul?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?I tru se olgeta skul oli gud?

Long plante skul, i gat ol man we oli wantem mekem God i glad. God i save ol man ya mo hem i stap tingbaot olgeta. Be sore tumas, samfala oli mekem rabis fasin long nem blong God. Long ol yia we i pas, sam lida blong skul oli mekem man we i agensem olgeta i harem nogud tumas long bodi blong hem gogo hem i ded. (2 Korin 4:3, 4; 11:13-15) Long taem blong yumi, ol niuspepa oli talem se sam lida blong skul oli wok wetem ol teroris, oli joen long faet, mo samfala oli mekem i nogud long ol pikinini.—Ridim Matiu 24:3-5, 11, 12.

Baebol i soemaot se i gat skul we i tru mo skul we i giaman. Ol giaman skul oli no tijim ol man long trutok blong God. Be Jehova God i wantem se ol man oli save trutok blong hem.—Ridim 1 Timoti 2:3-5.

2. ?Wanem bambae i hapen long ol skul?

God i no wantem se ol man oli folem ol skul we oli talem se oli lavem God be oli no tijim ol man long trutok. Olgeta we oli glad blong folem ol giaman skul, oli laekem ol fasin blong wol ya we i stap long paoa blong Setan. (Jemes 4:4; 1 Jon 5:19) Baebol i talem se ol skul we oli no stap tru long God be oli glad moa long ol gavman blong man, oli olsem woman blong rod. Baebol i singaot woman blong rod ya se “Bigfala taon ya Babilon.” Hemia from afta we bigfala wota i ron long taem blong Noa, taon ya Babilon i stamba blong ol giaman skul. I no longtaem ol man bambae oli sek se God i spolem ol skul we oli giaman, mo we oli mekem i nogud long ol man.—Ridim Revelesen 17:1, 2, 5, 17; 18:8, 23, 24.

  3. ?Bambae God i mekem wanem blong olgeta man oli glad?

Nius ya se God bambae i jajem ol giaman skul, i wan gudfala nius. Bambae i no moa gat man i mekem i nogud long narafala man. Bambae i no moa gat ol skul we oli giaman mo oli mekem ol man oli seraot. Bambae olgeta man oli joen gud long wosip we oli mekem long tru God.—Ridim Aesea 11:9; Revelesen 18:20, 21; 21:3, 4.

4. ?Ol man we oli wantem mekem God i glad, oli mas mekem wanem?

Jehova i no fogetem ol man we oli wantem mekem hem i glad, be oli stap long ol giaman skul. Hem i stap pulum olgeta oli kam long tru wosip, i tijim olgeta long trutok.—Ridim Maeka 4:2, 5.

Jehova i glad tumas blong tekem ol man we oli wantem mekem wok blong hem, oli kam long famle blong hem. Maet ol fren mo ol stret famle blong yumi oli no glad we yumi mekem wok blong God. Be bambae God i blesem yumi bigwan. Bambae yumi fren gud wetem God, yumi gat wan niufala famle we i lavem yumi, mo yumi putum tingting blong yumi i stap long promes ya laef we i no save finis.—Ridim Mak 10:29, 30; 2 Korin 6:17, 18.

Sipos yu wantem save moa, plis lukluk japta 15 mo japta 16 blong buk ya, ?Wanem Samting We Baebol i Rili Tijim? we ol Witnes blong Jehova oli wokem.

[Foto Credit Line pej 26]

The Complete Encyclopedia of Illustration/J. G. Heck