Hem i stap sidaon long graon, i harem nogud tumas from ol boela we oli kavremap ful bodi blong hem, i stat long hed i go kasem leg. Traem tingbaot: Hem i benem hed blong hem, i slakem solda i godaon, hem i stap hem wan, mo i stap traehad blong leftemap han blong hem blong ronem ol flae we oli stap raon long hem. Hem i stap sidaon long asis blong faea, blong soemaot olsem wanem hem i harem nogud, i stap yusum smol paoa we hem i gat yet blong skrasem ol soa blong hem wetem wan pis graonpot. !Hem i lusum evri samting, mo ol man oli no moa respektem hem! Ol fren mo famle oli lego hem. Ol man mo ol pikinini tu oli stap jikim hem. Hem i ting se God blong hem Jehova tu i agensem hem. Be samting ya i no tru.—Job 2:8; 19:18, 22.

Man ya hemia Job. God i tokbaot hem se: “I no gat narafala man long wol ya we i olsem hem.” (Job 1:8) Plante handred yia biaen, Jehova i tingbaot Job yet olsem wan man we i stanap strong long stret fasin.—Esikel 14:14, 20.

?Olsem wanem? ?Yu stap fesem ol hadtaem mo trabol? Stori blong Job i save mekem yu yu harem gud, mo halpem yu blong kasem save long wan fasin we olgeta man blong God oli mas gat, hemia blong holemstrong long God. Yumi holemstrong long God taem yumi gohed blong mekem i stret olsem God i wantem, nating se yumi fesem hadtaem. Stori blong Job i save tijim yumi.

I luk olsem se samtaem afta we Job i ded, gudfala man ya Moses i raetemdaon stori blong laef blong Job. Tabu spirit i givim save long Moses long saed blong laef blong Job, mo long samting we i stap hapen long heven long taem ya.

Long stat blong stori, Job i stap harem gud long laef blong hem. Hem i gat plante samting, mo long kantri ya Uj, we maet hemia long not Arebia, ol man oli save hem mo respektem hem. Hem i givhan bigwan long ol puaman mo olgeta we oli no gat man blong protektem olgeta. Job mo waef blong hem i gat ten pikinini. Samting we i impoten moa, se Job i fren gud wetem Jehova. Olsem Ebraham, Aesak, Jekob, mo Josef bifo, hem i traehad blong mekem Jehova i glad. Mo Job i mekem wok blong pris tu insaed long famle, hemia taem hem i mekem sakrefaes blong ol pikinini blong hem oli kam klin long fes blong God.—Job 1:1-5; 31:16-22.

Be wantaem nomo, stori ya i jenis, i tokbaot samting we i hapen long heven, mo ol samting we Job i no bin save. Ol gudfala enjel blong Jehova oli stanap long fored blong hem, mo enjel ya we i no obei long God, Setan, i kam. Jehova i save se Setan i no laekem stret man ya Job, taswe hem i tokbaot ol gudfala fasin blong Job. Be Setan i talem se: “No, be hem i stap mekem wosip long yu from we yu yu stap givhan gud long hem. Oltaem yu stap lukaot gud long hem wetem ol pikinini blong hem mo olgeta samting blong hem, mo yu stap blokemgud olgeta.” Setan i no laekem nating ol man we oli holemstrong long God. Taem oli no lego Jehova God, oli pruvum se Setan i wan rabis man we i no gat lav. Setan i talem se Job i wosipim God nomo blong kasem samting. !Hem i talem se sipos Job i lusum evri samting, bambae hem i tok nogud long God!—Job 1:6-11.

Job i no save se Jehova i givim wan bigfala blesing long hem, hemia blong pruvum se Setan i rong. God i letem Setan i tekemaot evri samting we Job i gat. Be hem i no save kilim Job i ded. Ale Setan i stat blong mekem ol rabis wok blong hem blong spolem Job. Long wan dei nomo, plante nogud samting i hapen. Setan i kilim i ded ol animol blong Job, fastaem ol buluk mo ol dongki, mo afta, ol sipsip mo ol kamel. Antap long hemia, hem i kilim i ded ol man blong wok we oli stap lukaot long ol animol ya. Wan man blong wok i talem long Job se oli ded taem “God i sanem faea,” maet hemia laetning. Bifo we Job i gat taem blong tingting gud long ol samting we hem i lusum, hem i kasem wan mesej we i moa nogud. !Ten pikinini blong hem we oli joen long haos blong bigfala brata blong olgeta, oli ded long wan hariken!—Job 1:12-19, NW.

