?Baebol i Wan Buk Nomo?

“Olgeta tok blong Baebol oli kamaot long God fastaem . . . . Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”—2 TIMOTI 3:16, 17.

SAMFALA oli no ting se Baebol i save givhan long olgeta long evri samting we oli mekem. ?Wanem tingting blong yu?

• ?Baebol i wan gudfala buk nomo?

• ?Hem i wan tabu buk olsem ol narafala tabu buk?

• ?Hem i wan stori buk we i tijim yumi long ol gudfala fasin?

• ?Hem i Tok blong God?

Wan narafala kwestin hemia se ?from wanem tingting blong yu long Baebol i impoten? Plis yu tingbaot ol tok ya blong Baebol we i se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Tru ya, Baebol i talem se ol tok blong hem i blong tijim yumi, blong mekem yumi harem gud, mo blong mekem tingting blong yumi i longfala.

Maet yu ting se Baebol i wan gudfala buk nomo no i wan tabu buk olsem ol narafala tabu buk. Mo maet yu ting se ol tok blong hem i no stret. Sipos i olsem, bambae yu no save trastem ol tok blong hem blong lidim yu mo famle blong yu. Sipos Baebol i wan stori buk nomo, bambae ol tok blong hem i no save mekem yu harem gud, mo bambae yu no save trastem ol promes blong hem.

Plante milian man we oli stadi long Baebol, oli bilif se Baebol i Tok blong God. ?From wanem oli bilif olsem? ?Wanem i mekem se Baebol i defren long ol narafala buk? Plis yu ridim ol haf biaen we oli tokbaot faef samting we i soemaot se Baebol i defren.