Mi mi gruap long Ancram, hemia wan smol taon we i stap long not blong Niu Yok, long Amerika. Long taon ya, i gat plante fam blong ol buluk, from samting ya i gat plante moa buluk i bitim namba blong ol man.

I gat wan jos nomo long taon ya, mo famle blong mi i stap go long jos ya. Evri sande long moning, Bubu man blong mi i polisim sus blong mi, afta mi tekem smol waet Baebol we bubu woman, i givim long mi, mo mi go long Sande skul. Papa mo mama, tufala i tijim mi wetem smol brata mo sista blong mi, blong mifala i mas wok had, gat respek mo givhan long ol man we oli stap raonabaot long mifala, mo glad long ol blesing we mifala i kasem.

Taem mi kam bigwan, mi muv i go long wan narafala ples mo mi kam wan tija blong skul. Mi gat plante kwestin long saed blong God mo laef. Sam long ol studen we mi tijim olgeta oli gat gudfala save, mo sam narafala oli no gat gudfala save, be oli traehad. Samfala oli handikap, mo samfala oli gat ol naes bodi. Taem mi luk samting ya, mi harem se i no stret we ol samting olsem oli hapen long ol man. Samtaem ol papa mo mama blong ol pikinini we oli handikap, no oli no gat gudfala save, oli talem long mi se: “God i wantem se pikinini blong mi bambae i olsem nao.” Mi stap tingting se, ?from wanem God i letem sam pikinini we oli handikap oli bon? From we ol pikinini ya oli no mekem wan samting we i nogud.

Mo tu mi stap tingting se: ‘?Mi mas mekem wanem blong harem gud long laef blong mi?’ Mi harem se taem i pas kwik nomo. Mi gruap long wan gudfala famle, mi go long gudfala skul, mo naoia mi mekem wan wok we mi laekem. Be i olsem se ful laef blong mi i blong nating nomo. Fastaem, mi stap tingbaot blong mi mared, mi gat wan naes haos, mo gat sam pikinini, afta mi gohed blong wok kasem we mi ritae mo i go stap long hospital blong ol olfala. Mi stap tingting sipos mi save mekem sam moa samting blong harem gud long laef blong mi.

Long wan hot taem, mi wetem sam tija mifala i go long Yurop. Mifala i visitim Westminster Abbey, Notre-Dame de Paris, mo biaen mifala i go long Vatican, mo sam narafala smosmol jos bakegen. Long evri ples we mi go long hem, mi askem ol kwestin blong mi. Taem mi kambak long  ples blong mi long Sloatsburg, Niu Yok, mi go visitim sam jos, mo mi askem ol kwestin ya, be i no gat wan we i givim ol ansa we mi glad long hem.

Wan dei, wan studen we i gat 12 yia i kam luk mi, mo i askem tri kwestin long mi. Fastaem, hem i askem long mi sipos mi save se hem i wan Witnes blong Jehova. Mi ansa se yes. Nambatu kwestin, hem i askem sipos mi wantem save moa long ol Witnes blong Jehova. Bakegen mi ansa se yes. Nambatri kwestin, hem i askem ples we mi stap long hem. Taem mi talem ples we mi stap long hem, mitufala i faenemaot se mitufala i laef klosap nomo long mitufala. Long taem ya, mi no save se ol trifala kwestin we smol gel ya i askem, bambae oli jenisim laef blong mi blong olwe.

Afta sam dei i pas, smol gel ya i ron long basket blong hem, i kam long haos blong mi, mo mitufala i stat blong stadi Baebol. Mi askem ol kwestin ya we mi bin askem long plante lida blong jos. Hem i defren long olgeta, hem i soemaot ol ansa blong ol kwestin ya long Baebol, we oli klia mo oli mekem mi glad tumas. !Hemia fas taem we mi harem ol ansa olsem!

