LONG wan eli moning, taem san i girap, Rehab i lukluk i gotru long windo, nao i luk wan bigfala ami blong Isrel oli hivap long levelples raonabaot long Jeriko. Oli stat blong maj i goraon long taon ya bakegen olsem we oli mekem long ol dei we oli pas. Ol man long taon ya oli harem noes blong pupu bakegen, nao taem oli wekap, oli luk se das i kavremap gud taon ya.

Rehab i laef long taon ya Jeriko, taswe hem i savegud ol man, ol rod, ol haos, ol ples blong maket mo ol stoa. Hem i luksave se ol man long taon ya oli fraet tumas, taem oli luk ol man Isrel oli stap gohed nomo blong majraon long taon ya evri dei. Taem Rehab i harem we noes blong ol pupu ya i stap kam strong moa, hem i no fraet mo i no wari olsem ol man ples blong hem.

Long eli moning long namba seven dei, Rehab i luk ol man Isrel, oli maj bakegen. Hem i luk ol pris oli stap blu long pupu, mo oli karem tabu bokis ya blong kontrak we i soemaot se Jehova i stap wetem olgeta. Rehab i putum han blong hem long red rop ya we i hang long windo blong hem. Rop ya i mekem Rehab i tingbaot se, hem mo famle blong hem bambae oli sef taem taon ya bambae i foldaon. ?Olsem wanem? ?Rehab i agensem ol man ples blong hem? ?Hem i agensem Jehova? !Nogat! Jehova i luk Rehab olsem wan woman we i gat strong bilif. I gud yumi gobak long stat blong stori ya, mo luk samting we yumi save lanem.

Sam man blong stadi long Baebol bifo, oli ting se Rehab i wan woman blong lukaot long wan hotel. Be Baebol i talem klia se hem i wan woman blong rod. Save ya i mekem olgeta oli sek. (Josua 2:1; Hibrus 11:31; Jemes 2:25) Ol man Kenan oli tingbaot wok we Rehab i mekem olsem woman rod, se i gud nomo. Nating se oli gat tingting olsem, be hem i save se wok ya i no stret. Hemia from we Jehova i mekem yumi evriwan wetem wan tingting we i save jajem yumi, nao yumi naf blong luksave samting we i stret mo samting we i no stret. (Rom 2:14, 15) Ating Rehab i sem bigwan from wok we hem i stap mekem. Tede plante man we oli gat fasin olsem, oli harem se oli fas long wan trap. Oli harem se oli mas mekem wok ya, blong oli save lukaot long famle blong olgeta. Maet Rehab tu i harem olsem.

Rehab i wantem gat wan gudfala laef. Be ples blong hem i fulap long ol raf fasin mo ol nogud fasin, mo fasin ya we man no woman i slip wetem stret famle blong hem, no i go wetem anamol. (Levitikas 18:3, 6, 21-24) Ol rabis fasin ya oli haf blong wosip blong olgeta. Oli stap leftemap rabis fasin blong ol woman blong rod long ol ples blong wosip. Mo oli wosipim ol giaman god ya Bal mo Molek, mo oli stap bonem ol pikinini blong olgeta long faea blong mekem sakrefaes.

Jehova i luk we ol man Kenan oli stap mekem plante nogud samting, nao hem i talem long olgeta se: ‘Graon blong yufala i kam doti long fes blong mi, nao mi bambae mi spolem graon ya, mi mekem i kam nogud, mo graon ya bambae i mekem we  yufala i aot long hem.’ (Levitikas 18:25) ?Jehova i minim wanem taem hem i talem se, “mi bambae mi spolem graon ya?” Hem i promes blong ronemaot ol man Kenan. Hem i talem long ol man Isrel se: “Hem bambae i stap ronemaot olgeta smosmol, gogo i finisim olgeta evriwan.” (Dutronome 7:22) ‘God i no save giaman.’ Plante handred yia bifo, hem i promes blong givim graon ya i go long famle blong Ebraham.—Taetas 1:2; Jenesis 12:7.

Jehova i talem tu se i gat sam laen blong ol man we oli stap long Kenan, we bambae oli mas lus fulwan. (Dutronome 7:1, 2) Jehova i “jajem olgeta man blong wol,” long stret fasin. Hem lukluk hat blong olgeta man mo hem i savegud ol slak fasin blong olgeta, mo ol rabis fasin we oli stap mekem. (Jenesis 18:25; 1 Kronikel 28:9) ?Laef blong Rehab i olsem wanem long taon ya we i fulap long rabis fasin? ?Wanem tingting blong Rehab, taem hem i harem se God blong Isrel i stap lidim ol man blong hem, i mekem oli fri, mo oli winim ol ami blong Ijip we oli strong man blong faet long taem ya? !Mo naoia oli stap rere blong kam spolem Jeriko! Be ol man taon ya, oli stap gohed nomo long ol rabis fasin blong olgeta. Naoia yumi save from wanem Baebol i tokbaot ol man Kenan se “oli no ona long God.”—Hibrus 11:31.

