?From Wanem God i No Blokem Ol Trabol?

NATING se sam man oli prea, be tingting blong olgeta i no strong se God i stap. ?From wanem oli gat tingting olsem? Ating hemia from we plante trabol i mekem ol man oli harem nogud. ?Olsem wanem? ?Samtaem yu yu tingbaot from wanem God i no blokem ol trabol?

Yumi no stret gud olgeta. Samtaem yumi mestem mo yumi mekem sin. ?Yu ting se man i olsem taem God i mekem hem? ?Yu ting se God i mekem yumi blong yumi stap kasem trabol? Ating bambae yumi no save respektem wan god we i wantem se ol man oli harem nogud. Yu traem tingbaot: Yu luk wan niufala trak we i naes we i naes. Yu go klosap long hem, yu goraon long hem, nao yu sek se saed blong hem i ben. ?Olsem wanem? ?Bambae yu talem se kampani i no mekem gud trak ya? !Nogat! Yu save se kampani i mekem trak ya i “stret gud,” be wan samting i bangem hem.

Long sem fasin, ating yu luk we God i wokem gud ol samting raonabaot long yu. Oli stap long stret ples blong olgeta, mo oli naes. Be ating yu luk se laef blong ol man i fasfas mo fasin blong olgeta i no stret. ?From wanem ol man oli olsem? Baebol i tijim se God i mekem fas man mo fas woman, we tufala i stret gud. Be biaen tufala nomo i mekem sin. (Dutronome 32:4, 5) God i promes blong tekemaot ol trabol we i kasem ol man from sin blong tufala, mo blong mekem oli kam stret gud olgeta. !Hemia wan gudfala nius ya! ?Be from wanem God i tektaem?

?From Wanem God i Tektaem?

Blong ansa long kwestin ya, fastaem yumi mas tingbaot se hu bambae i rulum ol man. I no tingting blong Jehova se ol man oli rulum olgeta bakegen. Hem nao i mas rulum olgeta. Baebol i talem se: “I no gat man i save kam bos long laef blong hem.” (Jeremaea 10:23) Be Adam mo Iv tufala i jusum blong agensem rul blong God. From we tufala i no obei long loa blong God, tufala i mekem sin. (1 Jon 3:4) Ale, tufala i lusum laef ya we i stret gud olgeta. Mo  tufala i pulum trabol i kam long tufala, mo long ol pikinini we i kamaot biaen long tufala.

Jehova i letem ol man oli rul blong plante taosen yia. Be ol samting we oli hapen oli soemaot se ol man oli no naf blong rulum olgeta bakegen. Mo oli soemaot se gavman blong man i mekem ol man oli harem nogud. I no gat wan long olgeta i finisim faet, fasin we i no stret, raf fasin, mo sik.

?Bambae God i Mekem Wanem Blong Finisim Ol Trabol?

Baebol i promes se i no longtaem, bambae God i mekem wan niufala wol we stret fasin nomo i stap long hem. (2 Pita 3:13) Ol man we oli jusum blong obei long God, nao oli lavem hem mo ol narafala, bambae olgeta nomo oli laef long niufala wol ya.—Dutronome 30:15, 16, 19, 20.

Baebol i talem tu se bambae God i finisim ol trabol we i mekem ol man oli harem nogud. Mo bambae hem i spolem olgeta man we oli stap mekem trabol. Yumi stap klosap long taem ya, hemia “dei ya we God bambae i jajem ol man.” (2 Pita 3:7) Biaen Jisas Kraes, King ya we God i jusumaot, bambae i rul long olgeta man we oli obei long God. (Daniel 7:13, 14) ?Bambae ol man oli harem olsem wanem aninit long rul blong Jisas? Baebol i talem se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11.

King Jisas bambae i finisim sik, olfala mo ded. Ol trabol ya oli kamaot from man i agensem Jehova, we i “stamba blong laef blong olgeta samting.” (Ol Sam 36:9) Bambae Jisas i mekem ol man we oli stap aninit long rul blong hem, oli kamgud bakegen. Sam long ol promes we bambae i kamtru aninit long rul blong Jisas, hemia:

◼ “Bambae i no moa gat man olbaot long kantri ya we i save talem se hem i sik, from we Hae God bambae i fogivim ol man blong ples  ya, i tekemaot ol sin blong olgeta.”—Aesea 33:24.

◼ “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

Ating yumi harem gud tumas blong save se i no longtaem bambae God i mekem promes blong hem i kamtru. Bambae hem i finisim olgeta trabol we i mekem man i harem nogud. Be go kasem taem ya, yumi mas trastem God nating se hem i letem trabol i stap yet.

God i stap. Hem i save harem yu taem yu krae long hem from we yu harem nogud. Hem i wantem tumas se yu stap long taem ya we bambae yu harem gud long bodi blong yu, mo yu bilif strong long hem.