“Mi Stap Wetem Yufala”

“Plante man bambae oli stap resis olbaot, mo [tru] save . . . bambae i kam bigwan moa.”—DAN. 12:4, futnot.

?BAMBAE YU YU ANSA OLSEM WANEM?

?Long taem blong yumi, ol man oli faenem tru save olsem wanem?

?Ol man we oli folem trutok oli kam “plante” olsem wanem?

?Stret save i “kam bigwan moa” olsem wanem?

1, 2. (1) ?From wanem yumi save se Jisas i stap wetem yumi tede, mo bambae i stap wetem yumi long niufala wol? (2) Folem Daniel 12:4, ?wanem gudfala samting i kamaot taem man i stadi gud long Baebol?

YU TRAEM tingbaot se yu stap long Paradaes. Long moning, taem yu girap, yu harem gud mo yu glad blong mekem ol wok blong yu. Yu no moa harem bodi blong yu i soa, yu no moa sik. Bodi blong yu i stret gud olgeta. Yu save lukluk mo harem samting. Yu save smelem, tajem mo testem samting. Yu gat plante paoa mo yu glad long wok blong yu. Yu gat plante fren, mo yu no wari long wan samting. Hemia ol blesing we bambae yu kasem taem Kingdom blong God i rulum wol ya. Bambae King Jisas Kraes i blesem ol man, mo i tijim olgeta blong oli save Jehova.

² Long taem ya, bambae Jehova i givhan long ol man blong hem, blong oli tijim ol narafala blong oli save hem. Longtaem finis i kam, Jehova mo Jisas tufala i stap mekem olsem. Bifo we Jisas i go antap long heven, hem i talem long ol man blong hem se: “Mi bambae mi stap wetem yufala.” Yes, bambae hem i gohed blong givhan long olgeta. (Ridim Matiu 28:19, 20.) Bambae yumi tokbaot wan profet tok we Daniel i raetem bitim 2,500 yia bifo. Profet tok ya i save mekem yumi bilif strong long tok blong Jisas. Daniel i tokbaot taem we yumi stap long hem, i se: “Plante man bambae oli stap resis olbaot, mo [tru] save . . . bambae i kam bigwan moa.” (Dan. 12:4, futnot) Hibru tok we oli tanem i kam “resis olbaot” i givim tingting ya se man i stadi gud long wan samting. Profet tok ya i soemaot se ol man we oli stadi gud long Baebol, oli kasem wan nambawan blesing. Oli kasem stret save long Tok blong God. Hem i talem tu se tru save bambae i “kam  bigwan moa.” Ol man we oli faenem save ya, bambae oli folem long laef blong olgeta, mo oli tijim ol narafala long hem. Mo bambae ol man long evri ples oli gat janis blong lanem ol trutok ya. Bambae yumi tokbaot olsem wanem profet tok ya i kamtru. Olsem nao, yumi save bilif strong se Jisas i stap wetem ol man blong hem tede, mo bambae Jehova i mekem ol promes blong hem oli kamtru.

OL MAN BLONG GOD OLI FAENEM TRU SAVE

3. ?Wanem i hapen afta we ol aposol oli ded?

³ Aposol Pol i talem se sam man long Kristin kongregesen bambae oli agensem trutok, mo oli giaman long ol Kristin blong lidim olgeta i go krangke. Samting ya i hapen afta we ol aposol oli ded, mo kwiktaem nomo ol giaman tijing i kasem plante ples olsem wan faea. (Wok 20:28-30; 2 Tes. 2:1-3) Blong plante handred yia, ol man we oli talem se oli Kristin oli no gat ‘tru save.’ Ol lida blong skul oli talem se oli bilif long Baebol, be oli tijim ol man long “ol tok blong ol devel,” hemia ol giaman tijing we oli no leftemap God. (1 Tim. 4:1) Ale, bighaf blong ol man oli no save trutok long saed blong God. Be oli lanem ol tijing olsem God i wan Triniti, wan samting insaed long man i gohed blong laef afta we hem i ded, mo sam man oli stap bon long helfaea.

4 ?Long ol yia 1870, wan grup blong ol Kristin i mekem wanem blong faenem trutok blong Baebol?