I had blong kasemsave long filing blong Job long taem ya. Hem i brekem klos blong hem, i katemaot hea blong hem, mo i foldaon long graon. Job i gat tingting se God i givim ol samting ya mo hem i tekemaot olgeta. Be Setan nao i mekem i luk olsem se God i stamba blong ol trabol ya. Nating se i olsem, Job i no tok nogud long God olsem we Setan i bin talem. Job i talem se: ‘Mi mi presem nem blong Jehova.’—Job 1:20-22.

Samting ya i mekem Setan i kros tumas, mo i gohed nomo blong spolem Job. Hem i kam long fored blong Jehova bakegen taem ol enjel oli stap. Jehova i talem gudfala tok long saed blong Job bakegen from we hem i holemstrong long hem, nomata long ol samting we Setan i mekem. Setan i kros, i talem se: “Hem i save lego olgeta samting we hem i gat blong i sevem laef blong hem. Be sipos yu spolem bodi blong hem, bambae hem i tok nogud long yu, stret long fes blong yu.” Setan i ting se sipos Job i kasem wan strong sik bambae hem i tok nogud long God. Be Jehova i trastem Job, taswe hem i letem Setan i givim wan sik long hem, be wan samting nomo, hem i no mas kilim Job i ded.—Job 2:1-6.

Job i harem nogud tumas olsem yumi tokbaot long stat. Traem tingbaot woman blong hem. !Hem i harem nogud tumas long ded blong ol ten pikinini blong hem, mo naoia hem i stap luk we hasban blong hem i safa, mo i no save mekem wan samting blong givhan! Hem i stap krae, mo i talem se: “?From wanem tingting blong yu i stap strong yet long God olsem? !I moa gud yu tok nogud long hem blong yu yu ded!” Hem i no toktok olsem woman ya we Job i lavem hem. Job i talem se hem i stap toktok olsem from we hem i lusum tingting blong hem. Be Job i no tok nogud long God. I no gat wan nogud tok i kamaot long maot blong hem.—Job 2:7-10.

?Yu yu save se stori ya i joen wetem laef blong yu tu? Makem se tok we Setan i talem i no agensem Job nomo be i go long evri man. Hem i se: ‘Wan man i save lego olgeta samting we hem i gat blong i sevem laef blong hem.’ !Hemia nao tingting blong Setan, se i no gat wan man we i save holemstrong long Jehova! Hem i talem se yu no rili lavem God, mo kwiktaem nomo bambae yu lego God blong sevem laef blong yu. !I olsem we hem i stap talem se, yu yu olsem hem nomo we i tingbaot hem wan! ?Yu wantem soemaot se hem i rong? Yumi evriwan i save mekem olsem. (Ol Proveb 27:11) Naoia bambae yumi luk nekis samting we i hapen long Job.

Tri man we oli save Job, we Baebol i tokbaot olgeta olsem ol fren blong Job, oli harem ol samting we i hapen long laef blong hem, nao oli go blong leftemap tingting blong hem. Taem oli kam klosap long hem oli no luksave hem. Bodi blong hem i soa tumas mo i kam blak from ol soa, taswe hem i no luk olsem fastaem. Trifala man ya, Elifas, Bildad, mo Jofara, oli mekem olsem se oli harem nogud tumas, oli stap krae bigwan mo oli sakem asis long hed blong olgeta. Nao oli sidaon klosap long Job, be oli no talem wan tok nating long hem. Oli sidaon olsem blong wan ful wik, dei mo naet, mo oli no talem wan toktok nating. Yumi no mas ting se oli mekem olsem from we oli sore long Job. Oli no askem wan kwestin nating blong faenemaot wanem i hapen mo soemaot se oli kea. Oli luksave nomo se Job i harem nogud tumas.—Job 2:11-13; 30:30.

