!Yu Lukaot Long Ol Trap Blong Setan!

“Oli save ronwe long trap blong Setan.”—2 TIM. 2:26.

?BAMBAE YU YU ANSA OLSEM WANEM?

?Yu mas mekem wanem sipos yu stap toktok blong daonem narafala oltaem?

?Yumi lanem wanem long stori blong Paelat mo Pita?

?Yumi save mekem wanem blong yumi no harem nogud bitim mak?

1, 2. ?Wanem ol trap blong Setan we bambae yumi tokbaot long stadi ya?

SETAN i traehad blong kasem ol man blong Jehova. Hem i olsem wan man we i wantem kasem anamol blong kakae. Be i no oltaem we Setan i kilim man i ded. Hem i wantem se ol man oli mekem ol samting we hem i wantem.—Ridim 2 Timoti 2:24-26.

² Man we i wantem kasem wan anamol, hem i yusum plante defren trap. Sipos anamol i haed, maet man ya i mekem faea blong anamol ya i kamaot long klia ples, nao i isi blong hem i kasem. Sipos no, hem i yusum wan rop blong fasem anamol. No maet hem i fasem wan ston antap long rod we anamol i stap pas long hem. Taem anamol i tajem rop we i fasem ston ya, ston i foldaon nao i flatem gud hem. Sipos yumi no wantem foldaon, tingting blong yumi i mas wekap gud, mo yumi mas luksave ol trap blong Setan. Long stadi ya, bambae yumi tokbaot tri trap blong Setan, mo bambae yumi luk olsem wanem yumi save ronwe long olgeta. Ol trap ya hemia (1) toktok blong yumi, (2) yumi fraet long man, mo (3) yumi harem nogud bitim mak from mastik blong yumi. Nekis stadi bambae i tokbaot tu narafala trap blong Setan.

TOKTOK BLONG YUMI

3, 4. ?Wanem i save hapen sipos yumi no bos long fasin blong yumi blong toktok? Yu talem wan stori.

³ Yu traem tingbaot krab kokonas we i haed insaed long wan wud we i drae. Ating hem i harem se i sefgud. Be sipos man i putum faea long wud ya, bambae krab ya i kamaot, nao man ya i save kasem hem. Sem mak long ol Kristin brata mo sista we oli stap long kongregesen. Oli harem se oli sef gud. Be Setan i wantem mekem trabol long kongregesen, i olsem se hem i wantem statem wan faea. Taem ol Kristin oli lego kongregesen, Setan i kasem olgeta. Samtaem yumi no luksave se yumi stap mekem sam samting we i givhan long Setan  blong spolem kongregesen. ?Yumi mekem samting ya olsem wanem?

⁴ Disaepol Jemes i talem se tang blong man i olsem faea. (Ridim Jemes 3:6-8.) Sipos yumi no bos long fasin blong yumi blong toktok, yumi save statem wan faea we i spolem kongregesen. ?Samting ya i save hapen olsem wanem? Yu traem tingbaot se yu stap long miting, nao oli talemaot se wan sista i kam fultaem paenia. Afta long miting, tu long kongregesen tufala i stap tokbaot samting ya. Wan i talem se i gud we sista ya i mekem wok blong paenia mo bambae hem i kasem plante blesing long wok blong hem. Narawan i talem se maet sista ya i paenia from we hem i wantem se ol narafala oli tinghae long hem. ?Bambae yu yu jusum weswan long tufala blong i fren blong yu? Ating yu luksave finis weswan we i save mekem trabol long kongregesen.

5. ?Yumi mas mekem wanem blong toktok blong yumi i no statem wan faea?

⁵ ?Yumi save mekem wanem blong toktok blong yumi i no statem wan faea? Jisas i talem se: “Taem man i tok, hem i stap talemaot ol samting we tingting blong hem i fulap long hem.” (Mat. 12:34) Taswe i gud yumi jekem se wanem i stap long tingting mo hat blong yumi. Yumi mas blokem ol nogud tingting we oli save pulum yumi blong tok nogud long saed blong narafala. Taem wan brata i stap traehad blong mekem moa wok long kongregesen, ?yu ting se hem i mekem olsem blong Jehova i glad no blong kasem samting nomo? Sipos oltaem yumi ting se ol brata mo sista oli mekem wok blong Jehova blong kasem samting nomo, yumi mas tingbaot se Setan i talem samting ya tu long man ya Job. (Job 1:9-11) Taswe, bitim we yumi no trastem Kristin brata blong yumi, yumi mas lukluk gud from wanem yumi tingting nogud long hem. ?Yumi gat gud risen blong tingting olsem? ?No yumi folem fasin blong ol man long wol we oli no lavem narafala man?—2 Tim. 3:1-4.

