Yu Letem Jehova i Mekem Yu Fri

“Loa ya we i save mekem man i fri, i stret olgeta. Mo man we i stap luklukgud long hem, . . . hem i no save fogetem ol samting we loa ya i talem.”​—JEM. 1:25.

?YU YU SAVE EKSPLENEM?

?Wanem loa i mekem man i fri olgeta, mo loa ya i mekem i gud long hu?

?Yumi mas mekem wanem blong yumi fri olgeta?

?Ol man we oli obei long Jehova bambae oli kasem wanem blesing?

1, 2. (1) ?Tede ol man oli harem olsem wanem, mo from wanem? (2) ?Yumi glad se bambae Jehova i mekem wanem?

YUMI laef long wan taem we plante man oli griri, oli mekem raf fasin, mo oli no folem ol loa. (2 Tim. 3:1-5) From samting ya, ol gavman oli putumap ol loa mo oli mekem sam samting blong halpem ol polis blong mekem gud wok blong olgeta. Long sam kantri, i gat ol sekiuriti we oli gad long haos blong ol man. Ol man oli putum plante lok long doa, mo oli pulum fenis raon long yad blong olgeta. Plante man oli fraet tumas mekem se oli no moa goaot long naet mo oli no letem pikinini blong olgeta i pleplei afsaed olgeta nomo. Tru ya, ol man oli harem se oli no fri, mo oli no sef nating. Mo i luk olsem se laef bambae i kam moa nogud.

² Long Iden bifo, Setan i talem se ol man oli save fri moa sipos Jehova i no lidim olgeta. !Be samting we i stap hapen naoia, i soemaot klia se Setan i giaman! Ol man oli mekem samting we olgeta nomo i wantem, i no samting we Jehova i wantem. From samting ya, olgeta man oli harem nogud, mo ol man blong Jehova tu oli harem nogud. Be yumi glad se wan dei, bambae Jehova i mekem se olgeta man oli fri long sin mo oli no moa slef blong rabis fasin. Baebol i talem se bambae God i “mekem ol pikinini blong hem oli fri olgeta.” (Rom 8:21) Jehova i stap mekem rod blong ol man blong hem oli fri. ?Hem i mekem samting ya olsem wanem?

3. ?Jehova i givim wanem loa long ol man blong hem? ?Bambae yumi tokbaot wanem kwestin?

³ Disaepol Jemes i talem se Jehova i yusum ‘loa ya we i stret olgeta we i save mekem man i fri.’ (Ridim Jemes 1:25.) Tede, ol man oli tingbaot loa olsem wan samting we i blokem man blong mekem wan samting, nao man i no moa fri. Ale, ?‘loa we i stret olgeta we i mekem man i fri,’ hem i wanem? ?Mo hem i mekem yumi fri olsem wanem?

LOA WE I MEKEM YUMI FRI

4. ?Loa ya we i stret olgeta hem i wanem? ?Hem i mekem i gud long hu?

⁴ ‘Loa ya we i stret olgeta we i save mekem man i fri,’ hem i no Loa blong Moses. Jehova i givim Loa long Moses blong soemaot long ol man Isrel se oli sinman, mo Jisas i mekem mining blong Loa ya i kam klia moa. (Mat. 5:17; Gal. 3:19) Sipos i olsem, ?Jemes i stap tokbaot wanem loa? Hem i tokbaot “loa blong Kraes.” (Gal. 6:2) ‘Loa ya we i stret olgeta’ hem i olgeta samting we Jehova i wantem yumi blong mekem. Loa ya i mekem i gud long ol Kristin we tabu spirit i makemaot olgeta mo ol “narafala sipsip.”​—Jon 10:16.

5. ?From wanem i isi blong man i folem loa we i stret olgeta?

⁵ ‘Loa we i stret olgeta’ hem i no fasfas, mo hem i no strong tumas blong man i folem. Hemia i defren olgeta long ol loa blong wan kantri. (1 Jon 5:3) Jisas i talem se: “Yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Mat. 11:29, 30) Mo tu, ‘loa ya we i stret olgeta’ i no stanap long wan longfala lis blong ol rul. Hem i stanap long lav. I olsem se Jehova i raetemdaon loa ya long hat mo tingting blong ol man.​—Ridim Hibrus 8:6, 10.

?‘LOA WE I STRET OLGETA’ I MEKEM YUMI FRI OLSEM WANEM?

