Yu Kam Klosap Long God Ya We i Stap Harem Prea

PLANTE man we oli talem se oli bilif long God, oli no save eksplenem from wanem oli bilif olsem. Oli no save talem from wanem ol skul oli mekem ol fasin we i nogud, mo from wanem God i letem trabol i stap. Oli prea nomo long wan God we oli no kasem save long hem.

Be yu yu save kam klosap long God. Taem yu kasem save long God, bambae yu lavem hem mo yu tinghae long hem, nao bambae bilif blong yu i kam strong moa. Bilif blong yu i mas stanap long ol samting we i tru. (Hibrus 11:1) Sipos yu save trutok long saed blong God, bambae yu save gud hem, mo yu toktok long hem olsem we yu toktok long wan fren. Bambae yumi tokbaot sam man we oli prea, nating se oli no save sipos i gat wan God i stap.

◼ Patricia we yumi tokbaot hem finis, i talem se: “Wan dei, mi wetem sam fren blong mi, mifala i stap tokbaot ol jos. Mi talem long olgeta se mi mi kamaot long haos from we papa blong mi we i no bilif long God, i stap rao wetem wan Witnes blong Jehova. Ale, wan long ol fren ya i talem se: ‘Maet samting we ol Witnes blong Jehova i talem i tru.’

“Wan narafala fren blong mi i talem se: ‘!Yumi traem go long jos blong olgeta blong harem se oli tokbaot wanem!’ Ale, mifala i go. Nating se sam long mifala i gat tu tingting long samting we mifala i harem, be mifala i gohed blong go long ol miting blong olgeta, from we oli kaen long mifala.

“Long wan Sande, mi harem wan samting long miting we i jenisim tingting blong mi. Man we i mekem tok i eksplenem from wanem ol man oli stap harem nogud. Fastaem, mi mi no save se God i mekem man i stret gud olgeta. Mo mi no save se wan man nomo i statem fasin blong sin, nao evri man i stap ded from we oli sinman. Mo tu, man we i mekem tok i eksplenem from wanem ded blong Jisas i naf blong mekem ol man, oli kasembak laef ya we fas man i bin lusum. * (Rom 5:12, 18, 19) Wantaem nomo, ol samting oli klia long tingting blong mi. Long taem ya, mi jes save se i gat wan God we i kea long yumi. Ale, mi gohed blong stadi long Baebol. Hemia fastaem long laef blong mi we mi harem se mi prea long tru God we i harem mi.”

◼ Allan, we hem tu yumi tokbaot finis, i talem se: “Wan dei, ol Witnes blong Jehova oli kam long haos blong mifala, nao woman blong mi i  talem long olgeta blong oli kam insaed. Hem i laekem tumas blong harem se ol man bambae oli laef olwe long wol. Mi mi kros tumas, ale mi singaot hem i kam luk mi long kijin. Mi talem long hem se: ‘!Yu yu krangke ya! !Yu no mas bilivim samting we ol man ya oli talem!’

“Hem i ansa se: ‘Ale, sipos i olsem, yu go pruvum se olgeta oli rong.’

“Mi mi no save pruvum wan samting nating. Be ol Witnes oli kaen long mi. Oli givim wan buk we i tokbaot se laef i kamaot olsem nomo no wan man i stamba blong hem. Taem mi ridim buk ya, mi luk se ol tingting we oli stap insaed oli stret, oli klia, mo plante samting i pruvum se oli tru. Hemia i mekem mi mi wantem blong save God moa. Mi stat blong stadi Baebol wetem ol Witnes, mo smoltaem biaen, mi luksave se wanem we Baebol i talem, i defren olgeta long wanem we mi stap tingbaot long saed blong ol skul. Taem mi kasem save long Jehova, mi talemaot moa ol samting we oli stap long hat blong mi. Mi mi gat sam nogud fasin, ale mi prea long Jehova blong i halpem mi. Mi save se hem i ansa long ol prea blong mi.”

◼ Andrew we i stap long Inglan, i talem se: “Mi mi strong long tingting blong mi, mo mi laekem tumas ol save blong saentis. Mo mi bilif se olgeta laef samting oli kamaot olsem nomo. Be  hemia from we mi harem ol man oli stap talem se i tru. Mi mi no bilif long God from we i gat tumas rabis samting i stap hapen.

“Nating se i olsem, samtaem mi stap tingting se: ‘Sipos i gat wan God, mi wantem save se, ?from wanem i gat tumas raf fasin mo faet?’ Taem mi kasem hadtaem, samtaem mi prea, be mi no save se mi stap prea long hu.

