Yumi Gohed Blong Stap Olsem “Ol Strenja Nomo”
Yumi Gohed Blong Stap Olsem “Ol Strenja Nomo”
“Yufala i stap long wol ya olsem ol strenja nomo, mo olsem ol man we oli no gat hom blong olgeta. Mi mi talem strong long yufala, se bambae yufala i no mekem ol rabis fasin we tingting blong yufala i wantem.”—1 PITA 2:11.
?BAMBAE YU YU ANSA OLSEM WANEM?
?From wanem ol tabu Kristin oli olsem ol strenja nomo long wol ya?
?Long wanem fasin ol narafala sipsip oli olsem ol strenja nomo?
?Wanem samting we yu yu wet long hem?
1, 2. ?Hu ya ‘ol man we God i jusumaot’? ?From wanem Pita i talem se olgeta oli olsem “ol strenja nomo”?
KLOSAP 30 yia afta we Jisas i go long heven, aposol Pita i raetem leta i go long ‘ol man we God i jusumaot.’ Olgeta ya oli olsem “strenja nomo, long ol provins ya Pontas mo Galesia mo Kapadosia mo Esia mo Bitinia.” (1 Pita 1:1) Pita i stap tokbaot ol tabu Kristin we oli ‘bon bakegen, oli gat niufala laef,’ blong bambae oli king wetem Kraes long heven. (Ridim 1 Pita 1:3, 4.) ?Be from wanem hem i talem se olgeta ya oli olsem “strenja nomo, mo olsem ol man we oli no gat hom blong olgeta”? (1 Pita 2:11) I gat wan smol grup nomo blong ol man blong Jehova we tabu spirit i makemaot olgeta, we oli laef yet long wol. ?Taswe, from wanem yumi evriwan i wantem kasem save long tok blong Pita?
2 I no rong blong talem se ol fas Kristin we tabu spirit i makemaot olgeta, oli olsem “ol strenja nomo.” Ol tabu Kristin bambae oli no laef long wol ya blong olwe. Tabu spirit i makemaot Pol mo hem i blong smol kampani blong “ol sipsip.” Hem i eksplenem se ol tabu Kristin oli sitisen blong heven taem hem i talem se: “Be long yumi i narafala. Yumi man blong heven, yumi gat raet insaed long ples ya, mo yumi stap wet blong luk Jisas Kraes, Masta blong yumi, we bambae i save kamaot long heven blong sevem yumi.” (Luk 12:32; Fil. 3:20) Hemia i min se afta we ol tabu Kristin oli ded, oli aot long wol blong Setan, mo oli kasem laef long heven, we oli no moa save ded samtaem. (Ridim Filipae 1:21-23.) Oli laef long wol ya blong sot taem nomo, taswe oli olsem “ol strenja nomo.”
3. ?Wanem kwestin long saed blong “ol narafala sipsip” we yumi mas askem?
3 ?Olsem wanem long “ol narafala sipsip”? (Jon 10:16) Baebol i tijim se bambae oli laef olwe long wol. ?Be from wanem yumi save talem se olgeta tu oli olsem ol strenja nomo long wol ya?
“OLGETA SAMTING YA WE GOD I MEKEM OLI STAP KRAE”
4. ?Ol man oli no save finisim wanem?
4 Jehova i letem rabis wol blong Setan i stap yet. Taswe olgeta man evriwan, wetem ol man blong Jehova tu, bambae oli gohed blong harem nogud long ol samting we i kamaot from we Setan i agensem Jehova. Rom 8:22 i talem se: “Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud.” I gat sam man we oli wantem yusum politik, saens, mo mane blong mekem laef i kam gud moa. Be oli no save finisim ol samting we oli mekem ol man oli harem nogud.
5. ?Stat long 1914, plante taosen man oli jusum wanem, mo from wanem?
5 Stat long 1914, plante taosen man oli jusum blong stap aninit long rul blong Jisas Kraes, King ya we God i putumap. Ol man ya oli no wantem joen long ol rabis fasin blong wol ya. Oli no wantem sapotem wol blong Setan. Be oli yusum laef blong olgeta mo ol samting we oli gat, blong sapotem Kingdom blong God.—Rom 14:7, 8.