6, 7. (1) ?Wanem sam risen we i save mekem se yumi toktok blong daonem narafala? (2) ?Yumi mas mekem wanem taem narafala i tok nogud long yumi?

⁶ Yumi save tingbaot sam narafala risen we i mekem se yumi toktok blong daonem narafala. Maet yumi wantem pulum ae blong narafala. Maet yumi wantem soemaot se yumi moa gud long ol narafala. No maet from we yumi no mekem samting we yumi mas mekem. Sipos yumi mekem olsem from we yumi flas, yumi jalus, no yumi no trastem yumi wan, be samting ya i save mekem bigfala trabol i kamaot.

⁷ Maet yumi harem se yumi gat raet blong daonem narafala, from we hem i bin talem wan samting we i mekem yumi harem nogud. Be sipos narafala i spolem yumi, i nogud yumi givimbak. Bambae yumi mekem moa trabol. Hemia nao samting we Setan i wantem, be i no Jehova. (2 Tim. 2:26) Yumi mas folem fasin blong Jisas. Taem ol man oli tok nogud long hem, “hem i no tok nogud bakegen long olgeta.” Hem i “putum  tingting blong hem i stap strong long God, we i stap jajem ol man long stret fasin.” (1 Pita 2:21-23) Jisas i trastem se Jehova bambae i givimbak rabis fasin blong ol man ya, long fasin we hem i wantem mo long taem we hem i wantem. Yumi tu yumi mas trastem Jehova. Taem yumi toktok kaen long ol narafala blong leftemap tingting blong olgeta, yumi stap traehad blong holem pis, blong yumi save joen gud long kongregesen.—Ridim Efesas 4:1-3.

YUMI FRAET LONG MAN

8, 9. ?From wanem Paelat i jajem Jisas se i mas ded?

⁸ Wan anamol we rop i fasem hem, hem i no moa fri blong go long ples we hem i wantem. Long sem fasin, wan man we i fraet long ol narafala man, nao i mekem samting we narafala i fosem hem blong mekem, hem i no moa bos long laef blong hem. (Ridim Ol Proveb 29:25.) Bambae yumi tokbaot stori blong tu man we tufala i fraet long ol narafala man, nao tufala i mekem samting we oli fosem tufala blong mekem. Mo bambae yumi luk wanem we yumi save lanem long stori blong tufala.

⁹ Ponjes Paelat we i hed gavman blong Rom, i save se Jisas i no mekem wan rong nating, taswe hem i no wantem spolem Jisas. Paelat i talem se Jisas i no mekem wan samting “we i stret blong hem i ded from.” Be yet, Paelat i jajem Jisas se i mas ded. ?From wanem hem i mekem olsem? From we hem i letem ol narafala man oli bos long hem. (Luk 23:15, 21-25) Ol man oli fosem Paelat blong i mekem samting we oli wantem. Oli stap singaot bigwan se: “Sipos yu letem man ya i go fri, yu yu no fren blong Sisa.” (Jon 19:12) Maet Paelat i fraet se sipos hem i letem Jisas i go fri, bambae hem i lusum haenem blong hem, mo maet bambae oli kilim hem i ded. Ale, hem i letem ol man oli bos long hem, nao hem i mekem samting we Setan i wantem.

10. ?From wanem Pita i talem se hem i no save Jisas?

¹⁰ Aposol Pita i wan gudfala fren blong Jisas. Hem i no fraet blong talem long ol man se Jisas i Mesaea. (Mat. 16:16) Hem i stap tru long Jisas, nating se sam narafala disaepol oli gowe long hem. (Jon 6:66-69) Mo taem ol enemi oli kam blong holem Jisas, Pita i pulumaot naef blong faet blong protektem Jisas. (Jon 18:10, 11) Be biaen, Pita i letem fraet i winim hem, nao hem i giaman se hem i no save Jisas. Fasin ya we man i fraet long narafala man i olsem wan trap, mo Pita i fas smoltaem long trap ya. Hem i fraet blong mekem samting we i stret mo blong stap tru long Jisas.—Mat. 26:74, 75.

11. ?Maet ol narafala oli pulum yumi blong mekem wanem?