“Wan dei, wan Witnes blong Jehova i givim wan smol pepa long woman blong mi. Smol pepa ya i tokbaot kwestin ya se: ?Wol Bambae i Lus No i Stap? Mi mi wantem tumas blong save ansa blong kwestin ya. Ol tok long pepa ya oli mekem mi tingting se maet samting we Baebol i talem i tru. Biaen taem mi go spel, wan man i givim buk ya, The Bible—God’s Word or Man’s? * Mi luk se ol samting we Baebol i talem i laenap gud wetem ol save we ol saentis oli faenemaot, nao mi harem se mi mas save Baebol moa. Ale, mi mi agri blong stadi Baebol wetem wan Witnes blong Jehova. Taem mi lanem bigfala tingting we God i gat long saed blong wol mo ol man, mi harem se mi save toktok long hem, olsem we hem i fren blong mi.”

◼ Jan i stap long London mo hem i wan Protestan. Hem i talem se: “Mi no moa go long jos from mi luk we plante man oli stap harem nogud, mo ol man long ol jos oli gat tu fes. Mi no moa finisim skul blong mi tu. Ale mi stat blong plei gita mo mi singsing blong mi gat smol mane. Long taem ya nao mi mitim Pat. Hem i Katolik, be hem tu i no moa bilif long God.

“Mitufala i stap long wan olfala haos wetem ol narafala yangfala we oli lego skul. Olgeta ya oli intres long ol jos we oli no bilif long Kraes. Mifala i storian plante long mining blong laef, gogo kasem let long naet. Nating se mi mo Pat, mitufala i no bilif long God, be mitufala i save se i gat wan paoa we i mekem ol samting i laef.

“Mitufala i muv i go long not blong Inglan blong faenem wok. Biaen, pikinini boe blong mitufala i bon. Wan naet, boe blong mitufala i sik, nao mi sek se mi stap prea long God ya we mi no bilif long hem. Smoltaem biaen, mi mo Pat mitufala i no moa joen gud. Ale, mi lego hem mo mi tekem smol boe blong mi wetem mi. Mi prea bakegen from mi ting se sipos i gat wan God i stap lesin, be bambae hem i givhan long mi. Mi mi no save se Pat tu i mekem sem mak.

“Long sem dei ya nomo, tu Witnes blong Jehova i go long haos blong Pat mo tufala i soem sam gudfala advaes blong Baebol long hem. Pat i ring long mi mo i askem sipos mi wantem joen long Baebol stadi we ol Witnes oli mekem wetem hem. Ale mi agri. Long stadi ya, mitufala i lanem se mitufala i mas mared blong God i glad long mitufala. Mitufala i harem se i had tumas blong mekem samting ya from we mitufala i no joen gud.

“Mitufala i wantem save moa long ol profet tok blong Baebol we oli kamtru, mo from wanem ol man oli stap harem nogud. Mitufala i wantem save tu se Kingdom blong God i wanem. Sloslo, mitufala i luksave se God i kea long ol man, mo mitufala i glad blong mekem samting we hem i talem. Ale mitufala i mared. Waes blong God i givhan long mitufala blong lukaotgud long trifala pikinini blong mitufala. Mitufala i save se Jehova i lesin long prea blong mitufala.”

Yu Mas Faenemaot Trutok

Plante man oli mekem olsem olgeta ya we yumi tokbaot finis. Oli no letem ol giaman tijing blong jos i pulum olgeta. Mo oli faenemaot from wanem God i letem ol trabol i stap. Long stori blong olgeta ya, ?yu yu makem se stret save long Baebol i givhan long olgeta, blong oli bilif se Jehova i stap harem ol prea?

?Yu yu wantem faenemaot ol save we i soemaot se God i stap? Ol Witnes blong Jehova bambae oli glad blong halpem yu blong yu save trutok long saed blong Jehova, God ya we i “stap ansa long ol prea.” Mo oli glad blong givhan long yu blong kam klosap long hem.—Ol Sam 65:2.

[Ol futnot]

[Tok blong makem poen long pej 10]

“Taem mi lanem bigfala tingting we God i gat long saed blong wol mo ol man, mi harem se mi save toktok long hem, olsem we hem i fren blong mi.”

[Tok blong pija long pej 9]

Bilif blong yu i mas stanap long ol samting we i tru mo yu mas wantem save trutok long saed blong God