“Plis Yu Tijim Mi Blong Mi Mekem Ol Samting We Yu Yu Wantem”

“Yu yu God blong mi, plis yu tijim mi blong mi mekem ol samting we yu yu wantem.”—SAM 143:10.

OL IMPOTEN POEN BLONG TINGBAOT

?Wanem sam samting we oli hapen long laef blong Deved, we oli soemaot se hem i wantem folem tingting blong Jehova?

?Wanem i givhan long Deved blong i save samting we Jehova i wantem?

?Sipos yumi wantem se God i glad long yumi oltaem, yumi mas mekem wanem?

1, 2. ?Blong wanem i gud yumi save tingting blong God long samting we yumi wantem mekem? ?Fasin blong King Deved i save givhan long yumi olsem wanem?

?YU YU wokbaot samtaem long wan aelan we i no aelan blong yu? Maet yu stap wokbaot blong go long wan vilej nao yu sek se rod i seraot long tu. ?Bambae yu folem wanem rod? Yu save askem long wan manples blong i talem wanem rod yu mas folem blong kasem vilej ya. Sem mak taem yumi mekem wan impoten desisen. Jehova i save evri samting. Taswe i gud yumi askem long Jehova wanem rod we yumi mas folem. Nao hem bambae i givhan long yumi blong ‘folem rod’ we hem i glad long hem.—Aes. 30:21.

² Deved, we i king blong Isrel bifo, klosap oltaem hem i traehad blong save tingting blong God long samting we hem i wantem mekem. Long rod ya, Deved i save se hem i stap mekem samting we Jehova i wantem. Tingting blong Deved i stap fulwan long Jehova God. Long stadi ya, bambae yumi tokbaot wanem we Deved i mekem taem hem i fesem ol trabol, mo wanem we yumi save lanem from.—1 King 11:4.

DEVED I TINGHAE LONG NEM BLONG JEHOVA

3, 4. (1) ?Deved i wantem faet long Golaeat from wanem? (2) ?Wanem tingting blong Deved long nem blong Jehova?

³ Taem Deved i yangfala, hem i go blong faet long wan bigfala man Filistia, nem blong hem Golaeat. Longfala blong man ya, hem i klosap tri meta. Mo hem i holem ol strong tul blong faet. ?Deved i wantem faet long hem from wanem? (1 Saml. 17:4) ?Hem i wantem soemaot nomo se hem i no fraet mo hem i bilif long God? I tru se hem i nidim tufala fasin ya. Be i gat wan samting we i bigwan moa long tingting blong Deved. Hem i tinghae long Jehova mo nem blong hem. Hem i kros long Golaeat from we hem i jikim ol man blong God. Deved i talem se: “God blong yumi i laef, i stap we i stap, mo yumi ol soldia blong hem. !Be man ya, hem i hiten man nomo! !Hem i no naf blong jikim yumi!”—1 Saml. 17:26.

 ⁴ Yangfala Deved i talem long Golaeat se: “Yu yu kam blong faet long mi long tufala spia mo naef blong faet blong yu, be mi mi kam blong faet long yu long nem blong Hae God. Hem i God blong mifala, mo hem i gat olgeta paoa, be yu yu stap jikim ol soldia blong hem.” (1 Saml. 17:45) Deved i trastem God ya we i tru se bambae i givhan long hem. Deved i slingim wan ston nomo long Golaeat, nao Golaeat i foldaon i ded. Biaen, Deved i trastem Jehova long olgeta laef blong hem, mo i tinghae long tabu nem blong Jehova. Mo hem i talem long ol man Isrel se olgeta tu oli mas “glad” se tabu nem blong Jehova i stap long olgeta.—Ridim 1 Kronikel 16:8-10.

5. ?Yu mas mekem wanem taem wan man i tok nogud long Jehova, olsem Golaeat?

⁵ ?Olsem wanem long yu? ?Yu yu glad we Jehova i God blong yu? (Jer. 9:24) Ating ol man raonabaot long yu, no ol man long wok, no ol yangfala long skul, no ol famle blong yu, oli tok nogud long Jehova mo oli jikim ol Witnes blong hem. Long taem olsem, ?yu yu mekem wanem? Taem oli tok nogud long God olsem Golaeat, ?yu yu tok blong leftemap nem blong Jehova? ?Yu yu trastem Jehova se bambae hem i givhan long yu? I tru se i gat taem we yumi mas “stap kwaet.” Be yumi no mas sem blong talemaot se yumi Witnes blong Jehova mo yumi man blong Jisas. (Pri. 3:1, 7; Mak 8:38) Yumi mas tok kaen long ol man we oli no gat respek long Jehova mo ol man blong hem. Be yumi no mas mekem olsem ol man Isrel. Taem olgeta oli harem ol tok blong Golaeat, oli “fraet we oli fraet.” (1 Saml. 17:11) Yumi mas mekem i defren. Yumi mas toktok blong leftemap tabu nem blong Jehova. Yumi wantem we ol man oli save gud ol fasin blong Jehova God. Taswe, yumi soemaot ol tok blong Baebol long olgeta. Oli mas kasem save from wanem i impoten we oli save God.—Jem. 4:8.

