Baebol i tijim se aot long evri laef samting long wol, wan smol namba blong ol man nomo bae oli go long heven. (Revelesen 14:1, 3) Oli go ya blong rul olsem ol king mo pris wetem Jisas. (Luk 22:28-30; Revelesen 5:9, 10) Bighaf blong ol man bae oli laef bakegen blong stap long wan paradaes wol.

 Baebol i no tokbaot nating se olgeta long heven oli gat animol o dog long haos—mo hemia i stret. Ol animol oli no naf blong kasem ol mak we i nidim blong oli kasem blong “go long heven.” (Hibru 3:1) Hemia ol mak olsem kasemsave long ol loa blong God, soemaot bilif, mo obei. (Matiu 19:17; Jon 3:16; 17:3) God i wokem man nomo we hem i naf blong laef olwe.

 Blong go long heven, ol laef samting oli mas laef bakegen. (1 Korin 15:42) Baebol i tokbaot sam we oli laef bakegen. (1 King 17:17-24; 2 King 4:32-37; 13:20, 21; Luk 7:11-15; 8:41, 42, 49-56; Jon 11:38-44; Ol Wok 9:36-42; 20:7-12) Be evriwan long olgeta hem i ol man nomo, i nogat animol.

•  ?Ol animol oli gat sol?

•  ?Sol i save ded?

•  ?Ol animol oli save mekem sin?

•  Fasin blong tritim nogud ol animol ?i oraet nomo?

 Nogat. Baebol i tijim se ol man mo tu ol animol oli ol sol. (Namba 31:28) Taem God i mekem faswan man Adam, hem i no givim hem wan sol be hem i “kam wan laef sol.” (Jenesis 2:7, futnot) I gat tu samting we i mekem wan sol, hemia: das blong “graon” long wol ya, mo “win blong laef.”

 Yes, Baebol i tijim se sol i save ded. (Levitikas 21:11, futnot; Esikel 18:20) Taem ol animol mo ol man oli ded, oli gobak long das o graon long wol ya. (Ol Krae 3:19, 20) I minim se, oli no moa laef. a

 Nogat. Blong mekem sin, i minim se hem i mekem long tingting, o filing blong hem, o mekem samting we i brekem loa blong God. Taswe blong wan laef samting i mekem sin, fastaem hem i mas naf blong jusum ol gudfala fasin o stret fasin. Ol animol oli no naf blong mekem olsem. Plante taem oli folem nomo samting we oli harem se oli mas mekem long laef blong olgeta. (2 Pita 2:12) Nao long en blong laef blong olgeta, oli ded, nating se oli no mekem sin.

 Nogat. God i givim raet long man blong oli bos long ol animol be i no blong tritim nogud olgeta. (Jenesis 1:28; Ol Sam 8:6-8) God i kea long evri wanwan animol—iven ol smosmol pijin. (Jona 4:11; Matiu 10:29) Hem i givim loa long ol man blong hem blong oli kea gud long ol animol.—Eksodas 23:12; Dutronome 25:4; Ol Proverb 12:10.