“Ol Strenja” Oli Joen Gud Blong Wosipim Tru God

‘Ol man blong ol narafala kantri bambae oli lukaot long ol sipsip blong yumi, mo oli mekem ol wok long ol garen blong yumi, mo bambae oli lukaot long ol plantesen blong grep blong yumi. Nao ol man bambae oli tokbaot yumi, se Hae God i God blong yumi, mo yumi ol pris blong hem.’—AES. 61:5, 6.

?BAMBAE YU YU ANSA OLSEM WANEM?

?Sam man oli gat wanem tingting long ol strenja? ?Baebol i talem wanem long saed ya?

?Ol man long olgeta kantri oli mas mekem wanem?

?From wanem i no gat strenja long medel blong ol Witnes blong Jehova?

1. ?Sam man oli tingting olsem wanem long ol man blong narafala kantri? ?From wanem i no stret blong tingting olsem?

LONG las stadi, yumi luk se sam man oli no laekem ol man blong ol narafala kantri. Oli ting se olgeta oli moagud long ol man ya. Be tingting olsem i no stret from i no gat wan man we i moagud bitim narafala. Wan buk (The Races of Mankind) i talem se ol man we oli kamaot long ol defdefren laen, oli brata nomo, olsem we Baebol i talem. Insaed long wan famle, i save gat tu brata we tufala i no sem mak nating, be tufala i brata yet.

2, 3. ?Wanem tingting blong Jehova long ol man blong ol narafala kantri we oli stap long Isrel bifo?

² Long taem blong Baebol, Jehova i mekem kontrak wetem ol man Isrel blong oli kam ol man blong hem we hem i jusumaot. Nating se ol man Isrel oli ol spesel man blong Jehova, be Loa i talem se oli mas respektem mo mekem i stret long ol man we oli no laen blong Isrel. Hemia wan samting we yumi tu yumi mas mekem. Ol Kristin oli no mas lukluk nogud long ol man blong narafala kantri. ?From wanem? Aposol Pita i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Wok 10:34, 35.

³ Bifo ol man blong ol narafala kantri oli harem gud blong stap long Isrel. ?From wanem? From we Jehova i glad long ol man blong ol narafala kantri. Sam yia biaen, aposol Pol i tokbaot Jehova se: “Hem i God blong yufala tu we yufala i no laen blong Isrel, mo yufala tu i save bilif long hem.”—Rom 3:29; Joel 2:32.

4. ?From wanem long “Isrel blong God,” i no gat man we i olsem strenja?

⁴ Afta we God i mekem niufala kontrak wetem ol tabu Kristin, ol man Isrel oli no moa spesel man blong  hem. Be ol tabu Kristin nao oli kam “Isrel blong God.” (Gal. 6:16, NW) Pol i eksplenem samting we i stap long niufala neson ya i se: “Naoia yumi no moa save makem yumi, se sam man oli laen blong Isrel, mo sam oli no laen blong Isrel, sam oli sakomsaes mo sam oli no sakomsaes, sam oli no skul gud, mo sam oli man bus olgeta, sam oli slef, mo sam oli friman. . . . Kraes ya, hem i evri samting long laef blong yumi ol man blong hem, mo hem i stap finis long laef blong yumi evriwan.” (Kol. 3:11) Taswe, insaed long Kristin kongregesen, i no gat man we i olsem strenja.

5, 6. (1) ?From wanem maet samfala oli stap tingting long ol tok long Aesea 61:5, 6? (2) ?Hu ya ‘ol pris blong God’ mo “ol man blong ol narafala kantri”? (3) ?Oli wok tugeta olsem wanem?

⁵ Maet samfala oli stap tingting long ol tok long Aesea japta 61. Hem i wan profet tok we i kamtru long Kristin kongregesen. Vas 6 i tokbaot samfala we bambae oli ‘pris blong God.’ Be vas 5 i tokbaot “ol man blong ol narafala kantri” we bambae oli givhan long ol “pris” ya mo oli wok wetem olgeta. ?From wanem vas ya i tokbaot “ol man blong ol narafala kantri”?

