Elaeja i harem wan nius: King Ehab i ded. Yu traem tingbaot olfala profet ya, i stap holem mustas blong hem, mo i stap tingting back long ol hadtaem we i fesem wetem rabis king ya. !Elaeja i stanap strong longtaem! King Ehab mo woman blong hem, Kwin Jesebel, i tok nogud long hem mo ronem hem plante taem we klosap i ded from. Mo king i no traem blong stopem oda we Jesebel i talem long ol man blong hem, blong oli kilim i ded ol profet blong Jehova. Mo tu, from tufala i griri, tufala i mekem plan blong kilim Nabot, wan kwaet man we i laekem stret fasin, mo ol pikinini boe blong hem. Biaen, Elaeja i talemaot jajmen blong Jehova mo panis we bae i kasem Ehab mo ful famle blong hem. Nao, ol tok we God i talem, oli kamtru. Ehab i ded olsem we Jehova i talem.—1 King 18:4; 21:1-26; 22:37, 38; 2 King 9:26.

Nating se i olsem, Elaeja i save se hem i mas gohed blong stanap strong. Jesebel i stap laef yet mo hem i gohed blong mekem i strong long famle blong hem mo ol manples blong hem. Elaeja bae i fesem moa trabol mo hem i mas tijim plante moa samting long fren blong hem Elisa, we bae i tekem ples blong hem. Naoia bambae yumi tokbaot tri laswan wok blong Elaeja. Yumi luk se strong bilif i givhan long hem blong i stanap strong. Taswe, yumi tu, yumi mas mekem bilif i strong long taem blong trabol.

Ahasia we i pikinini boe blong Ehab mo Jesebel, i kam king blong Isrel. Be king ya i no lanem wan samting long ol nogud fasin blong papa mo mama blong hem, be i girap, i folem ol nogud fasin blong tufala. (1 King 22:52) Olsem tufala, hem tu i wosipim Bal. Ol man we oli wosipim god ya, oli pulum ol man blong mekem ol nogud fasin long saed blong seks mo mekem sakrefaes long ol pikinini. ?Olsem wanem? ?Ahasia i jenisim tingting blong hem mo i lidim ol man oli gowe long ol rabis fasin ya?

Wan taem nomo trabol i kasem flas king ya. Wan dei, hem i stap stanap long vranda blong haos blong hem, nao i foldaon mo i kasem kil. Long taem ya, hem i no lukluk i go long Jehova blong i givhan long hem. Be hem i sanem sam man oli go long ol enemi long taon ya Ekron, long Filistia, blong faenemaot long god ya Balsebub, sipos bae hem i kam oraet bakegen o nogat. Jehova i no glad nating long king ya. Hem i sanem wan enjel i go long Elaeja mo talem long hem blong i go mitim ol man blong karem toktok. Profet ya i sanem ol man ya oli gobak long king wetem wan rabis nius. Ahasia i mekem wan bigfala sin. Hem i mekem olsem se ol man Isrel oli nogat God. Nao Jehova i mekem se Ahasia i neva kam oraet bakegen.—2 King 1:2-4.

Ahasia we i no tanem tingting blong hem, i askem se: “?Man ya i olsem wanem?” Nao, ol man blong karem toktok oli tokbaot kot blong wan profet we oli wokem long hea blong kamel. Wantaem nomo Ahasia i se: “!Elaeja ya!.” (2 King 1:7,8) Laef blong Elaeja i no fasfas mo tingting blong hem i stap fulwan long wok blong God. Taem ol man ya oli tokbaot klos blong Elaeja, kwiktaem nomo oli kasemsave se oli stap tokbaot olfala profet ya. Be ol man oli nogat tingting olsem long saed blong Ahasia no papa mo mama blong hem, from we trifala i griri. Tede, eksampol blong Elaeja i mekem yumi tingbaot ol tok blong Jisas we i se yumi no mas mekem laef blong yumi i fasfas, be yumi mas putum tingting blong yumi i stap fulwan long ol samting we oli moa impoten.—Matiu 6:22-24.

