“Mitufala i luksave denja blong ponografi, be mitufala i no luksave se i isi tumas blong gel blong mitufala i luk rabis fasin ya.”—Nicole.

Long atikol ya

•  Samting we yu mas save

•  ?Olsem wanem blong protektem pikinini blong yu long ponografi?

•  ?Olsem wanem sipos pikinini blong yu i luk ponografi?

 Samting we yu mas save

 Ol pikinini oli save fesem problem blong ponografi taem oli smol nomo. Ol stadi oli soemaot se naoia ol pikinini oli stat blong fesem problem blong ponografi taem oli gat 11 yia nomo.

 Ol pikinini oli fesem problem ya nating se oli no lukaotem ponografi. Maet oli luk sam rabis pija taem oli stap mekem risej long Intenet o yusum sosol media. Taem oli stap plei video gem long Intenet, maet oli sek long wan advetaesmen blong ponografi we i kamaot. I gat ol defren rod blong soemaot ponografi, tu bigfala rod hemia tru long ol foto mo video. Be i isi blong faenem ol stori blong ponografi long Intenet, we man i save ridim o lesin long olgeta.

 Wan narafala samting blong tingbaot, hemia se wan man i save sanem ol mesej long saed blong seks long pikinini blong yu tru long mobaelfon. Long 900 yangfala we oli mekem stadi long olgeta, klosap 90 pesen blong ol gel mo 50 pesen blong ol boe oli talem se, oltaem ol narafala long klas blong olgeta oli stap sanem ol rabis video mo foto long olgeta.

 Plante ponografi i fulap long raf fasin. Plante long ol ponografi we i isi blong man i lukluk i soemaot raf fasin, mo plante taem hem i vaelens agensem ol woman.

 Ponografi i mekem i nogud long pikinini. Ol man we oli mekem risej oli faenemaot se plante pikinini we oli wajem ponografi oli gat ol problem ya:

•   oli no wok gud long skul

•   oli wari, tingting i foldaon, mo oli ting nating long olgeta

•   oli ting se raf fasin long saed blong seks i nomol nomo

 Stamba poen: Ponografi i mekem i nogud long ol pikinini. Mo ol perens nao oli mas protektem olgeta.

 Advaes blong Baebol: “Ol tok ya we mi stap talemaot long yu tede, oli mas stap long hat blong yu, mo yu mas putum ol tok ya long hat blong ol boe blong yu, mo yu toktok long olgeta taem yu sidaon long haos blong yu, taem yu wokbaot long rod, taem yu ledaon, mo taem yu girap.”—Dutronome 6:6, 7.

 ?Olsem wanem blong protektem pikinini blong yu long ponografi?

 Faenemaot plante samting long saed ya. Tingbaot wetaem mo weples pikinini blong yu i save luk ponografi. Eksampol: ?Hem i save yusum Intenet long skul taem tija i no stap, olsem long taem blong kakae?

 Traem save ol samting long fon blong hem a we i save blokem ol rabis mesej, mo faenemaot ol app we hem i yusum mo ol gem we hem i stap plei long fon blong hem. Maet sam app oli gat wan samting we i save mekem ol rabis mesej, pija, o video oli lus kwiktaem. Mo tu, plante video gem we ol yangfala oli laekem oli gat ponografi long olgeta, mo tru long sam long ol gem ya, yangfala i save mekem olsem we hem i gat seks wetem narafala.

 “Mi pas long rod ya finis. Sipos pikinini blong yu i gat wan smatfon, yu mas save olsem wanem blong yusum, mo ol samting we yu save mekem long fon ya blong blokem ponografi, mo olsem wanem blong jekem ol samting we pikinini blong yu i stap mekem long fon ya.”—David.

 Mekem evri samting we yu save mekem blong protektem pikinini blong yu. Mekem evri samting we yu naf blong mekem blong blokem denja. Eksampol: Jenisim ol seting long fon blong pikinini blong blokem enikaen ponografi. Onem samting we i givim kontrol long ol perens. Mo save ol paswod we pikinini blong yu i yusum.

 “Mi luk se i gud blong jenisim seting long ol fon blong mifala blong givim kontrol long perens, blokem ol program we boe blong mi i save luk long TV, long fon blong hem, mo save paswod blong fon blong hem.”—Maurizio.

 “Mi no letem ol boe blong mi oli wajem ol video long rum blong olgeta taem doa i sat. Long taem blong slip, mi no letem oli tekem ol divaes i go long rum blong olgeta.”—Gianluca.

 Rerem pikinini blong yu from ponografi. Wan mama we nem blong hem Flavia, i talem se: “Sam papa mo mama oli no wantem toktok long pikinini long saed blong ponografi, from oli ting se bambae hem i neva fesem problem ya.” Sam narafala oli wari, oli talem se: ‘Sipos mi tokbaot ponografi, pikinini blong mi bambae i go lukaotem.’ Tingting olsem i no stret. Ol perens we oli waes oli tijim pikinini long saed blong ol denja blong ponografi bifo we hem i luk. ?Olsem wanem yu save mekem olsem?