⁴ Be 40 yia bifo we ol las dei i stat, long ol yia 1870, ol samting oli jenis. Wan smol grup blong ol tru Kristin long Amerika, oli kam wanples blong stadi gud long Baebol mo blong faenemaot tru save. (2 Tim. 3:1) Nem blong smol grup ya, ol Baebol Studen. Olgeta ya oli gat tingting daon, mo oli wantem mekem samting we God i wantem. Oli no olsem “ol man we oli waes, mo ol man we oli skul gud.” Jisas i talem se olgeta ya bambae oli no save faenem tru save. (Mat. 11:25) Ol Baebol Studen oli ridim gud Baebol, oli storian mo oli tingting dip long hem. Biaen, oli prea blong God i lidim olgeta. Oli skelem ol defren vas long Baebol, mo oli stadi gud long ol buk blong ol narafala we oli stap lukaotem trutok. Sloslo ol Baebol Studen oli faenemaot trutok we blong plante handred yia, ol man oli no bin save long hem.

5. ?From wanem ol Baebol Studen oli wokem smol pepa ya The Old Theology?

⁵ Ol Baebol Studen oli glad tumas long trutok we oli faenem, be oli no flas from. Oli save se trutok ya i stap oltaem long Baebol. Taswe oli no talemaot se oli faenem wan niufala samting. (1 Kor. 8:1) Defren olgeta, oli wokem ol smol pepa we nem blong olgeta The Old Theology. Ol pepa ya i blong givhan long ol man blong oli save trutok blong Baebol. Faswan pepa i givhan long ol man blong oli stadi Baebol. Olsem nao oli save sakemaot “ol giaman kastom blong man” mo oli tinghevi long ol tru tijing blong Jisas mo ol aposol. Oli kolem tru tijing ya se “tijing blong fastaem.”—The Old Theology, Pepa 1, Eprel 1889, pej 32.

6, 7. (1) ?Stat long ol yia 1870, ol Witnes blong Jehova oli kasem save long wanem trutok? (2) ?Wanem trutok we i mekem yu yu glad tumas?

⁶ Stat long ol yia 1870, ol Witnes blong Jehova oli kasem save long plante nambawan trutok. * Taem yumi stadi long ol trutok ya, yumi stap lanem ol gudfala samting we oli givhan long yumi blong mekem se laef blong yumi i kam gud. Oli mekem yumi harem gud, mo yumi save putum tingting blong yumi long ol promes blong God. Oli givhan long yumi blong save Jehova, God ya we i lavem yumi, mo blong kasem save samting we hem i wantem. Oli talemaot klia se Jisas hem i hu, from wanem hem i kam long wol mo i ded, mo hem  i mekem wanem tede. Ol nambawan trutok ya oli givhan long yumi blong kasem save from wanem God i letem rabis fasin i stap, from wanem yumi ded, olsem wanem blong prea, mo yumi mas mekem wanem blong yumi save harem gud.

⁷ Mining blong ol profet tok i “stap haed” blong longtaem. Be tede, yumi naf blong kasem save long olgeta from we oli stap kamtru long taem blong en. (Dan. 12:9) Plante long ol profet tok ya oli stap long fofala buk blong Baebol we oli kolem ol Gospel, mo long buk blong Revelesen. Yu traem tingbaot. Jehova i givhan long yumi blong save ol samting we oli stap hapen long heven, we yumi no save luk wetem prapa ae blong yumi. Yumi save se Jisas i kam King finis. Yumi save se i gat wan bigfala faet long heven, mo oli sakemaot Setan i kamdaon long wol. (Rev. 12:7-12) Mo Jehova i givhan long yumi blong save mining blong ol samting we yumi save luk. Yumi save from wanem i gat ol faet, graon i seksek, sik, mo kakae i sot. Mo tu, yumi save from wanem ol man oli mekem ol nogud fasin, nao laef long wol ya i “kam strong tumas.”—2 Tim. 3:1-5; Luk 21:10, 11.

8. ?Hu i givhan long yumi blong kasem save long trutok?

⁸ Jisas i talem long ol man blong hem se: “Yufala we i stap luk ol samting ya, yufala i save harem gud. Mi mi talem long yufala, bifo i gat plante profet mo plante king we oli wantem tumas blong luk ol samting ya we yufala i stap luk, be neva oli luk. Mo oli wantem tumas blong harem ol tok ya we yufala i stap harem, be neva oli harem.” (Luk 10:23, 24) Jehova God nao i mekem se yumi “luk” mo yumi “harem” trutok. Hem i yusum tabu spirit blong hem, we i “Spirit blong Givhan,” blong halpem yumi blong kasem save long trutok. !Yumi glad tumas we hem i mekem olsem! (Ridim Jon 16:7, 13.) I gud yumi tinghae oltaem long trutok mo yumi givhan long ol man blong oli save trutok ya.

