?Yu Yu Stap Soemaot Wanem Tingting?

“Jisas Kraes, Masta blong yumi, hem bambae i stap givhan long yufala long tingting blong yufala, long gladhat blong hem.”—FLM. 25.

?YU YU SAVE ANSA?

?From wanem yumi mas jekem tingting blong yumi?

?Wanem sam tingting we yumi mas blokem? ?Yumi save mekem samting ya olsem wanem?

?Yumi save mekem wanem blong soemaot gudfala tingting insaed long kongregesen?

1. Long ol leta blong Pol, ?plante taem hem i talem wanem samting?

LONG ol leta we aposol Pol i raetem long ol fas Kristin, plante taem hem i talem se hem i wantem we God mo Kraes tufala i glad long tingting we ol kongregesen oli soemaot. Long leta we i go long Timoti, hem i raetem se: “Masta blong yumi bambae i stap wetem yu long tingting blong yu. Mo hem bambae i stap givhan long yufala evriwan long gladhat blong hem.” (2 Tim. 4:22) Taem Pol i talem tok ya “tingting blong yu,” ?hem i minim wanem?

2, 3. (1) Taem Pol i talem tok ya “tingting,” ?hem i minim wanem? (2) ?Wanem ol kwestin we yumi wanwan i save tingbaot?

² Long ples ya, Pol i stap tokbaot “tingting” blong yumi we i stamba blong ol samting we yumi talem mo ol samting we yumi mekem. Maet tingting blong wan man i mekem we hem i kwaet, i tingbaot narafala, i kaen, i glad blong givim samting long narafala, mo i rere blong fogivim man. Baebol i talem se i gud ‘yumi kwaet man, we fasin blong yumi i stret gud.’ Hem i talem bakegen se yumi mas “stap kwaet,” hemia i min se yumi mas bos long tingting mo long ol fasin blong yumi. (1 Pita 3:4; Prov. 17:27) Maet tingting blong wan man i pusum hem blong talem ol samting we i mekem ol narafala oli kros. Maet wan narafala man i ting se mane i impoten moa long ol narafala samting. Tingting blong man i save mekem se hem i harem nogud kwiktaem long samting we narafala i talem. Mo tingting blong man i save mekem se hem i no wantem we narafala i talem long hem samting we hem i mas mekem. Tingting blong sam man i stap long ol rabis fasin blong man wetem woman, no i pulum olgeta blong oli mekem stronghed.

³ Taswe taem Pol i talem se “Masta blong yumi bambae i stap wetem yu long tingting blong yu,” hem i stap pulum ol brata mo sista blong oli folem fasin blong Kraes, mo blong oli gat tingting we God i glad long hem. (Ridim Kolosi 3:9-12.) I gud yumi wanwan i traem tingbaot se: ‘?Mi mi stap soemaot wanem tingting? ?Mi mi save mekem wanem, blong God i glad moa long tingting we mi mi soemaot? ?Mi mi save mekem wanem  blong givhan long evriwan long kongregesen blong oli gat tingting we God i glad long hem?’ Traem tingbaot wan yad we i fulap long ol naes flaoa we kala blong olgeta i yelo. Strong kala blong ol flaoa ya wanwan i mekem yad ya i naes we i naes. Be yu, ?yu olsem wan long ol flaoa ya? ?Yu yu stap givhan blong mekem kongregesen i naes we i naes? Yumi evriwan i mas traehad blong mekem olsem. Naoia bambae yumi tokbaot wanem we yumi mas mekem blong God i glad long tingting we yumi soemaot.

YUMI MAS BLOKEM “SPIRIT WE I KAMAOT LONG WOL”

4. ?Wanem ya “spirit we i kamaot long wol”?