6. ?From wanem olgeta Witnes blong Jehova oli olsem ol strenja nomo?
6 Ol Witnes blong Jehova oli ol gudfala sitisen long bitim 200 kantri. Be nomata weples oli stap long hem, oli olsem ol strenja nomo we oli no gat hom blong olgeta. Oli no joen long politik mo long ol problem blong kantri blong olgeta. Nating se oli laef long wol ya, be oli tingbaot se oli sitisen blong niufala wol we God i promes blong givim long ol man. Oli harem gud se klosap nao bambae oli no moa stap olsem ol strenja nomo long wol ya.
7. ?Wanem samting bambae i mekem se ol man blong God oli save laef olwe? ?Mo bambae oli laef olwe long weples?
7 I no longtaem, Jisas Kraes bambae i spolem rabis wol ya blong Setan. Gavman blong God we Kraes i rul long hem, bambae i finisim sin mo ol samting we oli mekem ol man oli harem nogud. Bambae hem i tekemaot olgeta man we oli agensem hae rul blong Jehova. Ale, olgeta we oli stap tru long God bambae oli save stap olwe long Paradaes long wol. (Ridim Revelesen 21:1-5.) Ol samting we Jehova i mekem bambae oli fri long olgeta samting we oli stap mekem olgeta oli harem nogud, mo bambae oli “fri olgeta, olsem ol pikinini blong [God].”—Rom 8:21.
?OL TRU KRISTIN OLI MAS GAT WANEM FASIN?
8, 9. ?Pita i minim wanem taem hem i talem se yumi ‘no mekem ol rabis fasin we tingting blong man i wantem’?
8 Pita i eksplenem ol fasin we ol Kristin oli mas mekem. Hem i talem se: “Ol fren. Yufala i stap long wol ya olsem ol strenja nomo, mo olsem ol man we oli no gat hom blong olgeta. Mi mi talem strong long yufala, se bambae yufala i no mekem ol rabis fasin we tingting blong yufala i wantem. Ol fasin ya oli agensem yufala blong spolem laef blong yufala.” (1 Pita 2:11) Ol tok ya i go long ol tabu Kristin, be oli stret tu long ol narafala sipsip.
9 Sam samting we yumi wantem, oli no rong sipos yumi mekem ol samting ya long fasin we Jehova i wantem. Taem yumi mekem olsem, yumi harem gud. Yu traem tingbaot. I stret nomo we yumi wantem kakae gudfala kakae mo dring wan gudfala samting. Yumi harem gud tumas taem yumi joen wetem ol gudfala fren mo yumi mekem sam samting blong spel. Mo i stret nomo we man mo woman we i mared i wantem slip tugeta. (1 Kor. 7:3-5) Be long vas ya, Pita i tokbaot klia ‘ol rabis fasin we tingting blong man i wantem’ we i ‘spolem laef blong hem.’ Sam Baebol i tanem tok ya i kam “wantem tumas ol rabis mo doti fasin,” (King James Version) mo “wantem tumas blong mekem sin,” (New International Version). Jehova i wantem se oltaem yumi mekem samting we i laenap wetem tingting blong hem. Yumi no mas letem eni samting we man nomo i wantem, i spolem yumi nao yumi no moa fren gud wetem God. Sipos yumi folem prapa tingting blong yumi, yumi no save kasem laef.
10. ?Wanem sam trik we Setan i yusum blong pulum ol Kristin blong oli joen long wol?
10 Setan i wantem we yumi fogetem se yumi olsem “ol strenja nomo.” Hem i wantem se yumi gat tingting ya blong wantem plante samting, yumi mekem rabis fasin blong man wetem woman, yumi kasem haenem, yumi winim ol narafala man, mo yumi flas from kantri blong yumi. Be yumi mas luksave se ol samting ya oli ol trap blong Setan. Sipos yumi strong blong no folem ol rong tingting ya, yumi stap soemaot se yumi no joen long rabis wol ya, mo yumi olsem “ol strenja nomo.” Yumi stap traehad from we yumi wantem laef olwe long niufala wol blong God, we stret fasin nomo i stap long hem.
