?Jisas i Luk Olsem Wanem?

PLEI

Ansa we Baebol i givim

I no gat wan long yumi we i save talem stret se Jisas i luk olsem wanem, from we Baebol i no diskraebem fes mo bodi blong hem. Hemia i soemaot se i no impoten blong save fes mo bodi blong Jisas. Be Baebol i givim sam save we i givhan long yumi blong kasem save se hem i luk olsem wanem.

Fes: Mama blong Jisas i wan woman Jiu, taswe i sua se fes mo bodi blong Jisas i mas luk olsem wan man Jiu. (Hibru 7:14) Bambae i narakaen sipos fes mo bodi blong hem i defren. Wan taem hem i wokbaot haed nomo, i aot long Galili i go long Jerusalem we i no gat man i luksave hem. (Jon 7:10, 11) Mo ol man oli no luksave hem tu, nating se hem i stap stanap klosap long ol disaepol blong hem. Hemia nao from wanem Judas Iskariot i mas soemaot Jisas long ol man we oli kam blong arestem hem.—Matiu 26:47-49.
Hea: I no posibol we Jisas i gat longfala hea, from we Baebol i talem se “taem hea blong man i longfala, hemia wan bigfala sem long hem.”—1 Korin 11:14.
Mustas: Jisas i gat mustas. Hem i bin folem loa blong ol man Jiu, we i blokem ol man blong oli no ‘katem en blong mustas blong olgeta.’ (Levitikas 19:27; Galesia 4:4) Mo tu, Baebol i tokbaot mustas blong Jisas long wan profet tok we i talemaot taem ya we bambae hem i safa.—Aesea 50:6.
Bodi: Evri samting i soemaot se bodi blong Jisas i helti. Taem hem i stap mekem minista wok blong hem, hem i wokbaot plante kilometa. (Matiu 9:35) Hem i bin klinim tempol blong ol man Jiu tu taem, i tanem ova tebol blong ol man we oli stap jenisim mane, mo wan taem hem i yusum wan wip blong ronemaot ol animol. (Luk 19:45, 46; Jon 2:14, 15) McClintock mo Strong’s Cyclopedia i talem se: “Olgeta samting we Jisas i mekem oli soemaot se bodi blong hem i strong mo i helti.”—Volume IV, pej 884.
Ekspresen long fes: Jisas i kaen mo i gat sore, mo fes blong hem i soemaot samting ya. (Matiu 11:28, 29) From samting ya, eni kaen man nomo oli kam long hem blong kasem help mo mekem olgeta oli harem gud. (Luk 5:12, 13; 7:37, 38) Ol pikinini tu oli no fraet blong kam klosap long hem.—Matiu 19:13-15; Mak 9:35-37.

Rong tingting long saed blong fes mo bodi blong Jisas

Rong tingting: Sam man oli stap agiu se Jisas i kamaot long laen blong ol man Afrika from we buk blong Revelesen i talem se hea blong hem i olsem wul mo se leg blong hem i “saen olsem bras.”—Revelesen 1:14, 15, The New Jerusalem Bible.

Trutok: Ol samting we buk blong Revelesen i tokbaot, oli olsem “ol saen” nomo. (Revelesen 1:1) Baebol i diskraebem hea mo leg blong Jisas, olsem wan saen nomo blong soemaot ol fasin blong Jisas afta we hem i laef bakegen, be i no blong diskraebem prapa hea mo leg we hem i gat taem i stap long wol. So taem Baebol i talem long Revelesen 1:14 se, ‘hed mo hea blong Jisas i olsem wul, i waet we i waet olsem sno,’ hem i pulum yumi blong komperem kala blong hea blong hem, be i no filing blong hem. Hemia i representem waes blong hem from i stap kam olfala. (Revelesen 3:14) Vas ya i no stap komperem hea blong Jisas se i strong olsem wul, be i stap komperem hea blong hem se i waet olsem sno.

Leg blong Jisas i luk “olsem gudfala kopa we i stap saen insaed long oven taem oli bonem.” (Revelesen 1:15) Mo tu, fes blong hem i “olsem san we i saen long medel dei.” (Revelesen 1:16) Mo from we i no gat wan laen blong man we kala blong skin blong olgeta i olsem we vas ya i talem, i sua se vison ya i wan saen nomo, we i soemaot Jisas we i laef bakegen we “i stap long delaet we i saen we i saen, we man i no save kam klosap long hem.”—1 Timoti 6:16.

Rong tingting: Jisas i no strong mo i wan slak man.

Trutok: Jisas i gat ol fasin we i soemaot se hem i wan man, be i no wan woman. Eksampol, taem ol man oli kam blong arestem hem, hem i no fraet nating blong talemaot hem wan long olgeta. (Jon 18:4-8) Mo tu, Jisas i gat strong bodi from we hem i mas yusum ol tul blong mekem wok blong hem olsem wan kapenta.—Mak 6:3.

?Sipos i olsem, from wanem Jisas i nidim we wan man i halpem hem blong karem pos blong hem? ?Mo from wanem hem i ded fastaem long tufala man ya we i hang klosap long hem? (Luk 23:26; Jon 19:31-33) Jes bifo we oli kilim Jisas, bodi blong hem i taed tumas. Hem i bin wekap fulnaet, from we hem i harem nogud tumas. (Luk 22:42-44) Long naet ol man Jiu oli mekem i nogud hem, mo long nekis moning ol man Rom oli nilim hem long pos. (Matiu 26:67, 68; Jon 19:1-3) Olgeta samting ya, oli mekem se hem i ded kwiktaem nomo.

Rong tingting: Oltaem Jisas i stap kwaet mo i harem nogud.

Trutok: Jisas i soemaot ol fasin blong Papa blong hem long heven, Jehova, we Baebol i tokbaot hem olsem wan “hapi God.” (1 Timoti 1:11; Jon 14:9) Mo tu, Jisas i bin talem long ol narafala, samting we oli mas mekem sipos oli wantem stap glad. (Matiu 5:3-9; Luk 11:28) Ol samting ya oli pruvum se oltaem Jisas i soemaot long fes blong hem se hem i glad.