Meri woman Magdala i lukluk i go antap long skae, mo i waepemaot wota blong ae blong hem. Masta blong hem we hem i lavem tumas i hang long wan pos. !Hemia long dei we ol tri oli putum flaoa, mo hem i samwe long aftenun, “be tudak i kavremap olgeta ples”! (Luk 23:44, 45) Meri i putum kaliko blong hem i goraon long solda blong hem mo i muv i go klosap long woman we i stap long saed blong hem. Wan eklips blong san we i stap sam minit nomo, i no save mekem ples i tudak blong tri aoa olsem. Maet Meri mo ol narafala we oli stap stanap klosap long Jisas oli harem ol animol blong tudak oli stap mekem noes, hemia ol animol we yumi no stap harem olgeta long dei. Sam man we oli luk samting we i hapen “oli fraet tumas, nao oli talem se: ‘Tru ya, hem i Pikinini blong God.’” (Matiu 27:54) Maet ol man we oli stap folem Jisas mo ol narafala man oli save ting se samting ya i hapen blong soemaot se Jehova i harem nogud mo i kros from nogud samting we oli mekem long Boe blong hem.

I mas had long Meri woman Magdala blong luk samting ya we i hapen, be i had tu blong hem i aot. (Jon 19:25, 26) Soa we Jisas i kasem i wan soa we yumi no save kasem save long hem. Mama blong Jisas tu i rili nidim we narafala i leftemap tingting blong hem mo sapotem hem.

Afta we Jisas i mekem plante samting blong givhan long Meri, Meri i wantem tumas blong mekem eni samting blong givhan long Jisas. Bifo hem i wan woman we i no glad mo ol man oli no laekem hem nating, be Jisas i jenisim ol samting ya. Hem i mekem se laef blong woman ya i kamgud moa mo i gat mining. Hem i kam wan woman we i gat strong bilif. ?Samting ya i hapen olsem wanem? ?Yumi save lanem wanem long bilif blong Meri?

Long Baebol, stori blong Meri woman Magdala i stat wetem wan presen. Jisas i mekem hem i kam fri, i tekemaot hem long wan situesen we i nogud we i olsem wan rabis drim long naet. Long ol taem ya, ol dimon oli gat paoa long evri ples, ol rabis spirit ya oli spolem plante man, mo tu, oli go insaed long sam man mo oli kontrolem olgeta. Yumi no save se ol dimon ya oli mekem wanem stret long Meri woman Magdala ya, be yumi save nomo se i gat seven dimon we oli nogud olgeta mo we oli stap spolem man, oli stap long hem. !Be tru long Jisas Kraes olgeta dimon ya oli aot!—Luk 8:2.

Naoia Meri i kam fri mo i harem gud tumas, hem i gat wan niufala laef long fored blong hem. ?Olsem wanem hem i save soemaot tangkiu blong hem? Hem i kam wan man blong Jisas we i holemstrong long hem. Mo tu, hem i mekem samting taem hem i luk se i gat nid. Jisas wetem ol aposol blong hem oli nidim kakae, klos, mo wan ples blong slip long naet. Olgeta oli no ol rijman, mo long taem ya oli no wok blong winim mane. Be blong oli putum tingting blong olgeta long wok blong prij mo blong tijim ol man, oli nidim sam samting.

Meri mo sam narafala woman oli givim ol samting we oli nidim. Ol woman ya “oli stap yusum olting blong olgeta blong mekem minista wok blong givhan long hem [Jisas] mo ol aposol.” (Luk 8:1, 3) Sam long ol woman ya oli gat sam rij samting. Baebol i no talem sipos ol woman ya oli rerem kakae, wasem klos, o rerem wan ples blong slip long wan vilej afta narafala vilej. Be oli glad nomo blong sapotem grup ya we i stap goraon, we oli samwe long 20 man. Traehad blong ol woman ya, i givhan long Jisas mo ol aposol blong hem blong oli putum tingting blong olgeta fulwan long wok blong prij. I tru, Meri i save se hem i no naf blong pembak Jisas from samting we hem i mekem blong hem—!be hem i glad tumas blong mekem samting we hem i naf blong mekem!

