God i no mekem disasta i kamaot, be hem i tingbaot ol man we oli fesem disasta. Disasta i wan samting we Kingdom blong God bambae i finisim. Be go kasem taem ya, God i leftemap tingting blong olgeta we oli harem nogud from ol disasta.—2 Korin 1:3.

•  ?From wanem yumi save se ol disasta oli no panis we God i givim?

•  ?Ol disasta oli saen blong ol las dei?

•  ?Olsem wanem God i halpem olgeta we oli fesem ol disasta?

•  ?Baebol i save givhan long yumi blong rere from ol disasta?

•  Ol vas blong Baebol blong leftemap tingting blong olgeta we oli fesem disasta

 Baebol i tokbaot sam taem we Jehova i yusum ol samting olsem win, ren, mo graon i seksek, blong mekem jajmen blong hem i kamtru long ol man. Be hemia i defren long ol disasta we yumi luk tede.

•   Ol disasta oli kilim mo spolem enikaen man nomo. God i mekem jajmen blong hem i kamtru long ol rabis man nomo. Tingbaot taem ya we Baebol i talem se God i spolem tufala taon ya Sodom mo Gomora, be hem i sevem gudfala man ya Lot mo tufala gel blong hem. (Jenesis 19:29, 30) God i save wanem i stap long hat blong ol man long taem ya, mo hem i spolem olgeta nomo we hem i luk se oli nogud.—Jenesis 18:23-32; 1 Samuel 16:7.

•   Disasta i kam olsem nomo we i no gat woning. Taem God i yusum ol samting olsem win, wota, mo graon i seksek blong spolem ol rabis man, hem i givim woning long olgeta fastaem. Ol man we oli lesin long woning, oli stap sef.—Jenesis 7:1-5; Matiu 24:38, 39.

•   Ol man nao oli mekem se i gat plante disasta. ?From wanem yumi talem olsem? Hemia from we ol man oli stap spolem wol, mo tu, oli wokem ol haos long ol ples we graon i seksek bigwan, wota i ron, mo ol narafala disasta oli save kasem olgeta. (Revelesen 11:18) I no fol blong God we ol man oli mekem olsem.—Ol Proveb 19:3.

 Yes, ol profet tok long Baebol oli talemaot se long “en blong wol,” hemia “ol las dei,” bambae i gat ol disasta. (Matiu 24:3; 2 Timoti 3:1) Jisas i tokbaot taem blong yumi, i se: “Olbaot long wol bambae kakae i sot mo graon i seksek.” (Matiu 24:7) I no longtaem, God bambae i finisim olgeta samting we oli mekem yumi harem nogud, safa, mo ol disasta.—Revelesen 21:3, 4.

•   Ol tok blong God long Baebol i leftemap tingting blong olgeta. Baebol i soemaot klia se God i sore long yumi mo i stap tingbaot yumi taem yumi harem nogud. (Aesea 63:9; 1 Pita 5:6, 7) Mo tu, Baebol i soemaot promes blong God se wan dei bambae i no moa gat ol disasta.—Yu luk haf ya “ Ol vas blong Baebol blong leftemap tingting blong olgeta we oli fesem disasta.”

•   God i yusum ol man blong hem blong givhan long ol narafala. God i yusum ol man blong hem long wol ya blong oli mekem sem mak olsem Jisas. Profet tok i bin talemaot se Jisas bambae i mekem “ol man we tingting blong olgeta i foldaon olgeta, oli harem gud bakegen.” Sem mak long “olgeta we oli harem nogud, oli stap krae.” (Aesea 61:1, 2) Ol man blong God long wol tu oli traehad blong mekem olsem.—Jon 13:15.

   Mo tu, God i yusum ol man blong hem blong oli givim kakae, klos, mo ol narafala samting, long olgeta we oli fesem ol disasta.—Ol Wok 11:28-30; Galesia 6:10.

 Yes. I tru se Baebol i no wan buk blong tokbaot samting we yumi mas mekem blong rere from disasta, be hem i gat ol advaes we oli save givhan long yumi. Olsem:

•   Mekem wan plan blong folem long taem blong disasta. Baebol i talem se: “Man we i gat gudfala tingting i save luksave we trabol i stap kam, nao i save ronwe long hem.” (Ol Proveb 22:3) I waes blong mekem wan plan blong rere from disasta. Yu save rerem wan basket blong karem kwiktaem wetem yu taem i gat wan disasta, mo toktok wetem famle blong talem weples yufala i save mit.

•   Tingbaot laef blong yu i bitim olting blong yu. Baebol i soemaot klia se: “Taem yumi bon i kam long wol ya, yumi no karem wan samting, mo taem yumi ded, bambae yumi no karem wan samting i go wetem yumi.” (1 Timoti 6:7, 8) Yumi mas rere blong lego haos mo olting blong yumi, blong ronwe long taem blong disasta. Yumi mas tingbaot se laef blong yumi i moa impoten i bitim olting blong yumi.—Matiu 6:25.