Bokis blong kontrak i wan tabu bokis we ol man Isrel bifo oli wokem, folem plan we God i talem long olgeta. Oli putum “tu flat ston” we Tenkomanmen i stap long tufala, insaed long bokis ya blong protektem tufala.—Eksodas 25:8-10, 16; 31:18.

•   Konstraksen. Longfala blong Bokis ya i tu kiubit haf, bigfala blong hem i wan mo haf kiubit, mo hae blong hem i wan mo haf kiubit (111 x 67 x 67 sentimeta). Oli wokem Bokis ya long wud blong akasia mo oli kavremap insaed mo afsaed long gol, mo oli flasem ol saed blong hem antap. Oli wokem tu jerubim long gol, mo oli putum tufala antap long lid we oli wokem long gol, long tufala en blong hem. Tufala i fesem tufala, mo tufala i openem wing blong tufala blong kavremap lid ya. Antap long fo leg blong Bokis ya, oli wokem fo ring blong gol. Oli wokem tu longfala stik long akasia we oli kavremap long gol, mo oli pusum tufala stik ya tru long ol ring blong karem Bokis ya.—Eksodas 25:10-21; 37:6-9.

•   Ples we Bokis i stap. Fastaem oli kipim Bokis ya long Rum We i Tabu We i Tabu long tabenakel. Hemia wan haos tapolen we oli wokem long semtaem we oli wokem Bokis ya, mo oli save karem i go long ol defren ples blong mekem wosip long hem. I gat wan bigfala kaliko we i blokem Rum we i Tabu We i Tabu, blong ol pris mo ol narafala man oli no save lukluk i go insaed. (Eksodas 40:3, 21) Hae Pris nomo i save lukluk Bokis ya, taem hem i go insaed long Rum We i Tabu We i Tabu wan dei long wan yia, hemia long Dei Blong Mekem Atonmen. (Levitikas 16:2; Hibru 9:7) Biaen, oli muvum Bokis ya i go long Rum We i Tabu We i Tabu, long tempol blong Solomon.—1 King 6:14, 19.

•   Wok blong Bokis ya. Oli putum ol tabu samting insaed long Bokis ya blong rimaenem ol man Isrel long kontrak, o promes, we God i mekem wetem olgeta long Hil ya Sinae. Mo tu, Bokis ya i mekem wan impoten wok long seremoni long Dei Blong Mekem Atonmen.—Levitikas 16:3, 13-17.

•   Ol samting insaed. Fas samting we oli putum insaed, hemia tufala ston we Tenkomanmen i stap long tufala. (Eksodas 40:20) Biaen oli fulumap mana long wan botel mo putum insaed long Bokis ya, wetem “stik blong Eron we i bin karem flaoa.” (Hibru 9:4; Eksodas 16:33, 34; Namba 17:10) I klia se oli bin tekemaot botel mo stik ya samtaem, from we taem oli muvum Bokis ya i go long tempol, tufala samting ya i no moa stap.—1 King 8:9.

•   Oli karem Bokis ya. Ol Livaet oli mas yusum tu longfala stik ya we oli wokem long wud blong akasia blong karem Bokis ya long solda blong olgeta. (Namba 7:9; 1 Kronikel 15:15) Tu longfala stik ya i stap oltaem long fo ring blong Bokis ya, taswe ol Livaet oli neva tajem Bokis ya. (Eksodas 25:12-16) Oli yusum “bigfala kaliko” we i seraotem Rum We i Tabu long Rum We i Tabu We i Tabu, blong kavremap Bokis ya taem oli stap karem i go olbaot.—Namba 4:5, 6. a

•   Wan saen. Bokis ya i saen blong soemaot se God i stap wetem olgeta. Wan eksampol: Klaod we i kamaot antap long Bokis ya long Rum We i Tabu We i Tabu mo long kamp blong ol man Isrel, i wan saen blong soemaot se Jehova i stap wetem olgeta mo i stap blesem olgeta. (Levitikas 16:2; Namba 10:33-36) Mo tu, Baebol i talem se Jehova “i sidaon long jea blong king, antap long ol jerubim,” hemia tufala jerubim antap long lid blong Bokis ya. (1 Samuel 4:4; Ol Sam 80:1) Taswe, tufala jerubim ya i “representem jariot” blong Jehova. (1 Kronikel 28:18) From we Bokis ya i min se Jehova i stap wetem olgeta, King Deved i raetem se Jehova i “stap long Saeon,” afta we oli muvum Bokis i go long ples ya.—Ol Sam 9:11.

•   Ol nem blong hem. Baebol i yusum plante nem blong tokbaot bokis ya we i tabu, olsem “bokis blong Loa,” “bokis blong kontrak,” “Bokis blong Jehova,” mo “Bokis ya we i saen blong paoa blong [Jehova].”—Namba 7:89; Josua 3:6, 13; 2 Kronikel 6:41.

   Lid blong Bokis ya, oli kolem “lid” blong mekem atonmen, o “jea blong sore.” (1 Kronikel 28:11; King James Version) Hemia i stap tokbaot spesel wok we lid ya i mekem long Dei Blong Atonmen, taem hae pris long Isrel i sakem blad blong ol animol we oli kilim olsem sakrefaes, i go long fored blong lid ya. Aksen ya blong hae pris i mekem atonmen o i kavremap sin “long bihaf blong hem wan, blong famle blong hem, mo long bihaf blong ful kongregesen blong Isrel.”—Levitikas 16:14-17.

?Bokis blong kontrak i stap yet tede?

 I no gat pruf se i stap tede. Baebol i soemaot se yumi no moa nidim Bokis ya from we kontrak we i joen wetem hem i finis, mo i gat wan “niufala kontrak” we i stanap long sakrefaes blong Jisas. (Jeremaea 31:31-33; Hibru 8:13; 12:24) Taswe Baebol i talemaot wan taem we bambae bokis blong kontrak i no moa stap, ol man blong God bambae oli fogetem gud.—Jeremaea 3:16.

 Afta we niufala kontrak i stanap, aposol Jon i luk wan vison blong heven we bokis blong kontrak i stap long hem. (Revelesen 11:15, 19) Bokis ya i wan saen se God i stap mo hem i blesem niufala kontrak ya.

?Bokis ya i givim gudlak?

 Nogat. Bokis ya i no mekem se oli win long evri samting we oli mekem. Wan eksampol: Taem ol man Isrel oli faet agensem taon ya Ae, Bokis i stap long kamp blong olgeta, be oli no winim faet ya from we wan man Isrel i no obei long Jehova. (Josua 7:1-6) Biaen, ol man Filistia oli winim faet, nating se ol man Isrel oli karem bokis blong kontrak i go wetem olgeta long ples blong faet. Oli lus from nogud fasin blong tu pris blong Isrel, hemia Hofni mo Finehas. (1 Samuel 2:12; 4:1-11) Ol man Filistia oli karem Bokis ya i blong olgeta, be God i mekem se oli kasem ol trabol gogo oli karem i gobak long ol man Isrel.—1 Samuel 5:11–6:5.