Yumi Lanem Samting Long Tok Blong God

?From Wanem Yumi Mas Yusum Nem Blong God?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?From wanem God i gat wan nem?

Ating yu laekem moa taem man i singaot yu long nem blong yu, i bitim we hem i talem “man,” “masta,” “misis,” no “woman.” Nem blong yu i mekem se man i save se yu yu defren long ol narafala. Baebol i tokbaot God se hem i “Masta” we i hae olgeta, hem i God we i “gat olgeta paoa,” mo hem i God we i “mekem yumi.” (Jenesis 15:2; 17:1; Prija 12:1) Be prapa nem blong hem Jehova. Hem nomo i jusum nem ya from we hem i wantem se yumi fren gud wetem hem.​—Ridim futnot blong Eksodas 3:14.

Plante man we oli tanem Baebol i go long narafala lanwis oli tekemaot nem blong God mo oli talem ol tok olsem “God,” mo “Masta.” Be nem blong God i stap klosap 7,000 taem long ol olfala hanraet blong Baebol we oli stap long Hibru lanwis. I klia we God i wantem se ol man oli save nem blong hem.​—Ridim Aesea 12:4.

2. ?From wanem i impoten blong save nem blong God?

I no naf blong save olsem wanem blong talem nem blong God. Man we i save nem ya, hem i fren gud wetem God. Nem ya Jehova i minim “Hem i Mekem i Kamaot.” Nem ya i mekem tingting blong man i strong se bambae God i save mekem eni samting we hem i mas mekem blong stamba tingting blong hem i kamtru. Taswe, man we i save nem blong God mo i yusum nem ya, hem i bilif strong se ol samting we God i promes blong mekem bambae oli kamtru. (Ol Sam 9:10) Hem i trastem God mo i mekem samting we God i wantem fastaem long ol narafala samting. Bambae God i lukaot gud long ol man we oli mekem olsem.​—Ridim Ol Sam 91:14.

  3. ?From wanem God i wantem we ol man oli save nem blong hem?

God i wantem se ol man oli save nem blong hem from we hemia i mekem i gud long olgeta. Oli save kam fren blong God, mo oli save kasem laef we i no save finis. !From samting ya nao God i wantem se yumi talemaot nem blong hem!​—Ridim Jon 17:3; Rom 10:13, 14.

Jisas i tijim ol man blong oli save ol fasin blong God, ol loa blong hem, mo ol promes blong hem. Long rod ya, hem i givhan long ol man blong save nem blong God. Tede, ol tru Kristin oli gohed blong talemaot nem blong God long ol man long olgeta kantri. Oli joen gud long wok ya olsem wan grup we i “holem nem” blong God.​—Ridim Ol Wok 15:14; Jon 17:6.

4. ?Bambae God i mekem wanem blong leftemap nem blong hem?

Jehova God i wantem leftemap nem blong hem from we ol man oli talem ol giaman tok blong spolem nem blong hem. Samfala oli talem se God i no stamba blong laef mo yumi no nid blong obei long hem. Sam narafala oli talem se hem i no tingbaot yumi mo hem i stamba blong ol trabol we i mekem man i harem nogud. Ol man we oli talem ol tok olsem oli spolem nem blong God. Be bambae God i no letem fasin ya i gohed olwe. Bambae hem i spolem olgeta we oli stap spolem nem blong hem.​—Ridim Ol Sam 83:17, 18.

Wan narafala samting we Jehova bambae i mekem blong leftemap nem blong hem, hemia se bambae hem i yusum Kingdom blong hem blong finisim olgeta gavman blong man. Nao bambae ol man oli stap long pis mo oli sef. (Daniel 2:44) I no longtaem bambae olgeta man oli savegud we Jehova hem i God we i tru.​—Ridim Esikel 36:23; Matiu 6:9.

?Yu yu mas mekem wanem? Yu mas stadi long Tok blong God blong kam klosap moa long hem, mo yu mas joen wetem ol man we oli lavem hem. Taem Jehova i leftemap nem blong hem, bambae hem i tingbaot ol man we oli no lego hem.​—Malakae 3:16.

Sipos yu wantem save moa, plis lukluk japta 1 long buk ya ?Wanem Samting We Baebol i Rili Tijim? we ol Witnes blong Jehova i wokem.

[Tok blong pija long pej 10]

Nem blong God long Hibru lanwis we i stap long wan olfala hanraet