“PLANTE MAN” OLI FOLEM SAVE YA WE I TRU

9. ?Wajtaoa blong Eprel 1881, i singaot ol man blong oli mekem wanem?

⁹ Wan haf long Wajtaoa blong Eprel 1881, i talem se, “I Nidim 1,000 Man Blong Prij.” Ol tok long haf ya i singaot olgeta long kongregesen blong oli mekem wok blong prij fultaem (colporteur), we tede yumi kolem paenia. Oli mas go long evri ples we oli naf blong go long hem, blong faenem ol gudfala man. Hemia ol man we oli lavem God, be oli no gat stret save long hem. Mo oli mas tijim ol man ya long trutok blong God mo Baebol.

10. ?Plante man oli mekem wanem afta we oli ridim Wajtaoa we i singaot 1,000 man blong prij fultaem?

¹⁰ Ol Baebol Studen oli luksave se ol tru Kristin oli mas talemaot gud nius. Ale oli singaot ol narafala man blong oli prij. Long taem ya, oli no kasem 1,000 man blong prij fultaem, from i gat sam handred man nomo we oli joen long ol miting blong ol Baebol Studen. Be afta we plante man oli ridim Wajtaoa mo ol narafala smol pepa, oli luksave se oli faenem trutok, mo oli wantem givhan long ol narafala. Long 1882, wan man Inglan i ridim wan Wajtaoa mo wan buklet blong ol Baebol Studen, nao i talem se: “Plis yufala i talem long mi se mi mas mekem wanem blong mi prij, mo mi mas talemaot wanem, blong mi mekem gudfala wok ya we God i wantem yumi blong mekem.”

11, 12. (1) ?Olgeta we oli prij fultaem oli wantem mekem wanem? (2) ?Oli stanemap ol niufala kongregesen olsem wanem?

¹¹ Long 1885, i gat klosap 300 man blong prij fultaem. Olgeta ya oli gat sem tingting olsem yumi. Oli wantem pulum ol man blong oli kam man blong Jisas Kraes. Be fasin blong  wok blong olgeta i defren long hemia we yumi stap folem tede. Yumi mekem stadi wetem ol man wanwan, mo yumi singaot olgeta i kam long ol miting. Be bifo, olgeta we oli prij fultaem oli givimaot plante buk, mo oli singaot plante man oli kam wanples blong stadi Baebol. Long rod ya, oli stanemap ol niufala kongregesen, we long taem ya oli kolem se ol klas.

¹² Yu traem tingbaot, long 1907, wan grup blong olgeta we oli prij fultaem, oli go long wan taon mo oli traem faenem ol man we oli gat buk ya, Millennial Dawn (we narafala nem blong hem se Studies in the Scriptures). Taem oli faenem olgeta, oli singaot ol man ya oli kam long miting blong Sande, we oli mekem long haos blong wan man we i intres long trutok. Ale long miting ya, wan we i prij fultaem i mekem tok ya, Plan Blong God Long Ol Yia We Oli Pas. Hem i mekem tok ya blong wan ful dei. Long Sande we i kam biaen, hem i talem long olgeta we oli kam se oli mas joen oltaem long ol miting. Long 1911, ol brata oli traem wan narafala rod blong pulum ol man oli kam man blong Jisas. Fifti eit brata oli go long ol defren ples long Yunaeted Stet mo Kanada blong givim ol pablik tok. Oli raetem nem mo adres blong ol man we oli kam long miting. Mo oli seraotem olgeta long ol grup, nao oli save mekem miting long haos blong sam long olgeta. Long rod ya, oli stanemap ol niufala kongregesen. Long 1914, i gat 1,200 kongregesen blong ol Baebol Studen long wol.

13. ?Wanem samting long wok blong prij we yu yu sapraes long hem?

¹³ Tede, i gat 109,400 kongregesen long wol, mo klosap 895,800 brata mo sista oli mekem wok blong paenia. I gat klosap 8 milian man we oli tinghevi long tru save mo oli folem long laef blong olgeta. (Ridim Aesea 60:22.) * Yumi sapraes blong luk ol namba ya, from we yumi save se Jisas i bin talem se ol man bambae oli no laekem nating ol man blong hem. Hem i talem se ol man bambae oli agensem strong ol man blong hem, oli putum olgeta long kalabus, mo oli save kilim olgeta i ded tu. (Luk 21:12-17) Setan wetem ol enjel blong hem, mo plante narafala man oli traem blong blokem wok blong prij. Nating se i olsem, ol man blong Jehova oli gohed blong pulum ol narafala i kam man blong Jisas, mo oli kasem gudfala frut long wok ya. Oli stap prij “long olgeta ples long wol.” Oli prij long ol ples we i hot, ol ples we i kolkol, long ol hil, long ol draeples, long ol taon, mo long ol ples we i no gat plante man long hem. (Mat. 24:14) Jehova nao i givhan long ol man blong hem blong oli mekem bigfala wok ya.