Ahasia i wantem givimbak samting we Elaeja i mekem long hem, nao hem i sanem wan kapten wetem fifti soldia blong oli go tekem Elaeja i kam. Taem oli faenem Elaeja, hem i stap “antap long wan hil, i stap sidaon,” * nao kapten blong ol soldia i askem blong i “kamdaon” long nem blong king. !Traem tingbaot! Nating se ol soldia ya oli save se Elaeja i wan “man blong God tru,” be oli ting se i stret nomo blong mekem hem i fraet mo putum laef blong hem long denja. !Oli rong olgeta! Elaeja i talem long kapten ya, se: “!Mi mi man blong God tru! Naoia, faea bambae i aot long heven, i kamdaon, i bonem yu wetem ol man ya blong yu, yufala evriwan i ded.” !Nao, God i sanem faea i kam! “Wantaem nomo, faea i kamdaon, i bonem kapten ya wetem ol man blong hem oli ded evriwan.” (2 King 1:9, 10) En blong laef blong ol soldia ya, i mekem yumi tingbaot se Jehova i no ting nating long ol man we oli spolem o no soemaot respek long ol man blong hem.—1 Kronikel 16:21, 22.

Ahasia i sanem wan narafala kapten mo fifti soldia. Seken kapten ya i raf moa i bitim faswan. Ating hem i no lanem wan samting from ded blong ol fas 51 soldia, nating se hem i luk asis blong olgeta long saedsaed blong hil. Mo hem i no ripitim sem oda ya nomo we fas kapten i talem long Elaeja blong i “kamdaon,” be hem i ademap tok ya, “hareap.” !I krangke stret! Taswe, hem mo ol man blong hem, oli lusum laef blong olgeta olsem ol narawan long fas grup. Be king i gohed blong mekem stronghed. Nao hem i sanem wan narafala kapten wetem fifti soldia. Be namba tri kapten i waes. Hem i go klosap long Elaeja mo i mekem tingting i stap daon. Nao, hem i askem strong long profet ya blong i no spolem hem mo ol man blong hem. Elaeja we i wan man blong God, i kwik blong soemaot fasin sore blong Jehova, taem i ansa long kapten ya. Nao enjel blong Jehova i lidim Elaeja blong i biaen long ol soldia. Elaeja i obei mo i talemaot bakegen ol tok blong Jehova long rabis king ya. Nao Ahasia i ded olsem we God i talem. Mo hem i rul blong tu yia nomo.—2 King 1:11-17.

Long taem ya, ?Olsem wanem Elaeja i stanap strong long medel blong ol rabis man ya? ?Yu ting se kwestin ya i stret long taem blong yumi tede? ?Maet samtaem yu yu kros long wan man we yu kea long hem, be hem i no wantem lesin long yu, mo i gohed blong mekem samting we i no stret? ?Olsem wanem yumi save stanap strong long taem olsem? Yumi save lanem samting taem yumi tingbaot ples we ol soldia oli faenem Elaeja long hem, hemia “antap long wan hil.” Yumi no save talem stret from wanem Elaeja i stap go long ples ya, be yumi save gud se hem i wan man blong prea. Hem i luksave se ples ya i wan kwaet ples we i save givhan long hem blong i kam klosap moa long God blong hem we i lavem tumas. (Jemes 5:16-18) I Semak long yumi. Yumi mas faenem taem blong kam klosap long God. Yumi mas prea long nem blong hem mo talemaot ol trabol mo ol wari blong yumi. Taem yumi mekem olsem, bambae yumi naf blong stanap strong taem ol man we oli stap raonabaot long yumi, oli mekem i strong long yumi blong spolem yumi.

