?God bambae i letem we ol man oli gohed blong spolem ol narafala mo spolem fiuja blong ol man? Nogat, olsem we yumi luk finis, hem bambae i finisim ol nogud fasin ya. Man we i wokem man mo wol ya, i wantem we yu save se taem blong hem i tekem aksen, i kam klosap finis. ?Hem i soemaot impoten save ya olsem wanem?

Yu traem tingbaot pijatok ya: Taem yu ron long trak blong go long wan narafala ples we yu no save, maet fastaem yu luk map blong ples ya mo faenem sam saen we bambae yu luk taem yu stap ron i go long ples ya. Biaen, taem yu stap ron i go long ples ya, yu lukluk map blong yu mo yu luk ol saen ya we oli stap long rod, hemia i mekem tingting blong yu i strong se yu stap klosap finis long ples we yu wantem go long hem. Long sem fasin God i givim Tok blong hem, we i tokbaot ol samting we bambae oli kamaot long wol, we yumi save luksave. Taem yumi luk ol saen ya oli stap kamaot, hem i mekem tingting blong yumi i strong se yumi stap long wan taem we i klosap long en.

Baebol i talem se, long taem blong en ol samting we oli hapen long wol, bambae oli defren long ol narafala taem long histri blong man. Long taem ya bambae i gat plante defdefren samting we oli kamaot long fulwol. I gud yumi luk sam long ol samting ya we Baebol i tokbaot.

1. OL JENIS WE OLI MEKEM TRABOL LONG FULWOL Long Matiu japta 24 i tokbaot wan profet tok long ol trabol we bambae oli hapen long wol, olsem wan saen. Saen ya bambae i makem “lashaf blong fasin blong laef long wol ya” mo biaen “bambae en i save kam.” (Vas 3, 14, NW) Saen ya, hemia ol faet, hadtaem blong kasem kakae, olbaot long wol bambae graon i seksek, ol fasin nogud oli kam bigwan moa, ol man bambae oli no moa lavem God, mo ol lida blong skul bambae oli trikim ol man mo oli lidim olgeta oli go krangke. (Vas 6-26) I tru sam long ol trabol ya oli stap hapen longtaem finis i kam. Nating se i olsem, taem en i kam klosap, olgeta trabol ya bambae oli hapen long semtaem nomo. Mo tu ol trabol ya bambae oli hapen wetem tri narafala trabol we olgeta tu oli olsem saen blong en.

2. OL FASIN BLONG MAN Baebol i talem se “long lasdei” long taem ya we en i klosap, bambae fasin blong ol man i kam moa nogud. Hem i talem se: “Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man, mo oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud, oli agens long hem. Bambae oli man blong spolem ol fren blong olgeta, mo oli man we oli no kea, mo oli praod tumas. Bambae oli man we oli wantem tumas ol samting we oli stap harem gud long hem, i winim we oli stap lavem God.” (2 Timoti 3:1-4) Fasin ya blong no gat respek long narafala, hem i wan fasin we i stap long taem finis, be long ol lasdei fasin ya bambae i kam mowas. Baebol i talem se, long taem ya “laef long wol ya bambae i kam strong tumas.” ?Yu yu luksave se ol man oli stap mekem ol rabis fasin ya tede?

3. OL MAN OLI SPOLEM WOL Baebol i talem se God bambae i “spolem ol man ya we oli stap spolem wol.” (Revelesen 11:18) ?Ol man oli stap spolem wol long wanem rod? Baebol i tokbaot taem blong Noa long sem fasin. Hem i se: “Ol narafala man oli stap mekem ol rabis fasin long fes blong God. Olbaot long evri ples, oli stap faet mo oli stap kilim man i ded. Nao taem God i luk long wol ya, hem i luk we wol i kam nogud tumas.” Taswe, God i talem long ol nogud man ya se: “Bambae mi spolem wol ya wetem olgeta man ya evriwan.” (Jenesis 6:11-13) ?Yu yu luk ol pruf we oli soemaot se ol rabis fasin oli stap kam antap moa? Mo tu, ol man oli laef long wan taem we i defren long ol narafala taem. Olgeta oli naf blong spolem ol laef samting long wol ya. Oli gat  ol tul blong faet. Mo tu wol i kam nogud long narafala rod. Ol samting long wol we oli mekem se yumi save gohed blong laef olsem win we yumi pulum, ol anamol, fasin blong laef blong anamol, mo ol samting raonabaot long yumi we oli gat laef, ol fis long solwota, oli stap kam nogud sloslo from we ol man oli no moa lukaotgud long wol.