6, 7. ?From wanem Jehova i wantem we yumi mekem ol samting we hem i glad long hem? ?Loa we i mekem man i fri i givhan long yumi olsem wanem?

⁶ Jehova i givim loa long man blong mekem i gud long hem, mo blong lukaot gud long hem. Yu traem tingbaot ol loa blong ol samting raonabaot long yumi. Wan long olgeta hemia loa blong graviti. * Ol man oli harem gud long ol loa ya from we oli luksave se ol loa ya i mekem i gud long olgeta. Long sem fasin, Jehova i wantem we yumi mekem ol samting we hem i glad long hem from we ol samting ya oli blong mekem i gud long yumi. Yumi lanem ol samting ya long loa blong Kraes we i stret olgeta.

⁷ Loa we i mekem man i fri i save lukaotgud long yumi. Hem i givhan long yumi blong harem gud long olgeta samting we yumi wantem mekem, mo long semtaem yumi no spolem yumi, yumi respektem raet mo tingting blong narafala. Loa ya i givhan long yumi blong luksave se yumi fri blong mekem samting we yumi wantem, sipos tingting we i pusum yumi i stret. Hemia i min se yumi mas wantem blong mekem samting we Jehova i glad long hem, mo we hem i wantem yumi blong mekem. Yumi mas lanem blong laekem fasin we i stret mo tanem baksaed long fasin we i no stret.​—Amos 5:15.

8, 9. ?Loa we i mekem man i fri, i mekem i gud long man olsem wanem? Yu talem wan stori.

⁸ Yumi sinman, taswe yumi mas traehad blong blokem ol rong tingting we i save pulum yumi. Be nating se i olsem, taem yumi obei long loa ya, yumi save harem gud. Yu traem tingbaot wan man nem blong hem Jay. Hem i slef long fasin ya blong smok tabak. Taem hem i stat stadi Baebol, hem i lanem se God i no glad long fasin blong hem. ?Olsem wanem? ?Bambae Jay i gohed nomo blong smok, no bambae hem i obei long Jehova? Jay i mekem desisen we i waes. Hem i jusum blong mekem wok blong God, nating se i had long hem blong lego smok. ?Hem i harem olsem wanem? Hem i talem se: “Mi mi glad tumas mo mi fri olgeta.”

⁹ Ol samting we wol i talem se i mekem man i fri, i pulum ol man blong oli harem gud long wanem we oli wantem. Be Jay i lanem se fasin ya i mekem man i slef blong fasin blong sin. Olgeta we oli obei long loa we i mekem man i fri, oli letem spirit blong God i lidim olgeta. Ale, oli fri mo oli gat “laef mo pis.” (Rom 8:5, 6) ?Wanem i givhan long Jay blong i no moa smok? God nao i givhan long hem. Hem i stadi Baebol oltaem, i prea long God blong i givim tabu spirit long hem, mo hem i glad taem ol Kristin brata mo sista oli givhan long hem. Yumi evriwan i save fri olgeta, sipos yumi mekem ol samting ya. Bambae yumi luk from wanem i olsem.

YU LUKLUKGUD LONG TOK BLONG GOD

10. ?I minim wanem se man i luklukgud long loa blong God?

¹⁰ Jemes 1:25 i talem se: “Loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, hem i no save fogetem ol samting we loa ya i talem. Hem i save mekem ol samting ya, mo taem hem i stap mekem olsem, God i stap mekem hem i harem gud long olgeta laef blong hem.” Grik tok we oli tanem i kam “luklukgud” i min se man i bendaon blong lukluk gud wan samting. Blong mekem olsem, man ya i mas traehad. Taswe sipos yumi wantem se loa ya i lidim tingting mo hat blong yumi, yumi mas traehad blong stadi gud long Baebol oltaem, mo tingting dip long ol samting we yumi lanem.​—1 Tim. 4:15.

11, 12. (1) ?Jisas i talem wanem we i soemaot se yumi mas folem trutok long laef blong yumi? (2) ?Ol yangfala oli mas lukaot blong no gat wanem tingting?

¹¹ Yumi mas tingbaot tu se oltaem yumi mekem samting we yumi lanem i wok long laef blong yumi. Long olgeta samting we yumi mekem, yumi mas folem trutok. Jisas i talem long sam man we i bilif long hem se: “Sipos yufala i obei long ol tok ya blong mi, yufala i prapa man blong mi. Nao bambae yufala i save trutok, mo trutok ya bambae i mekem yufala i fri man.” (Jon 8:31, 32) Taem yumi folem trutok ya long laef blong yumi, yumi soemaot se yumi save gud trutok. Ale i olsem se “tok blong God” i “wok” long laef blong yumi. Bambae hem i givhan long yumi blong jenisim ol fasin blong yumi, blong yumi folem moa fasin blong Jehova.​—1 Tes. 2:13.