Naoia i stret taem blong Elaeja i givimaot ol wok blong hem. Makem samting we hem i mekem. Taem hem mo Elisa i lego taon blong Gilgal blong go long Betel, hem i askem long Elisa blong stap long ples ya mo hem nomo bae i go long Betel, we i stap samwe long 11 kilometa. Be Elisa i ansa strong se: “Hae God i laef, i stap we i stap, mo long fes blong hem, mo long fes blong yu tu, mi mi talem tru long yu, se bambae mi no save livim yu.” Nao tufala i kamtru long Betel, mo bakegen Elaeja i talem long Elisa se hem nomo bae i wokbaot i go long Jeriko we i stap samwe long 22 kilometa. Be Elisa i no jenisim tingting nating. Nao taem tufala i kamtru long Jeriko, sem samting i hapen nambatri taem, bifo we tufala i wokbaot i go long Jodan Riva, we i stap samwe long 8 kilometa. Bakegen yangfala man ya i holemstrong. !Hem i no wantem lego Elaeja nating!—2 King 2:1-6.

Elaeja i soemaot wan nambawan fasin, hemia tru lav. Lav ya i semak long lav we Rut i soemaot long Nomi mo i wan kaen lav we i pusum man blong gat strong tingting blong mekem wan samting mo i no wantem lego. (Rut 1:15, 16) Evri man blong God oli mas traehad blong gat fasin ya—tede i bitim bifo. ?Yu yu luksave se i impoten blong gat fasin ya olsem Elaeja?

Ating tru lav we yangfala Elisa i soemaot, i mas leftemap tingting blong fren blong hem. From samting ya, Elisa i luk las merikel blong Elaeja. Taem tufala i stap stanap long saed blong Jodan Reva, long ples we wota i ron strong mo i dip, Elaeja i kilim wota wetem kot blong hem. !Nao wota i seraot long tu haf! Mo i “gat fifti profet” we oli luk merikel ya. Ol profet ya oli stap long wan trening we i blong givhan long olgeta blong oli lidimgud ol man long tru wosip. (2 King 2:7,8) Maet Elaeja nao i lukaot long trening ya. Sam yia bifo, Elaeja i ting se i no moa gat wan man olsem hem we i holemstrong long God long kantri ya. Stat long taem ya, Jehova i blesem hem from hem i stanap strong mo i luk olsem wanem Jehova i blesem ol man blong hem.—1 King 19:10.

Afta we tufala i krosem Jodan Reva, Elaeja i talem long Elisa se: “I no longtaem, Hae God bambae i tekemaot mi mi go antap. Sipos i gat sam samting we yu wantem blong mi mekem long yu fastaem, i gud yu talemaot long mi.” Elaeja i save se taem blong hem i kam finis. Nating se i olsem, hem i no jalus long wok mo haenem we yangfala fren blong hem bae i kasem. Be hem i givhan long hem. Elisa i askem wan samting nomo long Elaeja, i se :‘Plis...mi wantem kasem fulpaoa blong yu.’ (2 King 2:9) Elisa i no minim se hem i wantem kasem moa paoa, i bitim paoa we Elaeja i kasem. Be hem i stap askem raet we hem i save gat, olsem wan fasbon pikinini boe, we folem loa, hem i gat raet blong kasem plante samting o tu haf blong ol ting blong papa blong hem, blong i save mekem wok blong hed blong famle. (Dutronome 21:17) Elisa we i tekem ples blong profet Elaeja, i luksave se hem i mas gat strong tingting olsem Elaeja blong finisim gud wok blong hem.

Elisa i gat tingting daon mo i lego evri samting long han blong Jehova. Mo sipos Jehova i letem Elisa i luk taem ya we bae hem i tekem Elaeja i go antap, i min se Jehova i agri long samting we Elisa i askem long hem. !Mo afta samtaem we tufala fren ya “i stap wokbaot i go, tufala i stap toktok,” wan gudfala samting i hapen!—2 King 2:10, 11.

