Plante boe mo gel oli laef tugeta bifo we oli mared. Samfala oli mekem olsem from we oli wantem luk sipos oli naf blong wok gud tugeta, mo oli ting se hemia bambae i givhan long olgeta blong gat wan hapi mared. ?Be i waes blong laef tugeta bifo mared?

Long atikol ya

•  ?Baebol i talem wanem?

•  Sipos yu laef tugeta bifo mared, ?hemia bambae i rerem yu from mared?

•  Sipos yu laef tugeta bifo mared, ?hemia bambae i givhan long yu blong sevem mane?

•  Sipos yu laef tugeta bifo mared, ?hemia bambae i halpem yu blong jusum gud hasban o waef blong yu?

•  ?I gat wan narafala rod we i gud moa?

•   Baebol i no agri long fasin ya we man mo woman we i no mared i slip tugeta. Baebol i talem se: “Yufala i no mas mekem enikaen doti fasin blong seks.” (1 Tesalonaeka 4:3; 1 Korin 6:18) Hemia i minim tu olgeta we oli gat plan blong mared, be oli stap tugeta fastaem. a Ol advaes blong Baebol oli save givhan long man mo woman blong oli no kasem plante trabol, olsem woman i gat bel we i no mared, mo ol narafala trabol we oli save kamaot from fasin blong laef tugeta bifo mared.

•   God nao i stamba blong mared. Taem hem i stanemap plan ya, hem i talem se: “Man bambae i aot long papa mo mama blong hem, mo bambae hem i go joen wetem waef blong hem, mo bambae tufala i kam wan bodi nomo.” (Jenesis 2:24) Promes we wan man mo woman i mekem taem tufala i mared, i olsem wan strong fandesen we i mekem se i gat lav insaed long famle mo famle i stap gud.

 Samfala oli ansa se ‘yes.’ Hemia from oli gat tingting ya se taem wan man mo woman i laef tugeta, bambae tufala i lanem blong wok tugeta mo save gud fasin blong tufala. Be blong gat wan hapi mared, samting we i moa impoten hemia blong tufala i gat strong tingting blong stap tugeta.

 ?Wanem i save givhan long wan man mo woman blong stap tugeta nating se tufala i fesem sam hadtaem? Taem wan man mo woman i laef tugeta bifo we tufala i mared, tufala i save gat tingting blong seraot enitaem, mo hemia i no wan gudfala rod blong rere from mared. Be sipos tufala tugeta i gat strong tingting blong holemtaet promes blong tufala mo wok tugeta blong winim ol problem, bambae tufala i save stap gud oltaem.

 Stamba poen: Taem wan man mo woman i jus blong laef tugeta bifo mared, hemia i no rerem tufala blong gat wan gudfala mared, be i save mekem se tufala i gat tingting blong seraot.

 Advaes blong Baebol: “Wanem sid we man i planem, be frut blong hem nomo, man ya bambae i kasem.”—Galesia 6:7.

 Samfala oli ansa se ‘yes.’ Wan ripot we Pew Research Center i mekem, i soemaot se long Yunaeted Stet, 40 pesen blong ol man mo woman we oli laef tugeta bifo we oli mared, oli mekem olsem from we oli wantem sevem mane. Be afta we oli laef tugeta blong sam taem, plante long olgeta oli harem se oli no rere yet blong mared from we oli gohed blong fesem problem blong mane.

 I gat sam narafala trabol tu we i save kamaot taem man mo woman i laef tugeta bifo we tufala i mared, mo hemia i afektem moa ol woman. Eksampol, afta we wan man mo woman i seraot, plante taem woman nao i mekem wok ya blong lukaot long ol pikinini blong tufala.

 Stamba poen: Ol nogud samting we oli save kamaot taem man mo woman i laef tugeta bifo mared, oli plante moa i bitim ol gudfala samting we maet tufala i stap tingbaot.

 Advaes blong Baebol: “Mi Jehova, mi God blong yufala, mi nao mi stap tijim yufala blong givhan long yufala.”—Aesea 48:17.

 Samfala oli ansa se ‘yes.’ Be buk ya Fighting for Your Marriage i talem se: “Wan man mo woman we tufala i laef tugeta bifo mared, maet tufala i no luksave se hemia bambae i mekem i had moa blong tufala i seraot.” ?From wanem i had moa? Hemia from we maet tufala tugeta i agri blong pem sam samting, tufala i lisim wan haos, o tufala i gat pikinini we tufala i no plan from. Taswe i had blong tufala i seraot, nating se tufala i wantem blong mekem olsem. Ol man blong mekem risej oli faenemaot se samfala oli jus blong stap tugeta nomo from we oli lan blong laef tugeta, nating se laef blong tufala bambae i gud moa sipos tufala i seraot. b Buk ya Fighting for Your Marriage i gohed i se: “Samfala oli jus nomo blong mared from we i isi moa olsem. Sipos oli no bin laef tugeta, maet oli seraot finis.”

 Stamba poen: Taem wan man mo woman i laef tugeta bifo mared, hemia i no givhan long tufala blong mekem wan gudfala desisen, be i save mekem se i had moa blong tufala i seraot.

 Advaes blong Baebol: “Man we i tingting gud i luksave we trabol i stap kam, nao i go haed, be man we i no gat ekspiriens, hem i gohed nomo, i no wantem save, mo biaen i safa from.”—Ol Proveb 22:3.

 Yu save blokem ol trabol we olgeta we oli laef tugeta bifo mared oli kasem, mo gat wan hapi mared. ?Wanem i save givhan long yu? Hemia taem yu folemgud ol advaes blong Baebol long saed blong mared. I gud yu tekem taem blong save gud man o woman we yu stap tingting blong mared long hem bifo we yutufala i mared mo laef tugeta. I moa gud blong jusum wan we yutufala i gat sem bilif mo sem tingting long ol samting we oli moa impoten, i bitim we yu jusum wan jes from we fes mo bodi blong hem i naes.

 Ol advaes blong Baebol oli olsem wan strong fandesen we i save givhan long yu blong gat wan hapi mared. c Eksampol, long Baebol i gat ol advaes we oli save givhan long yu blong . . .

•   stap tru long hasban o waef blong yu

•   gat ol gudfala fasin we bambae yu nidim sipos yu mared

•   luksave sipos man o woman we yu stap frenem i stret blong yu mared long hem o nogat

 Blong kasem save moa long ol topik ya, yu go long jw.org long haf ya “Mared Mo Famle.”

 Advaes blong Baebol: “Olgeta tok blong Baebol oli kamaot long God fastaem, mo oli stret gud blong tijim man.”—2 Timoti 3:16.