Rehab i defren. Longtaem finis i kam, ating Rehab i stap tingting gud long ol stori blong ol man Isrel mo God blong olgeta Jehova. !Jehova i defren long ol god blong ol man Kenan! Hem i stap sevem ol man blong hem, hem i no spolem olgeta. Mo hem i tinghae long ol man we oli wosipim hem. God i no tingbaot ol woman se, man i save mekem eni samting we hem i wantem long olgeta, mo yusum olgeta long rabis wosip blong olgeta. Be hem i tinghae long olgeta. Taem Rehab i harem se ol man Isrel oli stap narasaed long Jodan reva, mo oli rere blong kam spolem Jeriko, hem i wari bigwan long ol man ples blong hem. ?Olsem wanem? ?Jehova i luk Rehab mo i tinghae long hem?

Plante man tede oli harem se oli fas long wan trap olsem Rehab, oli no glad nating long ol samting we oli mekem long laef blong olgeta. Oli harem se i no gat man i tinghae long olgeta, nao oli ting se oli nating nomo. Stori blong Rehab i mekem yumi tingbaot se Jehova i stap lukluk yumi evriwan. Maet yumi ting se yumi nating nomo, be ‘God i no stap longwe long yumi nating.’ (Ol Wok 17:27) Hem i stap klosap nomo long yumi, hem i rere mo i wantem tumas blong givim wan gudfala fiuja long olgeta we oli bilif long hem. ?Olsem wanem? ?Rehab i bilif long God?

Sam dei bifo we ol man Isrel oli majraon long Jeriko, i gat tu strenja i go long haos blong Rehab. Tufala i ting se bambae i no gat man i luksave tufala, be from we ol man long taon ya oli fraet, oli tingbaot se maet ol man Isrel oli save sanem sam spae i kam insaed. Be Rehab i luksave tufala wantaem nomo, from we tufala i no olsem ol narafala man we oli go blong mekem rabis fasin wetem hem. Tufala i go askem wan ples blong slip nomo.

Tufala strenja ya, tufala i spae blong ol man Isrel. Josua i saenem tufala, blong go faenemaot sipos  ol man long taon ya oli strong no nogat. Hemia fas taon long Kenan we ol man Isrel oli kam blong spolem, mo maet hem nao i strong moa i bitim ol narafala taon. Josua i wantem save ol samting we bambae oli fesem. Tufala spae ya i plan blong go long haos blong Rehab. From tufala i ting se long ples ya, ol man bambae oli no luksave tufala. Mo tu, maet tufala i ting se bambae tufala i faenemaot plante save long saed blong taon ya, long ol storian blong ol man.

Baebol i talem se Rehab “i tekem tufala i go haed long haos blong hem.” (Jemes 2:25) Nating we Rehab i no save tufala, mo i no save from wanem tufala i kam, be hem i letem tufala i stap long haos blong hem. Maet hem i ting se hemia janis blong lanem moa long saed blong Jehova, God blong ol man Isrel.

!Wantaem nomo ol man blong king, oli kam! Nius i kasem ol man finis se, ol man Isrel oli sanem sam spae oli kam long haos blong Rehab. ?Rehab bambae i mekem wanem? Sipos hem i haedem tufala strenja ya, ating ol man Jeriko bambae oli kilim hem wetem ol famle blong hem oli ded. Naoia Rehab i save se tufala man ya, i man Isrel. Sipos hem i save we Jehova i gud moa i winim god blong hem, naoia janis blong hem blong soemaot we hem i stap long saed blong Jehova.

Rehab i tingting kwiktaem mo i tekem aksen. Hem i haedem tufala spae ya, aninit long ol gras ya flakis we hem i stap draemap long san antap long haos blong hem. Nao biaen, hem i talem long ol man blong king se: “Yes, i tru i gat tu man i kam long haos blong mi tede, be mi mi no save se tufala i man wea. Tufala i aot long ples ya taem san i stap godaon, we oli no satem doa blong bigfala stonwol blong taon ya yet. Mi mi no save weples tufala i go long hem. Ating sipos yufala i hareap naoia, bambae yufala i save kasem tufala.” (Josua 2:4, 5) Yu traem tingbaot Rehab taem hem i stap lukluk fes blong ol man blong king. ?Yu ting se hem i wari se ol man ya bambae oli luksave we hem i fraet?

!Hem i trikim gud olgeta! Ol man blong king oli hareap, oli go lukaot tufala gogo oli kasem rod we i gokros long Jodan Reva. (Josua 2:7) Ating Rehab i pulum win. Hem i yusum wan isi rod nomo, blong trikim ol rabis man ya, oli go long rong rod. Nao hem i sevem laef blong ol gudfala man blong Jehova.