Wan laet we i narakaen i kamaot long skae, nao wan bigfala noes we i olsem noes blong tanda mo waelwin i kamaot long laet ya. Wantaem nomo, wan samting we i saen gud i stap kam from tufala we i mekem tufala i seraot. Tufala man ya i luk wan samting olsem wan trak o wan kat we oli wokem long faea. Elaeja i save se taem blong hem i kam finis. ?Hem i go insaed long kat ya? Baebol i no talem. !Be hem i filim save se strong win ya i stap tekem hem i go antap long ea!

Elisa i sapraes tumas blong luk ol samting we i hapen, mo from we hem i luk evri samting, hem i kasemsave se paoa ya we Jehova i givim long Elaeja bifo, bae Jehova i givim long hem. Be long taem ya, Elisa i stap harem nogud tumas blong tingbaot ol samting ya. Hem i no save weples nao gudfala fren blong hem i go long hem, mo hem i no sua se bae hem i luk hem bakegen o nogat. Nao hem i singaot se: “Papa blong mi! !Papa blong mi! !Yu yu strong man blong givhan long kantri ya blong yumi!” Elisa i stap luk tija blong hem i stap gowe long hem mo i no moa luk hem bakegen. Nao hem i terem klos blong hem from we hem i harem nogud tumas.—2 King 2:12.

Taem Elaeja i stap go antap long skae, ?Hem i harem krae blong yangfala fren blong hem mo hem tu i krae? Yumi sua se Elaeja i haremgud tumas blong gat wan fren olsem we i givhan long hem blong stanap strong long ol hadtaem. ?Yumi lanem wanem long eksampol blong Elaeja? !Yumi tu, yumi save frengud wetem ol man we oli lavem God mo mekem samting we hem i wantem!

?Elaeja i stap go wea? Sam skul oli talem se hem i go antap long heven blong go stap wetem God. Be i no samting we i hapen. Sam handred yia biaen, Jisas i talem se i nogat man i go antap long heven. (Jon 3:13) Taswe, taem yumi ridim long Baebol se “waelwin i kam tekemaot Profet Elaeja i go antap long heven,” yumi save askem se, ?“Heven” ya hem i wea? (2 King 2:11) Taem Baebol i tokbaot “heven,” hem i no stap minim nomo ples we Jehova i stap long hem be i save minim tu antap long skae, ples we ol klaod i stap long hem, mo ol pijin oli stap flae long hem. (Ol Sam 147:8) Long “heven” ya nao, Elaeja i go long hem. ?Mo wanem i hapen biaen?

Jehova i tekem profet Elaeja i go long kingdom blong Juda blong i statem wan niufala wok. Baebol i talem se seven yia afta, hem i stap gohed blong wok long kingdom ya. Long taem ya, rabis king ya, Jehoram i stap rul long Juda. Hem i mared long gel blong Ehab mo Jesebel mo from samting ya, ol man oli gohed blong luksave ol rabis wok blong tufala. Jehova i askem long Elaeja blong i raetem wan leta we i tokbaot jajmen we bae hem i mekem long Jehoram. Baebol i talem se ded blong Jehoram i nogud we i nogud, i se: “Taem hem i ded, i no gat wan man nating i sore long hem.”—2 Kronikel 21:12-20.

!Elaeja i no olsem rabis man ya nating! Yumi no save olsem wanem mo wetaem stret Elaeja i ded. Be yumi save se hem i no ded olsem Jehoram we i nogat man i sore long hem taem hem i ded. Elaeja i harem nogud tumas from we hem i no moa luk gudfala fren blong hem Elisa mo ol narafala profet tu. Be Jehova i gohed blong tingbaot hem. Samwe long 1000 yia biaen, hem i soemaot olfala profet ya long wan vison. (Matiu17:1-9) ?Yu yu wantem folem fasin blong Elaeja blong gat strong bilif mo stanap strong long taem blong trabol? I gud yu frengud wetem ol man we oli lavem God mo yu gat strong tingting blong mekem wok blong hem. Prea oltaem long fulhat blong yu. !Sipos yu mekem olsem, bambae yu faenem wan ples blong olwe insaed long hat blong Jehova, God ya we i lavem yu tumas!