⁶ Ol ‘pris ya blong God’ hemia ol tabu Kristin we oli “laef bakegen long ded fastaem.” Olgeta ya “oli pris blong God mo blong Kraes, mo bambae oli joen wetem Kraes we hem i king, nao oli rul wetem hem, gogo wan taosen yia i pas.” (Rev. 20:6, NTB) I gat plante Kristin we oli putum tingting blong olgeta i stap strong long laef long Paradaes long wol ya. Olgeta ya oli wok wetem olgeta we bambae oli laef long heven, mo oli joen gud wetem olgeta. Olgeta we bambae oli laef long wol, oli no “Isrel blong God,” be oli olsem ol man blong ol narafala kantri. Oli glad blong wok wetem “ol pris blong God” olsem ol “man we oli wok long ol garen” mo long “ol plantesen blong grep.” Oli givhan long ol tabu Kristin blong mekem se nem blong Jehova i stap tabu. Yes, oli prij mo oli tijim trutok long ol man, mo oli givhan long olgeta blong oli folem trutok ya long laef blong olgeta.—Jon 10:16.

YUMI “STRENJA NOMO” OLSEM EBRAHAM

7. ?Olsem wanem ol Kristin tede oli sem mak long Ebraham mo ol narafala gudfala man bifo?

⁷ Long las stadi, yumi lanem se ol tru Kristin oli olsem ol man blong narafala kantri, from we oli “strenja nomo” long rabis  wol ya blong Setan. Oli sem mak long Ebraham mo ol narafala gudfala man bifo, we oli no wantem joen long wol, oli ‘olsem strenja nomo.’ (Hib. 11:13) Nomata se bambae yumi laef long heven no long wol, yumi save stap olsem spesel fren blong Jehova, olsem Ebraham. Jemes i eksplenem se “‘Ebraham i bilif long God, mo from we hem i bilif olsem, God i mekem hem i stret man long fes blong hem.’ Mo ol man oli stap singaot hem se, ‘Fren blong God.’”—Jem. 2:23.

8. ?Jehova i mekem wanem promes long Ebraham? ?Ebraham i tingbaot promes ya olsem wanem?

⁸ God i no promes blong blesem wan kantri nomo. Be hem i promes se bambae hem i blesem olgeta famle long wol from Ebraham mo laen blong hem. (Ridim Jenesis 22:15-18.) Promes ya bambae i kamtru afta we Ebraham i ded. Nating se i olsem, Ebraham i save se promes ya bambae i mas kamtru. Blong plante yia, Ebraham mo famle blong hem oli go stap long plante defren ples. Mo long olgeta taem ya, hem i fren gud wetem Jehova.

9, 10. (1) ?Yumi save folem eksampol blong Ebraham olsem wanem? (2) ?Yumi save mekem wanem blong givhan long ol man?

⁹ Nating se Ebraham i no save se wetaem promes ya bambae i kamtru, be hem i gohed blong lavem Jehova mo wosipim hem. Ebraham i tingbaot oltaem se hem i wan strenja nomo long wol ya. Taswe hem i no mekem ol samting we ol narafala oli ting se wan man ples i mas mekem. (Hib. 11:14, 15) Yumi mas folem eksampol blong Ebraham. Yumi mekem laef blong yumi i no fasfas. Yumi no mas ting se samting we i moa impoten hemia blong gat plante samting, haenem long komuniti, mo gudfala wok. I no longtaem wol ya bambae i lus, ?taswe from wanem yumi wantem laef olsem ol narafala man? Ol samting blong wol ya oli blong sot taem nomo, ?taswe from wanem yumi laekem ol samting ya? Yumi wet long wan samting we i moa gud i bitim wol ya. Mo yumi glad blong wet wetem longfala tingting, kasem taem we ol promes blong God oli kamtru.—Ridim Rom 8:25.