YUMI MEKEM FASIN BLONG YUMI I STRET
11, 12. ?Wanem tingting we sam man oli gat long ol strenja? ?Sam man oli tingting olsem wanem long ol Witnes blong Jehova?
11 Pita i gohed blong eksplenem samting we ol Kristin we oli olsem “ol strenja,” oli mas mekem. Hem i talem se: “Ol hiten man oli stap faenem poen long yufala se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God bambae i kam blong jajem olgeta, bambae oli save leftemap nem blong God from ol gudfala wok ya blong yufala.” (1 Pita 2:12, NTB) Ol man we oli strenja long wan kantri, hemia ol man we oli laef long wan kantri we i no kantri blong olgeta. Samtaem ol man oli tok agensem ol strenja from we oli defren, mo oli ting se oli ol rabis man. Fasin blong ol strenja blong toktok, blong mekem samting, putum klos, mo kala blong skin blong olgeta i defren long ol man we oli laef long kantri ya. Be taem ol strenja ya oli soemaot gudfala fasin, ol narafala bambae oli luksave se oli no ol rabis man.
12 Long sem fasin, ol Witnes blong Jehova oli defren long ol man raonabaot long olgeta. Maet oli tokbaot wan samting no oli jusum wan samting blong spel we i defren olgeta long ol narafala. Plante taem ol man oli luksave olgeta from fasin blong olgeta blong putum klos. From samting ya, maet sam man oli talem sam samting blong “faenem poen” long ol Witnes. Be ol narafala oli talem gudfala tok long saed blong ol Witnes from ol gudfala fasin blong olgeta.
13, 14. ?Wanem mining blong tok blong Jisas long Matiu 11:19? Yu talem sam stori.
13 Gudfala fasin blong yumi i save givhan long ol narafala, blong oli luksave se i krangke nomo blong tok nogud long yumi. Jisas i obei fulwan long God. Be nating se i olsem, ol man oli talem se hem i stap mekem ol nogud samting. Samfala oli talem se hem i kakae tumas, i dring tumas, mo i fren gud wetem ol sinman. Be ol gudfala fasin blong hem oli soemaot se hem i no olsem. Jisas i talem se: “Ol gudfala wok blong ol man we oli stap folem waes blong God, oli stap soemaot we waes ya i tru.” (Mat. 11:19) Tok ya i tru tede tu. Long Jemani, long taon ya Selters, sam man we oli stap klosap long Betel, oli ting se fasin blong laef blong olgeta long Betel i narakaen. Be mea blong taon ya i tekem saed blong olgeta long Betel. Hem i talem se: “Ol Witnes we oli wok long ples ya, oli folem wan fasin blong laef we i defren, be samting ya i no spolem ol man long komuniti.”
14 Long Rasia, ol man long taon ya Moscow, oli talem se ol Witnes blong Jehova oli mekem plante samting we i nogud. Samfala oli talem se ol Witnes oli stap spolem ol famle, oli pulum ol narafala blong oli kilim olgeta bakegen oli ded, mo oli no wantem go long hospital. Be long manis Jun 2010, Kot Blong Yurop We i Lukaot Long Raet Blong Ol Man, i talem se ol man long Moscow oli rong. Oli no gat raet blong blokem ol Witnes blong Jehova blong oli holem ol miting blong olgeta. Kot ya i talem se ol kot long Rasia oli no save pruvum se fasin blong ol Witnes i nogud, mo se oli yusum ol strong loa blong Moscow, blong mekem i no stret long ol Witnes blong Jehova.
YUMI MAS OBEI LONG GAVMAN
15. ?Wanem tok blong Baebol we ol tru Kristin oli stap obei long hem?
15 Ol Witnes blong Jehova long fulwol oli mekem wan narafala samting we Pita i talem se ol Kristin oli mas mekem. Hem i talem se yumi mas ona long “olgeta lida we ol man oli putumap.” (1 Pita 2:13, 14) Yumi no joen long rabis wol ya. Be yumi glad blong obei long ol bigman blong gavman we “oli stap,” taem loa blong olgeta i no agensem ol loa blong God.—Ridim Rom 13:1, 5-7.
