Long Yunaeted Stet, stat long yia 1990 kasem 2015, namba blong olgeta we oli divos taem oli gat 50 yia kasem 64 yia, i go antap bigwan. Mo namba blong olgeta we oli divos taem oli gat bitim 65 yia i plante moa. ?From wanem ol olfala oli stap divos? ?Yu save mekem wanem blong protektem mared blong yu?

Long atikol ya

•  ?From wanem ol olfala oli stap divos?

•  Samting we yu save mekem

•  Sam samting blong storian long olgeta

•    Plante kapol we oli olfala oli stap divos from we oli no moa joen gud tugeta. Taem ol yia oli pas, sam hasban mo waef oli stat blong intres long ol defdefren samting, nao oli no moa mekem plante samting tugeta. Mo tu, taem ol pikinini oli aot long haos, maet wan kapol i harem se tufala i no moa save olsem wanem blong joen gud olsem hasban mo waef.

•    Long ol yia we oli jes pas, sam man we oli ting se oli gat save long saed blong mared oli givim advaes long ol hasban mo waef se wanwan long tufala i mas tingbaot samting we hem wan i nidim. Oli pulum olgeta blong tingbaot ol kwestin ya: ‘?Mi mi glad long mared blong mi?’ ‘?Mared ya i givhan long mi blong kam gud moa?’ ‘?Mi mi haremsave se hasban o waef blong mi i lavem mi mo i tinghae long mi?’ Ol man oli ting se sipos yu ansa “no” long wan long ol kwestin ya, i gud yu mekem wan desisen we bambae i givhan long yu wan, hemia blong divos mo statem wan niufala laef.

•   Plante man oli no moa luk fasin ya blong divos olsem wan nogud samting. Eric Klinenberg we i stadi long fasin blong laef blong ol man i raetem se: “Long taem bifo, taem wan man i no glad long mared blong hem, hem i mas gat wan gudfala risen blong hem i save divos. Be tede i defren. Plante man oli tingbaot olgeta nomo, taswe sipos wan man i no glad long mared blong hem, bambae oli fosem hem blong divos, mo hem i mas gat wan gudfala risen sipos hem i no wantem divos.” a

 Plante man oli ting se sipos oli divos bambae oli ronwe long ol problem blong olgeta, be blong talem stret, hemia i jes ademap sam moa niufala problem. Eksampol, wan stadi i soemaot se “plante long olgeta we oli divos taem oli olfala, oli fesem problem long saed blong mane, speseli ol woman.”

 I gat wan narafala samting tu we yu mas tingbaot. Buk ya Don’t Divorce i talem se: “Nating sipos yu divos mo statem wan niufala laef, be ol fasin blong yu bambae oli stap sem mak nomo. Taswe i moa gud yu tingbaot olsem wanem blong kam gud moa long fasin blong yu blong toktok wetem hasban o waef blong yu, mo blong yutufala i no moa raorao.” b

•   Tingbaot se i save gat ol jenis. I no gat wan frensip we i stap sem mak oltaem. Maet fasin blong yu blong fren gud wetem hasban o waef blong yu i jenis from we ol pikinini oli muvaot long haos, o from we yutufala i stat blong intres long ol defdefren samting. Be i gud yu tingbaot samting we yu save mekem naoia blong yutufala i fren gud bakegen, i bitim we yu stap tingbaot gudfala laef we yutufala i gat bifo.

   Advaes blong Baebol: “Yu no mas talem se: ‘?From wanem ol dei we oli pas finis, oli gud moa long hemia?’ From we hemia i no tok blong man we i waes.”—Prija 7:10.

•   Kam klosap moa long yutufala. ?Yu yu rere blong mekem samting we hasban o waef blong yu i intres long hem? ?Yu save givhan long hasban o waef blong yu blong hem tu i mekem samting we yu intres long hem? ?Yu save faenem wan niufala samting blong yutufala i mekem tugeta? Samting we i moa impoten, hemia blong spenem taem tugeta. Sipos yutufala i mekem olsem, bambae yutufala i kam klosap moa long yutufala olsem hasban mo waef.

   Advaes blong Baebol: “I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.

•   Gohed blong kaen long narafala. Nating se yutufala i stap tugeta blong plante yia, be i gud yutufala i gohed blong kaen long yutufala. Talem ol tok we i soemaot se yu respektem hasban o waef blong yu, mo kaen long hem olsem long taem ya we yutufala i stap fren yet. No foget blong talem “plis” mo “tangkiu.” Evri dei, i gud yu soemaot se yu lavem hasban o waef blong yu mo se yu glad long ol samting we hem i mekem blong yu.

   Advaes blong Baebol: “Yufala i mas kaen long yufala, yufala i sore long yufala.”—Efesas 4:32.

•   Tingbaot ol gudfala memori. I gud yutufala i joen tugeta blong lukluk ol foto blong mared blong yutufala, mo ol narafala gudfala taem we yutufala i spenem tugeta. Hemia bambae i mekem se yutufala i gohed blong lavlavem yutufala mo respektem yutufala.

   Advaes blong Baebol: “Wanwan hasban i mas lavem waef blong hem olsem we hem i lavem hem wan, mo waef i mas gat bigfala respek long hasban blong hem.”—Efesas 5:33.