Blong stap tabu i minim se yumi stap longwe long ol fasin we i no stret. Hibru tok ya we oli tanem i kam “Tabu” i kamaot long tok ya we i minim “seraot.” Taswe, samting we i tabu hem i no joen wetem samting we yumi mekem evri dei, from se hem i klin mo yumi tinghae long hem.

 God i haefala rula we i tabu we i tabu. Baebol i talem se: ‘I no gat man we i tabu olsem Jehova.’ a (1 Samuel 2:2) God i soemaot nambawan fasin blong stap tabu.

 Tok ya “tabu” i laenap wetem eni spesel samting we God i makemaot blong yumi yusum blong mekem wosip i go long hem. Eksampol, Baebol i tokbaot:

•   Ples we i tabu: Klosap long smol tri we faea i laet long hem, God i talem long Moses se: “Graon ya we yu stap stanap long hem i tabu ya!”—Eksodas 3:2-5.

•   Ol lafet we i tabu: Ol man Isrel bifo oli mekem ol bigfala lafet blong mekem wosip long Jehova, mo oli kolem ol lafet ya se: ‘tabu dei.’—Levitikas 23:37.

•   Ol samting we oli tabu: Ol samting blong God we oli yusum bifo long tempol blong Jerusalem oli kolem se “ol tabu samting.” (1 King 8:4) Ol tabu samting ya ol man oli mas gat bigfala respek long olgeta taem oli yusum, nating se oli no mekem wosip long olgeta. b

 Yes. God i talem long ol Kristin se: “Yufala i mas tabu from we mi mi tabu.” (1 Pita 1:16) I tru ol man we oli sin man oli no save kam stret gud olsem God we i tabu we i tabu. Be man we i obei long ol loa blong God hem i save kam ‘tabu, mo God i glad long hem’ (Rom 12:1) Wan man we i traehad blong stap tabu ol tok mo aksen blong hem oli klin. Hem i folem ol advaes blong Baebol blong “i mas tabu, i no mas mekem enikaen doti fasin blong seks” mo i mas ‘tabu long evri fasin’—1 Tesalonaeka 4:3; 1 Pita 1:15.

 Yes. Sipos wan man i no moa mekem samting we God i wantem, bambae God i no moa luk man ya se i tabu. Taswe buk blong Hibrus i go stret long “ol tabu brata,” i givim woning long olgeta i se: “Yufala i mas lukaot gud blong bambae i no gat wan long yufala we hat blong hem i stap kam nogud, nao hem i no moa bilif from we hem i gowe long God ya we i laef.”—Hibrus 3:1, 12.

 Giaman: Man we i no mared hem i tabu moa.

 Trutok: Taem wan Kristin i jusum blong no mared, hem i no kasem wan spesel fasin blong stap tabu long fored blong God. I tru se olgeta we oli singel oli save mekem moa long wok blong Jehova. (1 Korin 7:32-34) Be Baebol i soemaot tu se olgeta we oli mared tu oli save stap tabu. From we i gat wan long aposol blong Jisas tu we i mared hemia Pita.—Matiu 8:14; 1 Korin 9:5.