Laef We i No Save Finis

“Laef ya we i no save finis . . . hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”​—JON 17:2, 3.

SAVE i sevem laef blong man. Nouhou i sik bigwan taem hem i gat ten manis nomo. Mama blong hem i wok long helt long kantri ya Naeja. Hem i miksim suga, sol, mo wota blong pikinini blong hem i dring. Wan grup we Yunaeted Neson i stanemap blong givhan long ol pikinini (UNICEF) i talem se mama blong Nouhou “i kwik blong givhan long pikinini blong hem, mo wok blong hem i givhan long hem, mekem se pikinini blong hem i kam gud bakegen.”

Save blong Baebol tu i sevem laef blong man. Moses we i raetem ol fas haf blong Baebol, i talem se: “Ol tok ya oli no toktok nating nomo, laef blong yufala i stap long hem, mo yufala i mas obei long hem, blong bambae yufala i save stap longtaem.” (Dutronome 32:47) ?I tru se Baebol i save mekem laef blong yumi i longfala moa? ?Laef blong yumi i stap long ol tok ya olsem wanem?

Faef haf we yumi tokbaot finis long magasin ya, oli soemaot se Baebol i defren long ol narafala buk. Ol profet tok blong hem, ol stori blong hem, mo ol save we hem i givim long saed blong helt, oli tru. Ol tok blong hem i joen gud mo i givhan long yumi. Ol samting ya i soemaot se Baebol i no olsem ol narafala buk. Taswe i gud yu tinghevi long ol tok blong Baebol we i soemaot se yu save kasem wan laef we i longfala moa, hemia laef we i no save finis.

I gud yu lanem ol stret save long Baebol we i save mekem tingting blong yu i kwaet, mo i save lidim yu long wan gudfala laef we yu harem gud olwe. Ol Witnes blong Jehova oli glad blong givhan long yu blong save moa long Baebol.

[Bokis/ Foto blong pija long pej 9]

Wan narafala samting we i mekem Baebol i defren long ol narafala buk, hemia se Baebol nomo i save givim stret ansa long ol impoten kwestin we yumi askem. Ol kwestin olsem se:

• ?From wanem yumi laef?

• ?From wanem plante man oli harem nogud?

• ?Ol fren mo famle blong mi we oli ded, bambae mi save luk olgeta bakegen samtaem?

Yu save faenem ansa we Baebol i givim long ol kwestin ya, long buk ya ?Wanem Samting We Baebol i Rili Tijim? we ol Witnes blong Jehova i wokem.