¹⁰ Ol blesing we God i promes blong givim long Ebraham mo long olgeta we oli kamaot biaen long hem, oli blong olgeta man tede tu. ‘Ol pris blong God’ we tabu spirit i makemaot olgeta, mo “ol man blong ol narafala kantri” oli stap talemaot long ol man blong bitim 600 lanwis, se God i wantem we olgeta oli kasem ol blesing ya.

YUMI LAVEM OL MAN BLONG OLGETA KANTRI

11. ?Solomon i singaot ol man blong olgeta kantri blong oli mekem wanem?

¹¹ Taem Solomon i openem haos tempol long yia 1026 B.K.T., * hem i mekem wan prea. Ol toktok blong prea ya i givhan long yumi blong luk tingting we Jehova i gat long ol man blong olgeta kantri. Solomon i askem long Jehova blong i harem prea blong ol man blong olgeta kantri we oli kam long haos tempol blong prea. Hemia wan rod we ol man ya oli save kasem ol blesing we Jehova i promes blong givim long Ebraham. Solomon i prea se: “Hae God. Sipos wan man blong narafala kantri i stap long ples blong hem we i longwe long ples ya, nao i harem nius blong yu, we yu gat olgeta paoa, mo we yu mekem ol bigbigfala samting ya blong givhan long mifala, nao hem i kam long haos ya, i prea, nating we yu yu stap long hom blong yu long heven, be plis yu harem prea blong hem. Sipos man olsem i kam long yu, plis yu mekem ol samting we hem bambae i askem long yu, blong bambae olgeta man long wol oli save yu, mo oli ona long yu, olsem we mifala i stap ona long yu.”—1 King 8:41-43.

12. ?From wanem ol Witnes blong Jehova oli olsem ol man blong narafala kantri?

 ¹² Ol Witnes blong Jehova oli olsem ol man we oli visitim wan kantri we i no kantri blong olgeta. Oli stap long plante kantri long wol, be oli sapotem Kingdom blong God long heven we Jisas Kraes i King long hem. Oli no joen long politik long kantri blong olgeta, nating se ol narafala man oli ting se fasin ya i no stret.

13. (1) ?Wanem i save givhan long yumi blong yumi no luk narafala olsem strenja? (2) ?Bifo olgeta, Jehova i wantem wanem?

¹³ Samtaem, man i save luk ol narafala se oli strenja from fasin blong olgeta blong toktok, kastom blong olgeta, kala blong skin blong olgeta, mo klos blong olgeta. Be ol samting ya oli no impoten. Samting we i moa impoten hemia blong tingbaot ol samting we i mekem se yumi evriwan i sem mak. Taswe, taem yumi lanem blong no tingbaot ol samting we oli mekem se narafala i defren long yumi, bambae yumi no luk hem se hem i wan strenja. Sipos wan gavman nomo i rulum fulwol, bambae i no gat wan man we i olsem strenja. Bifo olgeta, Jehova i wantem se olgeta man oli stap olsem wan famle nomo aninit long rul blong hem. ?Olsem wanem? ?Fasin ya blong luk narafala olsem strenja bambae i finis?

14, 15. ?Wanem gudfala samting we grup blong ol Witnes blong Jehova i mekem?

¹⁴ Plante man long wol ya oli tingbaot olgeta nomo mo oli ting se kantri blong olgeta i gud moa long ol narafala kantri. Be i gat sam man we oli lavem ol man blong ol narafala kantri. I tru, yumi mas traehad blong jenisim tingting we yumi gat long ol narafala man. Man ya Ted Turner, we i statem wan program blong hem long TV we nem blong hem, CNN, i wok wetem plante man long olgeta ples long wol. Hem i talem se: “Mi lanem blong no luk ol man blong ol narafala kantri olsem ‘strenja,’ be olsem ol manples blong mi long wol ya.” Man ya i stanemap wan rul se ol wokman blong hem oli no yusum tok ya “strenja.” Be oli mas yusum tok ya “ol man blong evri ples.”