¹² I gud yu tingbaot ol kwestin ya se, ‘?Mi mi save trutok? ?Laef blong mi i soemaot se mi stap folem trutok, no mi wantem tumas ol samting we wol i talem se oli mekem man i fri?’ Wan sista we papa mo mama blong hem i Witnes, i talem se taem hem i yangfala, hem i bilif long Jehova be hem i no rili save Jehova. Hem i talem se: “Mi neva lanem blong no laekem samting we Jehova i no laekem. Mi no tingbaot tu se Jehova i stap luk ol samting we mi mekem. Taem mi kasem trabol, mi no prea long hem. Mi trastem mi wan nomo, nating we mi save se i no stret.” Yumi glad tumas we sista ya i luksave biaen, se tingting blong hem i no stret, mo hem i jenisim tingting blong hem. Hem i mekem wok blong fultaem paenia.

TABU SPIRIT I GIVHAN BLONG MEKEM YUMI FRI

13. ?Tabu spirit i givhan blong mekem man i fri olsem wanem?

¹³ Seken Korin 3:17 i talem se: “Taem Spirit ya blong Masta blong yumi i stap long man, hem i stap mekem man ya i fri.” ?Tabu spirit i givhan blong mekem man i fri olsem wanem? Hem i givhan long ol man blong oli wokem ol gudfala fasin. “Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. Hem i stap mekem we olgeta oli kwaet man, mo oli save blokem ol samting we olgeta nomo oli wantem.” (Gal. 5:22, 23) Ol samting we oli stap hapen long wol tede, oli soemaot klia se sipos man i no gat ol fasin ya, speseli lav, hem i no save talem se hem i fri olgeta. Afta we aposol Pol i tokbaot ol gudfala fasin ya, hem i talem se: “I no gat loa blong blokem yufala long ol samting ya.” ?Pol i minim wanem? Hem i wantem talem se i no gat wan loa nating we i save blokem wan man, blong hem i no soemaot ol gudfala fasin ya mo blong kamgud moa long olgeta. (Gal. 5:18) Jehova i wantem se yumi soemaot ol fasin ya oltaem, mo blong olwe.

14. ?Spirit blong wol i mekem man i slef olsem wanem?

¹⁴ Ol man we oli letem spirit blong wol i lidim olgeta, oli ting se oli fri from oli save mekem eni samting we oli wantem. (Ridim 2 Pita 2:18, 19.) Be oli no save se oli slef blong ol fasin blong wol ya. Ol gavman oli putum plante loa blong mekem se ol man oli no bitim mak blong folem prapa tingting blong olgeta. Pol i talem se ol loa ya “i no kamtru blong ol stret man, be i blong man blong brekem loa, mo man we i no save obei long ol lida.” (1 Tim. 1:9, 10) Ol man we oli letem spirit blong wol i lidim olgeta, oli slef blong sin from we oli ‘mekem samting we tingting blong olgeta i wantem,’ mo fasin ya i stap spolem olgeta. (Efes. 2:1-3) Ol man we oli folem prapa tingting blong olgeta, oli kam slef blong sin. Oli olsem ol anis we oli kakae jam from we i swit, nao oli fas i stap long jam ya.​—Jem. 1:14, 15.

KRISTIN KONGREGESEN I MEKEM YUMI FRI

15, 16. ?Taem yumi stat blong joen wetem kongregesen, hemia i mekem i gud long yumi olsem wanem? ?Taem yumi stap wetem ol brata sista, yumi harem olsem wanem?

¹⁵ Kristin kongregesen i no wan ples blong storian mo harem gud nomo. Yumi joen wetem kongregesen from we Jehova i pulum yumi blong mekem olsem. (Jon 6:44) ?From wanem Jehova i pulum yu? ?Hem i luk se fasin blong yu i stret mo yu fraet long hem? Maet yu talem se, “!nogat!” Be sipos i olsem, ?Jehova i luk wanem long yu? Hem i luk se yu wantem obei long loa blong hem, mo yu wantem we hem i lidim yu. Taem yu stat blong joen wetem kongregesen, Jehova i lukaot gud long yu mo i tijim yu long Tok blong hem. Hem i mekem yu fri long ol giaman tijing mo bilif blong ol giaman skul. Hem i tijim yu blong yu folem fasin blong Jisas. (Ridim Efesas 4:22-24.) From samting ya, naoia yu gat janis blong stap wetem ol man blong hem, we Baebol i talem se God i mekem olgeta oli fri.​—Jem. 2:12.

