Jehova i Mekem Famle Blong Hem, i Joen Gud
Jehova i Mekem Famle Blong Hem, i Joen Gud
‘Tabu spirit i stap mekem yumi evriwan i joen gud. Nao from samting ya, yumi mas traehad blong joen gud oltaem.’—EFES. 4:3.
?BAMBAE YU YU ANSA OLSEM WANEM?
?From wanem God i stap mekemrere olgeta samting long heven mo long wol?
?Yumi mekem wanem blong folem tok ya se “Tabu Spirit, hem i stap mekem yumi evriwan i joen gud”?
?Wanem i save givhan long yumi blong yumi “kaen gud” long narafala?
1, 2. ?Wanem plan we Jehova i gat fastaem long saed blong wol ya mo ol man?
TAEM yu harem tok ya famle, ?yu yu tingbaot wanem? ?Yu tingbaot ol man we oli lavem yu mo oli mekem yu harem gud? ?Oli mekem yu harem se yu sef mo oli gat sem tingting olsem yu? ?Oli tijim yu gogo yu kam bigwan, mo yu save talemaot ol tingting blong yu long olgeta? Sipos yu gruap long wan famle we i lavem yu, ating yu yu tingbaot ol samting ya. Jehova i stamba blong famle. (Efes. 3:14, 15) Plan blong hem fastaem hemia se olgeta samting long heven mo long wol, bambae oli olsem wan famle nomo. Mo bambae oli harem gud from we oli sef, oli save trastem narafala mo oli joen gud.
2 Afta we Adam mo Iv i mekem sin, ol man oli no moa joen long famle blong God. Be God i no jenisim plan we hem i gat fastaem. Bambae God i mekem we wol ya i kam wan Paradaes we i fulap wetem ol pikinini blong Adam mo Iv, we oli stret gud olgeta. (Jen. 1:28; Aes. 45:18) Hem i mekemrere ol samting blong plan blong hem i kamtru. Plante vas blong Efesas i tokbaot fasin blong joen gud. Buk ya bambae i soemaot wanem we Jehova i mekem blong plan ya i kamtru. I gud yumi tokbaot sam vas long buk blong Efesas, blong save wanem we yumi mas mekem blong folem plan blong Jehova.
ROD WE JEHOVA I FOLEM BLONG MEKEM PLAN BLONG HEM I KAMTRU
3. ?Long Efesas 1:10, God i mekem wanem blong plan blong hem i kamtru? ?Wetaem God i stat mekemrere ol samting blong heven?
3 Ol samting we Jehova i mekem oli givhan blong plan blong hem i kamtru. Hem i mekemrere olgeta samting long heven mo long wol, blong oli kam joen wanples olsem wan famle nomo. I gat tu samting we God i mekem blong plan ya blong hem i kamtru. (Ridim Efesas 1:8-10.) Fastaem, God i rerem ol tabu Kristin blong oli laef long heven. Taem oli stap long heven, bambae oli gohed blong wok aninit long Jisas we i hed blong olgeta. Long dei blong Pentekos long yia 33, God i stat blong jusumaot ol man we bambae oli rul wetem Jisas. Hem i makemaot olgeta wetem tabu spirit. (Wok 2:1-4) From ded blong Jisas, God i luk olgeta se oli stret man long fes blong hem mo oli save kasem laef. Ol tabu Kristin oli save se God i adoptem olgeta olsem ol ‘pikinini blong hem.’—Rom 3:23, 24; 5:1; 8:15-17.
4, 5. ?Wanem nambatu samting we God stap i mekem?
4 Nambatu samting, se God i rerem ol man we bambae oli laef long Paradaes long wol ya. Olgeta ya oli wantem stap aninit long Kingdom we Jisas mo ol tabu Kristin oli joen long hem. Bambae “bigfala hip blong ol man” i faswan blong laef long Paradaes. (Rev. 7:9, 13-17; 21:1-5) Long 1,000 yia rul blong Kraes, bambae plante milian man oli laef bakegen mo bambae oli laef wetem bigfala hip blong man ya. Olgeta ya oli ‘ol samting long wol.’ (Rev. 20:12, 13) !Tru, bambae yumi gat plante janis blong soemaot se yumi joen gud! Long en blong 1,000 yia, bambae Setan i fri blong smoltaem, mo bambae hem i traem ol man laswan. Olgeta man we oli stanap strong, bambae God i adoptem olgeta, oli kam ol ‘pikinini blong hem’ long wol ya.—Rom 8:21; Rev. 20:7, 8.
5 Tede, Jehova i stap rerem ol tabu Kristin blong oli laef long heven, mo ol narafala sipsip blong oli laef long Paradaes long wol. ?Be yumi wanwan i save mekem wanem blong wok folem plan ya blong God?
