Trabol We Ol Woman Oli Stap Kasem
Trabol We Ol Woman Oli Stap Kasem
“Taem mi luk ol man oli stap spolem ol woman, mi no wantem gruap nating.”—ZAHRA, 15 YIA. Tok ya i stap long Franis magasin ya GEO.
TOKTOK blong Zahra i soemaot se long olgeta ples long wol, ol man oli daonem ol gel mo ol woman, oli kilim olgeta, mo oli mekem i nogud long olgeta. Yu traem tingbaot ol samting ya.
● Man i mekem olsem se ol woman oli daon moa long ol man. Long Esia, bighaf blong ol papa mo mama oli laekem ol boe, i bitim ol gel. Long 2011, wan ripot blong Yunaeted Neson i talem se ol man oli kilim i ded ol bebi we oli gel, we oli stap yet long bel blong mama blong olgeta, oli kilim ol smol gel, mo ol man oli no lukaot gud long olgeta. Samting ya i mekem se kantri ya i lusum klosap 134 milian woman.
● Edukesen. Long olgeta ples long wol, long evri tri gel mo woman, tu long olgeta oli go skul tri yia nomo.
● Ol man oli no respektem olgeta. Bitim 2.6 bilian woman oli laef long ol kantri we ol man oli ting se i oraet nomo we man i repem woman blong hem.
● Helt. Long ol kantri we oli no gat mane, evri tu minit, wan woman we i gat bel no we i stap bonem pikinini, i ded from we hem i no kasem tritmen long hospital.
● Woman i no gat raet blong gat samting. Ol woman oli wok strong blong planem bitim haf blong ol kakae long wol. Be long plante kantri, oli no gat raet blong gat wan haos no graon.
?From wanem ol man oli blokem ol woman, blong oli no kasem ol samting ya? Long sam ples, ol man oli folem bilif mo kastom blong ol jos, we i givim tingting ya se i oraet nomo blong daonem ol woman mo mekem i nogud long olgeta. Wan niuspepa blong Franis i tokbaot wan loea blong India we nem blong hem Chandra Rami Chopra. Man ya i talem se: “Long olgeta loa blong jos, samting we i sem mak hemia se oli sapotem fasin ya blong daonem ol woman.”
?Yu tu yu gat tingting olsem? ?Yu ting se Baebol i daonem ol woman, olsem ol narafala buk blong jos oli mekem? Samfala oli ting se sam vas blong Baebol i daonem ol woman. ?Be God i gat wanem tingting long ol woman? Plante man oli gat prapa tingting blong olgeta long saed ya. Be taem yumi stadi gud long wanem we Baebol i talem, hemia i givhan long yumi blong faenem ansa.
[Foto Credit Line long pej 3]
© G.M.B. Akash/Panos Pictures