Tede plante man oli save luklukdaon long olgeta we oli mekem ol wok we i daon blong givhan long ol narafala. Be long lukluk blong God, i no olsem. !Traem tingbaot, God i mas glad tumas taem hem i luk we Meri i rere nomo blong mekem eni samting we hem i naf blong mekem blong sapotem Jisas mo ol aposol blong hem! Tede tu, plante Kristin oli glad blong mekem ol wok we i daon blong givhan long ol narafala. Samtaem ol samting we yumi mekem o gudfala tok we yumi talem i save gat bigfala paoa. Jehova i tinghae long ol sakrefaes olsem.—Ol Proveb 19:17; Hibrus 13:16.

Meri woman Magdala i wan long ol woman we i folem Jisas i go long Jerusalem blong mekem lafet blong Pasova long yia 33 K.T. (Matiu 27:55, 56) Taem hem i harem se oli arestem Jisas mo oli kwestinim hem long naet blong traem hem, i sua se Meri i mas harem nogud tumas. Mo nius ya i kam mowas. Taem ol lida blong ol man Jiu mo ol man we oli sapotem olgeta oli pulum Ponjes Paelat we i Hed Gavman, blong i letem Jisas i ded long wan pos. Maet Meri i luklukgud Masta blong hem, we blad i fulap long hem mo hem i taed, mo i wokbaot long rod we i safa, taem i stap karem longfala pos we bambae hem i ded long hem.—Jon 19:6, 12, 15-17.

Stret long ples we bambae oli hangem Jisas long hem, hemia afta we tudak i kavremap ples, samwe long medel dei, Meri woman Magdala mo ol narafala woman oli stap stanap ‘klosap long pos blong Jisas.’ (Jon 19:25) Meri, we i stap gogo kasem en, i luk mo i harem se Jisas i givim wok ya blong lukaot long mama blong hem, long aposol Jon we hem i lavem tumas. Hem i harem Jisas i krae i go long Papa blong hem, taem hem i stap safa. Mo hem i harem las tok we Jisas i talem blong soemaot se hem i win, i se: “!Olgeta samting i finis nao!” Hem i talem tok ya biaen hem i ded. Meri i harem nogud tumas. Nating se i olsem, afta we Jisas i ded, hem i stap yet long ples ya. Biaen hem i go long niufala tomb ya we wan rijman we nem blong hem Josef blong Aramatia, i putum bodi blong Jisas long hem.—Jon 19:30; Matiu 27:45, 46, 57-61.

Eksampol blong Meri i mekem yumi tingbaot samting we yumi save mekem taem ol brata mo sista blong yumi oli fesem hadtaem. Yumi no save blokem ol trabol o tekemaot filing blong harem nogud we narafala i gat. Be, yumi save soemaot sore mo strong tingting. Taem wan man i kasem wan hadtaem, nao i luk se wan gudfala fren blong hem i stap klosap long hem blong sapotem hem, hemia i givhan bigwan. Sipos yumi stap oltaem klosap long wan fren we i kasem hadtaem, yumi soemaot strong bilif, mo hemia i leftemap tingting blong man ya.—Ol Proveb 17:17.

Afta we oli putum bodi blong Jisas long wan tomb, Meri i wan long ol woman we oli tekem sam lif we oli gat gudfala smel, blong oli go putum long bodi blong Jisas. (Mak 16:1, 2; Luk 23:54-56) Taswe afta we Sabat i finis, Meri i girap eli long moning. Yu traem pijarem hem, hem wetem ol narafala woman oli stap wokbaot long rod we i haf tudak yet, oli stap go long tomb blong Jisas. Nao long rod, oli stap tingting se olsem wanem oli save rolemaot hevi ston we i blokem maot blong tomb ya. (Matiu 28:1; Mak 16:1-3) Nating se i olsem, oli no tanemraon. Bilif blong olgeta i pulum olgeta blong oli mekem wanem we oli naf blong mekem, mo oli trastem Jehova se hem bambae i mekem narafala haf.

Maet Meri i go fastaem long ol narafala woman taem oli kasem tomb ya. Nao hem i stanap kwaet, from we i sek. !Ston we i blokem maot blong tomb ya i kamaot finis—mo tomb ya i emti finis! Meri i wan woman blong tekem aksen, hem i ron i gobak blong talemaot long Pita mo Jon, samting we hem i luk. Yu traem tingbaot we hem i stap pulum nogud win blong hem mo i talem se: “Oli tekemaot bodi blong Masta long hol ya, mo yumi no save se oli putum long weples.” Pita mo Jon i ron i go long tomb, mo jekem sipos i emti, biaen tufala i gobak long haos blong tufala. *—Jon 20:1-10.