6. ?Wanem i impoten moa long Deved, taem hem i kilim Golaeat? ?Wanem i mas impoten moa long yumi?

⁶ Stori blong Deved mo Golaeat i tijim yumi long wan narafala samting bakegen. Taem Deved i stap ron i kam blong faet long Golaeat, hem i askem long ol man raonabaot long hem se: “?Sipos wan man i kilim Golaeat ya mo i tekemaot sem blong yumi, bambae hem i kasem wanem?” Ol man oli ansa se: ‘King i promes finis blong givim bigfala presen long man ya, mo bambae i givim dota blong hem tu long hem.’ (1 Saml. 17:25-27) Be Deved i no wantem wan presen. I gat wan samting we i impoten moa long hem. Hem i wantem leftemap nem blong tru God. (Ridim 1 Samuel 17:46, 47.) Long tingting blong yu, ?wanem i impoten moa? ?Yu yu wantem leftemap nem blong yu? ?Yu yu wantem kasem plante mane mo kam impoten long wol ya? Yumi mas gat sem tingting olsem Deved, we i singsing se: “Yufala i kam joen wetem mi, yumi talemaot we Hae God i hae we i hae, yumi leftemap hae nem blong hem.” (Sam 34:3) Yumi mas trastem God. Yumi mas wantem blong leftemap nem blong God, i no nem blong yumi.—Mat. 6:9.

7. ?Yumi save mekem wanem, blong yumi gat strong bilif blong gohed blong prij, nating se plante man oli no wantem lesin?

⁷ Yangfala Deved i mas gat strong bilif blong faet long Golaeat, mo hem i mas putum tingting blong hem i stap strong long Jehova. Taem Deved i stap lukaot long ol sipsip, evri dei hem i trastem Jehova moa. Sloslo, bilif blong hem i kam strong. (1 Saml. 17:34-37) Yumi tu, yumi mas gat strong bilif blong gohed blong prij, antap moa, taem ol man oli no wantem lesin. Sipos yumi trastem God evri dei, bambae bilif blong yumi i kam strong. Wan rod blong wokem fasin ya blong trastem God, se yumi tokbaot Baebol long ol man we oli sidaon klosap long yumi long bas no long ples blong maket. Mo taem yumi stap prij long ol haos wanwan, yumi storian wetem ol man we oli stap wokbaot long rod tu.—Wok 20:20, 21.

DEVED I MEKEM SAMTING WE JEHOVA I WANTEM

8, 9. Taem Sol i wantem kilim Deved i ded, ?Deved i mekem wanem we i soemaot se hem i folem tingting blong Jehova?

⁸ Deved i soemaot long wan narafala rod tu se hem i trastem Jehova. Hem i gat sem tingting olsem Jehova long Sol, we hem i fas king  blong Isrel. Sol i jalus long Deved. Tri taem hem i traem sperem Deved. Be Deved i muv i gowe. Hem i no traem givimbak long king. Biaen, Deved i ronwe. (1 Saml. 18:7-11; 19:10) Nao Sol i jusumaot 3,000 man Isrel, mo oli go lukaot Deved long ples blong ol bigbigfala ston. (1 Saml. 24:2) Deved mo ol man blong hem oli stap haed long wan hol blong ston. Wan dei, Sol i kam insaed long hol ya. Deved i gat janis nao blong kilim Sol i ded. Jehova i talem finis se Deved bambae i kam king. Be Deved i no wantem kilim Sol. (1 Saml. 16:1, 13) Ol man blong Deved tu oli traem pusum hem blong i kilim Sol i ded. Be Deved i talem se: “Mi no mas mekem wan samting nating long hem we i nogud, from we Hae God nomo i jusumaot hem.” (Ridim 1 Samuel 24:4-7.) Jehova i no tekemaot Sol yet long wok blong hem olsem king. Taswe Deved i no wantem mekem wan samting agens long hem. Ale, Deved i wokbaot i kam long baksaed blong Sol, mo i katemaot wan pis klos blong hem nomo. Deved i gat janis blong kilim Sol i ded. Be hem i soemaot se hem i no gat plan blong mekem wan samting agens long Sol.—1 Saml. 24:11.

