?Hu i Stap Harem Ol Prea?

SIPOS i gat wan God we i stap harem ol prea, yumi save tingbaot se hem nao i mekem olgeta samting. Hem i mekem bren blong yumi, taswe hem i save ol tingting blong yumi. Hem i save ansa long ol prea blong yumi, mo i save givhan long yumi blong winim ol trabol. Be maet yu stap askem se: ‘?From wanem man i bilif long God?’

Plante man oli ting se man we i bilif long God ya we i wokem olgeta samting, hem i no save agri long ol samting we ol saentis oli faenemaot. Be tingting ya i no tru. Yu traem tingbaot ol save we i kam biaen.

◼ Oli askem kwestin long 1,646 saentis, we oli tija long 21 yunivesiti blong Yunaeted Stet. Oli faenemaot se long evri 3 tija, 1 nomo i talem se: “Mi mi no bilif long God.”

Taswe, yumi luk se plante saentis oli bilif se i gat wan God i stap.

Ol Samting We i Soemaot Se God i Stap

?Olsem wanem? ?Yu mas bilif long God olsem nomo, we i no gat eni samting i soemaot se hem i stap? Nogat. Bilif blong man i no strong sipos hem i bilif olsem nomo. I mas gat sam samting we i soemaot se bilif blong hem i tru. Baebol i talem se man we i bilif, hem i putum tingting blong hem i strong long ol samting we “oli tru.” Ol samting ya, hem i no save luk, “be oli stap.” (Hibrus 11:1) Yu traem tingbaot. Taem wan man i toktok long yu long telefon, yu no luk hem be yu save se hem i stap from yu harem voes blong hem. Long sem fasin, yumi no save luk God, be i gat sam samting we i soemaot se hem i stap.

?Wanem ol samting we i soemaot se God i stap? Yumi mas lukluk ol samting raonabaot long yumi. Baebol i talem se: “Yes i tru, evri haos i gat man we i wokem, be God i wokem olgeta samting we i stap.” (Hibrus 3:4) ?Yu yu agri wetem tok ya blong Baebol? Taem yu tingbaot ol sta we oli stap long prapa ples blong olgeta, mo yu tingbaot laef se i stat olsem wanem, mo  olsem wanem bren blong man i wok, ating yu stap tingting se i mas gat wan God i stap, we i hae moa long ol man. *

Be ol samting raonabaot long yumi oli no save tijim yumi long evri samting long saed blong God. I olsem taem man i stap wokbaot afsaed long haos. Yu harem noes blong hem, be yu no luk hem from we doa i sat. Yu mas openem doa, blong yu save se hem i hu. Long sem fasin, yumi mas mekem wan samting blong faenemaot man we i mekem ol samting raonabaot long yumi.

Baebol i olsem doa we yumi openem blong save God. Taem yumi lukluk insaed long Baebol, i gat plante profet tok we oli kamtru stret olsem we Baebol i talem. Hemia i mekem yumi bilif strong se i gat wan God i stap. * Mo tu, ol stori long Baebol we i tokbaot ol samting we God i mekem long ol man, oli soemaot ol fasin blong hem.

God Ya We i Stap Harem Prea, ?Hem i Olsem Wanem?

Baebol i soemaot se God i no wan paoa nomo, be hem i save tingting mo hem i gat plante gudfala fasin blong hem. Taswe, hem i save lesin long yumi mo kasem save tingting blong yumi. Yumi save kam klosap long hem. Yumi harem gud tumas taem yumi ridim ol tok ya se: “Yu yu stap ansa long ol prea blong mifala. Olgeta man long evri ples bambae oli mas kam long yu.” (Ol Sam 65:2) God i harem mo i ansa long prea blong man we i bilif long hem.  Mo God i gat wan nem. * Baebol i talem se taem ol gudfala man oli prea, Jehova “i stap harem olgeta, be hem i stap tanem baksaed long ol man nogud.”—Ol Proveb 15:29.

Jehova i save harem gud, no i save harem nogud. Hem i “lavem ol man tumas.” Mo Baebol i talem se “hem i stap harem gud oltaem.” (2 Korin 13:11; 1 Timoti 1:11) Baebol i tokbaot taem ya we rabis fasin i kam plante long wol, i se: “Taem Hae God i luk samting ya, tingting blong hem i kam nogud.” (Jenesis 6:5, 6) Sam man oli talem se God i mekem ol man oli harem nogud blong traem olgeta. Be hemia i no tru. Baebol i talem se: “!God ya, hem i no save mekem wan samting we i no stret!” (Job 34:12) Be maet yu stap tingting se: ‘Sipos God i gat olgeta paoa, ?from wanem hem i no blokem ol trabol?’

Jehova i mekem man long fasin we hem i fri blong jusum samting we hem i wantem. Olsem nao, Jehova i soemaot se hem i tinghae long ol man. !Ating yu glad we yu save mekem wanem we yu wantem long laef! Sore tumas, plante man oli no jusum gud, nao oli mekem trabol long olgeta mo long ol narafala tu. I gud we yu tingting long kwestin ya se: ?God bambae i mekem olsem wanem blong finisim ol trabol, mo long semtaem i letem man i fri blong jusum samting we hem i wantem? Bambae yumi tokbaot kwestin ya long haf we i kam biaen.

[Ol futnot]

[Bokis blong pija long pej 5]

?Ol Skul Nao Oli Mekem Se Yu No Bilif Long God?

Sore tumas, be fasin blong ol skul i mekem se plante man oli no moa bilif long God. Ol skul oli joen long ol faet mo long wok blong teroris. Mo sam lida blong skul oli letem we man i mekem nogud long ol pikinini. Ale, plante man we fastaem oli stap prea long God, oli talem se, “Mi mi no bilif long God.”

?From wanem ol skul oli stamba blong plante nogud fasin? Blong talem stret, ol rabis man oli mekem ol nogud samting long nem blong skul. Baebol i talemaot se sam man bambae oli giaman se oli Kristin, blong oli kasem paoa long skul. Be oli yusum paoa blong olgeta blong mekem ol nogud fasin. Aposol Pol i talem long ol elda se: “Sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.”—Ol Wok 20:29, 30.

God i no glad nating long ol giaman skul. Baebol i talem se ol giaman skul oli gat fol from “blad . . . blong olgeta man we ol man oli kilim olgeta i ded.” (Revelesen 18:24) Long fes blong God, ol skul ya oli gat fol from we oli no tijim ol man blong save tru God, we i stamba blong fasin ya blong lavem man.—1 Jon 4:8.

God ya we i stap ansa long ol prea, i sore long ol man we oli harem nogud from fasin blong ol skul. From we hem i lavem ol man, i no longtaem bambae hem yusum Jisas blong jajem ol man blong ol skul we oli gat tu fes. Jisas i talem se: “Long Lasdei, bambae plante man oli save singaot long mi se, ‘Masta, Masta. Long nem blong yu, mifala i talemaot ol tok we God i givim long mifala. . . . ?Olsem wanem long mifala?’ Be bambae mi mi talem stret long fes blong olgeta se, ‘Neva mi mi save yufala. Yufala i man blong mekem ol rabis fasin, yufala i gowe long mi.’”—Matiu 7:22, 23.