Taem Meri i kambak long tomb, hem i stap longtaem long ples ya, hem wan nomo. Nao hem i harem nogud tumas taem i luk we tomb i emti mo ples i kwaet long moning ya, taswe hem i no moa save holemtaet hem, nao hem i krae we i krae. Hem i kam klosap long tomb ya blong lukluk i go insaed, mo i no save bilivim se Masta i no moa stap, nao hem i sek bigwan. !I gat tu enjel we tufala i werem waet klos, tufala i sidaon long ples ya! Tufala i askem se: “?From wanem yu stap krae?” Hem i no save wanem blong talem, ale hem i ripitim samting we hem i talem long tufala aposol ya, i se: “Oli tekemaot bodi blong Masta blong mi, mo mi no save weples oli putum.”—Jon 20:11-13.

Taem hem i tanem hem, i gat wan man i stap stanap biaen long hem. Hem i no luksave man ya, taswe hem i ting se hemia man we i stap lukaot long ples ya. Ale long kaen fasin, man ya i askem long hem se: “Woman, ?from wanem yu stap krae? ?Yu stap lukaot hu?” Meri i ansa se: “Masta, sipos yu karemaot bodi blong hem mo yu putum samples, plis yu talem long mi, blong mi save go karem.” (Jon 20:14, 15) Yu traem tingbaot samting we hem i talem. ?Olsem wanem? ?Woman ya i save leftemap mo karem bodi blong Jisas Kraes, we i wan strong man mo wan impoten man? Meri i no stop smoltaem blong tingting long samting ya. Hem i save nomo se hem i mas mekem samting we hem i naf blong mekem.

Taem yumi harem nogud mo yumi kasem wan trabol we i luk olsem se yumi no save winim, ?yumi save folem fasin blong Meri woman Magdala? Sipos yumi putum tingting blong yumi i stap long ol slak fasin blong yumi mo ol samting we yumi no naf blong mekem, yumi save fraet mo yumi kam slak nao yumi no save mekem eni samting. Be sipos yumi mekem desisen blong mekem samting we yumi naf blong mekem mo trastem God blong i mekem haf, bambae yumi mekem plante moa samting i bitim wanem we yumi tingbaot. (2 Korin 12:10; Filipae 4:13) Samting we i moa impoten hemia se yumi mekem Jehova i glad. Hemia nao samting we Meri i mekem, mo Jehova i blesem hem long wan rod we i nambawan.

Man ya we i stanap long fored blong Meri, i no man we i stap lukaot long ples ya. Be hem i man ya we bifo hem i wan kapenta, biaen i wan tija, mo biaen hem i kam Masta blong Meri we Meri i lavem hem tumas. Be Meri i no luksave hem, mo i stat blong tanemraon. Meri i no save pijarem se: Jisas i bin laef bakegen olsem wan spirit. From samting ya, hem i kamtru long Meri, olsem wan man, be i no long sem bodi ya we hem i bin gat bifo. Long ol dei afta we hem i laef bakegen, plante taem hem i gotru long olgeta we oli save gud hem, be olgeta oli no luksave hem.—Luk 24:13-16; Jon 21:4.

?Olsem wanem Jisas i mekem Meri i kasem save se hem i hu? Hemia fasin blong hem blong talem wan wod nomo, se: “!Meri!” Meri i tanraon mo i krae bigwan, mo i talem se “!Raboni!” hemia wan wod long lanwis Hibru we hem i yusum oltaem blong singaot Jisas !Yes, hemia Tija blong hem, we hem i lavem tumas! Meri i glad we i glad tumas. Hem i holemtaet Jisas mo i no wantem letem hem i go.—Jon 20:16.