 Tijim ol smol pikinini long samting we oli mas mekem sipos oli kasem problem ya. Eksampol: Oli save satem ae blong olgeta o ofem divaes. Mo tu, talem long olgeta se oli mas tokbaot wetem yu ol samting we oli luk mo harem. b

 “Taem boe blong mi i smol nomo, mitufala i tokbaot ol denja blong ponografi wetem hem. Taem hem i gat samwe long 11 yia, hem i sek se ol advetaesmen blong ponografi oli kamaot long wan gem we hem i stap plei long fon blong hem. I gat ol mesej tu wetem ol pija blong askem long hem blong sanem pija blong hem wan. Be from we mitufala i tokbaot finis wanem we hem i mas mekem, hem i kam luk mi kwiktaem blong talem samting we i hapen.”—Maurizio.

 Givhan long ol pikinini we oli bigwan moa blong oli blokem eni samting we i pulum olgeta blong lukluk, lesin, o ridim ponografi. Eksampol: Yu save givhan long pikinini blong hem i raetemdaon samting we bambae hem i mekem sipos hem i luk sam ponografi i kamaot, mo from wanem hem i mekem olsem. Mo tu, hem i save raetemdaon nogud frut we bambae i kamaot sipos hem i lukluk ponografi, olsem bambae hem i ting nating long hem wan, papa mo mama i no moa trastem hem, mo hem i no moa frengud wetem God. c

 “Taem ol pikinini oli kam bigwan moa, tokbaot ol frut we bambae oli kasem sipos oli lukluk ponografi, hemia i save givhan long olgeta blong oli no foldaon long trap ya blong wantem lukluk.”—Lauretta.

 “I isi moa blong pikinini i blokem ponografi sipos hem i kasemsave denja blong hem, mo tu, long filing blong Jehova long saed ya.”—David.

 Toktok oltaem. Maet i had blong yu bilivim, be ol pikinini oli wantem toktok long perens blong olgeta long saed blong seks mo ponografi tu. Komisna blong ol Pikinini long Inglan we nem blong hem Rachel de Souza, i talem se: “Taem ol pikinini oli smol nomo, oli soemaot oltaem se oli wantem tokbaot samting ya. Oli wantem tokbaot long fasin we i stret long yia blong olgeta, mo taem oli kam bigwan, oli nidim blong tokbaot ol defren samting long saed ya.”

 “Taem mi mi stap gruap, i gat sam samting we papa mo mama blong mi i neva tokbaot wetem mi. I moagud sipos mifala i bin tokbaot ol samting ya tugeta. Naoia mi mi wan mama, oltaem mi traem bes blong mi blong tokbaot seks long isi fasin wetem ol pikinini blong mi.”—Flavia.

 ?Olsem wanem sipos pikinini blong yu i luk ponografi?

 No kam kros. Sipos yu faenemaot se pikinini blong yu i lukluk, i lesin, o i ridim ponografi, traem kontrolem filing blong yu. Ating hem i harem nogud finis, i sek long samting ya, o i harem se hem i gat fol. Sipos yu kam kros, bambae yu mekem hem i harem nogud moa. Mo tu, long fiuja, maet hem i no moa wantem kam tokbaot wetem yu.

 Faenemaot wanem i rili hapen. I nogud yu ting se yu save finis samting we i hapen, be i moa gud blong askem sam kwestin blong faenemaot olsem wanem pikinini blong yu i lukluk ponografi. ?Narafala i sanem wan pija long hem o hem nomo i go faenem? ?Hemia fastaem we samting ya i hapen, o hem i bin lukluk bifo? ?Divaes we hem i stap yusum i save blokem ol samting ya o givim kontrol long perens? Sipos yes, ?hem i bin traem blong jenisim ol seting blong i save lukluk? Yu no mas fogetem se yu wantem pulum pikinini blong yu blong i tokbaot samting ya, taswe yu no mas kwestinim hem bitim mak.

 Tekem aksen. Sipos hem i no minim blong lukluk, maet yu mas jenisim ol seting long divaes blong hem blong givim kontrol long perens mo blokem ol rabis pija.

 Sipos yu faenemaot se hem i bin lukaotem ponografi, yu mas stretem hem long kaen fasin. Blong mekem tingting blong hem i strong moa blong agensem ponografi, yu save tokbaot ol vas olsem Job 31:1, Ol Sam 97:10, mo Ol Sam 101:3. d Mo talem long hem se bambae yu jekem hem evri wik, blong givhan moa long hem mo luk sipos hem i stap gohed gud.