⁹ Taem Deved i luk Sol laswan, hem i soemaot respek long hem yet, from we “Hae God nomo i jusumaot hem.” Deved mo Abisae tufala i gotru long ples we Sol i stap slip long haos tapolen blong hem. Abisae i ting se hemia plan blong God blong putum Sol long han blong Deved. Abisae i wantem planem spia long Sol. Be Deved i blokem hem. (1 Saml. 26:8-11) Deved i stap wet long Jehova. Hem i wantem folem rod we i stret long tingting blong God. Taswe hem i no wantem mekem wan samting long king ya we Jehova i putumap, nomata wanem samting Abisae i talem.

10. ?Sam man oli save mekem wanem long yumi? ?Wanem i save givhan long yumi blong yumi mekem samting we Jehova i wantem?

¹⁰ Samting olsem i save hapen long yumi. Maet sam narafala oli wantem se yumi mekem samting we olgeta oli ting se i gud. Oli no pulum yumi blong mekem samting we Jehova i wantem. Samfala oli olsem Abisae. Oli hareap long yumi blong mekem wan desisen, bifo we yumi gat taem blong faenemaot tingting blong Jehova. Yumi no mas letem ol narafala oli pulum yumi olsem. Yumi mas kasem save gud tingting blong Jehova, mo yumi mas gat strong tingting blong mekem samting we hem i wantem.

11. ?Deved i mekem wanem, blong soemaot se hem i tingbaot samting we God i wantem? ?Yumi save mekem wanem blong folem fasin blong Deved?

¹¹ Deved i prea long Jehova God se: “Plis yu tijim mi blong mi mekem ol samting we yu yu wantem.” (Ridim Ol Sam 143:5, 8, 10.) Deved i no trastem prapa tingting blong hem, mo hem i no folem tingting blong ol narafala. Hem i wantem nomo we God i tijim hem. Hem i talem long Jehova se: “Mi stap tingbaot olgeta wok ya we  yu yu mekem, mo mi stap tingting long olgeta samting ya we yu yu mekem long mi.” Yumi save mekem olsem Deved. Yumi save stadi gud long Baebol, mo yumi tingting dip long samting we Jehova i mekem long taem bifo blong lidim ol man. Long rod ya, bambae yumi faenemaot samting we God i wantem.

DEVED I FOLEM TINGTING BLONG GOD

12, 13. ?From wanem Deved i kafsaedem wota we trifala man blong hem i karem i kam?

¹² I gat wan moa samting we Deved i tijim yumi long hem. Hem i kasem save long ol tingting blong God we oli stap insaed long Loa, nao hem i letem ol tingting ya oli lidim hem taem hem i mekem desisen, mo long ol narafala samting long laef blong hem. Plante taem wan loa blong Jehova i save givhan long yumi blong yumi kasem save long tingting blong hem. Samting ya i hapen long Deved. Wan dei, Deved i talem se hem i wantem ‘dring wota we i kamaot long wel ya long doa blong stonwol blong taon ya’ Betlehem. Be ol man Filistia we oli enemi blong Isrel, oli holem taon ya i blong olgeta. Ale, trifala man blong Deved i go blong karem wota ya. Trifala i save lusum laef blong trifala. Taem trifala i karem wota i kam, Deved i no wantem dring. Hem i kafsaedem wota ya, “i givim i go long Hae God.” ?From wanem? Deved i talem se: “Mi no save dring wota ya. Sipos mi dring, bambae i olsem we mi dring blad blong trifala ya we i letem laef blong trifala blong go tekem i kam.”—1 Kron. 11:15-19.

¹³ Deved i save Loa ya se man i no mas kakae blad, be i mas kafsaedem i go long graon nomo. Hem i kasem save tu from wanem Loa i talem olsem. Hem i save se, “olgeta samting we i gat laef, be laef blong olgeta i stap long blad blong olgeta.” Be ol man blong Deved oli karem wota nomo i kam long hem, oli no karem blad. Taswe, ?Deved i no wantem dring wota ya from wanem? From we loa ya long blad i givhan long hem blong i luksave tingting blong Jehova. Hem i luksave se long tingting blong Jehova, blad i tabu. Trifala man blong hem i save ded taem trifala i go karem wota ya. Taswe Deved i no save dring. Hem i harem se sipos hem i dring, bambae hem i no gat respek long blad blong trifala, we i tabu. Ale hem i mekem desisen blong kafsaedem i go long graon.—Lev. 17:11; Dut. 12:23, 24.

14. ?Wanem i givhan long Deved blong i mekem ol desisen we Jehova i glad long olgeta?

