Baebol i singaot Jisas se “Pikinini blong God.” (Jon 1:49) Tok ya “Pikinini blong God” i soemaot klia se God i mekem olgeta samting, o hem i stamba blong laef blong olgeta samting, taswe hem nao i mekem Jisas. (Ol Sam 36:9; Revelesen 4:11) Baebol i no talem se God i gat pikinini long sem fasin olsem ol man.

 Baebol i singaot ol enjel tu se ‘ol pikinini blong tru God.’ (Job 1:6, NW) Mo Baebol i talem se fas man, Adam, hem i “pikinini blong God.” (Luk 3:38) Be from we God hem wan i wokem Jisas mo i mekem hem fastaem, Baebol i tokbaot Jisas se hem i stret Pikinini blong God.

•  ?Jisas i laef long heven bifo we hem i kamdaon long wol?

•  ?Jisas i mekem wanem bifo we hem i kamdaon long wol?

 Yes. Jisas i laef fastaem olsem wan spirit long heven ale hem i kamdaon mo i bon olsem wan man long wol ya. Hem i talem se: “Mi mi aot long heven i kam.”—Jon 6:38; 8:23.

 God i wokem Jisas fastaem long ol narafala samting. Long saed blong Jisas, Baebol i se:

•   “Hem i fasbon blong olgeta samting we God i mekem.”—Kolosi 1:15.

•   “Hem i faswan long olgeta samting we God i wokem.”—Revelesen 3:14.

 Jisas i mekem profet tok blong man ya we i laef ‘longtaem bifo, bifo we bifo olgeta’ i kamtru.—Maeka 5:2, NW; Matiu 2:4-6.

 Hem i gat wan hae posisen long heven. Jisas i tokbaot posisen ya taem hem i prea se: “Papa. Yu tekem mi . . . blong mi kasem haenem we mi gat fastaem, taem wol i no stap yet.”—Jon 17:5.

 Hem i givhan long Papa blong hem blong mekem olgeta narafala samting. Jisas i wok wetem God olsem ‘nambawan man blong wok.’ (Ol Proveb 8:30, NW) Long saed blong Jisas, Baebol i se: “God i yusum hem blong mekem olgeta narafala samting long heven mo long wol.”—Kolosi 1:16.

 God i yusum Jisas blong mekem ol narafala samting. Tufala i mekem ol enjel, ol sta mo ol planet. (Revelesen 5:11) Tufala i wok tugeta, olsem wan man blong mekem plan blong haos i wok wetem man blong bildim haos. Wan i mekem plan, narawan i folem plan ya blong wokem haos.

 Hem i Tok ya. Taem Baebol i tokbaot Jisas bifo we i kamdaon long wol, hem i singaot Jisas se “Tok ya.” (Jon 1:1) Hemia i min se God i yusum Pikinini blong hem blong i givim save mo i talem long ol narafala long heven, wanem we oli mas mekem.

 Jisas i talemaot ol tok blong God long ol man long wol tu. Ating God i yusum Jisas olsem Tok ya blong talemaot long Adam mo Iv wanem we oli mas mekem long garen blong Iden. (Jenesis 2:16, 17) Maet Jisas nao i enjel ya we i lidim ol man Isrel long draeples mo voes blong hem nao we ol man Isrel oli mas lesin gud mo obei long hem.—Eksodas 23:20-23. a