Yumi Lanem Samting Long Tok Blong God

?Ol Enjel Oli Save Mekem Wanem Long Yumi?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?Ol enjel oli olsem wanem?

Ol enjel oli ol spirit man we oli stap long heven. Oli hae moa long ol man. God tu hem i spirit. Hem i mekem ol enjel longtaem bifo we hem i mekem wol ya. (Job 38:4, 7; Matiu 18:10) I gat plante milian enjel we oli stap stanap raon long bigfala jea blong Jehova.—Ridim Ol Sam 103:20, 21; Revelesen 5:11.

2. ?Ol enjel oli save givhan long ol man?

Tu enjel i bin givhan long gudfala man ya Lot. Lot mo famle blong hem oli stap long wan taon we Jehova i wantem spolem, from we i gat tumas rabis fasin long hem. Tufala enjel ya i talem long Lot blong i tekem famle blong hem mo oli aot long taon ya. Sam man oli no lesin long woning ya, from we oli ting se i wan tokplei. Be Lot mo tufala gel blong hem oli obei long woning we God i givim, nao oli laef.—Ridim Jenesis 19:1, 13-17, 26.

Baebol i talem se ol enjel oli givhan long ol man tede blong oli harem gud nius blong Kingdom. Oli lidim ol man blong God blong oli talemaot nius ya. (Matiu 24:14) Nius ya i wan gudfala nius be i wan woning tu. Sem mak olsem long taem blong Lot, woning ya i no wan tokplei. Woning ya i kamaot long God.—Ridim Revelesen 1:1; 14:6, 7.

God i save yusum ol enjel blong givhan long yumi blong stanap strong, taem ol samting oli traem yumi. Hem i yusum wan enjel blong mekem Jisas i strong.—Ridim Luk 22:41-43.

I no longtaem, God bambae i yusum ol enjel long wan narafala rod. Bambae oli finisim ol rabis man we oli mekem ol man oli safa. Nao bambae olgeta man oli stap gud.—Ridim 2 Tesalonaeka 1:6-8.

 3. ?Ol rabis enjel oli save mekem wanem long yumi?

Plante man long wol oli no obei long God. Sem mak long heven, plante enjel oli rebel agensem God. (Jud 6) Ol enjel ya oli kam ol rabis enjel. Setan nao i jif blong olgeta. Hem mo ol rabis enjel blong hem oli stap lidim ol man oli go krangke.—Ridim Revelesen 12:9.

Setan i yusum ol bisnes we oli mekem kruked fasin, ol gavman blong man, mo ol giaman skul blong pulum ol man oli gowe long God. Taswe, Setan nao i stamba blong ol fasin we oli no stret, raf fasin, mo ol trabol we i stap spolem ol man.—Ridim 1 Jon 5:19.

4. ?Ol rabis enjel oli lidim ol man oli go krangke olsem wanem?

Setan i trikim plante man blong oli bilif se taem man i ded, hem i kam wan spirit, nao i save toktok wetem ol man. Be Baebol i talem se ol dedman oli no moa save wan samting. (Prija 9:5) Ol rabis enjel oli tekem voes blong ol man we oli ded, blong trikim ol man. (Aesea 8:19) Mo tu oli yusum ol kleva, ol man blong mekem nakaemas, ol man blong talemaot samting we bambae i kamtru, mo ol man blong lukluk ol sta blong talemaot fiuja. Baebol i talem se yumi no mas joen nating long olkaen wok olsem. Taswe, yumi mas sakemaot eni samting we i joen wetem wok blong ol rabis enjel mo ol kleva.—Ridim Dutronome 18:10, 11; Ol Wok 19:19.

Sipos yumi lavem Jehova, bambae yumi no fraet long ol rabis enjel. Taem yumi stadi Baebol mo yumi mekem samting we hem i talem, yumi save kam klosap long God mo yumi blokem Setan. Jehova i gat moa paoa i bitim ol rabis enjel. Ol gudfala enjel blong Jehova oli save mekem yumi stanap strong taem yumi kasem trabol.—Ridim Ol Sam 34:7; Jemes 4:7, 8.

Sipos yu wantem save moa, plis yu lukluk japta 10 long buk ya ?Wanem Samting We Baebol i Rili Tijim? we ol Witnes blong Jehova oli wokem.