 ¹⁴ Long tingting blong Deved, i impoten blong folem loa blong God evri dei. Hem i singsing se: “God blong mi. . . . Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” (Sam 40:8) Deved i stadi long loa blong God mo hem i tingting dip long hem. Hem i gat strong tingting se sipos hem i folem loa blong Jehova, bambae laef blong hem i moagud. I no ol rul long Loa blong Moses nomo we Deved i wantem folem. Be ol rul ya oli givhan long hem blong i luksave tingting blong God, nao hem i folem tingting ya. Yumi tu, taem yumi stadi Baebol, yumi mas tingting dip long ol tok we yumi ridim. Olsem nao, ol tingting blong Jehova we yumi faenemaot, yumi save mekem olgeta oli wok long laef blong yumi evri dei. Nao bambae yumi mekem ol desisen we Jehova i glad long olgeta.

15. ?Solomon i brekem wanem Loa blong God?

¹⁵ Pikinini blong Deved we nem blong hem Solomon, i kasem plante blesing long Jehova. Be biaen, Solomon i lego Loa blong God. Loa blong Jehova i talem se king blong Isrel i no mas tekem plante woman. (Dut. 17:17) Be Solomon i tekem plante woman blong ol narafala kantri. Taem hem i kam olfala, ol woman ya oli “lidim hem i go mekem wosip long ol narafala god.” Nomata wanem eskius Solomon i mekem taem hem i brekem Loa blong God, be “hem i mekem sin agens long Hae God . . . Hem i no mekem olsem we papa blong hem King Deved i bin mekem.” (1 King 11:1-6) Yumi mas obei long ol loa mo ol tingting blong God we yumi faenem long Baebol. Hemia i impoten tumas taem yumi wantem mared.

16. ?Loa blong Jehova se yumi mas mared long “man blong Masta” nomo, i tijim yumi long wanem samting?

¹⁶ Sipos wan man no woman we i no bilif long Jehova i laekem yu, ?bambae yu mekem wanem? ?Bambae yu olsem Deved we i traehad blong save tingting blong God? ?No bambae yu olsem Solomon we i brekem loa blong Jehova? Baebol i talem se ol man blong wosipim tru God oli mas mared long “man blong Masta” nomo. (1 Kor. 7:39) Hemia i min se, sipos wan man blong Jehova i wantem mared, hem i mas mared long wan man blong Jehova bakegen. Loa ya i mekem yumi kasem save tu se Jehova i no wantem we yumi frenem olgeta we oli no bilif long hem. Taswe yumi no save mared long man no woman we i no bilif long Jehova. Be i no hemia nomo. Sipos wan man no woman we i no bilif long Jehova i soemaot se hem i laekem yu, yu mas blokem samting ya.

17. ?Wanem i save givhan long yumi, blong yumi no lukluk ol doti pija?

¹⁷ Olsem yumi luk finis, Deved i traem blong save tingting blong God long evri samting. Fasin ya bambae i givhan long yumi tu, blong yumi blokem enikaen tingting we i pulum yumi blong lukluk ol doti pija. Plis ridim ol vas we oli kam biaen mo tingting gud long olgeta. Nao yu traem kasem save tingting blong Jehova long ol doti pija. (Ridim Ol Sam 119:37; Matiu 5:28, 29; Kolosi 3:5.) Yumi mas tingting dip long ol fasin we Jehova i tinghae long olgeta, nao samting ya bambae i givhan long yumi blong yumi blokem ol doti pija.

OLTAEM YUMI MAS GAT TINGTING BLONG GOD

18, 19. (1) Deved i mekem sam bigfala sin, ?be wanem i mekem se God i glad long hem yet? (2) ?Yu yu gat strong tingting blong mekem wanem?

¹⁸ Deved i wan gudfala eksampol blong yumi. Be hem i mekem sam bigfala sin tu. (2 Saml. 11:2-4, 14, 15, 22-27; 1 Kron. 21:1, 7) Nating se i olsem, oltaem hem i tanem tingting blong hem. Hat blong hem i stret, mo hem i ‘wok blong God long fasin we i stret gud.’ (1 King 9:4) ?From wanem yumi talem olsem? From we Deved i traehad blong save tingting blong Jehova long evri samting, mo i traehad blong mekem samting we Jehova i glad long hem.

¹⁹ Yumi tu yumi sinman, be Jehova i save glad long yumi yet. Yumi mas gohed blong stadi long Tok blong God, yumi mas tingting dip long hem, mo yumi mas hareap blong folem samting we yumi lanem. Sipos yumi mekem olsem, bambae yumi olsem man blong raetem Sam ya, we i askem long Jehova se: “Plis yu tijim mi blong mi mekem ol samting we yu yu wantem.”

[Kwestin]

[Tok blong pija long pej 10]

Deved i gat janis blong kilim Sol i ded. ?Hem i no mekem olsem from wanem?

[Tok blong pija long pej 11]

Deved i kafsaedem wota we trifala man blong hem oli karem. ?Yumi lanem wanem samting from?