Job nao i statem storian ya. Mo ol tok blong hem oli soemaot se hem i harem nogud tumas, taem hem i talem se i moagud we hem i no bon. Hem i soemaot wan risen from wanem hem i harem nogud. !Hem i ting se God nao i stamba blong ol trabol blong hem! (Job 3:1, 2, 23) Nating se i olsem, hem i holemtaet bilif mo i wantem tumas we narafala i leftemap tingting blong hem. Be taem trifala fren blong Job oli stat blong toktok, hem i luksave se i moagud we oli no toktok nating.—Job 13:5.

Elifas we maet hem i olfala moa long olgeta mo long Job tu, i stat blong toktok. Biaen tu narafala i toktok. Yumi save talem se tufala i folem tingting blong Elifas nomo. Maet i luk olsem se sam long ol samting we trifala ya i talem oli gud, taem oli talem se God i hae we i hae, i stap panisim ol rabis man, mo i stap blesem ol gudfala man. Be oli no toktok kaen long Job. Elifas i talem ol tok we i luk olsem se i stret, i se God i gud mo i stap panisim ol man nogud. Taswe sipos i stap panisim Job, hemia i soemaot klia se Job i mekem wan samting we i nogud.—Job 4:1, 7, 8; 5:3-6.

Hemia nao from wanem Job i no glad long ol toktok blong Elifas. Hem i agensem ol tok ya fulwan. (Job 6:25) Be trifala man ya oli strong moa blong talem se Job i stap haedem wan nogud samting we hem i mekem, taswe i stret nomo we ol trabol ya oli kasem hem. Elifas i talem se Job i flas, i nogud, mo i no ona gud long God. (Job 15:4, 7-9, 20-24; 22:6-11) Jofara i talem se Job i mas lego ol nogud fasin we hem i harem gud blong mekem. (Job 11:2, 3, 14; 20:5, 12, 13) !Mo Bildad i talem wan samting we i moa nogud, se i stret nomo we ol boe blong Job oli ded from we oli mekem wan sin!—Job 8:4, 13.

Ol rabis fren ya oli mekem wan samting we i moa nogud. !Oli no talem nomo se Job i no holemstrong long God, be oli talem se i blong nating nomo we hem i holemstrong long God! Long fastok blong Elifas, hem i tokbaot wan spirit we i kamtru long hem mo i mekem hem i fraet tumas. Samting ya we i hapen long hem, i mekem se hem i gat wan rabis tingting, nao i talem se: “Ol enjel long heven oli man blong wok blong God, be hem i no trastem olgeta, hem i gat poen long olgeta.” !Hemia i min se ol man oli no save mekem God i glad! Biaen, !Bildad i talem se God i no tinghae long fasin blong Job blong holemstrong long hem, olsem we hem i no save tinghae long wan maget we i holemstrong long hem!—Job 4:12-18; 15:15; 22:2, 3; 25:4-6.

?Yu traem finis blong leftemap tingting blong wan man we i harem nogud tumas? I no isi. Be yumi save lanem lesen long trifala giaman fren blong Job. Yumi save lanem wanem tok we yumi no mas talem. !Nomata se trifala ya i yusum ol tok we i luk olsem se i waes mo i tru, be oli neva singaot Job long nem blong hem! Oli no tingbaot nating se Job i harem nogud tumas mo se oli mas kaen long hem. * Taswe, sipos wan fren blong yu i harem nogud, yu mas kaen mo soemaot se yu lavem hem mo yu kea. Traem mekem bilif mo tingting blong hem i strong, mo givhan long hem blong i trastem God mo i bilif se Jehova i kaen tumas, i gat sore, mo i stap jajem man long stret fasin. Hemia nao samting we Job bambae i mekem long ol fren blong hem sipos oli harem nogud. (Job 16:4, 5) ?Be hem i mekem wanem taem oli stap tok agensem hem from fasin blong hem blong holemstrong?

