Yes. Jisas i soemaot se ol man blong hem oli save go luk dokta blong kasem meresin, taem hem i talem se: “Man we i no sik, hem i no nidim dokta, be man we i sik, yes, hem i nidim dokta.” (Matiu 9:12) I tru we Baebol i no wan buk blong meresin, be hem i givim sam gudfala advaes blong lidim olgeta we oli wantem mekem God i glad.

Sam kwestin we i gud blong askem

 1. ?Mi mi kasem save long tritmen we dokta i se mi mas folem? Baebol i givim advaes se i gud blong lukaot sam moa save, i bitim we yumi “bilif long evri samting.”—Ol Proveb 14:15.

 2. ?I stret blong mi go luk wan narafala dokta, blong traem faenemaot tingting blong hem? I impoten tumas blong yu kasem “ol gudfala advaes we ol man oli givim,” speseli taem sik blong yu i bigwan tumas.—Ol Proveb 15:22.

 3. ?Tritmen we dokta i givim bambae i mekem se mi brekem loa blong Baebol we i talem se yumi “no mas kakae blad”?—Ol Wok 15:20.

 4. ?Dokta i mas mekem sam samting we i joen wetem wok blong rabis spirit, blong faenemaot no blong tekemaot sik blong mi? Baebol i agensem “ol bisnes blong posen mo kleva.” (Galesia 5:19-21) Blong faenemaot sipos tritmen i joen wetem wok blong kleva, i gud yu askem ol kwestin ya se:

•   ?Dokta ya i stap mekem wok blong kleva?

•   ?Tritmen we hem i talem se mi mas folem, i stanap long bilif ya se ol god oli kros long mi nao oli mekem mi sik? ?No se sam enemi oli yusum wok blong rabis spirit blong mekem mi mi sik?

•   ?Dokta ya i mas kilim i ded wan anamol, no i singsing long wan samting, no i mekem sam narafala samting olsem, bifo we hem i givim meresin long mi?

 5. ?Mi mi wari bitim mak long helt blong mi? Baebol i talem se: “Yufala i mas soemaot long olgeta man, we yufala i kwaet man.” (Filipae 4:5) Sipos yu soemaot se yu kwaet man, samting ya bambae i givhan long yu blong tingbaot oltaem samting we i impoten moa, hemia wok blong Jehova.—Filipae 1:10; Matiu 5:3.