Samting we mi lanem long Baebol i mekem mi harem gud long laef. Mi mi glad tumas, taem mi ridim 1 Jon 5:19, we i talem se: “Olgeta man blong wol ya oli stap long paoa blong Setan.” Mi mi harem gud blong save se i no God we i stap mekem ol man oli harem nogud, be hem i Setan we i mekem ol samting ya, mo God bambae i finisim ol trabol ya. (Revelesen 21:3, 4) Mi faenemaot se Baebol i eksplenem ol samting ya klia nomo. Nating se mi stadi wetem wan Witnes we i gat 12 yia nomo, be mi luksave se hemia nao trutok, nomata se wan pikinini no wan bigman i tokbaot.

Nating se i olsem, mi wantem luk sipos ol Witnes blong Jehova oli stap folem samting we oli tijim. Eksampol, smol gel ya i talem se ol tru Kristin oli soemaot ol fasin olsem, longfala tingting mo kaen fasin. (Galesia 5:22, 23) Ale mi wantem traem hem blong luk sipos hem i soemaot ol fasin ya, no nogat. Wan dei, mi minim nomo blong kam let from stadi blong mi. Mi stap tingting se: ‘?Bambae hem i wet long mi no nogat? Sipos hem i wet, ?bambae hem i kros long mi from mi kam let?’ Taem trak blong mi i stap kam insaed long yad, mi luk we hem i stap sidaon long step blong haos blong mi. Hem i resis i kam long trak mo i talem se: “Mi stap wantem gobak long haos blong talem long mama blong mi blong mifala i ring long hospital mo polis, blong jekem yu, from we yu neva let long stadi blong yu. !Mi mi wari tumas from yu!”

Wan narafala taem, mi askem wan kwestin, we mi ting se i had tumas blong wan pikinini blong 12 yia i ansa long hem. Mi stap wet blong luk sipos hem i talem wan ansa we i olbaot nomo. Taem mi askem kwestin ya, hem i lukluk mi, mo hem i talem long mi se: “Hemia wan kwestin we i had. Bambae mi raetem kwestin ya, mo mi askem long papa mo mama blong mi.” Nekis taem we hem i kam blong mitufala i stadi, hem i tekem wan haf blong magasin ya Wajtaoa we i givim ansa long kwestin we mi askem. Hemia i pulum mi blong joen wetem ol Witnes blong Jehova. Ol buk blong olgeta, oli tokbaot ol vas blong Baebol we oli givim ansa long evri kwestin we mi gat. Mi gohed blong stadi Baebol wetem smol gel mo wan yia biaen, mi tekem baptaes mo kam wan Witnes blong Jehova. *

Taem mi kasem ansa blong ol kwestin we mi askem, samting ya i mekem mi glad tumas mo mi wantem talemaot nius ya long ol narafala. (Matiu 12:35) Fastaem, ol famle blong mi oli agensem mi from niufala bilif blong mi. Sloslo oli no moa kros long mi. Mama blong mi i stat blong stadi Baebol, biaen hem i ded. Nating se hem i no baptaes, be mi save se hem i wantem mekem wok blong Jehova.

Long yia 1978, mi mared long Elias Kazan. Mo long 1981, mitufala i kasem wan leta we oli askem mitufala blong go wok long Betel * blong Yunaeted Stet. Sore tumas, afta long fo yia we mitufala i wok, Elias i ded. Nating se mi stap olsem wan wido, be mi gohed blong mekem wok blong mi long Betel. Hemia i leftemap tingting blong mi, mo i mekem mi tingbaot se oltaem mi gat wan wok blong mekem.

Long 2006, mi mared bakegen long Richard Eldred. Hem tu i wok long Betel blong Yunaeted Stet. Mitufala i glad blong gohed blong wok long Betel. Mi glad tumas blong save trutok long saed blong God. Mi luksave se mi faenem ansa blong ol kwestin we mi askem, be i no hemia nomo, mi faenem beswan rod blong harem gud long laef. Ol samting ya oli stat taem wan smol gel i askem tri kwestin long mi.