¹⁶ Yu traem tingbaot: ?Yu yu fraet taem yu stap wetem ol man we oli lavem Jehova long olgeta hat blong olgeta? ?Taem yu storian wetem ol brata sista long Haos Kingdom, yu yu wari se maet wan man i stilim sam samting long basket blong yu? Nogat. Yu no wari mo yu harem se i sef nomo. Be sipos yu stap wetem ol man we oli no save Jehova, ating bambae yu wari long basket blong yu. Tru ya, yumi harem gud, mo yumi fri taem yumi stap wetem ol man blong Jehova. Be long fiuja, Jehova bambae i mekem yumi fri moa.

“GOD BAMBAE I MEKEM OL PIKININI BLONG HEM OLI FRI OLGETA”

17. ?Long taem ya we God i “soemaot ol pikinini blong hem,” bambae oli mekem wanem blong ol man oli fri?

¹⁷ Pol i tokbaot taem ya we God bambae i mekem ol man blong hem oli fri, i se: “Olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem.” Mo hem i gohed i se: “God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:19-21) Tok ya “olgeta samting we God i mekem” i minim ol man we bambae oli laef olwe long wol ya. Olgeta ya bambae oli harem gud taem God i “soemaot ol pikinini blong hem,” hemia ol tabu Kristin we hem i jusumaot. ?Wetaem God i stat blong soemaot ol pikinini blong hem? Hemia taem ol tabu Kristin we oli stap long heven oli givhan long Jisas blong spolem ol rabis man, mo oli lidim “bigfala hip blong ol man” i go fri long niufala wol.​—Rev. 7:9, 14.

18. ?Wanem bambae i mekem se ol man oli fri olgeta? ?Sipos oli obei long Jehova, bambae oli kasem wanem blesing?

¹⁸ Bambae ol man oli fri olgeta from we Setan mo ol rabis enjel blong hem oli no moa save spolem olgeta. (Rev. 20:1-3) !Tru ya, bambae yumi harem gud tumas! Ol 144,000 man we oli king mo oli pris, bambae oli yusum sakrefaes blong Jisas blong mekem se olgeta man oli fri long paoa blong sin, mo oli kam stret gud olgeta. (Rev. 5:9, 10) Afta we Setan i traem olgeta laswan, nao sipos oli holemstrong long bilif blong olgeta mo oli obei long Jehova, bambae Jehova i mekem oli fri olgeta, olsem we hem i wantem fastaem. Bambae hem i mekem “oli fri olgeta, olsem ol pikinini blong hem.” !Yu traem tingbaot! Bambae yu no moa harem se i had tumas blong mekem wok blong God. Bambae bodi mo tingting blong yu i stret gud olgeta, mo bambae yu naf blong soemaot ol fasin blong God.

19. ?Yumi mas mekem wanem blong yumi save fri olgeta?

¹⁹ ?Yu yu wantem se yu ‘fri olgeta, olsem ol pikinini blong God’? Yu mas letem ‘loa we i stret olgeta we i mekem man i fri’ i lidim tingting mo hat blong yu. Yu stadi gud long Baebol oltaem, mo yu soemaot long laef blong yu se yu folem trutok. Yu prea blong God i givim tabu spirit long yu. Yu joen wetem Kristin kongregesen, mo yu mas tekem ol kakae blong spirit we Jehova i stap givim long yumi. Mo yu no mas letem Setan i trikim yu olsem we hem i mekem long Iv, blong ting se ol tok blong Jehova oli strong tumas. Setan i waes gud blong trikim man. Be yumi no wantem we hem i winim yumi, from we yumi “savegud ol plan blong Setan.” Bambae yumi tokbaot samting ya long nekis stadi.​—2 Kor. 2:11.

[Futnot]

[Kwestin]

 [Tok blong pija long pej 14]

?Mi mi wantem tumas ol samting we wol i talem se i mekem man i fri?

[Tok blong pija long pej 14]

?Mi mi folem trutok long laef blong mi?