⁴ Baebol i talem se: “Spirit ya we yumi kasem finis, hem i no wan spirit we i kamaot long wol. Hem i Spirit blong God.” (1 Kor. 2:12) ?Wanem ya “spirit we i kamaot long wol”? Hemia sem spirit we Efesas 2:2 i tokbaot, se: ‘Bifo, yufala i stap holem ol fasin nogud blong wol ya, yufala i stap obei long jif blong paoa blong win. Hemia spirit we i stap wok long ol man we oli no save obei long God.’ “Win” we vas ya i tokbaot i sem mak long “spirit we i kamaot long wol,” hemia ol tingting blong ol man blong wol. Ol tingting ya oli olsem win, from we oli stap raonabaot long yumi oltaem. Olsem tingting we plante man oli soemaot taem oli talem se, ‘!Mi mi no nidim yu blong yu talem long mi wanem blong mekem, mi mi save finis!’ No maet oli talem se, ‘!Hemia i raet blong mi ya! !Bae mi faet from!’ Ol man olsem oli blong wol blong Setan, oli “ol man we oli no obei long God.”

5. ?Wanem nogud tingting we sam man Isrel oli soemaot?

⁵ Longtaem finis i kam, plante man oli gat tingting ya blong wol, we oli no wantem obei. Long taem blong Moses, wan man we nem blong hem Kora, i girap agensem ol lida blong Isrel. Hem i agensem moa, Eron mo ol pikinini blong hem we oli mekem wok blong pris. Ating Kora i luk ol slak fasin blong olgeta. Maet hem i ting se Moses i givim spesel wok long olgeta from we oli famle blong hem. Nating se i olsem wanem, be Kora i no moa holem stret tingting. Hem i no moa tingting olsem Jehova. Taem Kora i talem se, “!Yutufala i go tumas ya!” hem i soemaot se hem i no gat respek nating long ol man ya we Jehova i jusum olgeta. Hem i gohed, i se: “?From wanem yutufala i putumap yutufala bakegen, se yutufala i hae moa long mifala?” (Nam. 16:3) Long sem fasin, Datan mo Abiram tufala i toktok smosmol agens long Moses, tufala i talem long hem se hem i stap traem blong mekem bigfala masta long olgeta. Taem Moses i mekem plan blong oli kam wanples blong stretem trabol ya, tufala i talem se: “!Mitufala i no save kam!” (Nam. 16:12-14) I klia se Jehova i no glad nating long tingting we ol stronghed ya oli soemaot, ale hem i kilim olgeta oli ded.—Nam. 16:28-35.

6. Long taem blong ol fas Kristin, ?sam man oli soemaot wanem tingting we i no stret? ?Maet oli gat tingting ya from wanem?

⁶ Long taem blong ol fas Kristin, i gat sam man we oli tekem fasin ya blong ‘tok nogud long olgeta we oli gat haenem.’ Oli no gat respek long ol brata we oli lidim olgeta long kongregesen, oli tok agens long olgeta. (Jud 8) Ating ol man ya oli ting se oli naf blong mekem moa wok long kongregesen, be oli no kasem. Mo oli traem pulum sam narafala tu, blong oli no gat respek long ol brata long kongregesen, we oli stap mekem bes blong olgeta long wok we God i putum long han blong olgeta.—Ridim 3 Jon 9, 10.

7. ?Yumi mas lukaot gud se yumi no gat wanem tingting?

⁷ Tingting ya blong no gat respek long ol brata we oli lidim yumi, i no mas stap long kongregesen. Yumi evriwan i mas lukaot gud se yumi no stat blong tingting olsem. Ol elda oli no stret gud olgeta, oli olsem ol man we Jehova i yusum long taem blong Moses mo aposol Jon. Samtaem ol elda oli save mestem, oli save mekem wan samting long yu we i mekem yu yu harem nogud. Long taem olsem, yu no mas gat tingting ya blong wol, se: “!Mi mi wantem stret fasin!” mo “!Oli mas tekemaot brata ya, i no stret we hem i mekem wok ya!” Yumi mas tingbaot se Jehova i save jus blong fogetem sam smosmol mastik blong ol elda. ?Olsem wanem? ?Yumi save mekem sem mak? Samfala we oli mekem bigfala sin oli no laekem ol elda we oli gat  wok blong givhan long olgeta. Nao oli no wantem kam wanples blong storian wetem ol elda ya. Oli olsem wan sikman we i no wantem tekem meresin blong winim sik blong hem, from we hem i no laekem dokta we i givim meresin ya.

