Hel (“Seol” mo “Hades” long tufala lanwis we Baebol i kamaot long hem fastaem) hem i beregraon o Hom blong ol Dedman, i no wan ples we ol man oli stap harem nogud long hem blong olwe. ?Hu olgeta we oli go long hel? Ol gudfala man mo ol rabis man. (Job 14:13; Ol Sam 9:17) Baebol i talem se beregraon ya i ples we evri man bambae oli go long hem.—Job 30:23.

 Taem Jisas i ded, hem tu i go long hel. Be, “hem i no stap long hel” longtaem, from God i mekem hem i laef bakegen.—Ol Wok 2:31, 32, The Bible in Basic English.

?Bambae ol man oli stap olwe long hel?

 Evri man we oli go long hel, bambae oli laef bakegen. Jisas bambae i mekem olgeta oli laef bakegen tru long paoa we God i givim long hem. (Jon 5:28, 29; Ol Wok 24:15) Revelesen 20:13 i tokbaot taem ya we ol dedman bambae oli laef bakegen, i se, “ded mo Hel i no moa save holemtaet ol dedman.” (King James Version) Taem ol man oli kamaot long hel, bambae hel i no moa gat. Ol man oli no moa save gobak long hem from “bambae i no moa gat man i ded.”—Revelesen 21:3, 4; 20:14.

 I no evri man we oli ded oli go long hel. Baebol i soemaot se i gat sam man we oli mekem ol samting we i nogud tumas, mo oli no save tanem tingting blong olgeta. (Hibrus 10:26, 27) Taem ol man olsem oli ded, oli no go long hel, be oli go long Gehena, we i pija blong lus olwe. (Matiu 5:29, 30) Eksampol, Jisas i talem se ol lida blong jos long taem blong hem we oli gat tu fes bambae oli go long Gehena.—Matiu 23:27-33.