Plante hasban mo waef oli no toktok tugeta plante, nating se oli spenem taem tugeta. ?From wanem?

•  Tugeta be wanwan—?From wanem?

•  Samting we yu save mekem

•  Samting we ol hasban mo waef oli talem

•  Sam samting blong storian long olgeta

•   Taed tumas

   “Taem mi mo hasban blong mi i gat taem blong storian, mitufala i taed tumas. Taem mi mi taed, mi save kam kros from ol smosmol samting nomo. I moa gud mitufala i wajem TV.”—Ana.

•   Bisi tumas long mobaelfon o kompiuta

   “Ol samting we yumi save mekem o wajem long Intenet oli save kakae taem blong yumi. Yumi save spenem plante aoa blong mekem olsem, be yumi no toktok nating long hasban o waef blong yumi. I olsem we yumi no stap long sem rum wetem hem.”—Katrin.

•   No intres long sem samting

   “Taem hasban blong mi i kamhom long wok, hem i wantem mekem ol samting we hem i laekem. I stret nomo we hem i mekem olsem, from we hem i wok had. Be mi glad sipos mitufala i save spenem moa taem tugeta.”—Jen.

•   Wok

   “Teknoloji i mekem se yumi save gohed blong wok taem yumi gobak long haos. Plante taem, mi yusum taem we mi sud spenem wetem waef blong mi blong ansarem ol imel mo teks mesej long saed blong wok.”—Mak.

•   Luksave se i impoten blong spenem taem tugeta.

   Rul blong Baebol: “Faenemaot ol samting we oli moa impoten.”—Filipae 1:10.

   Yu traem tingbaot: ?Ol aksen blong yu oli soemaot se yu tinghae moa long wok blong yu mo ol samting we yu laekem blong mekem, i bitim mared blong yu? ?Yu yu spenem taem wetem hasban o waef blong yu, taem yu no gat narafala samting blong mekem nomo?

   Traem hemia: Makemaot taem blong spenem wetem hasban o waef blong yu, we i no gat narafala samting i pulum tingting blong yu.

   “Mi glad tumas taem hasban blong mi i plan blong mitufala i mekem wan samting tugeta. Mi harem se mi spesel, mo se hem i wantem kampani wetem mi. Hemia i mekem se mi lavem hem moa.”—Ana.

•   Lanem blong talem “no” long mobaelfon mo kompiuta.

   Rul blong Baebol: “I gat wan stret taem blong evri samting.”—Prija 3:1.

   Yu traem tingbaot: ?Olsem wanem? ?Plante taem yu no lesin gud long hasban o waef blong yu from we yu kasem wan teks mesej o wan narafala samting long fon?

   Traem hemia: Traem blong kakae tugeta wan taem evri dei o bitim wan taem. Putum fon blong yutufala long narafala rum. Taem yutufala i kakae tugeta, hemia nambawan janis blong tokbaot ol samting we i hapen long dei ya.

•   Sipos i posibol, joen wanples blong pem olting long stoa mo mekem wok long haos.

   Rul blong Baebol: “Tu man i gud moa i bitim wan man nomo, from we bambae tufala i kasem plante gudfala samting from hadwok blong tufala.”—Prija 4:9, futnot.

   Yu traem tingbaot: ?Yutufala i go wanwan blong pem ol samting long stoa, o blong mekem wan samting long haos?

   Traem hemia: I gud yutufala i joen wanples blong mekem ol samting, nating se wan long yutufala nomo i naf blong mekem.

   “Taem yu pem ol samting long stoa, wasem ol plet, foldem ol klos, klinim yad, tingbaot ol wok ya olsem janis blong spenem taem tugeta, i bitim we yu tingbaot se wok ya i hevi long yu.”—Nina.

•    No mekem i strong tumas long hem

   Rul blong Baebol: “Yufala i no stap mekem i strong tumas long ol narafala.”—Filipae 4:5.

   Yu traem tingbaot: ?Olsem wanem blong save sipos yu stap mekem i strong tumas long hasban o waef blong yu?

   Traem hemia: Storian tugeta blong save nid blong yutufala. Afta, yutufala i agri long ol rod blong spenem taem tugeta we bambae oli mekem yutufala i glad.

   “Hasban blong mi i laekem blong muvmuv plante, be mi laekem blong stap kwaet from mi no gat gudfala helt. Plante taem mi glad blong hem i go afsaed blong pleplei, mo mi mi stap long haos. Long rod ya, mi spel olsem mi nidim, mo hem i eksasaes olsem hem i nidim. Mitufala i harem gud blong mekem samting we i stret long nid blong mitufala.”—Daniela.

 Fastaem, i gud yutufala wanwan i tingting long ol kwestin ya. Afta, yutufala i save tokbaot tugeta.

•    ?Yu yu ting se naoia yutufala i stap spenem naf taem tugeta?

•   ?Wanem gudfala samting we hasban o waef blong yu i mekem blong yutufala i save spenem taem tugeta?

•   ?I gat wan samting we hem i save kamgud moa long hem?

•   ?Plante taem yu stap yusum mobaelfon o narafala teknoloji, nao yu no lesin gud long hasban o waef blong yu?

•   ?Yutufala i save mekem olsem wanem, blong wan i no strong tumas long narawan?

•   ?Wanem sam jenis we yutufala i save mekem long wik ya blong spenem moa taem tugeta?