8. ?Wanem ol vas we oli save givhan long yumi blong yumi gat stret tingting long ol elda?

⁸ Yumi save blokem tingting ya sipos yumi tingbaot oltaem se Jisas i holem ‘ol seven sta oli stap long raethan blong hem.’ Ol “sta” ya, hemia ol elda we tabu spirit i makemaot olgeta. Be ol tok ya i stret tu long ol narafala elda long ol kongregesen. Jisas i save yusum ol “sta” long han blong hem, long enikaen rod we hem i luk se i stret. (Rev. 1:16, 20) Jisas i Hed blong kongregesen. Taswe hem i lidim gud ol elda long evri samting we oli mekem. Hem i save lukluk evri samting, from we “ae blong hem i olsem faea we i laet.” Taswe, sipos i gat nid blong stretem wan elda, Jisas bambae i lukluk long bisnes ya long stret taem blong hem mo long fasin we hem i wantem. (Rev. 1:14) Go kasem taem ya, yumi mas gat respek long ol elda we oli stap long “raethan” blong Jisas. Pol i talem se: “Yufala i mas ona long ol lida blong yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya olsem wanem. Yufala i mas mekem olgeta oli harem gud long wok ya. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.”—Hib. 13:17.

9. (1) ?Wanem tingting we wan brata no sista i save soemaot taem ol elda oli stretem hem? (2) ?I moagud yumi mekem wanem?

⁹ Taem ol elda oli stretem no tekemaot wok long wan brata no wan sista long kongregesen, hem i save soemaot wan gudfala tingting no wan nogud  tingting. Traem tingbaot wan yangfala brata we ol elda oli toktok long hem long kaen fasin, from we hem i stap pleplei ol video gem we oli raf tumas. Sore tumas, yangfala ya i no lesin long advaes blong ol elda. Hem i no moa save mekem wok blong man blong givhan, from we ol fasin blong hem oli no moa stret long ol fasin we Baebol i talem se man blong givhan i mas gat. (Sam 11:5; 1 Tim. 3:8-10) Biaen, brata ya i talemaot olbaot se hem i no agri long desisen blong ol elda. Hem i raetem plante leta i go long hed ofis, blong tok agens long ol elda. Hem i pulum sam narafala long kongregesen blong olgeta tu oli raet long hed ofis. Be, blong talem stret, sipos yumi mekem eskius from ol nogud fasin blong yumi, yumi stap long rod blong spolem pis long kongregesen. Hemia i no save givhan nating long yumi mo long ol narafala. Taem oli stretem yumi, i moagud yumi tingbaot samting ya olsem wan janis blong luksave slak fasin blong yumi, nao yumi no toktok, yumi folem ol advaes ya nomo.—Ridim Ol Krae 3:28, 29.

10. (1) ?Jemes 3:16-18 i tokbaot wanem tingting we i gud mo wanem tingting we i nogud? (2) ?Taem yumi folem waes we i kam long heven, wanem frut i kamaot?

¹⁰ Jemes 3:16-18 i tokbaot wanem tingting i gud mo wanem tingting i nogud blong soemaot insaed long kongregesen. Hem i talem se: “Taem ol man oli jalus, mo oli wantem kam hae moa long narafala man, evri samting i go olbaot, nao olgeta fasin nogud oli stap kamtru. Be fasin blong man we i kasem waes we i kam long heven, hem i narafala. Nambawan samting blong hem, laef blong hem i klin gud, mo hem i man blong pis, i kwaet man, i man blong joen gud long narafala man, mo i man we i gat sore long man. Waes blong man ya i gat plante gudfala frut long laef blong hem. Hem i no save jajem man long fasin we i no stret, mo hem i no save giaman. Taem ol man blong mekem pis oli wok long kwaet fasin, i olsem we oli planem sid we frut blong hem, laef we i stret gud.” Sipos yumi folem waes we i kam long heven, bambae yumi folem ol fasin blong God. Long rod ya, bambae yumi pulum narafala tu blong i soemaot gudfala tingting, nao bambae i gat pis long kongregesen.