“TABU SPIRIT, HEM I STAP MEKEM YUMI EVRIWAN I JOEN GUD”
6. ?Wanem ol vas we oli soemaot se ol Kristin oli mas joen wanples?
6 Baebol i talem se ol Kristin oli mas joen wanples. (1 Kor. 14:23; Hib. 10:24, 25) Be i no naf blong joen wanples olsem ol man we oli go long maket no long stad. Sipos yumi wantem joen gud, yumi mas folem wanem we Jehova i tijim yumi long hem, mo yumi mas letem tabu spirit i givhan long yumi blong gat ol gudfala fasin.
7. ?Yumi mekem wanem blong folem tok ya se “Tabu Spirit, hem i stap mekem yumi evriwan i joen gud”?
7 Yumi bilif long sakrefaes blong Jisas, taswe Jehova i luk yumi olsem stret man. Sipos yumi wan tabu Kristin, hem i luk yumi olsem wan pikinini blong hem. Sipos yumi joen long ol narafala sipsip, hem i luk yumi olsem wan fren blong hem. Be nating se i olsem, yumi stap yet long rabis wol ya mo samtaem bambae yumi gat problem wetem narafala. (Rom 5:9; Jem. 2:23) Taswe Baebol i talem se yumi mas gat longfala tingting wetem narafala. ?Yumi mas mekem wanem blong yumi joen gud wetem ol Kristin brata mo sista? Yumi mas mekem ‘tingting blong yumi i stap daon, mo yumi mas kwaet man.’ Pol i talem se yumi mas traehad blong gat pis mo blong joen gud wetem ol man. Hem i talem se: “Tabu Spirit, hem i stap mekem yumi evriwan i joen gud, mo hem i givim pis long yumi. Nao from samting ya, yumi mas traehad blong holem pis ya, blong yumi save joen gud oltaem.” (Ridim Efesas 4:1-3.) Wan rod blong folem ol tok ya, hemia blong letem tabu spirit blong God i jenisim fasin blong yumi. Yumi mas letem tabu spirit i givhan long yumi blong soemaot ol fasin we oli frut blong spirit. Ol gudfala fasin ya bambae oli givhan long yumi blong stretem ol trabol we yumi gat wetem ol narafala, mo blong joen gud wetem narafala. Be ol samting we God i no glad long hem oli mekem yumi seraot. Taswe, yumi no mas mekem ol rabis samting we tingting blong yumi i wantem.
8. ?Ol rabis samting we tingting blong man i wantem, oli seraotem man olsem wanem?
8 ?Ol ‘rabis samting we tingting blong man i wantem,’ oli seraotem man olsem wanem? (Ridim Galesia 5:19-21.) Man we i mekem nogud wetem woman, hem i stap longwe long Jehova mo long kongregesen. Man we i stilim woman blong narafala, hem i mekem famle i harem nogud. Man mo woman i seraot, mo ol pikinini oli stap wetem papa no mama nomo. Man we i mekem ol doti fasin, i no save fren gud wetem God mo wetem ol man we oli lavem hem. I sem mak, sipos yu wantem putum glu long tu samting, tufala samting ya i mas klin blong tufala i save fas gud tugeta. Man we i no sem blong mekem ol krangke fasin, hem i no obei long ol loa blong God mo i ting nating long olgeta. Ol narafala fasin we tingting blong man i wantem, oli seraotem man long ol narafala mo long God tu. Jehova i no laekem ol fasin ya nating.
9. ?Wanem ol kwestin we yumi mas askem blong save sipos yumi stap traehad blong holem pis wetem narafala?
9 Yumi wanwan i mas tingbaot ol kwestin ya se: ‘?Mi mi stap traehad blong holem pis wetem ol brata mo sista, blong joen gud wetem olgeta? ?Mi mi mekem wanem taem mi gat problem wetem narafala? ?Mi mi talemaot problem ya long ol fren blong mi? ?Mi wantem se oli tekem saed blong mi? ?Mi wet long ol elda blong oli stretem problem ya, from we mi no wantem toktok wetem narafala? Sipos mi save se narafala i gat poen agens long mi, ?mi mi stap longwe long hem from mi no wantem tokbaot samting ya?’ Sipos yumi mekem ol fasin ya, yumi no wok folem plan blong Jehova blong olgeta man oli joen gud long wan famle, aninit long rul blong Jisas.
10, 11. (1) ?From wanem yumi mas holem pis wetem ol brata mo sista? (2) ?Yumi mas mekem wanem blong yumi holem pis, mo blong Jehova i blesem yumi?