I gud yu askem se: ‘?Long ol 100 yia we oli pas, ol man oli gat paoa blong finisim ol samting we olgeta nomo oli mekem we i spolem wol?’ Be naoia ol man oli yusum paoa blong olgeta, blong hivimap ol tul blong faet, mo blong spolem ol samting raonabaot long yumi. Naoia we teknoloji i kam antap, hemia i mekem we save blong man tu i kam antap, blong kontrolem ol nogud samting we oli kamaot. Nating se i olsem, man i no gat raet blong jusum ol samting we bambae oli kamtru long fiuja. God bambae i spolem ol man we oli spolem wol, bifo we olgeta samting long wol oli kam nogud. !Hemia nao samting we hem i promes blong mekem!

4. WOK BLONG PRIJ LONG FULWOL Wan narafala haf blong saen we i soemaot se en i klosap hemia se, ol man bambae oli mekem wan wok we i neva hapen olsem bifo. Baebol i talem se: “Gud nius ya blong kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW) Wok ya blong talemaot gud nius, bambae i defren long samting we plante skul oli stap talemaot long ol handred yia we oli pas. Long ol lasdei ya, bambae ol man oli stap talemaot, “Gud nius ya blong Kingdom.” ?Yu yu save wan skul we i stap talemaot mesej ya? Mo tu sipos i gat sam man we oli stap talemaot mesej ya, ?oli ol lokol grup nomo, no oli stap talemaot mesej ya long “olgeta ples long wol, blong oli witnes long hem long fes blong olgeta man”?

Websaet ya www.pr418.com i talemaot “gud nius ya blong Kingdom.” Websaet ya i soemaot ol buk we oli tokbaot mesej ya, long bitim 700 lanwis. ?Yu yu save wan narafala ogenaesesen we i talemaot gud nius blong Kingdom long olgeta ples long wol? Bifo we i gat Intenet, ol man oli savegud ol Witnes blong Jehova from traehad blong olgeta blong talemaot gud nius blong Kingdom. Stat long yia 1939, long fas pej blong magasin ya Wajtaoa, oli raetem ol tok ya, “Talemaot Kingdom Blong Jehova.” Wan buk we i tokbaot ol skul i talem se wok blong prij we ol Witnes blong Jehova oli mekem, “i bigwan i bitim ol narafala wok we ol man oli mekem.” Wok ya blong talemaot gud nius i makem gud se i no longtaem Kingdom blong God bambae i mekem we “en bambae i kam.”

?Long laef blong yu, yu luk se ol fofala saen blong en we Baebol i tokbaot oli stap kamtru? Blong bitim 100 yia finis, magasin ya i stap givim ol save we oli tokbaot ol samting we oli stap hapen long wol, mo hemia i givhan long ol man we oli ridim magasin ya, blong oli luksave se en i klosap. Nating se i olsem, sam man  we oli gat tu tingting, oli no agri long ol save ya mo oli talem se ol pruf ya oli tingting blong olgeta nomo. Mo tu oli talem se stat long taem we fasin blong storian wetem ol man i kam antap, ol fasin blong wol oli kam nogud. Nating se ol man oli talem ol samting ya, plante lida oli save se yumi stap kam klosap long en, mo taem ya i defren long histri blong man.

Sam man blong hae save oli talem se yumi stap klosap long taem ya we plante bigbigfala jenis oli kamaot long wol. Eksampol long 2014, the Science and Securirty Board of the Bulletin of the Atomic Scientists, i givim woning long Sekiuriti Kaonsel Blong Yunaeted Neson, from ol nogud samting we oli stap kasem ol man. Ol saentis ya oli talem se: “Taem oli luklukgud bakegen long ol nogud samting ya, hemia i pulum olgeta blong talem se i gat bigfala denja i stap, taem save blong man long teknoloji i stap kam antap moa.” Plante moa man oli bilif se yumi stap kam long wan impoten taem long histri blong man. Ol man we oli raetem magasin ya, mo plante man we oli ridim, oli sua fulwan se impoten taem ya hem i lasdei, mo se en i klosap. Bitim we yu wari long fiuja, i gud we yu glad long samting we bambae i kamaot from. ?From wanem? !From we yu save laef taem en i kam!