YUMI MAS GAT RESPEK INSAED LONG KONGREGESEN

11. (1) ?Sipos yumi gat stret tingting, yumi no save mekem wanem? (2) ?Fasin blong Deved i tijim yumi long wanem samting?

¹¹ Yumi mas tingbaot oltaem se Jehova nao i givim wok long ol elda blong oli “lukaot long ol sipsip blong hem.” (Wok 20:28; 1 Pita 5:2) Nating se yumi elda no nogat, be yumi mas respektem rod we God i yusum. Sipos yumi gat stret tingting, yumi no save ting se i impoten blong kasem paoa mo posisen. Taem King Sol blong Isrel i ting se maet Deved i tekem ples blong hem i kam king, hem i no moa trastem Deved, ‘i stap tingting nogud long hem.’ (1 Saml. 18:9) Tingting blong king ya i rong, mo hem i wantem kilim Deved i ded tu. Yumi no mas tingting tumas long posisen, olsem Sol. I moagud yumi gat tingting olsem Deved. Nating se king ya i mekem plante samting long Deved we oli no stret nating, be oltaem Deved i gat respek long hem from we God nao i putumap hem.—Ridim 1 Samuel 26:23.

12. ?Yumi save mekem wanem blong kongregesen i joen gud?

¹² I tru, yumi evriwan i gat defdefren tingting long sam samting. Taswe, yumi save kam kros long narafala. Samting ya i save hapen long ol elda tu. Baebol i talem wanem tingting we yumi mas gat, i se: “Oltaem yufala i mas rere blong ona long yufala,” mo “bambae yufala i no mas tingbaot yufala, se yufala i waes moa.” (Rom 12:10, 16) Taswe yumi no mas ting se oltaem yumi stret, mo ol narafala oli rong. Yumi mas luksave se long plante samting, i gat moa long wan tingting we i stret. Sipos yumi traehad blong kasem save long tingting blong narafala, yumi givhan blong mekem kongregesen i joen gud.—Fil. 4:5.

13. ?Taem yumi talemaot tingting blong yumi finis, yumi mas mekem wanem? ?Wanem stori blong Baebol i soemaot samting we yumi mas mekem?

¹³ Be sipos yumi luk se i gat nid blong stretem wan samting long kongregesen, ?i rong blong talemaot tingting blong yumi? Hemia i no rong. Long taem blong ol fas Kristin, i gat wan samting we plante long kongregesen oli gat defdefren  tingting long hem. Ale ol brata oli “jusumaot Pol mo Banabas, mo sam narafala man tu, blong oli go long Jerusalem, blong luk ol aposol mo ol elda blong jos from bisnes ya.” (Wok 15:2) Yumi save se olgeta brata ya wanwan oli gat prapa tingting blong olgeta long samting we i stret blong mekem. Be taem evriwan oli talemaot tingting blong olgeta mo tabu spirit i lidim olgeta blong oli mekem wan desisen, ol brata ya oli no moa gohed blong tokbaot tingting blong olgeta wanwan. Nao taem ol kongregesen oli kasem wan leta we i talemaot desisen ya, “oli harem gud, from we tok blong hem i leftemap tingting blong olgeta,” mo “oli stap kam strong moa long bilif blong olgeta.” (Wok 15:31; 16:4, 5) Long taem blong yumi tu, sipos yumi talemaot long ol elda samting we yumi wari long hem, yumi mas trastem olgeta se bambae oli tingting gud long ol tok blong yumi, nao bambae oli luk sipos i gat nid blong mekem wan samting no nogat.