Rehab i spid i go antap long ruf blong haos bakegen, i talemaot long tufala spae ya, olgeta samting we hem i mekem. Mo tu, hem i talemaot se: Tingting blong ol man ples blong hem i foldaon finis mo oli fraet we oli fraet. Ating tufala spae ya i harem gud tumas long nius ya. !Ol rabis man Kenan ya oli fraet tumas long Jehova, God blong ol man Isrel!  Makemgud samting we Rehab i talem i se: “Hae God ya we i God blong yufala, hem i God blong heven mo blong wol ya tu.” (Josua 2:11) Ol samting we hem i harem long saed blong Jehova, oli mekem se hem i trastem Jehova, God blong Isrel, mo i bilif long hem.

Rehab, i sua se Jehova bambae i mekem ol man blong hem oli win. Taswe, hem i plis long tufala spae ya, blong tufala i sore long hem mo tufala i sevem hem wetem ol famle blong hem. Ale tufala spae ya i agri, be tufala i talem long hem blong i no talemaot. Mo tufala i talem long hem se, hem i mas hangem wan rop afsaed long windo blong hem, olsemia taem ol soldia oli luk rop ya, oli no save spolem hem mo ol famle blong hem.—Josua 2:12-14, 18.

Bilif blong Rehab i tijim yumi long wan impoten trutok. Baebol i talem se: ‘Ol man oli stap bilif long God, taem oli harem gud nius.’ (Rom 10:17) Rehab i trastem ol stori we hem i harem, we oli tokbaot paoa mo stret fasin blong Jehova God, taswe hem i bilif mo i trastem God. Tede, yumi naf blong lanem moa samting long saed blong Jehova i bitim bifo. ?Olsem wanem? ?Yumi wantem save moa Jehova mo bilif long ol samting we yumi lanem long Baebol?

Tufala spae ya i folem gud toktok blong Rehab. Tufala i godaon long rop we Rehab i hangem long windo blong hem, mo tufala i spid i go long hil. Ol hil long saed i go long not blong Jeriko, i gat plante hol blong ston we tufala i haed long hem gogo kasem taem we i sef. Ale tufala i gobak long ol man Isrel, mo talemaot gud nius ya we tufala i kasem long Rehab.

Biaen, ol man Jeriko oli fraet tumas taem oli harem se Jehova i blokem Jodan Reva blong i no ron, nao ol man Isrel oli wokbaot long drae graon nomo blong krosem. (Josua 3:14-17) Be Rehab i defren, nius ya i olsem wan pruf we i mekem se bilif blong hem long Jehova i kam strong moa.

Ol man Isrel oli majraon long Jeriko wan taem long wan dei go kasem en blong namba sikis dei. Be long namba seven dei, i defren. Olsem yumi tokbaot finis long stat, ol man Isrel oli stat blong maj long eli moning, mo afta we oli goraon wan taem long taon ya, oli gohed nomo oli goraon bakegen mo bakegen. (Josua 6:15) ?From wanem oli mekem olsem?

Long namba seven dei ya, ol man Isrel oli maj i goraon long taon ya seven taem. Mo long en blong namba seven taem, oli stop. Ol pupu oli no moa krae. I no moa gat noes. I sua se ol man long taon ya oli wari bigwan. Biaen, Josua i mekem wan saen long ol man Isrel, nao oli singaot bigwan. Hemia fastaem we oli mekem olsem. Ating ol gad antap long stonwol oli ting se faet ya i narakaen, taem oli harem olgeta oli singaot olsem. !Be i no longtaem bigfala stonwol ya i stat blong seksek, i foldaon, mo i brokbrok long ol smosmol pis! Taem asis blong ol samting ya i godaon, oli luk wan smol haf blong stonwol ya nomo i stap. Hemia haos blong Rehab, from we hem i gat bilif. Yu traem tingbaot Rehab. !Hem i glad tumas, taem hem i luk we Jehova i lukaot gud long hem! * !Jehova i sevem hem wetem ol famle blong hem!—Josua 6:10, 16, 20, 21.

Ol man blong Jehova oli respektem Rehab from bilif blong hem. Taem oli luk we haos blong hem nomo i stap, oli luksave se Jehova i stap wetem hem. Hem wetem famle blong hem nomo oli no lus, taem rabis taon ya i foldaon. Afta long faet ya, ol man Isrel oli letem Rehab i kam stap wetem olgeta. Mo biaen hem i joen wetem ol man Isrel. Hem i mared long Salmon. Pikinini blong tufala, hemia Boas. Hem i gat strong bilif, mo hem i mared long Rut we i wan woman Moab. (Rut 4:13, 22) King Deved mo Jisas Kraes we i Mesaea, tufala i kamaot long famle blong Rehab.—Josua 6:22-25; Matiu 1:5, 6, 16.

Stori blong Rehab i soemaot se Jehova i luk yumi evriwan se yumi impoten. Hem i luk yumi evriwan, mo hem i savegud samting we i stap long hat blong yumi. Mo tu, hem glad tumas taem hem i luk we wan man i gat smol bilif, olsem Rehab. Rehab i bilif long God, nao bilif blong hem i pulum hem blong mekem wan samting. Olsem Baebol i talem, ‘God i mekem hem i kam stret woman, from gudfala wok blong hem.’ (Jemes 2:25) !I gud tumas sipos yumi folem fasin blong Rehab!