10 Jisas i talem se: “Sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God. Sipos yu yu mekem wan samting agens long wan man, . . . i gud yu go kwik, yu stretem samting ya.” (Mat. 5:23-25) Jemes i talem se: “Taem ol man blong mekem pis oli wok long kwaet fasin, i olsem we oli planem sid we frut blong hem, laef we i stret gud.” (Jem. 3:17, 18) Tru ya, sipos yumi no holem pis wetem narafala, yumi no save gohed blong mekem samting we i stret.
11 Long sam kantri we i gat faet long hem, ol fama oli no moa wok long graon from we i gat ol bom i stap aninit long graon. Taem ol bom ya oli bosta, ol fama oli fraet nao oli lego graon blong olgeta. From samting ya, ol man long ol vilej oli no moa gat wok mo i no moa gat plante kakae long taon. Yumi mas lukaot se ol slak fasin blong yumi i no spolem pis blong yumi, olsem we bom aninit long graon i save bosta enitaem. Sipos ol slak fasin blong yumi oli mekem se yumi no moa holem pis wetem narafala, bambae i had blong yumi kamgud moa long ol Kristin fasin. Yumi mas jenisim fasin blong yumi. Yumi fogivim ol narafala mo yumi mekem i gud long olgeta, nao bambae yumi gat pis wetem narafala mo Jehova bambae i blesem yumi.
12. ?Ol elda oli save mekem wanem blong yumi joen gud?
12 Ol elda oli save givhan long yumi blong yumi “kam wan nomo, we yumi bilif.” (Efes. 4:13) Hemia i min se oli givhan long evriwan long kongregesen blong oli joen gud oltaem. Oli wok wetem yumi long wok blong Jehova, mo oli givim advaes we i kamaot long Baebol. Nao oli halpem yumi blong yumi kam gud moa long ol Kristin fasin. (Efes. 4:22-24) Taem ol elda oli givim advaes long yu, yu mas tingbaot se Jehova i yusum olgeta blong rerem yu blong laef long niufala wol. Mo yufala ol elda, yufala i mas meksua se yufala i stretem ol narafala long fasin we i soemaot se yufala i wantem halpem olgeta.—Gal. 6:1.
“YUFALA I MAS KAEN GUD” LONG YUFALA
13. ?From wanem yu mas obei long ol tok blong Efesas 4:25-32?
13 Efesas 4:25-29 i tokbaot sam samting we yumi no mas mekem. Yumi no mas giaman, yumi no mas kros bitim mak, yumi no mas les mo yumi no mas talem ol rabis tok. Yumi mas talem ol samting we oli gud mo oli leftemap tingting blong man. Man we i no obei long ol tok ya, hem i seraotem man. Hem i “mekem Tabu Spirit blong God i harem nogud.” Spirit blong God nao i mekem man i joen gud. (Efes. 4:30) Pol i gohed blong tokbaot sam moa samting we yumi mas mekem blong gat pis mo joen gud wetem narafala. Hem i se: “Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala. Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.”—Efes. 4:31, 32.
14. (1) ?From wanem Pol talem se yumi mas “kaen gud” long narafala? (2) ?Wanem i save givhan long yumi blong yumi kaen long narafala?
14 Pol i talem se yumi mas “kaen gud” long ol brata mo sista blong yumi. Hem i talem olsem from we samtaem, yumi no kaen long narafala, mo yumi mas traehad blong kam gud moa long fasin ya. Yumi mas lanem blong tingbaot narafala fastaem. ?Bambae ol tok blong yu i mekem hem i harem olsem wanem? (Fil. 2:4) Samtaem yumi wantem talem wan samting we i mekem narafala i laf no i mekem man i ting se yumi gat hed. Be sipos samting we yumi wantem talem i no kaen, yumi no mas talem. Yumi mas tingting gud bifo yumi toktok, nao bambae yumi “kaen gud” long narafala.
LAV MO RESPEK LONG FAMLE
15. ?Efesas 5:28 i givhan olsem wanem long man we i mared?
15 Baebol i tokbaot fasin we Kraes i soemaot long kongregesen se i sem mak long fasin we man i mekem long woman blong hem. Fasin blong Kraes i givhan long man we i mared blong i lidim woman blong hem, i lavem hem, mo i lukaot gud long hem. Fasin blong Kraes i givhan long woman we i mared blong kasem save se hem i mas ona long man blong hem. (Efes. 5:22-33) Pol i talem se: “Long sem fasin, man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo.” ?Pol i minim wanem taem hem i talem tok ya “long sem fasin”? (Efes. 5:28) Ol tok we hem i talem long saed blong Kraes mo kongregesen i givhan long yumi blong save ansa. Hem i talem se Kraes i lavem kongregesen mo hem i letem laef blong hem blong sevem kongregesen. Kraes i mekem kongregesen i klin, “i olsem we hem i wasem long wota, mo long tok blong hem.” Taswe ol tok blong Pol i soemaot se man we i mared i mas givhan long wanwan memba long famle, blong i fren gud wetem Jehova. Nao hem i wok folem plan blong Jehova blong olgeta man oli joen gud long wan famle, aninit long rul blong Jisas.