¹¹ Olgeta Kristin evriwan oli no mas letem ol narafala man oli pulum olgeta blong mekem samting we Jehova i no glad long hem. Long ples blong wok, maet bos blong yumi no wan narafala i traem fosem yumi blong giaman mo blong mekem rabis fasin. Long skul, maet ol narafala yangfala oli traem fosem yumi blong stilim ol ansa long taem blong eksam. Maet oli pulum yumi blong yumi lukluk ol rabis pija, yumi smok, yumi tekem drag, yumi dring strong dring, mo yumi mekem rabis fasin. Sipos yumi fraet long narafala nao yumi mekem samting we Jehova i no glad long hem, yumi fas long wan trap. ?Yumi mas mekem wanem blong yumi save kamaot long trap ya?

12. ?Yumi lanem wanem long stori blong Paelat mo Pita?

¹² ?Yumi lanem wanem long stori blong Paelat mo Pita? Paelat i no gat plante save long saed blong Jisas. Be hem i save se Jisas i no mekem wan nogud samting, mo Jisas i no olsem ol narafala man. Paelat i no gat tingting daon mo hem i no lavem Jehova. Taswe i isi blong hem i foldaon long trap blong Setan, nao i mekem samting we Setan i wantem. Pita i gat stret save mo hem i lavem God. Be samtaem, Pita i no gat tingting daon mo i fraet long man, nao i mekem samting we narafala i wantem. Bifo we ol man oli kam holem Jisas, Pita i tok flas se: “Maet bilif blong olgeta evriwan i foldaon, be bilif blong mi bambae i no save foldaon nating.” (Mak 14:29) Sipos  Pita i trastem Jehova olsem man blong raetem Ol Sam, bambae hem i rere blong winim ol samting ya we oli traem hem biaen. Man blong raetem Ol Sam i trastem Jehova, nao i singsing se: “Oltaem hem i stap wetem mi, nao bambae mi mi no save fraet. Man i no save mekem wan samting blong spolem mi.” (Sam 118:6) Long laswan naet blong Jisas long wol, Jisas i tekem Pita mo tu narafala aposol blong hem, oli go long garen blong Getsemane. Jisas i talem long olgeta se oli mas stap wekap, be olgeta oli slip. Taem Jisas i wekemap olgeta, hem i talem long olgeta se: “Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon.” (Mak 14:38) Be Pita i slip bakegen, mo biaen hem i fraet long man, nao i giaman.

13. ?Yumi mas mekem wanem blong ol narafala oli no pulum yumi?

¹³ Stori blong Paelat mo Pita i save tijim yumi long wan narafala impoten samting. Ol narafala oli no save bos long yumi, sipos yumi gat save, yumi putum tingting blong yumi i stap daon, yumi lavem Jehova mo yumi ona long hem. Sipos bilif blong yumi i stanap long stret save, bambae yumi no fraet blong talemaot bilif ya long ol narafala. Yumi no mas ting se yumi save stanap strong bitim ol narafala. Yumi mas gat tingting daon mo luksave se yumi nidim paoa blong Jehova. Yumi mas askem long Jehova blong i givim tabu spirit blong hem blong givhan long yumi. Sipos yumi lavem Jehova bambae yumi folem ol loa blong hem, mo bambae yumi no mekem samting we i save sakem doti long nem blong hem. Mo tu, yumi mas rere from ol samting we bambae oli traem yumi. Yumi mas prea wetem pikinini blong yumi. Yumi givhan long hem blong i save samting we hem i mas mekem, taem ol narafala pikinini oli traem blong pulum hem.—2 Kor. 13:7. *

YUMI HAREM NOGUD BITIM MAK FROM MASTIK BLONG YUMI

14. ?Setan i wantem se yumi gat wanem tingting?

¹⁴ Wan narafala trap, hemia we man i fasem wan bigfala ston antap long rod we anamol i stap pas long hem. Taem anamol i tajem rop we i fasem ston ya, ale ston ya i foldaon, i flatem gud hem. Long sem fasin, sipos yumi harem nogud bitim mak from wan mastik we yumi bin mekem, yumi save harem olsem se wan bigfala ston i foldaon long yumi, nao yumi “flat olgeta.” (Ridim Ol Sam 38:3-5, 8.) Setan i wantem we yumi gat rong tingting se yumi nogud olgeta, nao Jehova i no save fogivim yumi, mo yumi no naf blong folem ol loa blong hem.

15, 16. ?Yu mas mekem wanem blong yu no harem nogud bitim mak?

