?I Tru Se God i Stap Harem Ol Prea?

“Fastaem, mi mi no bilif se i gat wan God i stap. Nating se i olsem, samtaem mi mi prea. Mi no save sipos God i stap lesin long prea blong mi, no nogat. Be long hat blong mi, mi wantem se God i harem mi. Mi mi no glad mo mi harem se laef blong mi i blong nating nomo. Mi mi fraet blong bilif long God from mi ting se man we i bilif long God, hem i slak.”—PATRICIA, * blong AEALAN.

?OLSEM wanem? ?Yu yu gat tingting olsem Patricia? ?Samtaem yu prea, nating se yu no bilif se i gat wan God i stap? Ale, yu mas tingbaot se i no yu nomo we i mekem olsem. I gud yu ridim ol haf we i kam biaen.

◼ Sam man i askem kwestin long 2,200 man Briten, blong save tingting blong olgeta long God. Oli faenemaot se klosap 500 man nomo oli bilif se i gat wan God we i wokem olgeta samting long wol. Mo oli bilif se God i stap harem ol prea. Be bitim 1,200 man oli prea sam samtaem, nating se oli no bilif long God.

◼ Sam man oli askem kwestin long 10,000 man long ol defdefren kantri. Plante long olgeta we oli talem se oli no bilif long God, oli stap prea.

?From Wanem Oli No Bilif Long God?

Wan man Inglan, nem blong hem Allan i talem se: “Fastaem mi mi no bilif long God. Mi ting se ol skul oli wantem bos long ol man mo oli wantem mane nomo. Mo mi ting se sipos i gat wan God, bambae hem i blokem ol fasin we i no stret. Nating se mi tingting olsem, samtaem mi sidaon long wan kwaet ples mo mi prea, be mi no save se mi prea long hu. Samtaem mi stap tingbaot se, ‘?Laef i stat olsem wanem?’”

Ol man wanwan oli gat defdefren risen we i mekem se oli ting se God i no harem ol prea. Plante taem, oli tingting olsem from i gat plante kwestin we oli no save ansa blong olgeta. Sam long ol kwestin ya se:

◼ ?I tru se i gat wan God we i mekem olgeta samting?

◼ ?From wanem ol skul oli stamba blong plante nogud fasin?

◼ ?From wanem God i no blokem ol trabol?

Sipos yu save ansa blong ol kwestin ya, ?yu ting se bambae yu harem gud moa blong prea?

[Futnot]