TRU SAVE I “KAM BIGWAN MOA”

14. ?Ol buk mo magasin blong yumi oli mekem tru save i kam bigwan moa olsem wanem?

¹⁴ Tru save i kam bigwan moa from we plante  man oli stap talemaot gud nius. Mo ol buk mo magasin blong yumi oli mekem se tru save i kasem plante moa man. Long Julae 1879, ol Baebol Studen oli wokem faswan Wajtaoa. Long taem ya oli kolem magasin ya se Zion’s Watch Tower and Herald of Christ’s Presence. Ol Baebol Studen oli askem long wan kampani blong i printim 6,000 kopi blong faswan magasin ya long Inglis. Charles Taze Russell, we i gat 27 yia blong hem long taem ya, i lukaot long wok ya. Mo faef narafala Baebol Studen oli raetem ol haf blong Wajtaoa ya. Tede, oli printim 42,182,000 Wajtaoa long 195 lanwis. Mo oli printim 41,042,000 Wekap! long 84 lanwis. Tufala magasin ya, oli seremaot long olgeta ples long wol i bitim ol narafala magasin. Mo tu, evri yia oli printim klosap 100 milian buk mo Baebol.

15. ?Yumi kasem mane blong printim ol buk mo magasin olsem wanem?

¹⁵ Mane we oli kasem blong mekem wok ya i kamaot long ol presen mane nomo. (Ridim Matiu 10:8.) Ol kampani blong printim ol buk oli sapraes long samting ya, from we oli save se ol masin blong printim buk, pepa, ing, mo ol narafala samting we oli yusum blong printim buk, oli sas tumas. Wan brata long Betel we i stap pem ol samting blong printim buk, i tokbaot ol bisnes man we oli visitim Betel. Hem i talem se: “Oli sapraes se wetem presen mane nomo, yumi save pem ol niufala masin we i save printim plante buk wantaem. Mo oli sapraes blong luk ol yangfala we oli glad blong wok long Betel.”

BAMBAE WOL I FULAP WETEM SAVE BLONG GOD

16. ?From wanem Jehova i mekem se tru save i kam bigwan moa?

¹⁶ Jehova i mekem se tru save i kam bigwan moa from we hem i wantem “sevem olgeta man, mo i wantem we olgeta man bambae oli save trutok blong hem.” (1 Tim. 2:3, 4) Jehova i wantem se ol man oli save trutok, nao oli save wosipim hem long fasin we i stret, mo hem i save blesem olgeta. From wok blong prij, Jehova i hivimap ol Kristin we tabu spirit i makemaot olgeta. Mo hem i hivimap “wan bigfala hip blong ol man” we bambae oli laef olwe long wol. Ol man ya oli kamaot “long olgeta kala, mo long olgeta kantri, mo long olgeta laen, mo long olgeta lanwis.”—Rev. 7:9.

17. Namba blong ol man blong Jehova i kam antap bigwan. ?Hemia i soemaot wanem?

¹⁷ Long ol 130 yia we i pas, namba blong ol man we oli wosipim Jehova i kam antap bigwan. Hemia i soemaot klia se Jehova mo King we hem i jusumaot, tufala i stap wetem olgeta. Tufala i lidim olgeta, lukaotgud long olgeta, mo tijim olgeta. Jehova i talem se bambae hem i givhan long plante man blong oli faenem trutok long taem blong yumi. Hem i holem promes blong hem. Mo yumi save se bambae hem i mekem ol narafala promes blong hem oli kamtru. Wol ya “bambae i fulap gud long ol man we oli savegud Hae God, olsem we solwota i fulap gud long ples blong hem.” (Aes. 11:9) !Yu traem tingbaot ol nambawan blesing we ol man bambae oli kasem long taem ya!

[Ol futnot]

[Kwestin]

[Tok blong pija long pej 14]

Ol Baebol Studen oli gat tingting daon, mo oli mekem samting we God i wantem

[Tok blong pija long pej 15]

Jehova i tinghae long yu taem yu traehad blong mekem se tru save i kasem plante moa man