¹⁵ ?Yu mas mekem wanem blong yu no harem nogud bitim mak from mastik we yu bin mekem? Sipos yu mekem wan bigfala sin, yu mas stretem samting ya kwiktaem blong yu save fren gud bakegen wetem Jehova. Yu mas go luk ol elda mo askem long olgeta blong oli givhan long yu. (Jem. 5:14-16) Yu mas mekem evri samting we yu naf blong mekem blong stretem rong blong yu. (Mat. 3:8) Sipos ol elda oli stretem yu, yu no mas harem nogud. Hemia rod we Jehova i yusum blong soemaot se hem i lavem yu. (Hib. 12:6) Yu mas gat strong tingting blong no mekem sin ya bakegen. Mo yu mas blokem eni samting we i save pulum yu blong mekem sin ya. Afta we yu sore mo yu tanem tingting blong yu, yu mas bilif strong se Jehova i save yusum sakrefaes blong Jisas blong fogivim ol sin blong yu.—1 Jon 4:9, 14.

¹⁶ Samfala oli gohed blong harem nogud bitim mak, nating se Jehova i fogivim olgeta finis. Sipos yu tu yu olsem, yu mas tingbaot se Jehova i fogivim Pita mo ol narafala aposol, nating se oli lego Jisas long taem we hem i nidim olgeta. Mo Jehova i fogivim wan man we kongregesen i bin putumaot hem from hem i mekem wan sin we i nogud olgeta, be biaen i tanem tingting blong  hem. (1 Kor. 5:1-5; 2 Kor. 2:6-8) Baebol i tokbaot stori blong sam man we oli mekem sam bigfala sin be biaen Jehova i fogivim olgeta, from we oli tanem tingting blong olgeta.—2 Kron. 33:2, 10-13; 1 Kor. 6:9-11.

17. ?Sakrefaes blong Jisas i save givhan long yu olsem wanem?

¹⁷ Jehova bambae i fogivim yu mo i fogetem sin blong yu, sipos yu tanem tingting blong yu mo yu bilif strong se bambae hem i sore long yu. Yu no mas ting se sakrefaes blong Jisas i no naf blong tekemaot sin blong yu. Setan nao i wantem se yu tingting olsem. Be Jehova i save fogivim fulwan ol man we oli tanem tingting blong olgeta. (Prov. 24:16) Sipos yu bilif long sakrefaes blong Jisas, bambae yu no harem nogud bitim mak. Be bambae yu gat paoa blong mekem wok blong Jehova wetem olgeta hat, laef mo tingting blong yu.—Mat. 22:37.

YUMI SAVE OL TRAP BLONG SETAN

18. ?Yumi save mekem wanem blong no foldaon long ol trap blong Setan?

¹⁸ Setan i no wantem save se yumi foldaon long wanem trap. Hem i wantem nomo se yumi foldaon. Be from we yumi save ol trap blong Setan, yumi save ronwe long olgeta. (2 Kor. 2:10, 11) Bambae yumi no save fas long ol trap blong Setan sipos yumi askem waes long God, blong yumi save stanap strong. Disaepol Jemes i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jem. 1:5) Sipos yumi wantem kasem waes ya, yumi mas mekem prapa Baebol stadi blong yumi oltaem, mo folem ol tok blong Baebol long laef blong yumi. Ol buk blong slef we i stret mo waes oli givhan long yumi blong luksave ol trap blong Setan, mo ronwe long olgeta.

19, 20. ?From wanem yumi no mas laekem nating ol rabis fasin?

¹⁹ Taem yumi prea mo yumi stadi long Baebol, yumi laekem moa ol fasin we i gud. Be yumi mas lanem blong no laekem nating ol fasin we oli nogud. (Sam 97:10) Bambae yumi blokem ol samting we yumi nomo i wantem, sipos yumi tingbaot ol trabol we oli save kamaot. (Jem. 1:14, 15) Yumi mas lanem blong laekem ol fasin we i gud mo no laekem nating ol fasin we oli nogud. Olsem nao, taem Setan i yusum sam samting blong pulum yumi, be bambae hem i no save winim yumi from we yumi no laekem nating ol samting ya.

²⁰ Yumi talem tangkiu long Jehova from we hem i givhan long yumi blong ronwe long ol trap blong Setan. Jehova i yusum tabu spirit blong hem, Tok blong hem, mo ogenaesesen blong hem blong blokem “Setan i no kam spolem” yumi. (Mat. 6:13) Long nekis stadi, bambae yumi luk olsem wanem yumi save ronwe long tu moa trap blong Setan.

[Futnot]

[Kwestin]

[Tok blong pija long pej 24]

Toktok blong yu i save mekem trabol long kongregesen

[Tok blong pija long pej 27]

Yu no nid blong harem nogud bitim mak