16, 17. (1) ?Wanem i soemaot se ol tru Kristin oli no wantem agensem gavman? (2) ?Sam lida blong gavman oli talem wanem?
16 Ol Witnes blong Jehova oli olsem “ol strenja nomo” long wol ya, be i no from we oli wantem agensem gavman no oli wantem spolem ol man. Oli save se ol man oli gat prapa tingting blong olgeta long saed blong hu i mas kam lida long gavman, mo olsem wanem blong stretem ol trabol. Sam jos oli joen long politik, be ol Witnes blong Jehova nogat. Ol Witnes oli no traem blong pulum ol lida blong politik blong oli jenisim fasin blong olgeta blong rulum ol man. Oli no gat tingting nating blong agensem gavman, mo blong pulum ol man blong oli agensem gavman.
17 Pita i talem se yumi mas “ona long hed gavman.” Taswe ol Kristin oli respektem ol gavman mo oli obei long olgeta. (1 Pita 2:17) Samtaem ol lida blong gavman oli talem se i no gat risen blong ol man oli ting se ol Witnes oli save spolem olgeta. Wan man blong politik long Jemani we i bin wok long gavman, i talem se ol Witnes blong Jehova oli soemaot gudfala fasin taem ol Nasi oli mekem i nogud long olgeta. Oli no jenisim bilif blong olgeta, nating se ol man oli agensem olgeta. Mo oli mekem i gud long ol narafala man long kalabus. Hem i talem se fasin blong olgeta i impoten tumas long wan kantri olsem Jemani, speseli taem sam man oli no moa kaen long ol man blong narafala kantri, mo long ol man we oli gat defren tingting long saed blong politik mo bilif.
YUMI MAS LAVEM OL BRATA MO SISTA
18. (1) ?From wanem i stret nomo we yumi lavem olgeta brata mo sista? (2) ?Sam man oli talem wanem long saed blong ol Witnes blong Jehova?
18 Aposol Pita i raetem se: “Yufala i mas lavem olgeta Kristin man, mo yufala i mas ona gud long God.” (1 Pita 2:17) Ol Witnes blong Jehova oli no wantem mekem wan samting we i save mekem God i harem nogud. Samting ya i pusum olgeta blong oli wantem mekem wok blong hem. Oli glad blong joen wetem olgeta brata mo sista we oli mekem wok blong Jehova long fulwol. Oli lavem “olgeta Kristin” brata mo sista blong olgeta. I had long ol man long wol blong oli lavem ol narafala. Hemia nao from wanem ol man oli sapraes taem oli luk ol Witnes oli lavlavem olgeta. Long 2009, wan woman long Jemani we wok blong hem i blong soemaot ol ples long ol turis, i sapraes tumas blong luk we ol brata sista we oli kam long bigfala asembli long Jemani, oli lavlavem olgeta. Ol Witnes blong Jehova long Jemani oli lavem ol brata mo sista blong olgeta we oli kam long ol narafala kantri, mo oli givhan long olgeta. Woman ya i talem se hem i neva luk wan grup we i olsem ol Witnes blong Jehova. ?Olsem wanem? ?Yu yu harem finis ol man oli toktok olsem long saed blong ol Witnes?
19. ?Yumi mas gat strong tingting blong mekem wanem, mo from wanem?
19 Olsem we yumi luk finis, ol Witnes blong Jehova oli soemaot se oli olsem “ol strenja nomo” long rabis wol blong Setan. Oli gat strong tingting blong stap olsem “ol strenja nomo.” Olgeta oli gat strong bilif se i no longtaem bambae oli stap olwe long niufala wol. ?Yu yu stap wet long niufala wol ya?
[Kwestin]
[Tok blong pija long pej 23]
Yumi no wantem sapotem wol blong Setan
[Tok blong pija long pej 23]
Yumi sapotem niufala wol blong God
[Tok blong pija long pej 25]
Trutok blong Baebol i givhan long famle ya long Rasia