¹⁵ Long fulwol, grup blong ol Witnes blong Jehova nomo i folem tingting we God i gat long ol man blong olgeta kantri. Oli lanem blong tingbaot ol man olsem we God i tingbaot olgeta. From samting ya, oli jenisim tingting we oli gat long saed blong ol narafala. Oli laekem ol man blong ol narafala kantri mo oli trastem olgeta. Oli glad blong luk ol defdefren fasin we ol man oli gat mo ol defdefren samting we oli naf blong mekem. ?Yu yu stap tingbaot se samting ya we ol Witnes oli mekem i spesel tumas? Taem yumi evriwan i jenisim tingting blong yumi long saed blong ol narafala, samting ya i mekem i gud long yumi evriwan.

 WAN WOL WE BAMBAE I NO MOA GAT STRENJA LONG HEM

16, 17. Taem ol tok blong Revelesen 16:16 mo Daniel 2:44 i kamtru, ?samting ya bambae i mekem wanem long yumi?

¹⁶ I no longtaem, olgeta kantri bambae oli faet agensem rul blong God, long Amagedon. (Rev. 16:14, 16; 19:11-16) Bitim 2,500 yia bifo, profet Daniel i talemaot samting we bambae i hapen long ol gavman blong man. Hem i talem se: “Long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”—Dan. 2:44.

¹⁷ ?Taem profet tok ya i kamtru, samting ya bambae i mekem wanem long yumi? Tede, ol man oli putum ol mak we i seraotem ol kantri, mekem se i gat plante defdefren kantri long wol. Be afta long Amagedon, bambae i no moa gat ol mak olsem. Mo nating se ol man oli defdefren, be hemia bambae i soemaot ol gudgudfala fasin we God i putum long ol samting we hem i mekem. Yumi gat wan gudfala fiuja, taswe yumi mas mekem evri samting we yumi naf blong mekem, blong yumi gohed blong presem Jehova God mo ona long hem.

18. ?Wanem samting we i soemaot se ol Witnes oli no tingbaot ol narafala olsem ol strenja?

¹⁸ ?Yu ting se wan dei bambae ol man oli no moa luk narafala olsem strenja? Yes, yumi save bilif se samting ya bambae i hapen. Tede, ol Witnes blong Jehova oli no tingbaot ol narafala olsem ol strenja. Yu traem tingbaot. I no longtaem i pas, oli klosem sam smol hed ofis, mo oli mekem se ol narafala hed ofis long narafala kantri oli lukaot long ol wok blong olgeta. Hemia i blong meksua se wok blong prij i gohed long fasin we i isi moa. (Mat. 24:14) Sipos i no gat loa we i blokem olgeta, bambae oli gohed blong wok, nomata wanem kantri we oli stap long hem. Jisas Kraes hem i King blong Kingdom blong God. Hem i stap givhan long ol Witnes blong Jehova blong oli joen gud, nating se oli stap long ol defdefren kantri. Bambae i no moa gat ol mak we i seraotem ol kantri. I no longtaem, bambae Jisas i finisim faet blong hem blong i win bakegen.—Rev. 6:2.

19. ?Klin lanwis i mekem se ol Witnes oli save mekem wanem?

¹⁹ Ol Witnes blong Jehova oli kamaot long plante defren kantri mo oli gat plante defdefren lanwis. Nating se i olsem, oli joen gud mo neva bambae oli seraot. (Ridim Sefanaea 3:9. *) Oli olsem wan bigfala famle long fulwol. Nating se oli laef long rabis wol ya, be oli no joen long hem nating. Bigfala famle ya i joen gud naoia. Hemia i pruvum se long niufala wol, bambae i no gat wan man we i olsem strenja. Evri man long wol bambae oli harem gud mo oli luk ol narafala blong ol defren laen se oli brata nomo.

[Ol futnot]

[Kwestin]

[Tok blong pija long pej 31]

?Yu yu glad blong stap long taem ya we i no moa gat ol mak we oli seraotem ol kantri, mo i no moa gat strenja?

[Tok blong pija long pej 28]

?Bambae yu yu gohed blong putum tingting blong yu long ol promes blong God, olsem Ebraham i mekem?

[Tok blong pija long pej 30]

Jehova i luk ol man se oli sem mak nomo