YUMI MAS SOEMAOT GUDFALA TINGTING LONG OL FREN BLONG YUMI

14. ?Yumi soemaot olsem wanem se yumi gat gudfala tingting long ol fren blong yumi?

¹⁴ I gat plante janis blong soemaot gudfala tingting long ol fren blong yumi. Sipos yumi kwik blong fogivim olgeta taem oli mekem yumi harem nogud, yumi save mekem wan gudfala samting i kamaot. Tok blong God i talem se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi.” (Kol. 3:13) Tok ya “taem wan long yufala i gat sam poen agens long narawan,” i soemaot se samtaem maet yumi save kros long narafala from wan bigfala rong we hem i mekem long yumi. Be sipos narafala i gat sam smosmol slak fasin we yumi no laekem, yumi no mas kam kros from. Hemia i save spolem pis long kongregesen. I moagud yumi traem folem fasin blong Jehova, yumi rere blong fogivim ol brata mo sista blong yumi, mo yumi gohed blong joen wanples blong mekem wok blong God.

15. (1) ?Fasin blong Job i tijim yumi long wanem samting? (2) ?Prea i save givhan long yumi olsem wanem?

¹⁵ Fasin blong Job blong fogivim narafala i save tijim yumi. Ol tok blong trifala fren blong Job i mas leftemap tingting blong hem, be nogat. Trifala i talem plante samting we i no kaen nating. Be Job i fogivim trifala. ?Wanem i givhan long Job? ‘Hem i prea from trifala ya.’ (Job 16:2; 42:10) Taem yumi prea from narafala, tingting we yumi gat long hem i save jenis. Taem yumi prea from ol brata mo sista blong yumi, i isi moa blong yumi gat sem tingting long olgeta olsem Jisas i gat. (Jon 13:34, 35) Yumi mas prea tu blong askem long God blong i givim tabu spirit long yumi. (Luk 11:13) Tabu spirit i save givhan long yumi blong yumi soemaot ol gudfala fasin long ol fren blong yumi.—Ridim Galesia 5:22, 23.

GUDFALA TINGTING BLONG YUMI I GIVHAN LONG KONGREGESEN

16, 17. ?Wanem tingting we yu yu wantem soemaot?

¹⁶ Taem yumi evriwan i wok strong blong gat wan gudfala tingting, yumi givhan long kongregesen. Ating stadi ya i givhan long yu blong yu luksave se yu mas jenisim tingting blong yu mo leftemap tingting blong ol narafala. Sipos i olsem, yu mas lukluk i go long Tok blong God, blong yu save rod blong mekem ol jenis ya. (Hib. 4:12) Pol i wantem stap olsem wan gudfala eksampol long kongregesen, taswe hem i talem se: “Naoia tingting blong mi i stap kwaet, be hemia i no min se olgeta wok blong mi i stret gud. Masta ya blong yumi, hem nomo i gat raet blong jajem wok ya.”—1 Kor. 4:4.

¹⁷ Yumi save givgivhan long yumi, blong yumi evriwan long kongregesen i holem wan gudfala tingting. Yumi save mekem olsem, sipos yumi folem ol fasin blong God, mo yumi no traem fosem ol narafala blong oli folem tingting blong yumi. Mo tu, yumi no mas ting se oli mas givim moa wok long yumi long kongregesen. Sipos yumi kwik blong fogivim ol narafala mo yumi gat gudfala tingting long olgeta, bambae yumi gat pis wetem ol brata mo sista blong yumi. (Fil. 4:8) Sipos yumi mekem ol samting ya, tingting we yumi soemaot bambae i mekem Jehova mo Jisas tufala i glad.—Flm. 25.

[Kwestin]

[Tok blong pija long pej 20]

?Taem ol elda oli givim advaes long yumi, yumi mas tingbaot wanem?