Traem luk ol advaes ya we oli stanap long ol waestok blong Baebol:

1.   No fren bitim mak. Yu fren gud mo yu respektem ol man we yu wok wetem olgeta, be yu no mas fren tumas wetem olgeta, nao bae oli ting se yu glad nomo blong gat seks wetem olgeta.—Matiu 10:16; Kolosi 4:6.

2.   No werem klos we i pulum ae. Ol klos we i pulum ae i save mekem man i gat rong tingting. Baebol i talem se i gud blong werem ‘ol klos we i stret nomo, mo oli mas soemaot stret tingting.’—1 Timoti 2:9.

3.   Jusum ol gudfala fren. Sipos yu joen oltaem wetem ol fren we oli glad nomo blong gat seks wetem narafala, o oli laekem we narafala i pleplei wetem filing blong olgeta, bae ol narafala oli ting se yu tu yu olsem olgeta.—Ol Proveb 13:20.

4.   No joen long ol rabis storian. Yu aot taem yu harem se storian i tokbaot “ol toti stori, ol krangke tok, mo ol tokplei we oli no klin.”—Efesas 5:4, Tok Blong God Baebol.

5.   Yu mas gat fasin luksave. Eksampol, yu mas lukaot gud sipos oli askem yu blong wok ova taem we i no gat wan gud risen.—Ol Proveb 22:3.

6.   Yu mas strong mo tok stret. Sipos wan man i stap pulum yu blong gat seks wetem hem, yu talem stret long hem se yu no laekem nating fasin ya we hem i stap mekem. (1 Korin 14:9) Eksampol, maet yu save talem se: “Mi mi no laekem nating we yu stap tajem mi taem yu kam pas bitim mi.” Yu save raetem wan leta i go long hem blong tokbaot wanem we i hapen, samting ya i mekem yu harem olsem wanem, mo yu wantem se hem i mekem wanem. Yu talem klia long hem se yu no wantem hem i mekem olsem from we samting ya i agensem bilif blong yu.—1 Tesalonaeka 4:3-5.

7.   Askem help. Sipos man ya i stap gohed yet blong pulum yu, yu save talemaot long wan gudfala fren blong yu, wan famle, wan we yu wok wetem hem, o wan we i gat save long saed ya mo i save halpem yu. (Ol Proveb 27:9) Plante man we oli bin kasem fasin ya oli faenem se prea i givhan bigwan long olgeta. Nating se yu neva prea bifo, be i gud yu prea long Jehova blong i givhan long yu, from we hem i God ya we i stap “leftemap tingting blong man.”—2 Korin 1:3.

Fasin blong seks i stap spolem plante milian man long ples blong wok, be Baebol i save givhan.