!Sore tumas long Job! Hem i harem nogud finis taem trifala i stat blong toktok long hem. Hem i talem se samtaem ol man oli “sek long ol tok” we hem i ‘sakem from we tingting blong hem i foldaon.’ (Job 6:3, 26) Yumi save from wanem Job i toktok olsem. Hem i harem nogud tumas. Mo tu, hem i no save from wanem ol trabol ya i stap kasem hem. Job i ting se Jehova nao i mekem ol trabol ya, from we i kasem Job mo famle blong hem wantaem nomo, mo i luk olsem se i kamaot long wan paoa we i hae moa long man. Be i gat sam impoten samting we Job i no save, taswe tingting blong hem i no stret.

Nating se i olsem, Job i gat strong bilif. Ol tok blong hem i soemaot samting ya. Ol gudfala toktok ya i tru mo i leftemap tingting blong yumi tede. Taem hem i tokbaot ol nambawan samting we God i wokem, hem i talem ol gudfala toktok blong presem hem, we i klia nomo se God i putum long tingting blong hem. Tingbaot tok blong hem se Jehova i “putum wol ya i hang long open ples nomo,” we plante handred yia biaen ol saentis oli faenemaot se i tru. * (Job 26:7) Mo taem Job i tokbaot hop blong hem long fiuja, hem i soemaot sem tingting we ol narafala man blong bilif oli soemaot. Job i bilif se sipos hem i ded, God bambae i misim hem, i tingbaot hem, mo i mekem hem i laef bakegen long fiuja.—Job 14:13-15; Hibrus 11:17-19, 35.

?Olsem wanem long fasin ya blong holemstrong long God? Elifas mo tufala fren blong hem i talem se God i ting nating long wan man we i holemstrong long hem. ?Job i letem samting we oli talem i daonem tingting blong hem? !Nogat! Hem i bilif se God i tinghae long man we i holemstrong long hem. Hem i tokbaot Jehova wetem strong tingting, i se: “Bambae hem i save luk we mi mi no mekem samting nogud nating.” (Job 31:6) Samtaem afta, Job i jes luksave se trifala fren ya oli stap agensem hem from fasin blong hem blong holemstrong long God. Samting ya i pulum hem blong i mekem wan longfala toktok, we i satem gud maot blong trifala ya.

Job i luksave se hem i mas holemstrong long Jehova evri dei. Taswe, hem i eksplenem olsem wanem hem i holemstrong long Jehova. Hem i blokem enikaen fasin blong mekem wosip long ol aedol, hem i kaen mo i respektem ol narafala, hem i stap klin, i tinghae long mared blong hem, mo antap long ol samting ya, hem i holemstrong long trufala God, Jehova. Taswe, Job i save talem wetem fulhat blong hem se: “!Go kasem taem we mi mi ded, bambae mi no save lego fasin blong mi blong holemstrong long God!”—Job 27:5, NW; 31:1, 2, 9-11, 16-18, 26-28.

Olsem Job, ?yu tu yu tinghae long fasin blong holemstrong long God? I isi blong talem yes, be Job i luksave se fasin blong holemstrong i moa long hemia, yumi mas soemaot samting ya long ol aksen blong yumi. Yumi soemaot se yumi stap ona long God, taem yumi obei fulwan long hem mo yumi mekem ol samting we i gud oltaem, nating se yumi kasem hadtaem. Sipos yumi mekem olsem, bambae yumi mekem Jehova i glad mo yumi mekem enemi ya Setan i kros, olsem Job i mekem bifo. !Hemia nambawan rod blong folem fasin blong bilif blong Job!

Be stori blong Job i no finis long ples ya. From ol trabol we hem i kasem, hem i traem soemaot se hem i no mekem wan samting we i no stret, i bitim we hem i leftemap nem blong God. Hem i nidim advaes blong stretem hem, mo i mas gat sem tingting olsem God. Hem i stap harem nogud yet, mo i nidim we narafala i leftemap tingting blong hem. ?Jehova i mekem wanem blong givhan long man ya we i bilif long hem mo i holemstrong long hem? Bambae yumi ansa long kwestin ya long wan narafala stori.