16. ?Wanem gudfala samting i save kamaot sipos papa mo mama i mekem gud wok blong tufala?
16 Ol papa mo mama oli mas tingbaot se Jehova i givim wok long olgeta blong lukaotgud long ol pikinini blong olgeta. Sore tumas, plante man tede oli no soemaot se oli lavem pikinini blong olgeta. (2 Tim. 3:1, 3) Plante papa oli no wantem lukaot long famle, nao fasin ya i spolem ol pikinini mo i mekem oli harem nogud. Be Pol i talem long ol papa we oli Kristin se: “Bambae yufala i no mas mekem ol samting long ol pikinini blong yufala we i save mekem olgeta oli kros. Yufala i mas lukaot gud long olgeta. Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.” (Efes. 6:4) Long famle nao, pikinini i lanem blong lavem narafala mo blong gat respek long man we i lukaot long hem. Ol papa mo mama we oli tijim ol fasin ya long pikinini blong olgeta, oli wok folem plan blong Jehova blong mekem olgeta man oli joen gud. Pikinini i mas haremsave se papa mo mama i lavem hem. Taem tufala i kros, tufala i no mas faerap, mo singaot strong long pikinini mo talem ol nogud tok long hem. Olsem nao, tufala i tijim pikinini blong lavem narafala mo gat respek. Hemia bambae i rerem pikinini blong laef long niufala wol.
17. ?Yumi mas mekem wanem blong agensem Setan?
17 Yumi mas luksave se oltaem Setan i traehad blong blokem ol man blong oli no mekem wok blong Jehova. Mo hem i mekem evri samting we hem i naf blong mekem blong blokem yumi tu. Plante man oli mekem wanem we Setan i wantem. Oli divos, oli stap tugeta we oli no mared, mo oli agri taem man i mared wetem man no woman wetem woman. Ol man oli ting se ol fasin olsem oli stret nomo. Be yumi, yumi no folem ol fasin ya, yumi folem fasin blong Kraes. (Efes. 4:17-21) Yumi mas “kasem paoa blong God, we i olsem olgeta samting blong faet we i blong blokem ara.” Nao yumi save agensem Setan mo ol rabis enjel blong hem.—Ridim Efesas 6:10-13.
“YUFALA I MAS LAVEM OL MAN”
18. ?Yumi mas mekem wanem blong yumi save joen gud?
18 Yumi mas lavem ol man sipos yumi wantem joen gud. Yumi gat “wan Masta nomo” we yumi lavem hem, hemia Jisas Kraes. Yumi gat “wan God ya nomo” we yumi lavem hem, hemia Jehova. Mo yumi lavlavem yumi. Hemia nao from wanem yumi gat strong tingting blong holem pis wetem narafala mo blong joen gud. (Efes. 4:3-6) Long wan prea, Jisas i tokbaot fasin ya blong lavem man. Hem i talem se: “Mi mi no prea from olgeta ya nomo, mi prea tu from ol man ya we bambae oli save bilif long mi from tok blong olgeta. Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala, blong oli stap wan nomo.” Hem i gohed i talem se: “Mi mi mekem olgeta ya oli save yu. Mo bambae mi mekem olsem bakegen, blong oli save lavem mi olsem we yu yu lavem mi, mo blong laef blong mi i save joen gud long laef blong olgeta.”—Jon 17:20, 21, 26.
19. ?Yu yu gat strong tingting blong mekem wanem?
19 Maet i had long yumi blong jenisim sam fasin blong yumi. Be sipos yumi lavem Jehova, bambae yumi prea olsem man we i raetem Sam. Hem i talem se: “Plis yu mekem we mi mi gat wan tingting nomo i stap long hat blong mi, hemia blong fraet long nem blong yu.” (Sam 86:11, NW) Setan i traehad blong seraotem yumi long Papa blong yumi long heven, mo long ol Kristin brata mo sista blong yumi. Yumi mas gat strong tingting blong agensem hem. Yumi olsem ‘pikinini blong God, mo hem i lavem yumi tumas, nao from samting ya, yumi mas traehad blong folem fasin blong hem.’ Yumi mas soemaot lav long famle, long wok blong prij mo long kongregesen.—Efes. 5:1, 2.
[Kwestin]
[Tok blong pija long pej 29]
Hem i livim presen blong hem long olta, nao i go blong mekem pis wetem brata blong hem
[Tok blong pija long pej 31]
Ol papa mo mama, yufala i mas tijim ol pikinini blong yufala blong oli gat respek long narafala
