Baebol i neva tokbaot ol daenaso. Be, hem i tokbaot se God i “mekem olgeta samting,” taswe i klia se God i wokem ol daenaso tu. a (Revelesen 4:11) Nating se Baebol i no tokbaot stret ol daenaso, be hem i tokbaot ol defdefren kaen grup blong ol anamol we maet hemia i save minim ol daenaso tu:

•   “Ol bigbigfala fis blong solwota.”—Jenesis 1:21

•   “Ol naranarafala samting we i gat laef we oli stap long graon.”—Jenesis 1:25.

•   “Ol anamol blong bus.”—Jenesis 1:25.

?Ol daenaso oli kamaot long ol narafala anamol?

 Ol bun blong ol daenaso we ol man oli faenem, oli soemaot se ol daenaso oli no kamaot long wan nara anamol olsem we evolusen i tokbaot. Samting ya i laenap wetem wanem we Baebol i talem, se God i wokem olgeta anamol. Eksampol, Ol Sam 146:6 i tokbaot se God “i mekem skae, mo graon, mo solwota, wetem olgeta samting we i stap long trifala.”

?Ol daenaso oli laef Wetaem?

 Baebol i tokbaot se God i wokem ol anamol blong solwota mo graon long namba faef mo sikis dei o long taem ya we God i wokem olgeta samting. b (Jenesis 1:20-25, 31) Taswe, hemia i save minim se ol daenaso oli bin laef longtaem lelebet long wol ya bifo.

?Behemot mo Leviatan oli ol daenaso?

 Nogat. Buk blong Job i no talemaot stret se ol anamol ya oli wanem, be plante taem oli yusum Behemot blong tokbaot hipopotamus, mo Leviatan blong tokbaot krokodael. Fasin blong ol anamol ya i stret folem wanem we ol vas ya oli tokbaot. (Job 40:15-23; 41:1, 14-17, 31) From samting ya, “Behemot” mo “Leviatan” oli no ol daenaso. God i talem long Job blong i lukluk gud long fasin blong ol anamol ya. Be long taem blong Job, ol daenaso oli lus longtaem finis.—Job 40:16; 41:8.

?Wanem i hapen long ol daenaso?

 Baebol i no tokbaot olsem wanem ol daenaso oli lus. Nating se i olsem, Baebol i talem se “from we [God] i wantem olsem,” hem i wokem olgeta samting. Taswe i klia se i gat wan risen blong God i wokem ol daenaso. (Revelesen 4:11) Taem olgeta samting ya i finis, God i tekemaot ol daenaso.