Jisas i save tingting blong hem. Ale hem i talem long hem se: “Yu no moa holemtaet mi.” Yumi save pijarem Jisas we i talem tok ya long kaen fasin, mo maet wetem wan smael long fes blong hem, taem i kamaot sloslo long han blong Meri mo i mekem hem i harem gud taem i talem se: “Mi mi no go antap yet long Papa.” Hemia i no stret taem yet blong Jisas i go long heven. Hem i gat sam wok yet blong mekem long wol, mo hem i wantem we Meri i halpem hem. I sua se Meri i lesin gud long olgeta samting we Jisas i talem long hem, we i se: “Yu go luk ol brata blong mi mo yu talem long olgeta se: ‘Mi mi stap go antap long Papa blong mi we hem i Papa blong yufala tu, mo hem i God blong mi we hem i God blong yufala tu.’”—Jon 20:17.

!Hemia wan gudfala wok we Masta blong hem i givim long hem! Meri i wan long ol faswan disaepol we i gat privilej ya blong luk Jisas we i laef bakegen, mo naioa hem i gat privilej ya blong talemaot gud nius ya long ol narafala. Traem tingbaot glad we hem i kasem, mo strong tingting we hem i gat blong traem faenem ol disaepol. Traem pijarem Meri we i stap pulum nogud win blong hem mo i stap traehad blong talemaot ol tok ya we i stap long tingting blong hem mo we biaen i stap long tingting blong ol narafala: “!Mi mi luk Masta!” Hem i talemaot long olgeta, evri samting we Jisas i bin talem long hem, hem i toktok hareap from we hem i glad tumas. (Jon 20:18) Samting we hem i talem, i joenem save we ol disaepol oli harem finis long ol woman ya we oli kambak long tomb blong Jisas we i emti.—Luk 24:1-3, 10.

?Ol man ya oli talem wanem? Oli no mekem wan samting. Yumi ridim se: “Ol aposol mo ol narafala disaepol oli harem tok ya olsem krangke tok nomo, nao oli no bilivim olgeta.” (Luk 24:11) Ol man ya oli kaen, be oli gruap long ples we ol man oli no stap trastem ol woman; mo folem kastom blong ol rabae, wan woman i no save talemaot tingting blong hem long kot. Maet ol aposol ya oli letem kalja blong olgeta i gat moa paoa long olgeta. Be Jisas mo Papa blong hem oli no gat tingting ya. !Hemia i wan nambawan privilej we tufala i givim long ol woman ya we oli holemstrong long hem!

I sua se Meri i no letem ansa blong ol man ya i daonem tingting blong hem. Hem i save se Masta blong hem i trastem hem, mo hemia i naf. Olgeta evriwan we oli folem Jisas oli kasem wan wok we i sem mak, hemia se hem i trastem olgeta blong talemaot wan mesej. Baebol i singaot mesej ya se “gud nius blong Kingdom blong God.” (Luk 8:1) Jisas i no promes long ol man blong hem se evri man bambae oli bilivim olgeta o glad long wok we oli mekem. Hem i talem samting we i defren olgeta. (Jon 15:20, 21) Taswe i gud ol Kristin oli tingbaot eksampol blong Meri woman Magdala. !Nating se sam long ol disaepol oli no bilivim tok blong hem stret long taem ya, be hem i no letem samting ya i spolem glad blong hem blong talemaot gud nius ya se Jisas i laef bakegen!

Smol taem biaen, Jisas i kamtru long ol aposol blong hem mo long plante moa man we oli biaen long hem. !Wantaem hem i kamtru long bitim 500 man long sem taem nomo! (1 Korin 15:3-8) Maet evritaem we Meri i luk o i harem nius se Jisas i kamtru long ol man blong hem, hemia i mekem bilif blong hem i kam strong moa. Maet Meri woman Magdala i wan long ol woman we oli bin stap long miting ya long Jerusalem long dei blong Pentekos, taem tabu spirit i kamdaon long ol man blong Jisas we oli stap wanples long taem ya.—Ol Wok 1:14, 15; 2:1-4.

Nomata wanem i hapen, yumi gat i naf risen blong bilif long samting ya se: Meri woman Magdala i holemtaet bilif blong hem go kasem we hem i ded. !I gud we yumi wanwan i mekem sem mak! Bambae yumi folem fasin blong bilif blong Meri woman Magdala, sipos yumi soemaot tangkiu long olgeta samting we Jisas i mekem blong yumi, mo yumi mekem wok blong narafala wetem tingting daon mo long semtaem yumi trastem God blong i halpem yumi.