Mi mi bon long Moundsville, wan taon we i kwaet, mo i stap klosap long Ohio Reva long not wes blong Virginia, long Amerika. Long famle blong mi, mifala fo pikinini evriwan, tri boe mo wan gel, mo mi mi seken bon. Oltaem mifala i pleplei mo mekem noes long haos. Papa mo mama blong mi, tufala i wok had blong lukaot long mifala, tufala i gat gudfala fasin mo tufala i lavem ol man. Mifala i no gat plante mane, be oltaem mifala i gat samting we mifala i nidim. Papa mo mama blong mi tufala i Witnes blong Jehova. Tufala i mekem bes blong tufala blong putum ol rul blong Baebol long hat blong mifala taem mifala i smol nomo.

Be taem mi kam yangfala, sam narafala samting oli stat blong pulum tingting blong mi i gowe long ol samting we mi lanem. Mi stat blong askem sipos i tru se man i save harem gud taem hem i folem ol rul blong Baebol long laef blong hem. Ale mi tingting se wan rod nomo blong man i glad, hemia sipos hem i fri blong mekem eni samting we hem nomo i wantem. I no longtaem afta, mi no moa go long ol miting. Bigfala brata blong mi mo smol sista blong mi, tufala tu i no moa go long ol miting. Papa mo mama blong mifala, tufala i mekem evri samting blong givhan long mifala, be mifala i no wantem save long samting ya.

Mi no bin luksave se ol samting we mi ting se oli mekem mi mi fri, bambae oli pulum mi blong mi kam slef blong olgeta. Wan dei, taem mi stap gobak long haos afta long skul, wan fren i givim wan sigaret long mi, ale mi tekem. Stat long dei ya, mi agri nomo blong mekem enikaen nogud fasin. I no longtaem afta, mi dring bitim mak, mi tekem plante drag, mo mi mekem nogud fasin blong man wetem woman. Sam yia afta, sloslo mi tekem ol drag we oli strong moa, mo mi kam slef blong olgeta. Ale, blong mi gat mane blong pem ol drag ya, mi stat blong salem drag.

Tingting blong mi i stikim mi oltaem, mo i mekem mi tingbaot se rod we mi stap folem i no stret, be mi traehad blong no lesin long hem. Mi ting se mi no save mekem laef blong mi i kamgud from we mi mekem plante nogud samting finis. Nating se mi joen oltaem wetem ol man long ol lafet mo ol konset, be plante taem mi harem se mi no gat fren mo tingting blong mi i foldaon. Samtaem mi stap tingtingbak long papa mo mama blong mi, mo gudfala fasin blong tufala. Mo mi stap tingting se fasin blong mi i longwe tumas long fasin blong tufala.

Mi ting se mi mi blong lus nomo, be ol narafala oli no gat tingting ya. Long yia 2000, papa mo mama blong mi, tufala i askem long mi blong mi go wetem tufala long wan asembli blong tri dei, we ol Witnes blong Jehova oli mekem. Ale mi go, nating se mi no wantem. Mi mi sapraes tumas taem mi luk we bigfala brata blong mi mo smol sista blong mi, tufala tu i kam long asembli ya.

Taem mi stap long asembli, mi tingbaot se wan yia bifo, mi bin kam long ples ya blong lesin long wan konset blong miusik. Samting we mi luk long asembli ya i tajem hat blong mi bigwan. Taem i gat konset long ples ya, ol man oli no kaen, oli sakem doti olbaot, mo ples i fulap long smok blong sigaret. Mo ol toktok blong miusik long konset ya, i no leftemap tingting nating. Be ol man we oli stap long asembli ya oli hapi mo oli welkamem mi, nating se mi no luk olgeta blong plante yia. Ples i klin, mo ol tok we oli kamaot oli pulum mi blong mi putum tingting blong mi i stap long wan samting we i moagud. Taem mi luk olsem wanem tok blong God i gat paoa long laef blong ol man, mi stap askem se: ?From wanem mi bin sakemaot trutok?​—Aesea 48:17, 18.

Afta long asembli ya, mi mekemap tingting blong mi kwiktaem blong mi joen wetem kongregesen bakegen. Asembli ya i tajem hat blong bigfala brata blong mi tu, wetem smol sista blong mi, mo tufala tu i wantem joen bakegen long kongregesen. Ale, mitrifala i stadi Baebol.

Wan vas blong Baebol we i tajem hat blong mi, hemia Jemes 4:8 we i talem se: “Yufala i mas stap klosap long God, nao hem bambae i kam stap klosap long yufala.” Mi luksave se sipos mi wantem kam klosap long God, mi mas klinim laef blong mi. Mo mi mas stop blong smok, tekem drag mo strong dring.​—2 Korin 7:1.

Mi sakemaot ol fren we mi bin gat mo mi lukaot ol niufala fren long kongregesen, we oli wosip long Jehova. Elda we i mekem stadi blong mi i givhan bigwan long mi. Oltaem hem i ring long mi mo i kam luk mi long haos, blong luk sipos mi oraet. Kam kasem tede, elda ya i besfren blong mi.

Long yia 2001, taem ol tri oli stat blong putum flaoa, mi baptaes blong soemaot we mi givim laef blong mi long Jehova. Bigfala brata blong mi wetem smol sista blong mi, tufala tu i baptaes long taem ya. Yu traem tingbaot glad blong papa mo mama blong mi wetem smol brata blong mi, taem oli luk we famle blong mifala i joen gud bakegen blong wosipim Jehova.

Bifo mi ting se ol rul blong Baebol oli strong tumas. Be naoia, mi luksave se oli protektem mi bigwan. Baebol i givim paoa long mi blong mi no moa tekem mo salem drag, mo blong mi kam wan gudfala man long komuniti.

Mi kasem blesing ya blong stap long medel blong bigfala kampani blong ol brata mo sista we oli wosipim Jehova long fulwol. Olgeta ya oli lavlavem olgeta, mo oli joen gud blong mekem wok blong God. (Jon 13:34, 35) Wan spesel blesing we mi kasem long ogenaesesen blong Jehova, hemia se mi mared long wan gudfala woman we mi lavem hem tumas, nem blong hem Adrianne. Mitufala i glad tumas blong mekem wok blong Jehova tugeta.

Naoia mi no moa mekem samting we mi nomo mi wantem. Be mi mekem wok blong Jehova fultaem, mi stap tijim ol man blong oli luksave se Baebol i save mekem olgeta oli glad. Wok ya i mekem mi mi glad tumas. Mi save talem wetem strong tingting se Baebol i jenisim laef blong mi. Mi mi fri olgeta.